Ediwak owo imaha ndikpono Abasi sia mmọ ẹkere ke enye anam nnyịn ibọ ufen.

Ediwak ikpọ owo ufọkabasi ẹsikpep mme owo ẹte ke Abasi anam ibọ ufen, mîdịghe ẹtịn̄ n̄kpọ emi anamde etie nte ke Abasi anam ibọ ufen. Ke uwụtn̄kpọ, ndusụk mmọ ẹdọhọ ke:

• Abasi esida oto-obot afanikọn̄ amia nnyịn ufen.

• Nditọwọn̄ ẹsikpa sia Abasi oyom mmọ ẹdidi angel ke heaven.

• Abasi esida ọnọ ndusụk idụt ke ekọn̄, ndien ekọn̄ anam ata ediwak owo ẹbọ ufen.

Okûdi se ikpọ owo ufọkabasi ẹtịn̄de emi ẹban̄a Abasi inenke? Edieke mînenke, ndi emekere ke Abasi enyịme se mmọ ẹnamde oro?

Idịghe Abasi anam nnyịn ibọ ufen.

Se Bible etịn̄de aban̄a Abasi anam ifiọk ke idịghe Abasi anam ibọ ufen. Kop ndusụk se Bible etịn̄de mi:

‘Kpukpru usụn̄ Abasi ẹnen. Enye edi eti ye edinen.’—DEUTERONOMY 32:4.

“Nsa-o ata Abasi ndinam se idiọkde, Ata Ọkpọsọn̄ ndinyụn̄ nnam se mînenke!”—JOB 34:10.

“Ata Ọkpọsọn̄ . . . ikwan̄ake ikpe.”—JOB 34:12.

Abasi imaha ufọkabasi emi ẹkpepde nsu ẹban̄a enye.

Emi esịne mme ufọkabasi oro ẹdọhọde ke Abasi anam ibọ ufen ye mbon oro ẹnyịmede ẹn̄wana ekọn̄ ẹnyụn̄ ẹnam afai.

“Mme prọfet ẹtịn̄ nsunsu ntịn̄nnịm ikọ ke enyịn̄ mi [Abasi]. Ami ndọn̄ke mmọ nnyụn̄ n̄wụkke mmọ nnyụn̄ ntịn̄ke ikọ nnọ mmọ. Nsunsu n̄kukụt ye . . . abian̄a esịt mmọ ke mmọ ẹda ẹtịn̄ ntịn̄nnịm ikọ ẹnọ mbufo.”—JEREMIAH 14:14.

Jesus ama asua ọnọ mbon emi mîkokponoke Abasi ke nnennen usụn̄.

“Idịghe kpukpru mbon oro ẹkotde mi, ‘Ọbọn̄, Ọbọn̄,’ ẹdidụk obio ubọn̄ heaven, edi edi enye emi anamde uduak Ete mi emi odude ke heaven edidụk. Ediwak owo ẹyedọhọ mi ke usen oro ẹte, ‘Ọbọn̄, Ọbọn̄, nte nnyịn iketịn̄ke nte prọfet ke enyịn̄ fo, inyụn̄ idaha enyịn̄ fo ibịn mme demon, inyụn̄ idaha enyịn̄ fo inam ediwak utom odudu?’ Ndien adan̄aoro nyọdọhọ mmọ nte: Akananam ndiọn̄ọke mbufo! Ẹdian̄ade mi ke idem, mbufo mme abiatibet.”—MATTHEW 7:21-23.