SE BIBLE ETỊN̄DE ABAN̄A
Ekọn̄
Ke eset, Jehovah Abasi ama enyịme nditọ Israel ẹsin̄wana ekọn̄. Ndi emi ọwọrọ ke Abasi enyịme mme owo ẹn̄wana ekọn̄ mfịn?
Ntak emi nditọ Israel ẹkesin̄wanade ekọn̄?
SE NDUSỤK OWO ẸDỌHỌDE
Abasi nditọ Israel ama esima ẹn̄wana ekọn̄ man ẹduọk iyịp.
SE BIBLE ỌDỌHỌDE
Mme idụt oro nditọ Israel ẹkekande ke ekọn̄ ẹma ẹsinam afai ẹnyụn̄ ẹdu oburobụt uwem. Mmọ ẹma ẹsidan̄ ye unam, ẹdan̄ ye iman mmọ, ẹnyụn̄ ẹda nditọ mmọ ẹnam uwa. Abasi ama ọnọ mmọ ediwak isua ndikpụhọde, edi mmọ ikamaha. Ntre, Abasi ama ọdọhọ nditọ Israel ete: ‘Mme idụt emi ami mbịnde mfep ke iso fo ẹma ẹsabade idemmọ ke mme n̄kpọ emi.’—Leviticus 18:21-25; Jeremiah 7:31.
“Idiọkido mme idụt emi esịn Jehovah Abasi fo ebịn mmọ efep ke iso fo.” —Deuteronomy 9:5.
Ndi enyene idụt emi Abasi esidade ọnọ ke ini ekọn̄?
EKEME NDIDI EMESIKỤT
Ke ini idụt iba ẹn̄wanade ekọn̄, ikpọ mbon ufọkabasi mmọ ẹsibọn̄ akam ẹte Abasi anam mmimọ ikan sia mmọ ẹsikere ke Abasi ada ye mmimọ. N̄wed oro ẹkotde The Causes of War ọdọhọ ke ufọkabasi ẹsinyene ubọk ke kpukpru ekọn̄ oro ẹn̄wanade.
SE BIBLE ỌDỌHỌDE
Abasi idọhọke mme Christian ẹn̄wana ye mme asua mmọ. Apostle Paul ekewet leta ọnọ mme Christian ete: “Edieke usụn̄ odude, adan̄a nte mbufo ẹkekeme, ẹtie ke emem ye kpukpru owo. Ẹkûsio usiene ẹnọ idem mbufo.”—Rome 12:18, 19.
Jesus ikọdọhọke mbet esie ẹn̄wana ekọn̄, enye akakam ọdọhọ mmọ ete: “Ẹka iso ẹma mme asua mbufo ẹnyụn̄ ẹbọn̄ akam ẹyom ufọn mmọ eke ẹkọbọde mbufo; man mbufo ẹkpedi nditọ Ete mbufo emi odude ke heaven.” (Matthew 5:44, 45) Ọkpọkọm idụt oro mme Christian ẹdụn̄de ẹka ndin̄wana ye idụt en̄wen, mmọ isitieneke ika sia mmọ ‘idịghe ubak ererimbot.’ (John 15:19) Edieke Abasi ọdọhọde ikọt esie ẹma mme asua mmọ, ẹkûnyụn̄ ẹsịn idem ke en̄wan ererimbot emi, enye akpanam didie ada ọnọ n̄kan̄ kiet ke ini ekọn̄?
“Obio ubọn̄ mi idịghe ubak ererimbot emi. Edieke obio ubọn̄ mi ekpedide ubak ererimbot emi, mme asan̄autom mi ẹkpen̄wana mbak ẹdiyak mi ẹsịn mme Jew ke ubọk. Edi, obio ubọn̄ mi itoho ebiet emi.”—John 18:36.
Ndi enyene ini emi owo mîdin̄wanake aba ekọn̄?
SE NDUSỤK OWO ẸDỌHỌDE
Ekọn̄ iditreke tutu amama. N̄wed oro ẹkotde War and Power in the 21st Century ọdọhọ ke idụhe ini emi emem edidude ke ofụri isọn̄, ke ẹdisụk in̄wan̄wana ekọn̄ ke ini iso.
SE BIBLE ỌDỌHỌDE
Ekọn̄ ididụhe ke Obio Ubọn̄ Abasi sia ididọn̄ke owo ndomokiet ndin̄wana ekọn̄ ini oro. Ibịghike, Abasi ayabiat kpukpru n̄kpọekọn̄ efep onyụn̄ ekpep mme owo ndidu ke emem. Bible ọdọhọ ke Abasi “eyebiere ikpe ke otu ediwak owo, onyụn̄ enen̄ede mme n̄kpọ ọnọ n̄kpọsọn̄ idụt ke anyan ebiet. Ndien mmọ ẹyeda akan̄kan̄ mmọ ẹdom n̄kpọ ufụn̄isọn̄ ẹnyụn̄ ẹda eduat mmọ ẹdom ikwa udiọn̄ eto. Idụt idimenke akan̄kan̄ itiene idụt, mmọ idinyụn̄ ikpepke aba ekọn̄.”—Micah 4:3.
Bible ọdọhọ ke ekọn̄ ididụhe ke Obio Ubọn̄ Abasi sia idụhe ukara emi ẹdin̄wanade iyom ufọn idụt mmọ, mme owo idisịnke ntịme ke ntak emi mmọ mîmaha ibet emi ukara ẹnịmde, owo idinyụn̄ isarike owo ke ntak ebiet emi enye otode. Abasi ọn̄wọn̄ọ ete: “Mmọ idinamke ibak, idinyụn̄ ibiatke n̄kpọ . . . koro ifiọk Jehovah ọyọyọhọ isọn̄ kpa nte mmọn̄ ofụkde inyan̄.”—Isaiah 11:9.
“Enye amanam ekọn̄ etre tutu esịm utịt isọn̄. Obụn̄ utịgha onyụn̄ okpok eduat n̄ken̄e n̄ken̄e; ọfọp mme chariot ekọn̄ ke ikan̄.”—Psalm 46:9.
Ekeme Ndidi Ayama Mmọ Emi N̄ko
ENYỌN̄-UKPEME
Nte Abasi Ekesede Ekọn̄ ke Eyo Nditọ Israel
Enyene n̄kpọ ita oro anamde ekọn̄ emi Abasi enyịmede okpụhọde ye mme ekọn̄ eken.
BIBLE EKEME NDIBỌRỌ MBỤME FO
Nso Idi Ekọn̄ Armageddon?
Ikọ oro Armageddon odu itie kiet kpọt ke Bible, edi ẹtịn̄ n̄kpọ ẹban̄a ekọn̄ emi ke ofụri Bible.
MBỤME EMI ẸSIWAKDE NDIBỤP
Ntak Emi Mme Ntiense Jehovah Mîsin̄wanake Ekọn̄?
Ofụri ererimbot ẹdiọn̄ọ ke Mme Ntiense Jehovah isin̄wanake ekọn̄. Se ntak emi nnyịn mîsin̄wanake ekọn̄.
