1-3. (a) Nso idi ndusụk n̄kpọ oro ẹkemede ndisọn̄ nnyịn nditre ke ima ikana baptism? (b) Ewe mbụme ke ikeme ndibụp idem nnyịn edieke ọsọn̄de nnyịn ndikpụhọde? (Se akpa ndise ibuotikọ emi.)

KEVIN ^[1] ama esibre mbre mfọniso, ọn̄wọn̄ sika, ama ndin̄wọn̄ mmịn, onyụn̄ ada n̄kpọsọn̄ ibọk ke ediwak isua. Edi ke ini enye ekedide edifiọk akpanikọ, ama ọdọn̄ enye ndinen̄ede n̄kpere Jehovah. Akana Kevin etre kpukpru ndiọi edu emi man enye ekeme ndidi ufan Abasi. Ndibọn̄ akam nnọ Jehovah nnyụn̄ n̄kot Ikọ esie ama an̄wam enye okpụhọde.—Heb. 4:12.

² Ndi Kevin ama etre ndikpụhọde ke enye ama akana baptism? Baba, akana enye aka iso okpụhọde onyụn̄ ekpep ndinyene nti edu. (Eph. 4:31, 32) Ke uwụtn̄kpọ, ama ọsọn̄ enye nditre ndisisọp nyat esịt. Kevin ọkọdọhọ ete: “Idem ama akpa mi ndikụt ke emem mi utom nditre ndiọi edu eken akan nditre ndisọp ndiyat esịt.” Ndibọn̄ akam ke ofụri esịt nnọ Abasi nnyụn̄ nsịn idem n̄kpep Bible ama an̄wam enye.

³ Kpa nte Kevin, ediwak nnyịn ima itre ikpọ idiọkn̄kpọ oro ikesinamde mbemiso ikanade baptism man idu uwem nte Bible  etemede. Edi ke ima ikana baptism, imokụt ke osụk oyoyom ika iso ikpụhọde man ikeme ndinen̄ede n̄kpebe Abasi ye Jesus Christ. (Eph. 5:1, 2; 1 Pet. 2:21) Ke uwụtn̄kpọ, ekeme ndidi imesisọp ndikụt ndudue nnọ owo, ikop bụt, m̀mê ima nditịn̄ ikọ-edem. Ndi ọsọn̄ nnyịn nditre mme n̄kpọ emi? Edieke edide ntre, emekeme ndikere, ‘Ntak emi ọsọn̄de mi nditre mme n̄kpọ emi ke ini edide mmakam ntre mme n̄kpọ oro ẹdiọkde ẹkan emi? Nso ke n̄kpanam man nyak Ikọ Abasi aka iso okpụhọde mi?’

4. Ntak emi nnyịn mîsikemeke ndinem Jehovah esịt kpukpru ini?

⁴ Nnyịn emi ifiọkde Jehovah inyụn̄ imade enye imesidomo ofụri ukeme nnyịn ndinem enye esịt. Edi sia nnyịn mîfọnke ima, idịghe kpukpru ini ke isikeme ndinem enye esịt. Etie nnyịn ke idem nte eketiede apostle Paul, ke ini enye ọkọdọhọde ete: “Ukeme ndiyom ndinam n̄kpọ odu ye ami, edi ukeme ndinanam se ifọnde idụhe.”—Rome 7:18; Jas. 3:2.

5. Ewe ndiọi n̄kpọ ke iketre mbemiso ikanade baptism, edi ewe n̄kpọ ẹkeme ndisọn̄ nnyịn nditre?

⁵ Nnyịn ima itre kpukpru ndiọi n̄kpọ oro ẹkemede ndinam ẹsio nnyịn ẹfep ke esop Abasi. (1 Cor. 6:9, 10) Kpa ye oro, nnyịn ifọnke ima. (Col. 3:9, 10) Ntre inenke ndikere ke sia ima ikana baptism, mîdịghe sia imodu ke esop Abasi ibịghi, ke nnyịn idinamke aba ndudue, idifiakke inam n̄kpọ emi ima iketre, mîdịghe ke idiọk ekikere ididụkke nnyịn esịt. Ekeme ndida anyan ini nditre ndusụk ido emi mîfọnke.

6, 7. (a) Nso inam nnyịn ikeme ndika iso ndi ufan Jehovah kpa ye oro nnyịn mîfọnke ima? (b) Ntak emi nnyịn mîkpetreke ndikpe Jehovah ubọk ite efen ọnọ nnyịn?

⁶ Nnyịn imekeme ndidi ufan Jehovah inyụn̄ ika iso inam n̄kpọ esie kpa ye oro nnyịn mîfọnke ima. Ke ini Jehovah okodụride nnyịn adian idem, enye ama ọdiọn̄ọ ke nnyịn iyesinam ndudue ndusụk ini. (John 6:44) Sia Abasi ọdiọn̄ọde nte nnyịn itiede onyụn̄ ọfiọkde se isịnede nnyịn ke esịt, enye ama ọfiọk ndusụk ido oro ẹdinen̄erede isọn̄ nnyịn nditre. Enye ama ọdiọn̄ọ ke nnyịn iyesinam ndudue ndusụk ini. Edi emi ikakpanke enye ndidụri nnyịn ndian idem man idi ufan esie.

⁷ Abasi ama ama nnyịn tutu enye ọnọ nnyịn ata ọsọn̄urua enọ. Enye ọkọnọ edima Eyen esie edikpa man afak nnyịn. (John 3:16) Edieke ituade n̄kpọfiọk ke ini inamde ndudue, Jehovah eyefen ọnọ nnyịn ke ntak uwa ufak eyen esie, ndien emi ayanam nnyịn ika iso idi ufan esie. (Rome 7:24, 25; 1 John 2:1, 2) Ndi akpana ikere ke uwa ufak Christ inyeneke ufọn inọ nnyịn ke ntak emi idiọkn̄kpọ nnyịn okponde akaha? Ikpanaha ikere ntre. Emi ekpetie nte owo ndisịn ndida mmọn̄ nyet ubọk emi abaride. Kûfre ke Abasi ọkọnọ Eyen esie edikpa ọnọ mbon emi ẹkabarede esịt. Jehovah anam etieti ye nnyịn, sia uwa ufak Eyen esie anam ikeme ndika iso ndi ufan esie kpa ye oro nnyịn mîfọnke ima.—Kot 1 Timothy 1:15.

8. Ntak emi mîkpedịghe ima inam ndudue nnyịn idọhọ ke edi ke ntak emi nnyịn mîfọnke ima?

⁸ Ikpanaha edi ima inam ndudue nnyịn idọhọ ke edi ke ntak emi nnyịn mîfọnke ima. Edieke iyomde ndika iso ndi ufan Jehovah, ana idomo ofụri ukeme nnyịn ndikpebe Abasi ye Christ, inyụn̄ idi orụk owo emi mmọ ẹyomde nnyịn idi. (Ps. 15:1-5) Ana idomo n̄ko ndimụm idem n̄kama ke ini ọdọn̄de nnyịn ndinam mme n̄kpọ emi iyomde usụn̄ nditre,  ana inyụn̄ isịn ofụri ukeme nnyịn nditre mme n̄kpọ emi. Edide ina baptism ndondo emi, m̀mê ebịghi ikodu ke esop Abasi, ana ‘ika iso ikpụhọde.’—2 Cor. 13:11.

9. Nnyịn isan̄a didie ifiọk ke ndimen obufa owo nsịne idịghe n̄kpọ usen kiet?

⁹ Oyom ika iso isịn ukeme man ‘ikpụhọde’ inyụn̄ ‘imen obufa owo isịne.’ Paul ọkọdọhọ mme Christian ete: “Ẹsio akani owo ẹduọk, emi ekemde ye ido uwem mbufo eke eyo oko, emi onyụn̄ ọdiọn̄de-diọn̄ abiara ekekem ye mme abian̄a abian̄a udọn̄ esie; edi yak mbufo ẹkabade ẹdi obufa ke odudu oro anamde utom ke ekikere mbufo, ẹnyụn̄ ẹmen obufa owo ẹsịne emi ẹkebotde ekekem ye uduak Abasi ke ata edinen ido ye akpanikọ.” (Eph. 4:22-24) Ikọ Greek oro ẹkabarede “mbufo ẹkabade edi obufa” ọwọrọ “ẹka iso ndidi obufa.” Emi owụt ke ndimen obufa owo nsịne idịghe n̄kpọ usen kiet. Ntre, inamke n̄kpọ m̀mê idu ke esop Abasi ebịghi adana didie, ana ika iso idomo ukeme ndikpụhọde inyụn̄ ikpep ndinyene nti edu emi ẹdinamde nnyịn idi obufa owo. Ke akpanikọ, Bible ekeme ndin̄wam nnyịn ika iso ikpụhọde.

10. Nso ke ana inam man iyak Ikọ Abasi aka iso okpụhọde nnyịn, ndien nso mbụme ke ikeme ndibụp?

¹⁰ Ana in̄wana ọkpọsọn̄ man iyak Ikọ Abasi aka iso okpụhọde nnyịn. Ntak emi oyomde inam emi? Edieke Jehovah ọdiọn̄de utom oro nnyịn inamde inọ enye, ntak emi esisọn̄de nnyịn ndikpụhọde? Ntak emi Jehovah esiyakde nnyịn idomo ke idem nnyịn ndikpụhọde mînyụn̄ idaha odudu esie ikpụhọde nnyịn inikiet inikiet?

11-13. Ntak emi Jehovah esiyakde nnyịn idomo ke idem nnyịn ndikpụhọde?

¹¹ Ke ini isede ekondo emi Jehovah okobotde, imesikụt ke enye enen̄ede enyene odudu ndinam n̄kpọ ekededi. Ke uwụtn̄kpọ, idụhe n̄kpọ emi enyenede odudu nte utịn emi Jehovah okobotde. Un̄wana ye ufiop emi ẹsiwọrọde ke utịn kpukpru sekọn esikpon etieti. Ekpri un̄wana ye ufiop emi otode utịn esịm isọn̄ ekem ndinam kpukpru n̄kpọ ẹdu uwem. (Ps. 74:16; Isa. 40:26) Jehovah esinọ mme asan̄autom esie odudu oro mmọ ẹyomde. (Isa. 40:29) Emi owụt ke Jehovah enyene odudu ndinam nnyịn itre idiọk edu inikiet inikiet utu ke ndiyak nnyịn idomo ke idem nnyịn ndinam emi. Edi ntak emi enye mînamke ntre?

¹² Jehovah ọnọ nnyịn ifụre ndimek ndinam se imade. Ke ini imekde ndinam uduak Abasi inyụn̄ isịnde ifịk ndinem enye esịt, emi owụt ke nnyịn imenen̄ede ima enye. Emi owụt n̄ko ke nnyịn ida inọ ukara esie. Satan ọkọdọhọ ke Jehovah inyeneke unen ndikara mme owo, edi ke ini inyịmede ndinam se ededi oro ikemede ndiwụt ke ida inọ ukara Jehovah, emi esinam Jehovah enen̄ede enem esịt. (Job 2:3-5; N̄ke 27:11) Edieke Jehovah akpadade odudu esie anam nnyịn itre idiọk edu inikiet inikiet mbak nnyịn idibọbọ ufen ndinam n̄kpọ esie, ndi ikpetiehe nte ke Abasi oyom ndinam n̄kpọ emem ọnọ nnyịn man nnyịn ima ndinam n̄kpọ esie?

¹³ Emi anam Jehovah ọdọhọ nnyịn isịn “ofụri ukeme” inyene nti edu. (Kot 2 Peter 1:5-7; Col. 3:12) Enye oyom nnyịn isịn ofụri ukeme nnyịn itre ndikere oburobụt n̄kpọ. (Rome 8:5; 12:9) Ke ini isịnde ofụri ukeme nditre mme n̄kpọ oro mîfọnke, esịt esinem nnyịn sia imesikụt ke Bible ke okpụhọde uwem nnyịn.

14, 15. Nso ke nnyịn ikpanam man inyene nti edu emi edinemde Jehovah esịt? (Se ekebe oro “ Ndibọn̄ Akam Nnyụn̄ N̄kpep Bible Ama Okpụhọde Uwem Mmọ.”)

¹⁴ Nso ke nnyịn ikpanam man inyene nti edu emi edinemde Jehovah esịt? Utu ke ndibiere ke idem nnyịn se ikpokpụhọrede, ọfọn iyak Jehovah ada nnyịn usụn̄. Oyom inam se Rome 12:2 ọdọhọde ete: “Ẹtre ndibiet editịm n̄kpọ emi, edi ẹkpụhọde oto ke edinam ekikere mbufo edi obufa, man mbufo ẹkpedomo ẹfiọk uduak Abasi eke edide eti onyụn̄ enemde enye esịt onyụn̄ ọfọnde ama.” Jehovah esida Ikọ esie ye edisana spirit esie an̄wam nnyịn idiọn̄ọ uduak esie, inam uduak esie, inyụn̄ ikpụhọde idu uwem nte enye oyomde. Man ikeme ndinam kpukpru emi, oyoyom isịn ifịk ikot Bible kpukpru usen, itie ikere se ikotde, inyụn̄ ibọn̄ akam iben̄e Abasi edisana spirit esie. (Luke 11:13; Gal. 5:22, 23) Edieke iyakde edisana spirit Abasi ada nnyịn usụn̄ onyụn̄ anam nnyịn ikere n̄kpọ nte Jehovah esikerede, nnyịn iyekere n̄kpọ, itịn̄ ikọ, inyụn̄ inam n̄kpọ nte Jehovah oyomde. Edi sia nnyịn mîfọnke ima, oyom inen̄ede ikpeme mbak idifiak ikanam mme n̄kpọ oro ima iketre.—N̄ke 4:23.

¹⁵ Ke adianade ye ndisikot Bible kpukpru usen, oyom ida mme n̄wed esop Abasi, utọ nte Enyọn̄-Ukpeme ye Ẹdemede! ikpep Bible. Ediwak ibuotikọ ke mme magazine emi ẹkpep nnyịn ndikpebe nti edu Jehovah ye nte ikemede nditre ido emi mîfọnke. Imekeme ndiwet mme ibuotikọ ke mme magazine emi ye mme itie N̄wed Abasi oro ẹkemede ndin̄wam nnyịn inam emi inịm, man ikpafiak ikot mmọ ke ini ke ini.

16. Ntak emi nnyịn mîkpayakke idem emem nnyịn edieke adade nnyịn ini nditre mme ido oro mîfọnke?

¹⁶ Edieke adade fi ini nditre mme ido oro mîfọnke, oyom eti ke nnyịn ikemeke ndida usen kiet n̄kpụhọde, koro n̄kpọ emi idịghe ifia ubọk kiet. Oyom aka iso esịn ifịk. Ana inyene ime nte nnyịn idomode ndiyak Bible anam nnyịn ikpụhọde. Ana ibem iso inam emehe nnyịn ndisinam se Bible ọdọhọde. Nte ini akade, idisọn̄ke nnyịn ndikere n̄kpọ nnyụn̄ nnam n̄kpọ nte Jehovah Abasi amade.—Ps. 37:31; N̄ke 23:12; Gal. 5:16, 17.

17. Nso ke Jehovah edinam ọnọ nnyịn ke ini iso edieke isọn̄ọde ida ye enye?

¹⁷ Ini ke edi emi kpukpru ikọt Jehovah ẹdifọnde ẹma ẹnyụn̄ ẹka iso ndinam  n̄kpọ esie ke nsinsi. Ini oro, idisọn̄ke nnyịn aba ndikpebe nti edu Jehovah. Imenen̄ede ikọm Jehovah ke ndikọnọ Eyen esie edikpa ke ibuot nnyịn man ikeme ndituak ibuot nnọ Abasi nnyịn. Kpa ye oro nnyịn mîfọnke ima, nnyịn imekeme ndisụk nnem Jehovah esịt edieke isịnde ukeme ndikpụhọde nnyụn̄ nnam se Bible ekpepde.

18, 19. Nso ikeme ndinam nnyịn inịm ke Bible ekeme ndinam nnyịn ika iso ikpụhọde?

¹⁸ Kevin oro iketịn̄de iban̄a ke akpa ikpehe ibuotikọ emi ama anam kpukpru se enye ekekeme man etre ndisisọp ndiyat esịt. Enye ama esitie ekere onyụn̄ anam se enye ekpepde ke Bible. Enye ama onyụn̄ anam se nditọete ke esop ẹketemede enye. Kevin ama enen̄ede okpụhọde ke isua ifan̄ ebede. Nte ini akakade, ẹma ẹmek enye asan̄autom unamutom. Ndien enye edi ebiowo ke isua 20 idahaemi. Kevin ke anam kpukpru se enye ekemede mbak enye idifiak inam mme n̄kpọ oro enye ama eketre.

¹⁹ Kevin ndikekeme nditre ndiọi edu esie owụt ke Bible ke an̄wam ikọt Abasi ẹka iso ẹkpụhọde ẹnyụn̄ ẹdu eti uwem. Mmọdo, ẹyak ikûdedei ikpa mba ndiyak Ikọ Abasi aka iso okpụhọde nnyịn, onyụn̄ anam nnyịn itetịm ikpere Jehovah Abasi. (Ps. 25:14) Ke ini isịnde ofụri ukeme ndikpụhọde man inem Jehovah esịt, Jehovah esin̄wam nnyịn. Ndien ke ini ikụtde adan̄a nte ikpụhọrede, iyenen̄ede inịm ke Bible ekeme ndin̄wam nnyịn ika iso ikpụhọde.—Ps. 34:8.