1, 2. (a) Jehovah ọkọdọhọ ke nso iditịbe ke eyo nnyịn emi? (b) Mme mbụme ewe ke ẹdibọrọ ke ibuotikọ emi? (Se akpa ndise ibuotikọ emi.)

JEHOVAH ọkọdọhọ ete ke eyo nnyịn, “owo duop eke ẹtode ke kpukpru usem mme idụt ẹyemụm, ih, mmọ ẹyemụm utọn̄ ọfọn̄ owo kiet emi edide eyen Jew, ẹte: ‘Nnyịn iyetiene mbufo ika, koro imokop ite ke Abasi odu ye mbufo.’” (Zechariah 8:23) “Eyen Jew” oro ada aban̄a mbon oro Jehovah adade edisana spirit esie eyet aran. Ẹkot mmọ n̄ko “Israel Abasi.” (Galatia 6:16) “Owo duop” oro ada aban̄a mbon oro ẹnyenede idotenyịn ndidu uwem mi ke isọn̄ ke nsinsi. Mmọ ẹdiọn̄ọ ke Abasi ọdiọn̄ mbon oro enye eyetde aran, ẹnyụn̄ ẹda ke edi akwa ukpono nditiene mmọ n̄kpono Abasi.

² Jesus ọkọdọhọ ke ikọt Abasi ẹyediana kiet, ukem nte prọfet Zechariah ọkọdọhọde. Enye okokot mbon oro ẹdoride enyịn ndidu ke heaven “ekpri otuerọn̄,” onyụn̄ okot mbon oro ẹdoride enyịn ndidu mi ke isọn̄, “mme erọn̄ en̄wen.” Edi Jesus ọkọdọhọ ke kpukpru mmọ ẹyekabade ẹdi “otuerọn̄ kiet,” ẹnyụn̄ ẹtiene “ekpemerọn̄ kiet” oro edi, Jesus. (Luke 12:32; John 10:16) Sia Jesus enyenede otuerọn̄ iba, ndusụk owo ẹkeme ndikere: (1) Ndi akpana mme erọn̄ en̄wen ẹdiọn̄ọ  enyịn̄ kpukpru mbon oro ẹyetde aran mfịn? (2) Mbon oro ẹyetde aran ẹkpeda didie idemmọ? (3) Edieke owo ke esop nnyịn ọtọn̄ọde ndita uyo nnyụn̄ n̄n̄wọn̄ wine ke ini Editi, n̄kpanam n̄kpọ didie ye enye? (4) Edieke n̄kụtde nte ibat mbon oro ẹtade uyo ẹnyụn̄ ẹn̄wọn̄de wine ke ini Editi ọdọkde, ndi akpana nyak oro afịna mi? Ẹyebọrọ mme mbụme emi ke ibuotikọ emi.

3. Ntak emi nnyịn mîkemeke ndinen̄ede mfiọk m̀mê anie ke otu mbon oro ẹyetde aran edika heaven ke akpatre?

³ Ndi akpana mme erọn̄ en̄wen ẹdiọn̄ọ enyịn̄ kpukpru mbon oro ẹyetde aran, oro ẹsụk ẹdude ke isọn̄ mfịn? Baba. Ntak-a? Koro idụhe owo emi enen̄erede ọfiọk m̀mê anie ke otu mbon oro ẹyetde aran edika heaven ke akpatre. ^[1] (Se ikọ idakisọn̄.) Okposụkedi emi Abasi eyetde mmọ aran, mmọ ẹdikeme ndika heaven edieke mmọ ẹsọn̄ọde ẹda ẹnam n̄kpọ Abasi tutu ẹsịm utịt. Satan ọfiọk emi, ndien enye esida “mme prọfet nsu” odomo ‘nditụn mmọ usụn̄.’ (Matthew 24:24) Ke ini Jehovah efịkde mbon oro ẹyetde aran akpatre idiọn̄ọ, ke mmọ ẹdinen̄ede ẹnịm ke mmimọ iyaka heaven. Jehovah edifịk mmọ akpatre idiọn̄ọ emi mbemiso mmọ ẹkpade, m̀mê mbemiso “akwa ukụt” ọtọn̄ọde.—Ediyarade 2:10; 7:3, 14.

4. Edieke nnyịn mîfiọkke enyịn̄ kpukpru mbon oro ẹyetde aran oro ẹdude ke isọn̄ mfịn, nnyịn idinam didie ‘itiene mmọ’?

⁴ Edieke mme erọn̄ en̄wen mîfiọkke enyịn̄ kpukpru mbon oro ẹyetde aran oro ẹdude ke isọn̄ mfịn, mmọ ẹdinam didie ‘ẹtiene mmọ’? Bible ọdọhọ ke “owo duop” oro “ẹyemụm utọn̄ ọfọn̄ owo kiet emi edide eyen Jew, ẹte: ‘Nnyịn iyetiene mbufo ika, koro imokop ite ke Abasi odu ye mbufo.’” Kpa ye oro itien̄wed oro ọdọhọde eyen Jew, enye n̄ko ọdọhọ “mbufo,” emi owụt ke eyen Jew oro idịghe owo kiet. Enye ada aban̄a ofuri otu mbon oro ẹyetde aran. Mme erọn̄ en̄wen ẹfiọk emi, mmọ ẹsinyụn̄ ẹdiana ye otu mbon oro ẹyetde aran ẹnam n̄kpọ Jehovah. Ufọn idụhe mmọ ndifiọk enyịn̄ kpukpru mbon oro ẹyetde aran, nnyụn̄ ntiene mmọ owo kiet kiet. Jesus edi Adausụn̄ nnyịn, ndien Bible ọdọhọ ke enye ikpọn̄ ke ana nnyịn itiene.—Matthew 23:10.

5. Nso ke mbon oro ẹyetde aran ẹkpenen̄ede ẹkere ẹban̄a, ndien ntak-a?

⁵ Mbon oro ẹyetde aran ẹkpenyene ndinen̄ede ntie n̄kere se ẹtịn̄de ke 1 Corinth 11:27-29. (Kot.) Didie ke owo oro ẹyetde aran ekeme ndita uyo nnyụn̄ n̄n̄wọn̄ wine ke “usụn̄ eke mîdotke” ke ini Editi? Edieke enye mîsọn̄ọke ida inam n̄kpọ Jehovah, onyụn̄ anamde se mînenke, ekem enye ata uyo onyụn̄ ọn̄wọn̄ wine ke ini Editi, enye anam oro ke “usụn̄ eke mîdotke.” (Mme Hebrew 6:4-6; 10:26-29) Se akpa n̄wed Corinth emi etịn̄de owụt ke ana mbon oro ẹyetde aran ẹka iso ẹsọn̄ọ  ẹda ẹnam n̄kpọ Jehovah, edieke mmọ ẹyomde ndibọ “utịp ikot eke heaven oro Abasi okokotde [mmọ] ebe ke Christ Jesus.”—Philippi 3:13-16.

6. Didie ke mbon oro ẹyetde aran ẹkpeda idemmọ?

⁶ Paul ọkọdọhọ mbon oro ẹyetde aran ete: “Ami emi ndide owo-n̄kpọkọbi ke Ọbọn̄, n̄kpe mbufo ubọk nte ẹsan̄a nte odotde ye ikot emi ẹkekotde mbufo.” Didie ke mmọ ẹkeme ndinam emi? Paul ama etịn̄ ete: “Ke ọyọhọ nsụhọdeidem ye ifụre ifụre ido, ye anyanime, ẹyọde kiet eken ke ima, ẹsịnde ifịk ẹn̄wana ndimụm edidianakiet eke spirit n̄kama, ẹnyụn̄ ẹdude ke mbọbọ emem.” (Ephesus 4:1-3) Edisana spirit Jehovah esin̄wam ikọt Abasi ẹsụhọde idem, utu ke ndikohode idem. (Colossae 3:12) Ntre mbon oro ẹyetde aran isikereke ke mmimọ imọfọn ikan mbon en̄wen. Mmọ ẹfiọk ke Jehovah inọhọ mmimọ edisana spirit esie ikan nte ọnọde ikọt esie eken. Mmọ inyụn̄ ikereke ke Ikọ Abasi an̄wan̄a mmimọ akan nte an̄wan̄ade ikọt Abasi eken. Mmọ idinyụn̄ idọhọke owo ke Abasi eyet enye aran, ntre yak enye esitiene ata uyo onyụn̄ ọn̄wọn̄ wine ke ini Editi. Utu ke oro, mmọ ẹsisụhọde idem ẹnyụn̄ ẹfiọk ke Jehovah ikpọn̄ esimek mbon oro ẹdikade heaven.

7, 8. Nso ke mbon oro ẹyetde aran mîsiyomke mme owo ẹnam ye mmimọ, ndien ntak-a?

⁷ Kpa ye oro mbon oro ẹyetde aran ẹfiọkde ke Abasi ndimek mmimọ itiene ika heaven edi ata akwa ifet, mmọ isikereke ke akpana mbon en̄wen ẹnọ mmimọ san̄asan̄a ukpono. (Ephesus 1:18, 19; kot Philippi 2:2, 3.) Mmọ ẹfiọk n̄ko ke ini emi Jehovah ekeyetde mmimọ aran, ke enye ikanamke mme owo ẹdiọn̄ọ. Ntre, idem isikpaha owo emi ẹyetde aran edieke mme owo mîsọpke inịm ke ẹyet enye aran. Enye ọdiọn̄ọ ke Bible ọdọhọ yak nnyịn ikûsọsọp inịm eyenete emi ọdọhọde ke Abasi emek imọ n̄kpọ. (Ediyarade 2:2) Sia owo emi ẹyetde aran mîyomke mme owo ẹnọ imọ san̄asan̄a ukpono, enye ididọhọke owo emi enye osobode ke akpa ini ete ke ẹyet imọ aran. Ekeme ndidi enye idikam idọhọke owo ndomokiet ke ẹyet imọ aran. Enye idinyụn̄ inamke inua iban̄a ikpọ n̄kpọ oro enye edinamde ke heaven.—1 Corinth 1:28, 29; kot 1 Corinth 4:6-8.

⁸ Mbon oro ẹyetde aran isikereke ke akpana mmimọ idu kpọt ye mbon en̄wen oro ẹyetde aran, nte n̄kpọ eke ẹdọhọde ke mmọ ẹnyene n̄ka emi mmọ ẹdude. Mmọ isisan̄ake iyom mbon en̄wen oro ẹyetde aran man ẹtie kiet ẹneme nte ẹkeyetde mmimọ aran, mîdịghe man ẹtie ke otu ẹkpep Bible. (Galatia 1:15-17) Edieke mmọ ẹnamde emi, esop ididianake kiet. Emi idinyụn̄ iyakke edisana spirit odu ke esop, koro edisana spirit esinam ikọt Abasi ẹdiana kiet ẹnyụn̄ ẹdu ke emem.—Kot Rome 16:17, 18.

9. Ntak emi anade ikpeme nte inamde n̄kpọ ye mbon oro ẹtade uyo ẹnyụn̄ ẹn̄wọn̄de wine ke ini Editi? (Se ekebe oro “Ima ‘Inamke Ido Eke Mîdotke.’”)

⁹ Didie ke afo akpanam n̄kpọ ye nditọete iren ye iban oro ẹyetde aran? Jesus ọkọdọhọ mme mbet esie ete: “Kpukpru mbufo ẹdi nditọete.” Enye ama aka iso ọdọhọ ete: “Ẹyesụhọde owo ekededi eke emenerede idem ke enyọn̄, ẹyenyụn̄ ẹmenede owo ekededi eke osụhọrede idem.” (Matthew 23:8-12) Ntre ifọnke ida owo  ekededi nte abasi, ọkpọkọm enye edi owo emi ẹyetde aran. Bible ọdọhọ nnyịn ikpebe mbuọtidem mbiowo, edi enye idọhọke nnyịn ida owo ndomokiet nte adausụn̄ nnyịn. (Mme Hebrew 13:7) Edi akpanikọ ke Bible ọdọhọ ke enyene mbon emi ẹdotde ‘inen̄erede ikpono.’ Edi enye idọhọke nnyịn inen̄ede ikpono mmọ ke ntak emi ẹyetde mmọ aran, edi ọdọhọ inen̄ede ikpono mmọ ke ntak emi mmọ ‘ẹtịmde ẹda nnyịn usụn̄’ ẹnyụn̄ ‘ẹnamde utom ọkpọsọn̄ ke ndinọ utịn̄ikọ nnyụn̄ n̄kpep nnyịn n̄kpọ.’ (1 Timothy 5:17) Edieke nte inamde n̄kpọ ye mbon oro ẹyetde aran owụtde ke ida mmọ nte abasi, oro ekeme ndinam bụt anam mmọ. Se idiọkde ikan edi ke oro ekeme ndinam mmọ ẹkohode idem. (Rome 12:3) Idụhe owo nnyịn ndomokiet emi akpamade ndinam kiet ke otu nditọete Christ oro ẹyetde aran, anam utọ akamba ndudue oro!—Luke 17:2.

10. Didie ke ikeme ndiwụt ke imokpono mbon oro Jehovah eyetde aran?

¹⁰ Didie ke ikeme ndiwụt ke imokpono mbon oro Jehovah eyetde aran? Nnyịn idibụpke mmọ nte ẹkeyetde mmọ aran. Abasi ndiyet mmọ aran ibeheke nnyịn, nnyịn inyụn̄ inyeneke unen ndibụp mmọ nte emi eketịbede. (1 Thessalonica 4:11; 2 Thessalonica 3:11) Ikponyụn̄ inaha ikere ke ẹyet ebe m̀mê n̄wan, ete m̀mê eka, m̀mê mbonubon mmọ eken, aran n̄ko. Isidịghe ẹma ẹyeyet owo kiet ke ubon aran, ọwọrọ ke ẹyeyet kpukpru owo ke ubon oro n̄ko. (1 Thessalonica 2:12) Nnyịn ikpobụpke mme owo mbụme emi edinamde esịt etịmede mmọ. Ke uwụtn̄kpọ, ifọnke ibụp n̄wan eyenete oro Abasi eyetde aran m̀mê etie enye didie ke idem ndifiọk ke ebe esie iditieneke enye idu uwem mi ke isọn̄ ke nsinsi. Koro nnyịn imenen̄ede inịm ke Jehovah ‘ọyọnọ kpukpru mme odu-uwem n̄kpọ’ se mmọ ẹyomde ke obufa ererimbot.—Psalm 145:16.

11. Ntak emi mîfọnke ida nditọete nnyịn nte abasi?

¹¹ Edieke nnyịn mîdaha mbon oro ẹyetde aran nte abasi, owo iditụnke nnyịn usụn̄. Ntak idọhọde ntre? Bible ọdọhọ ke “nditọete abian̄a” ẹkeme ndidu ke esop; mmọ ẹkam ẹkeme ndidọhọ ke Abasi eyet mmimọ aran. (Galatia 2:4, 5; 1 John 2:19) N̄ko, ndusụk mbon oro ẹyetde aran ẹkeme nditre ndinam n̄kpọ Jehovah. (Matthew 25:10-12; 2 Peter 2:20, 21) Ntre, edieke nnyịn mîdaha nditọete nnyịn nte abasi, nnyịn iditieneke mmọ inam se mmọ ẹnamde, idem ọkpọkọm mmọ ẹdi mbon oro ẹyetde aran, mbon oro ediwak owo ẹdiọn̄ọde, ye mbon oro ẹma ẹkenam n̄kpọ Jehovah ẹbịghi. Ndien, edieke mmọ ẹtrede ndinam n̄kpọ Jehovah m̀mê ẹkpọn̄de esop Abasi, nnyịn idiyakke se mmọ ẹnamde anam nnyịn itre ndibuọt idem ye Jehovah m̀mê itre ndinam n̄kpọ esie.—Jude 16.

12, 13. Ntak emi nnyịn mîkpayakke ibat mbon oro ẹtade uyo ẹnyụn̄ ẹn̄wọn̄de wine ke ini Editi afịna nnyịn?

¹² Ke ediwak isua, ibat mbon oro ẹsitade uyo ẹnyụn̄ ẹn̄wọn̄de wine ke ini Editi ekesisọsụhọde, utu ke ndidọdọk. Edi idahaemi, ibat emi edidọdọk kpukpru isua. Ndi akpana iyak emi afịna nnyịn? Baba. Yak ineme ntak emi nnyịn mîkpayakke n̄kpọ emi afịna nnyịn.

 ¹³ “Jehovah ọmọfiọk mmọ eke ẹnyenede enye.” (2 Timothy 2:19) Nditọete oro ẹsibatde mbon oro ẹtade uyo ẹnyụn̄ ẹn̄wọn̄de wine ke ini Editi isifiọkke m̀mê anie ke otu mbon oro mmimọ ibatde ke Abasi eyet aran, edi Jehovah ọfiọk. Ntre, ibat emi esisịne mbon oro ẹkerede ke Abasi eyet mmimọ aran, edi Abasi iyetke mmọ. Ke uwụtn̄kpọ, ndusụk mbon oro ẹkesitade uyo ẹnyụn̄ ẹn̄wọn̄de wine ke ini edem, ẹma ẹtre. N̄ko, mfịna ibuot ekeme ndinam ndusụk owo ẹkere ke ẹmek mmimọ nditiene Christ n̄kara ke heaven. Ke akpanikọ, nnyịn ikemeke ndifiọk ata ibat mbon oro Abasi eyetde aran, emi ẹsụk ẹdude ke isọn̄ mfịn.

14. Ndi Bible asiak ibat mbon oro ẹyetde aran, emi ẹdidude ke isọn̄ ke ini akwa ukụt ọtọn̄ọde?

¹⁴ Mbon oro ẹyetde aran ẹyedu ke ediwak itie ke isọn̄ ke ini Jesus edidide nditan̄ mmọ n̄ka heaven. Bible ọdọhọ ke Jesus “oyosio mme angel esie ọdọn̄ ye akwa uyom obukpon̄, mmọ ẹyenyụn̄ ẹtan̄ ndimek ikọt esie ke ikpehe ofụm mbinan̄ ẹbon ọtọkiet, ọtọn̄ọde ke utịt ikpaenyọn̄ kiet tutu esịm utịt eken.” (Matthew 24:31) Bible ọdọhọ n̄ko ke ekpri ibat mbon oro ẹyetde aran ẹyedu ke isọn̄ ke mme akpatre usen emi. (Ediyarade 12:17) Edi Bible itịn̄ke m̀mê owo ifan̄ ke otu mmọ ẹdidu ke isọn̄ ke ini akwa ukụt ọtọn̄ọde.

15, 16. Nso ke ikpọfiọk iban̄a mbon oro Jehovah emekde ndika heaven?

¹⁵ Jehovah esibiere ini emi enye edimekde mbon oro ẹditienede Jesus ikara ke heaven. (Rome 8:28-30) Jehovah ọkọtọn̄ọ ndimek mbon emi ẹditienede Jesus ikara ke heaven ke Jesus ama ekeset. Etie nte ẹma ẹyet kpukpru  ata mme Christian ke eyo mme apostle, aran. Ke ata ediwak isua ke eyo mme apostle ama ekebe, ata ediwak mbon oro ẹkedọhọde ke idi mme Christian, ikekpebeke Jesus. Kpa ye oro, Jehovah ama eyet owo ifan̄ oro ẹkedide ata mme Christian ini oro, aran. Mmọ ẹketie nte wheat oro Jesus ọkọdọhọde ke ọyọkọri ke otu mbiet. (Matthew 13:24-30) Ke mme akpatre usen emi, Jehovah aka iso ndimek mbon emi ẹditienede Jesus ikara ke heaven. ^[2] (Se ikọ idakisọn̄.) Ke ntre, edieke Abasi ebierede ndimek ndusụk ke otu mmọ esisịt ini mbemiso ererimbot emi esịmde utịt, nnyịn ikpekereke ke se enye anamde inenke. (Isaiah 45:9; Daniel 4:35; kot Rome 9:11, 16.) ^[3] (Se ikọ idakisọn̄.) Ana inen̄ede ikpeme mbak nnyịn iditie nte mme anamutom oro ẹkesụkde eteutom mmọ uyo, ke ntak okụk emi enye ekekpede mbon oro ẹkedide utom ke akpatre hour.—Kot Matthew 20:8-15.

¹⁶ Idịghe kpukpru mbon oro ẹdoride enyịn ndika heaven ẹdi “ofụn emi anamde akpanikọ onyụn̄ enyenede ọniọn̄.” (Matthew 24:45-47) Mfịn, Jehovah ye Jesus ẹda ibat ibat owo ẹkpep ata ediwak ikọt Abasi n̄kpọ, kpa nte ekedide ke eyo mme apostle. Ini oro, ibat ibat owo ke otu mbon oro ẹyetde aran ke Abasi akada ewet N̄wed Abasi Christian Usem Greek. Mfịn n̄ko, ibat ibat ke otu mbon oro ẹyetde aran ke Abasi ada ọnọ ikọt esie “udia ke nnennen ini.”

17. Nso ke afo ekpep ke ibuotikọ emi?

¹⁷ Nso ke ikpep ke ibuotikọ emi? Jehovah ebiere ndinam ata ediwak ke otu ikọt esie ẹdu uwem ke nsinsi ke isọn̄, onyụn̄ emek ndusụk ikọt esie ẹka heaven ẹketiene Jesus ẹkara. Jehovah ọnọ kpukpru ikọt esie utịp, ẹdide mbon oro “eyen Jew” adade aban̄a, m̀mê mbon oro “owo duop” adade aban̄a. Ndien enye oyom kpukpru mmọ ẹnịm mbet imọ ẹnyụn̄ ẹsọn̄ọ ẹda ẹnam n̄kpọ imọ. Ana kpukpru ikọt Abasi ẹsụhọde idem. Ana kpukpru mmọ ẹdiana kiet ẹkpono Jehovah. Ndien ana kpukpru mmọ ẹnam emem odu ke esop. Nte utịt ererimbot emi asan̄ade ekpere, ẹyak kpukpru nnyịn ika iso inam n̄kpọ Jehovah inyụn̄ itiene Jesus nte otuerọn̄ kiet.