NSIO NSIO ndiye itie ẹyọyọhọ Spain. Mme owo ẹnyụn̄ ẹto nsio nsio idụt ẹdidụn̄ mi. Ẹtọ wheat, vine, ye olive ke ediwak itie ke Spain. Mmọn̄ emi abaharede Spain ye Africa edi n̄kpọ nte itiat usụkkiet kpọt.

Ediwak owo—esịnede mbon Phoenicia, mbon Greece, ye mbon Carthage—ẹma ẹwọrọ ẹdidụn̄ ke idụt emi. Ke ini mbon Rome ẹkekande obio emi ke n̄kpọ nte isua 2,300 emi ekebede, mmọ ẹkekot enye Hispania. Nte ini akakade, mbon Visigoth ye mbon Moor ẹma ẹdidụn̄ ke obio emi, ndien ẹsụk ẹnanam n̄kpọ ke Spain nte mmọ ẹkesinamde.

Ke 2015, se ibede owo miliọn 68 ẹma ẹka ẹkese Spain. Ediwak owo ẹsidi idụt emi man ẹdiwebe eyo, ẹse ndiye esụk, ndiye utomusọ, mme n̄kpọeset, ye ikpọ ndiye ufọk.  Ediwak isenowo ẹsima udia Spain, utọ nte udia emi ẹdade iyak, n̄kọp, ye ikpọ obu ẹnam, unam edi emi ẹfọpde-fọp, stew, ye mme ikọn̄udia emi ẹdade aran olive ẹtem. Mme owo ke nsio nsio itie ke ererimbot ẹdiọn̄ọ udia mbon Spain emi ẹkotde paella ye tapas.

Mbon Spain ẹsitie ufan ufan ẹnyụn̄ ẹnem itie. Ediwak mmọ ẹdọhọ ke idi mbon Catholic, edi n̄kpata owo ifan̄ kpọt ẹsika Mass. Ke mme isua ndondo emi, mme owo ẹto Africa, Asia, ye Latin America ẹwọrọ ẹdidụn̄ ke Spain. Ediwak mmọ ẹsima ndineme n̄kpọ mban̄a nte mmọ ẹsikponode Abasi. Mme Ntiense Jehovah ẹsineme ikọ Abasi ye mmọ ẹnyụn̄ ẹn̄wam mmọ ẹdiọn̄ọ se Bible ekpepde.

Ke 2015, se ibede Mme Ntiense Jehovah 10,500 ẹma ẹbọp ẹnyụn̄ ẹdiọn̄ Ufọkmbono Obio Ubọn̄ 70 emi mmọ ẹsitiede ẹkpono Abasi. Ukara ẹsinọ isọn̄ ẹda ẹbọp ndusụk Ufọkmbono Obio Ubọn̄ emi. Ke adianade ye usem Spanish, Mme Ntiense Jehovah ẹsinịm ikọ Abasi mmọ ke se ibede usem 30 man ẹn̄wam mbon emi ẹtode idụt en̄wen ẹdidụn̄ ke Spain. Ke 2016, se ibede owo 186,000 ẹma ẹdụk akpan mbono emi Mme Ntiense Jehovah ẹkenịmde man ẹda ẹti n̄kpa Jesus Christ.