5 Ndi Ini Oyodu Emi Nnyịn Mîdibọhọ Ufen Aba?
Ntak Emi Ọfọnde Idiọn̄ọ
Edieke inịmde ke ufen eyetre, uwem ididorokede nnyịn, iyonyụn̄ ikpere Abasi.
Kere Ise
Ediwak owo ẹkpema ndinam ufen etre, edi ikemeke. Se nsio nsio n̄kpọ emi ẹsinamde mmọ ẹkûkeme mi:
Kpa ye oro ntaifiọk ẹsion̄ode nsio nsio ibọk ẹdi . . .
-
Udọn̄ọ esịt osụk owot mme owo akan n̄kpọ en̄wen ekededi.
-
Kansa esiwot mme owo ke miliọn ke miliọn kpukpru isua.
-
Dọkta emi ekerede David Bloom ekewet ke n̄wed kiet ete ke mme owo ke nsio nsio itie ke ererimbot ke ẹdọn̄ọ mbufa udọn̄ọ ye mme udọn̄ọ emi ẹkesidude ke eset.
Kpa ye oro ndusụk idụt ẹnyenede ediwak okụk . . .
-
Kpukpru isua, nditọwọn̄ ẹsikpan̄a ke miliọn ke miliọn, ndien emi esiwak nditịbe ke itie emi mme ubuene ẹwakde.
-
Ata ediwak miliọn owo inyeneke eti itie uken̄idem.
-
Ediwak miliọn owo inyeneke eti mmọn̄.
Kpa ye oro edide ediwak owo mfịn ẹdiọn̄ọ nte ẹkpenamde n̄kpọ ye mme owo . . .
-
Esop Edidiana Mme Idụt ẹdọhọ ke ẹsidịbe ẹmen mme owo ke ediwak idụt ẹka itie en̄wen man ẹkesan̄a akpara mîdịghe man ẹkedi ifịn. Ndien ke ukara imụmke mbon emi ẹnamde utọ n̄kpọ emi sia mmọ idiọn̄ọke ke utọ n̄kpọ emi ke aka iso mîdịghe ikemeke ndikọbi mmọ.
N̄KPỌ EN̄WEN DO
Se vidio oro Nso Idi Obio Ubọn̄ Abasi? ke jw.org/efi.
Se Bible Ọdọhọde
Abasi ekere aban̄a nnyịn.
Esibiak enye ke ini nnyịn ibọde ufen.
“Koro [Abasi] mîsịnke ukụt owo ukụt ke ndek mînyụn̄ isuaha ukụt esie; inyụn̄ idịpke enye iso esie, enye onyụn̄ okop ke ini enye esemede ọnọ enye oyom un̄wam.”—PSALM 22:24.
“[Ẹtop] kpukpru editịmede esịt mbufo ẹdori enye ke idem, koro enye ekerede aban̄a mbufo.”—1 PETER 5:7.
Mme owo idibọhọ ufen ke nsinsi.
Bible ọdọhọ ke Abasi ayanam se enye ọn̄wọn̄ọde ndinam nnọ nnyịn.
“Abasi . . . ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba.”—EDIYARADE 21:3, 4.
Abasi eyetre mme n̄kpọ emi ẹnamde mme owo ẹbọ ufen.
Enye edida Obio Ubọn̄ esie inam emi. Bible ọdọhọ ke Obio Ubọn̄ Abasi edi ata ukara.
“Abasi enyọn̄ oyowụk obio ubọn̄ eke owo mîdisoboke ifep tutu amama. Ndien idikpọn̄ke obio ubọn̄ oro inọ mbio efen. . . . Enye ayada ke nsinsi.”—DANIEL 2:44.
