Zechariah 13;1-9
13 “Ke usen oro,+ ẹyetịbi obube mmọn̄+ ẹnọ ufọk David ye mme andidụn̄ Jerusalem man ẹda ẹyet idiọkn̄kpọ+ ye n̄kpọ itekesịt.+
2 “Ndien ama ekem ke usen oro,” uyo Jehovah mme udịm edi emi, “nyesịbe mme enyịn̄ ndisọi n̄kpọ mfep ke isọn̄,+ owo idinyụn̄ itịghi mmọ aba; nyonyụn̄ nnam mme prọfet+ ye spirit ndek ẹbe ẹfep ke isọn̄.+
3 Ndien ama ekem edieke owo etịn̄de ntịn̄nnịm ikọ, ete esie emi okobonde enye ye eka esie emi akamande enye, ẹnyene ndidọhọ enye ẹte, ‘Afo ududụhe uwem, koro afo osude nsu ke enyịn̄ Jehovah.’ Ndien ete esie emi okobonde enye ye eka esie emi akamande enye, ẹnyene ndikịm enye ke ntak emi enye eketịn̄de ntịn̄nnịm ikọ.+
4 “Ndien ama ekem ke usen oro, mme prọfet ẹyekop bụt+ ẹban̄a n̄kukụt mmọ ke ini mmọ ẹtịn̄de ntịn̄nnịm ikọ; mmọ idinyụn̄ isịneke idet idet ọfọn̄+ prọfet man ẹbian̄a abian̄a.
5 Ndien enye ọyọdọhọ ete, ‘Ami ndịghe prọfet. Ami ndi ofụn̄isọn̄, koro owo ekedepde mi toto ke uyen.’
6 Ndien owo oyobụp enye ete, ‘Nso unan edi emi ke idem fo?’ Ndien enye ọyọbọrọ ete, ‘Edi unan oro n̄kadade ke ini ẹkemiade mi ke ufọk mbon oro ẹnen̄erede ẹma mi.’”
7 “O akan̄kan̄, demede n̄wana ye ekpemerọn̄+ mi, nyụn̄ n̄wana ye owo emi edide nsan̄a mi,”+ uyo Jehovah mme udịm edi emi. “Wot ekpemerọn̄,+ nyụn̄ yak otuerọn̄ asuana;+ nyafiak n̄wọn̄ọde ubọk mi ndori mbon oro mîdịghe n̄kpọ.”+
8 Jehovah ọdọhọ ete, “Ndien ama ekem ẹyesịbe mbak iba ke ofụri isọn̄ ẹwot;+ ẹyeyak ọyọhọ mbak ita osụhọ ke esịt.+
9 Ndien nyada ọyọhọ mbak ita ndisịn ke ikan̄;+ nyonyụn̄ nnam mmọ ẹsana kpa nte ẹnamde silver asana,+ nnyụn̄ ndụn̄ọde mmọ kpa nte ẹdụn̄ọrede gold.+ Enye oyokot enyịn̄ mi, ndien ami nyeyere enye.+ Nyọdọhọ nte, ‘Enye edi ikọt mi,’+ enye oyonyụn̄ ọdọhọ ete, ‘Jehovah edi Abasi mi.’”+
