Ndi ama etịn̄ enyịn okot mme Enyọn̄-Ukpeme ndondo emi? Ọfọn, se m̀mê emekeme ndibọrọ mme mbụme oro ẹtienede mi:

Ntak emi Jehovah ekenyịmede nditọ Israel ẹn̄wana ekọn̄?

Jehovah edi Abasi ima. Edi ndusụk ini, enye ama esiyak nditọ Israel ẹn̄wana ekọn̄ man ẹkûka iso ẹfịk mmọ. Abasi kpọt ekesibiere m̀mê mmanie ẹdin̄wana ekọn̄ ye ini oro mmọ ẹdin̄wanade ekọn̄.—w15 11/1, p. 4-5.

Mme akpan n̄kpọ ewe ke mme ete ye eka ẹkeme ndinam man ẹkpep nditọ mmọ ẹnam n̄kpọ Jehovah?

Enen̄ede oyom mme ete ye eka ẹma nditọ mmọ ẹnyụn̄ ẹnanam ẹwụt ke imama mmọ. Oyom mme ete ye eka ẹnyene ọniọn̄ n̄ko man mmọ ẹtịm ẹfiọk nditọ mmọ.—w15 11/15, p. 9-11.

Ntak emi mînenke ndidọhọ ke pope ada itie apostle Peter?

Matthew 16:17, 18 idọhọke ke apostle Peter edidi ibuot esop Christian. Bible owụt ke utu ke Peter ndidi ibuot esop Christian, ke Jesus edidi itiat inụk esop Christian. (1 Pet. 2:4-8) —w15 12/1, p. 12-14.

Nso ke ikpekere ke ini iyomde nditịn̄ ikọ?

Edieke iyomde nditịn̄ ikọ emi enyenede inem, ana ikere iban̄a (1) ini oro ikpetịn̄de ikọ (Eccl. 3:7), (2) se ikpetịn̄de (N̄ke 12:18), ye (3) nte ikpetịn̄de ikọ (N̄ke 25:15).—w15 12/15, p. 19-22.

Nso ke owo akpanikọ mîdinamke?

Mme ata Christian isisụhu nsu, isinyụn̄ idọkke edidọk. Mmọ isitịn̄ke ikọ emi ekemede ndibiat mbon en̄wen enyịn̄. Mmọ isitụkke owo, isinyụn̄ iyịpke n̄kpọ.—wp16.1, p. 5.

Mmanie ẹkedi “mbọn̄ oku” oro ẹtịn̄de ẹban̄a ke Bible?

Anaedi “mbọn̄ oku” ẹkedi ikpọ owo ke otu mme oku, esịnede mme akwa oku emi ẹkedororede ẹfep ke itie.—wp16.1, p. 10.

Didie ke ikpanam n̄kpọ ye owo emi ọtọn̄ọde ndita uyo nnyụn̄ n̄n̄wọn̄ wine ke ini Editi?

Nnyịn isidaha mbon oro ẹyetde aran nte Abasi; mbon emi ẹyetde aran isikereke ke akpana ẹnọ mmimọ san̄asan̄a ukpono, isinyụn̄ idọhọke mbon en̄wen ke ẹyet mmimọ aran. (Matt. 23:8-12)—w16.01, p. 22-23.

Nte Abraham akasan̄ade edi ufan Abasi ekpep nnyịn nso?

Ekeme ndidi Shem akanam Abraham edifiọk Abasi. Se iketịbede ke uwem Abraham ye ke ubon esie akanam enye etetịm ọbuọt idem ye Abasi. Ọyọfọn nnyịn ikpebe enye.—w16.02, p. 4-5.

Anie ọkọdọn̄ ibuot ye ufan̄ikọ ke Bible?

Stephen Langton, akabahade Bible ọdọn̄ ke ibuot ke ibuot ke n̄kpọ nte isua 800 emi ẹkebede. Mme Jew emi ẹkedide mme osion̄o-n̄wed ẹma ẹdọn̄ ufan̄ikọ ke N̄wed Abasi Usem Hebrew, ndien ke n̄kpọ nte isua 500 emi ẹkebede, ataifiọk kiet emi ekerede Robert Estienne ama ọdọn̄ ufan̄ikọ ke N̄wed Abasi Usem Greek.—wp16.2, p. 14-15.

Ndi Satan ekemen Jesus aka ata ata temple man okodomo enye do?

Nnyịn idiọn̄ọke. Se Matthew 4:5 ye Luke 4:9 ẹtịn̄de ẹkeme ndiwọrọ ke ẹkemen Jesus ẹka do ke n̄kukụt mîdịghe ke enye ọkọdọk odoro ke ebiet emi okon̄de akan ke temple.—w16.03, p. 31-32.

Didie ke ukwọrọikọ nnyịn ekeme nditie nte mbara?

Mbara esitọi sụn̄sụn̄, esinem owo ke idem, esinịm mbiet ye eto uwem, enye onyụn̄ edi edidiọn̄ Abasi. (Deut. 33:13) Kpasụk ntre ke ukeme oro kpukpru nnyịn isisịnde ikwọrọ ikọ etie.—w16.04, p. 31-32.