1, 2. (a) ‘Enọ mfọn Abasi oro inua mîkemeke ndibụk’ esịne nso n̄ko? (b) Mme mbụme ewe ke idineme ke ibuotikọ emi?

JEHOVAH ndikọnọ Eyen esie Jesus, edikpa man afak nnyịn edi akakan enọ emi enye ọnọde nnyịn, ke ntak emi enye amade nnyịn. (John 3:16; 1 John 4:9, 10) Apostle Paul okokot enọ emi “enọ mfọn esie oro inua mîkemeke ndibụk.” (2 Corinth 9:15) Ntak emi Paul ọkọdọhọde ntre?

² Paul ama ọfiọk ke Jesus ndikakpa man afak nnyịn ọsọn̄ọ ke Abasi oyosu kpukpru se enye ọkọn̄wọn̄ọde. (Kot 2 Corinth 1:20.) Emi ọwọrọ ke ‘enọ mfọn Abasi oro inua mîkemeke ndibụk’ esịne Jesus ndikakpa man afak nnyịn ye kpukpru nti n̄kpọ oro Jehovah anamde ọnọ nnyịn, ke ntak emi enye amade nnyịn. Ke akpanikọ, inua ikemeke ndibụk utọ enọ mfọn Abasi emi. Edi nso ke enọ mfọn emi akpanam nnyịn inam? Ndien didie ke enye akpanam nnyịn iben̄e idem  inọ Editi n̄kpa Christ emi ẹdinịmde ke Wednesday, March 23, 2016?

3, 4. (a) Esitie fi didie ke idem ke ini owo ọnọde fi n̄kpọ? (b) Didie ke enọ ekeme ndikpụhọde uwem fo?

³ Esinem nnyịn ke ini owo ọnọde nnyịn enọ. Edi, ndusụk enọ ẹsinen̄ede ẹnyene ufọn ẹnyụn̄ ẹkeme ndikpụhọde uwem nnyịn. Ke uwụtn̄kpọ, yak idọhọ ke amanam akwa idiọkn̄kpọ, ndien ẹbiere ndiwot fi ke ntak idiọkn̄kpọ oro. Edi etise, owo en̄wen ọwọrọ edi edidọhọ ẹwot imọ utu ke ndiwot fi. Afo akpada didie utọ akwa n̄kpọ oro owo oro anamde ọnọ fi do?

⁴ Se owo oro anamde ọnọ fi do ekeme ndinam afo okpụhọde nte esidude uwem, ọtọn̄ọ ndinen̄ede ntat ubọk nnọ mme owo n̄kpọ, ama mme owo, onyụn̄ efen ọnọ owo emi ekeduede fi. Se afo anamde kpukpru usen oyowụt ke afo amama nte owo oro ekenyịmede ndikpa ke ibuot fo.

5. Ntak emi Abasi ndikọnọ eyen esie edikpa ke ibuot nnyịn okponde akan n̄kpọ ekededi emi owo akpanamde ọnọ nnyịn?

⁵ Abasi ndikọnọ Eyen esie edikpa man afak nnyịn enen̄ede okpon akan owo ndinyịme ndikpa ke ibuot anamidiọk. (1 Peter 3:18) Kpukpru nnyịn ikadada idiọkn̄kpọ imana ke ntak idiọkn̄kpọ Adam, ndien utịp idiọkn̄kpọ emi edi n̄kpa. (Rome 5:12) Ima akanam Jehovah ọnọ Jesus edi isọn̄ edikpa ọnọ kpukpru owo man “enye akpatabi n̄kpa ke ibuot kpukpru owo.” (Mme Hebrew 2:9) Edi n̄kpa Jesus ayanam se ikande oro. Ke ntak uwa ufak Jesus, Jehovah oyosobo n̄kpa efep ke nsinsi. (Isaiah 25:7, 8; 1 Corinth 15:22, 26) Kpukpru mbon oro ẹbuọtde idem ye Jesus, edide mbon oro ẹditienede Jesus ikara ke heaven m̀mê mbon oro ẹdidude ke Paradise mi ke isọn̄, ẹyedu uwem ke nsinsi, ẹnyene emem ẹnyụn̄ ẹkop inemesịt. (Rome 6:23; Ediyarade 5:9, 10) Enọ mfọn Abasi esịne nso en̄wen?

6. (a) Nso ke afo enen̄ede oyom Abasi anam ọnọ fi ke ini iso? (b) Tịn̄ n̄kpọ ita oro enọ mfọn Abasi edinamde nnyịn inam.

⁶ Enọ mfọn Abasi esịne n̄ko Abasi ndinam isọn̄ edi Paradise, ndinam mbon udọn̄ọ ẹkop nsọn̄idem, nnyụn̄ nnam mme akpan̄kpa ẹset. (Isaiah 33:24; 35:5, 6; John 5:28, 29) Imama Jehovah ye Jesus Eyen esie etieti ke ntak emi mmọ ẹnọde nnyịn ‘enọ mfọn oro inua mîkemeke ndibụk.’ Nso ke enọ emi edinam nnyịn inam? Enye ayanam nnyịn (1) inen̄ede ikpebe Jesus, (2) ima nditọete nnyịn, inyụn̄ (3) ifen inọ mme owo ke ofụri esịt.

7, 8. Ima oro Christ amade nnyịn akpanam nnyịn inam nso ye nso?

⁷ Akpa kan̄a, akpana nte idude uwem owụt ke imokpono Jesus. Apostle Paul ọkọdọhọ ete: “Ima Christ onụk nnyịn.” (Kot 2 Corinth 5:14, 15.) Paul ama ọdiọn̄ọ ke edieke nnyịn inịmde ke Jesus enen̄ede ama nnyịn, oro ayanam nnyịn ima inyụn̄ ikpono enye. Ke ini ifiọkde kpukpru se Jehovah anamde ọnọ nnyịn ke ntak emi enye amade nnyịn, oro ayanam idu uwem nte Jesus oyomde idu. Didie ke ikeme ndinam oro?

⁸ Edieke imade Jehovah, nnyịn iyekpebe Jesus inyụn̄ itiene nde ikpat esie ketket. (1 Peter 2:21; 1 John 2:6) Ke ini ikopde uyo inọ Abasi ye Christ, oro oyowụt ke imama mmọ. Jesus ọkọdọhọ ete: “Owo eke enyịmede mme ewụhọ mi onyụn̄ enịmde mmọ, enye edi owo eke amade mi. Ndien owo eke amade mi, Ete mi ayama  enye, ami nyonyụn̄ mma enye nnyụn̄ n̄wụt enye idem in̄wan̄-in̄wan̄.”—John 14:21; 1 John 5:3.

9. Mmanie ke ẹsidọn̄ nnyịn ndikpebe ndusụk ini?

⁹ Ke ini Editi emi, ọyọfọn nnyịn itie ikere nte nnyịn isidude uwem. Bụp idemfo ete: ‘Nso ke nnam idahaemi oro owụtde ke mmekpebe Jesus? Nso en̄wen ke n̄kpanam man nnen̄ede n̄kpebe Jesus?’ Enen̄ede oyom ibụp idem nnyịn mme mbụme emi, koro mbon ererimbot emi ẹyom nnyịn idu uwem nte mmọ. (Rome 12:2) Edieke nnyịn mîkpemeke, nnyịn imekeme nditọn̄ọ ndikpebe mme ọfiọkn̄kpọ owo, mme ọwọrọetop owo, ye mbon mbre mbuba ererimbot emi. (Colossae 2:8; 1 John 2:15-17) Nso idin̄wam nnyịn ikûkpebe mbon ererimbot?

10. Mme mbụme ewe ke ikpobụp idem nnyịn ke ini Editi emi, ndien nso ke ibọrọ mbụme oro akpanam nnyịn inam? (Se akpa ndise ibuotikọ emi.)

¹⁰ Ọfọn ida ini Editi emi ikere iban̄a utọ ọfọn̄ oro isisịnede, fim oro isisede, ikwọ oro isikopde m̀mê ibrede. Onyụn̄ ọfọn ise se isidọn̄de ke kọmputa, fon, m̀mê tablet nnyịn. Bụp idemfo ete: ‘Ndi bụt akpanam mi edieke Jesus okpodude mi okụt ọfọn̄ oro ami nsịnede?’ (Kot 1 Timothy 2:9, 10.) ‘Ndi ọfọn̄ mi owụt ke ndi mbet Christ? Ndi Jesus akpama ndise mme fim oro ami nsisede? Ndi enye akpama utọ ikwọ oro ami nsibrede? Edieke enye ọkpọbọde fon m̀mê tablet mi ese se isịnede, ndi bụt akpanam mi? Ndi n̄kpekeme ndidọhọ enye ntak emi mmade ndibre mbre vidio oro nsibrede?’ Ima oro imade Jehovah ayanam nnyịn itop se ededi oro mîdotke mme Christian ẹnyene iduọk, inamke n̄kpọ m̀mê ọsọn̄urua adan̄a didie. (Utom 19:19, 20) Ke ini ikayakde idem inọ Abasi, ima in̄wọn̄ọ ke nnyịn ididụhe aba uwem inọ idem nnyịn, edi ke ididu inọ Christ. Ntre, nnyịn ikpayakke n̄kpọ ekededi anam ọsọn̄ nnyịn ndikpebe Jesus.—Matthew 5:29, 30; Philippi 4:8.

11. (a) Ima oro imade Jehovah ye Jesus edinam nnyịn ikwọrọ ikọ didie? (b) Didie ke idin̄wam nditọete nnyịn ke esop sia imade Jesus?

¹¹ Imesisịn idem ikwọrọ ikọ inyụn̄ ikpep mme owo n̄kpọ sia imade Jesus. (Matthew 28:19, 20; Luke 4:43) Ke ini Editi emi, ndi emekeme ndinam ndutịm man etiene anam utom usiakusụn̄ unọ un̄wam onyụn̄ ọnọ hour 30 m̀mê 50? Eren kiet emi ekedide isua 84, emi n̄wan esie ama akakpa, ama ekere ke imọ ikemeke ndisiak usụn̄, sia imọ imọsọn̄, idem inyụn̄ isọn̄ke imọ. Edi mme asiakusụn̄ ke edem mmọ ẹma ẹn̄wam enye. Mmọ ẹma ẹsimen enye ke moto ẹka ukwọrọikọ, ẹnyụn̄ ẹsikwọrọ ikọ ke efakutom emi ọfọnde ye enye. Emi ama anam eyenete oro ekeme ndisiak usụn̄ nnyụn̄ nnọ hour 30 ọfiọn̄ oro. Ndi afo emekeme ndin̄wam owo ke esop mbufo anam utom usiakusụn̄ unọ un̄wam ke March ye April? Edi edieke nnyịn mîkemeke ndisiak usụn̄, imekeme ndibiere ndikwọrọ ikọ ke ini Editi emi n̄kan nte isikwọrọde. Edieke inamde ntre, ọwọrọ ima Christ onụk nnyịn nte okonụkde Paul. Nso en̄wen ke ikpanam ke ntak emi imade Abasi?

12. Abasi ndima nnyịn akpanam nnyịn inam nso?

¹² Ọyọhọ iba, nnyịn ikpenyene ndima nditọete nnyịn nte Abasi amade nnyịn. Apostle John ekewet ete: “Ndima, edieke emi edide nte Abasi amade nnyịn, nnyịn nde inyene ndima kiet eken.” (1 John 4:7-11) Ntre, edieke inịmde ke Abasi ama  nnyịn, nnyịn ikpenyene ndima nditọete nnyịn n̄ko. (1 John 3:16) Didie ke ikeme ndiwụt ke imama mmọ?

13. Nso ke Jesus ekesinam ndiwụt ke imama mme owo?

¹³ Jesus ama owụt nnyịn nte ikpamade mme owo. Ke ini enye okodude ke isọn̄, enye ama esin̄wam mme owo, akpan akpan mme usụhọde owo. Enye ama ọkọk mbon udọn̄ọ, mbụn̄ọ, nnan, inan, ye imụm. (Matthew 11:4, 5) Enye ama esima ndikpep mbon oro ẹkeyomde ndidiọn̄ọ Abasi, n̄kpọ; enye iketiehe nte mme adaiso ido ukpono eyo esie. (John 7:49) Enye ama esima mme usụhọde owo, onyụn̄ esịn idem an̄wam mmọ.—Matthew 20:28.

14. Didie ke afo ekeme ndiwụt nditọete fo ke amama mmọ?

¹⁴ Ini Editi emi edi eti ini ndikere mban̄a nte ikpan̄wamde nditọete nnyịn ke esop, akpan akpan mbon oro ẹsọn̄de. Nnyịn imekeme ndika n̄kese mmọ. Imekeme ndinam udia nda nsọk mmọ, in̄wam mmọ inam mme n̄kpọ ke ufọk, imen mmọ ke n̄kpọisan̄ nnyịn ika mbonoesop, mîdịghe isan̄a ye mmọ ika ukwọrọikọ. (Kot Luke 14:12-14.) Yak nte Abasi amade fi anam ama nditọete fo!

15. Nso ke ana nnyịn isiti?

¹⁵ Ọyọhọ ita, Jehovah ndima nnyịn ekpenyene ndinam nnyịn ifen inọ nditọete nnyịn. Sia kpukpru nnyịn idide nditọ Adam, nnyịn ikadada idiọkn̄kpọ ye n̄kpa imana, ntre idụhe owo emi ekemede ndidọhọ ke imọ iyomke ufak. Idem asan̄autom Abasi emi ọsọn̄ọde ada anam n̄kpọ Abasi oyom ufak. Abasi efen ata akwa isọn oro nnyịn owo kiet kiet ikamade enye. Ntak ikpesitide ke Abasi efen nnyịn ata akamba isọn? Uwụtn̄kpọ oro Jesus ọkọnọde ayanam nnyịn ifiọk ibọrọ mbụme emi.

16, 17. (a) Nso ke ikpekpep ito uwụtn̄kpọ oro Jesus ọkọnọde aban̄a edidem ye ifịn esie? (b) Nso ke uwụtn̄kpọ emi akpanam fi anam?

¹⁶ Jesus ama ọnọ uwụtn̄kpọ aban̄a edidem emi okosion̄ode idem ọkpọn̄ ata akamba isọn miliọn denarii 60, emi ofụn esie akakamade enye. Edi ofụn oro ikenyịmeke ndision̄o idem n̄kpọn̄ denarii 100 kpọt, oro ofụn en̄wen akakamade enye. Akpakana ofụn emi osion̄o idem ọkpọn̄ ekpri isọn oro ofụn en̄wen akakamade enye, ukem nte edidem okosion̄ode idem ọkpọn̄ ata akamba isọn oro enye akakamade enye. Esịt ama enen̄ede ayat edidem oro ke ini enye okopde n̄kpọ emi tutu enye ọdọhọ ete: “Idiọk ofụn, mma mbiat kpukpru isọn fo mfep, ke ini afo ekekpede mi ubọk. Nte afo n̄ko ukpatuaha ekemmọ ofụn mbọm, kpa nte ami n̄katuade fi mbọm?” (Matthew 18:23-35) Jehovah abiat ata akamba isọn oro ikamade enye efep, ukem nte edidem oro akabiatde ata akamba isọn oro ofụn esie akakamade  enye. Jehovah ndima nnyịn nnyụn̄ ntua nnyịn mbọm akpanam nnyịn inam nso?

¹⁷ Nte itịmde idem inọ Editi, ọfọn ibụp idem nnyịn ite: ‘Ndi eyenete edue mi? Ndi ọsọn̄ mi ndifen nnọ enye?’ Edieke ọsọn̄de nnyịn ndifen nnọ owo, ata eti ini edi emi ndikpebe Jehovah emi ‘esinyịmede ndifen nnọ owo.’ (Nehemiah 9:17; Psalm 86:5) Edieke imade nte Jehovah atuade nnyịn mbọm, nnyịn iyatua mbon en̄wen mbọm inyụn̄ ifen inọ mmọ ke ofụri esịt. Edieke nnyịn mîmaha nditọete nnyịn, inyụn̄ ifenke inọ mmọ, nnyịn ikemeke ndidori enyịn Jehovah ndima nnyịn nnyụn̄ mfen nnọ nnyịn. (Matthew 6:14, 15) Ke ini ifende inọ mbon en̄wen, oro iwọrọke ke se mmọ ẹnamde iyatke nnyịn, edi ndifen nnọ mmọ ayanam ikop inemesịt.

18. Nso ikan̄wam Lily ekeme ndiyọ Carol?

¹⁸ Ndusụk ini, esisọn̄ ndiyọ nditọete nnyịn ke ntak emi mmọ mîfọnke ima. (Kot Ephesus 4:32; Colossae 3:13, 14.) Eyenete an̄wan nnyịn kiet emi ekerede Lily ama esiyọ ebeakpa kiet emi ekekerede Carol. ^[1] (Se ikọ idakisọn̄.) Enye ama esimen Carol aka ebiet ekededi oro enye okoyomde ndika, an̄wam enye edep mme n̄kpọ, onyụn̄ esinam ediwak n̄kpọ eken ọnọ enye. Kpa ye ofụri se Lily akanamde, Carol ikesitoroke enye, edi ekesitịn̄ ikọ nte ke inyeneke se Lily anamde ọfọn. Emi ama anam ọsọn̄ ndin̄wam enye ndusụk ini. Edi Lily ekesikere aban̄a nti edu Carol, ndien emi ama anam enye ekeme ndin̄wam Carol ke ediwak isua tutu esịm ini emi enye ekenen̄erede ọdọn̄ọ, ekem akpa. Kpa ye oro mîkememke utom inọ Lily ndise mban̄a Carol, enye ọdọhọ ete: “Ọdọn̄ mi ndikụt Carol ke ini ẹdinamde mme akpan̄kpa ẹset. Nyom ndikụt nte enye edinamde n̄kpọ ke ini enye edifọnde ima.” Ke akpanikọ, ndifiọk ke Abasi ama nnyịn ayanam nnyịn ikeme ndiyọ nditọete nnyịn, inyụn̄ itie ibet ini oro kpukpru owo ẹdifọnde ima ke obufa ererimbot.

19. Nso ke ‘enọ mfọn Abasi oro inua mîkemeke ndibụk’ edinam fi anam?

¹⁹ Ke akpanikọ, inua ikemeke ndibụk enọ mfọn oro Jehovah ọnọde nnyịn. Nnyịn ikpakam iwụt ke imenen̄ede ima enọ emi. Ini Editi edi ata eti ini nditie n̄kere kpukpru se Jehovah ye Jesus ẹnamde ẹnọ nnyịn. Ima oro Jehovah ye Jesus ẹmade nnyịn akpakam anam nnyịn inen̄ede ikpebe Jesus, ima nditọete nnyịn, inyụn̄ ifen inọ mmọ ke ofụri esịt.