Ke ini n̄kpọ anamde esịt etịmede fi, mfre fo esinam esịt fo ọtọn̄ọ nditịm usọp usọp, anam okot ibifịk usọp usọp, ọnọ iyịp aka mme ebiet oro idem fo enen̄erede oyom, onyụn̄ anam obụkidem fo okpụp man udûsọp uda unan. Etibọp enyịn itat, idem fo eben̄e idem ọnọ se iditịbede. Ke ini n̄kpọ oro akanamde esịt etịmede fi ebede, idem esifiak ana fi sụn̄.

Nte idem nnyịn etiede esinam ikeme ndiyọ ke ini inyenede mfịna m̀mê ke ini n̄kpọ edịghede nnyịn uwem. Ke ini emi etịbede, mfre nnyịn esibem iso ọtọn̄ọ utom. Enye esinam ikeme ndisọsọp nnam n̄kpọ mban̄a se itịbede oro. Ke uwụtn̄kpọ, ke ini iwetde udomo, ibrede mbre mbuba, m̀mê ibọrọde mbụme man ẹda nnyịn ke utom, ekpri editịmede esịt ekeme ndinam isịn idem inam n̄kpọ ọfọn akan nte ikekerede. Emi ọwọrọ ke idịghe kpukpru editịmede esịt ọdiọk.

Edi edieke esịt akade iso etịmede owo idiọk idiọk, emi ekeme ndinam enye esisọp iyatesịt, esisọp efre n̄kpọ, okûkere n̄kpọ ọfọn, mîdịghe anam enye ọdọn̄ọ. Enye onyụn̄ ekeme nditọn̄ọ ndinam n̄kpọ ye mme owo ke usụn̄ emi mîfọnke onyụn̄ anam mme n̄kpọ oro mîfọnke owo ke idem, utọ nte ndin̄wọn̄ mmịn mbe ubọk, ndidia udia ke en̄weme, ndin̄wọn̄ sika, ye ndida n̄kpọsọn̄ ibọk ke idiọk usụn̄. Editịmede esịt akam ekeme ndinam owo esifụhọ kpukpru ini m̀mê ekere ndiwot idem.

Sia owo ye owo mîdịghe ukem, se editịmede esịt esinamde owo kiet esikpụhọde ye se enye anamde owo en̄wen. Edi editịmede esịt esinam mme owo ẹdọn̄ọ nsio nsio udọn̄ọ, onyụn̄ ekeme nditịmede kpukpru n̄kpọ ke idem owo.