Edi ndusụk n̄wan ye ebe ẹyak fon adia mmọ idem tutu mmọ . . .

• inyeneke aba ini idu ye kiet eken.

• ẹsimen utom ẹnyọn̄ ẹdi ufọk ẹdinam.

• ẹsinyụn̄ ẹdịp kiet eken n̄kpọ mîdịghe ẹdịbe ẹnam se mîfọnke.

INI ẸDUDE KIET

Ebe kiet emi ekerede Michael ọdọhọ ete: “Ndusụk ini, ami ye n̄wan mi imesidu kiet edi enye inọhọ mi iso; ke efịk fon, ọdọhọ ke imọ ikenyeneke ini ise m̀mê ẹnọ imọ etop, ke idahaoro ke inyụn̄ inyene ini.” Ebe en̄wen emi ekerede Jonathan ọdọhọ ke emi ekeme ndinam ebe ye n̄wan ẹdu kiet, edi etie nte idụhe.

KERE ISE: Ndi emesiwak ndikpọn̄ nneme emi ekenemede ye n̄wan m̀mê ebe fo n̄kọbọrọ owo emi okotde fi ke fon m̀mê ọnọde fi etop?—EPHESUS 5:33.

UTOM

Utom ndusụk owo esinam ẹkot mmọ mîdịghe ẹnọ mmọ etop ini ekededi, ọkpọkọm ufọt okoneyo. Edi ndusụk mbon emi mînamke utọ utom emi ẹsimen utom ẹdinam ke ufọk. Ebe kiet emi ekerede Lee ọdọhọ ete: “Ndusụk ini, ẹsikot mi mîdịghe ẹnọ mi etop ẹban̄a utom ke ini n̄kosiode nnịm ndidu ye n̄wan mi. Esisọn̄ nditre ndibọrọ.” N̄wan kiet emi ekerede Joy ọdọhọ ete: “Nsitie ke ufọk nnam utom, ntre ndusụk ini nsidiọn̄ọke ini utom asuanade. Esisọn̄ ndidaha n̄kanam n̄kpọ en̄wen.”

KERE ISE: Ndi emesinen̄ede akpan̄ utọn̄ ọnọ n̄wan m̀mê ebe fo ke ini enye enemede nneme ye afo?—LUKE 8:18.

NDINAM AKPANIKỌ

Ediwak owo ẹdọhọ ke imọtọhọ ye n̄wan m̀mê ebe mmimọ akpa ke ntak se enye ekesịnde ke Intanet. Ndusụk owo ẹkam ẹdọhọ ke imesidịbe isịn n̄kpọ ke Intanet emi mmimọ mîyomke ebe m̀mê n̄wan mmimọ ọdiọn̄ọ.

Ntak edi oro ediwak owo ẹdọhọde ke Intanet ekeme ndibiat ndọ, onyụn̄ akam ekeme ndinam owo esịn efịbe. Ikpaha nnyịn idem nte mme ekpeibet ẹdọhọde ke Intanet anam ediwak owo ẹdian̄ade ndọ.

KERE ISE: Ndi emesidịp nneme emi ekenemede ye n̄wan m̀mê erenowo en̄wen man n̄wan m̀mê ebe fo edikụt?—MME N̄KE 4:23.

DIỌN̄Ọ SE IDIDE AKPAN N̄KPỌ

Kpa nte idem mîsisọn̄ke owo emi mîdiaha udia, kpasụk ntre n̄ko, ebe ye n̄wan emi mîsinyeneke ini inọ kiet eken idikopke inem ndọ mmọ.—Ephesus 5:28, 29.

Ẹmek se ẹkpenamde ke otu emi, mîdịghe ẹwet se mbufo ẹkpenamde man fon idibiat ndọ mbufo.

• Iyesitie kiet idia udia ọkpọkọm ini kiet ke usen

• Inịm ini emi nnyịn mîdisitụkke fon

• Isio mbubreyo kiet inịm emi nnyịn mbiba kpọt iditiede ineme nneme, mîdịghe isio usen inịm itie idia uwem

• Inịme fon nnyịn okoneyo, inyụn̄ inịmke enye ikpere idem ke ini idede idap

• Isio minit 15 inịm kpukpru usen isida ineme nneme inyụn̄ itụkke fon ini oro

• Inịm ini emi nnyịn mîdidụkke Intanet