Jehovah ‘Ekere Aban̄a Fi’
NTAK emi afo ekpenịmde ke Jehovah enen̄ede ekere aban̄a fi? Koro Bible ọdọhọ ke Jehovah ekere aban̄a fi. Akpa Peter 5:7 ọdọhọ ete: ‘Top kpukpru editịmede esịt fo dori enye ke idem, koro enye ekere aban̄a fi.’ Edi, nso iwụt ke Jehovah Abasi ekere aban̄a fi?
ABASI ỌNỌ NNYỊN MME N̄KPỌ EMI IDADE IDU UWEM
Jehovah . . .ọfọn ido onyụn̄ ọnọ owo n̄kpọ
Abasi enyene nti edu emi afo akpamade ata akpan ufan fo enyene. Mme owo ẹsisọp ndidian idem ye owo emi ọfọnde ido ye mmọ onyụn̄ ọnọde mmọ n̄kpọ. Afo emesikụt nte Jehovah ọfọnde ido ye nnyịn onyụn̄ ọnọde nnyịn n̄kpọ kpukpru usen. Ke uwụtn̄kpọ: ‘Enye esinam utịn esie asiaha ọnọ mme idiọkowo ye nti owo onyụn̄ anam edịm edep ọnọ ndinen owo ye mme anam ukwan̄ido.’ (Matt. 5:45) Nso ke utịn ye edịm ẹsinam ẹnọ nnyịn? Abasi esida utịn ye edịm anam nnyịn inyene ‘udia barasuene onyụn̄ anam esịt nnyịn ọyọhọ ye idatesịt.’ (Utom 14:17) Jehovah anam isọn̄ ọfọn ọnọ nnyịn man ikeme ndinyene kpukpru se idiade. Iwakke n̄kpọ emi esinemde nnyịn nte ndidia eti udia.
Edi, ntak emi ata ediwak owo mîsinyeneke udia idia? Koro mme andikara ẹyom odudu ye okụk, ikereke iban̄a mme owo. Jehovah ọmọn̄ ọsọp ndida ukara Obio Ubọn̄ heaven emi Eyen esie edide Edidem nsobo kpukpru ukara owo emi ẹkerede ẹban̄a idemmọ ikpọn̄ mi. Kpukpru owo ẹyenyene se ẹdiade ini oro. Edi mbemiso ini oro, enye aka iso ndinọ ikọt esie se mmọ ẹdade ẹdu uwem. (Ps. 37:25) Ndi emi iwụtke ke enye ekere aban̄a nnyịn?
JEHOVAH ESINYENE INI ỌNỌ NNYỊN
Jehovah . . .esinyene ini ọnọ nnyịn
Eti ufan isidaha kpukpru ini esie inam n̄kpọ inọ idemesie kpọt. Enye esida ini eneme nneme ye ufan esie. Eti ufan esinen̄ede akpan̄ utọn̄ ke ini ufan esie etịn̄de mfịna esie ọnọ enye. Ndi Jehovah esikpan̄ utọn̄ ntem ọnọ nnyịn? Ih, esikpan̄. Enye esikam oyoyom nnyịn ibọn̄ akam inọ imọ. Oro anam Bible ọdọhọ nnyịn ‘ikọbọ ke akam’ ikûnyụn̄ ‘idop ndibọn̄ akam.’—Rome 12:12; 1 Thess. 5:17.
Ndi Jehovah esinyene ini akpan̄ utọn̄ ọnọ akam oro ẹbọn̄de ebịghi? Bible ọbọrọ mbụme emi. Ke ini Jesus okoyomde ndimek mme apostle esie, enye ama “ada ofụri okoneyo ọbọn̄ akam ọnọ Abasi.” (Luke 6:12) Ekeme ndidi Jesus ama asiak mbet esie kiet kiet ke enyịn̄, ekere aban̄a nti edu mmọ ye mmeme mmọ, ekem ekpe Ete esie ubọk ete an̄wam imọ ifiọk eke ikpemekde ke otu mmọ. Mbemiso eyo ekesierede, Jesus ama emek mbon oro ẹkenen̄erede ẹdot ndidi mme apostle esie. Sia Jehovah edide “Andikop akam,” esinenem enye ndikop akam emi ibọn̄de ke ofụri esịt. (Ps. 65:2) Idem ọkpọkọm owo ada ediwak hour ọbọn̄ akam aban̄a n̄kpọ emi afịnade enye, Jehovah osụk enyenyene ini akpan̄ utọn̄ okop.
ABASI ESIMA NDIFEN NNỌ OWO
Jehovah . . .esifen ọnọ nnyịn
Ndusụk ini, esisọn̄ ndusụk owo ndikam mfen nnọ ata akpan ufan mmọ. Ndusụk owo emi ẹkedide ufan ẹbịghi ẹsidian̄ade ke ntak emi mînyịmeke ndifen nnọ kiet eken. Jehovah itiehe ntem. Bible ọdọhọ nnyịn ikpe enye ubọk ke ofụri esịt, “koro enye eyefen ke akamba usụn̄,” oro edi, eyefen ọnọ nnyịn ofụri ofụri. (Isa. 55:6, 7) Nso isinam Abasi efen ọnọ nnyịn ofụri ofụri?
Enye esinam emi sia enye enen̄erede ama nnyịn. Enye ama nnyịn tutu enye ọnọ Jesus Eyen esie edikpa man afak nnyịn osio ke idiọkn̄kpọ onyụn̄ anam nnyịn ibọhọ ufen idiọkn̄kpọ. (John 3:16) Edi, idịghe n̄kukụre se ufak Christ anamde edi emi. Enye anam Abasi efen ọnọ mbon emi enye amade. Apostle John ọkọdọhọ ete: “Edieke nnyịn iyararede mme idiọkn̄kpọ nnyịn, enye edi anam-akpanikọ onyụn̄ enen, ntre enye eyefen mme idiọkn̄kpọ nnyịn.” (1 John 1:9) Sia Jehovah esifende ọnọ nnyịn, imekeme ndika iso ndi ufan esie ke nsinsi. Ndi Abasi ndisifen nnọ owo iwụtke ke enye enen̄ede ekere aban̄a nnyịn?
ENYE AYAN̄WAM FI KE INI AFANIKỌN̄
Jehovah . . .esin̄wam nnyịn ke ini afanikọn̄
Ata ufan esin̄wam ufan esie ke ini afanikọn̄. Ndi Jehovah esinam ntem n̄ko? Bible ọdọhọ ete: “[Asan̄autom Abasi] ọkpọdọduọ, idinyanakede ina, koro Jehovah omụmde enye ubọk akama.” (Ps. 37:24) Jehovah esin̄wam mme asan̄autom esie ke nsio nsio usụn̄. Se nte enye akan̄wamde ekpri eyenete an̄wan kiet emi odude ke St. Croix ke isuo Caribbean.
Ekpri eyenete an̄wan emi isimaha ndikọm ọfọn̄ etakubom ke ntak se enye ekpepde ke Bible; emi ama anam nditọ ufọkn̄wed mmọ ẹsifịna enye uwem. Ke enye ama ọkọbọn̄ akam ọnọ Jehovah ete an̄wam imọ, enye ama ebiere ndinam mmọ ẹdiọn̄ọ ntak emi imọ mîsikọmke ọfọn̄ etakubom. Isan̄ efen oro ẹkedọhọde enye etịn̄ ikọ ọnọ nditọ ubet ukpepn̄kpọ mmọ, enye ama ebiere nditịn̄ n̄kpọ mban̄a ọfọn̄ etakubom. Enye ama ada mbụk Shadrach, Meshach, ye Abednego ke N̄wed Mi eke Mme Mbụk Bible owụt mmọ ntak emi imọ mîsikọmke ọfọn̄ etakubom. Enye ọkọdọhọ ete: “Jehovah ama anyan̄a nditọ Hebrew ita oro ke ntak emi mmọ mîkatuakke ibuot inọ edisọi mbiet.” Ekem enye ama obụp m̀mê mmọ ẹkpema ndinyene n̄wed oro. Owo 11 ke otu mmọ ẹma ẹdọhọ ke imoyom. N̄kaiferi emi ama enen̄ede okop inemesịt sia enye ama ọdiọn̄ọ ke Jehovah ọkọnọ imọ uko ye ọniọn̄ ndineme utọ ibuotikọ oro ye mmọ.
Edieke etiede fi nte ke Jehovah ikereke iban̄a fi, kot nyụn̄ tie kere mme utọ itie N̄wed Abasi nte, Psalm 34:17-19; 55:22; ye 145:18, 19. Dọhọ nditọete oro ẹbịghide ke esop ẹtịn̄ nte Jehovah esede aban̄a mmọ. Bọn̄ akam nọ Jehovah ini ekededi oro oyomde enye an̄wam fi. Ke ini Jehovah an̄wamde fi, oyokụt ke enye ‘ekere aban̄a fi.’