1, 2. (a) Nso isinam ikọt Abasi ẹkop inemesịt mfịn? (b) Didie ke mme ete ye eka ye mbiowo ẹkeme ndin̄wam mme uyen ẹdiọn̄ọ se ndina baptism ọwọrọde?

EBIOWO kiet ọkọdọhọ Christopher emi edide isua 12 ete: “Mmọdiọn̄ọ fi toto ke edet iba. Esịt enem mi ndikop ke oyom ndina baptism. Mbọk yak mbụp fi ise, ‘Nso inam oyom ndina baptism?’” Enyene se inamde ebiowo emi obụp mbụme emi. Esịt esinem nnyịn ndikụt ediwak uyen nnyịn ẹnade baptism kpukpru isua. (Ecclesiastes 12:1) Edi ọkpọfọn mme ete ye eka emi ẹdide Mme Ntiense ye mbiowo ẹkụt ẹte ke mme uyen ẹbiere ke idemmọ ndina baptism, ndien ke mmọ ẹdiọn̄ọ se owo ndina baptism ọwọrọde.

² Bible owụt ke ọtọn̄ọde ke ini emi owo ayakde idem ọnọ Abasi onyụn̄ anade baptism, ke Abasi edinyene owo oro.  Jehovah ọyọdiọn̄ owo oro, edi Satan ọyọbiọn̄ọ enye. (Mme N̄ke 10:22; 1 Peter 5:8) Ntak edi oro anade mme ete ye eka ẹda ini ẹkpep nditọ mmọ se owo ndidi mbet Christ ọwọrọde. Ana mbiowo ẹn̄wam nditọ emi ete ye eka mmọ mîdụhe ke esop Abasi ẹdiọn̄ọ se owo ndiyak idem nnọ Abasi nnyụn̄ nna baptism ọwọrọde. (Kot Luke 14:27-30.) Kpa nte oyomde owo enen̄ede eben̄e idem mbemiso enye ekeme ndibọp ufọk mma, ntre n̄ko ke oyom mme uyen ẹnen̄ede ẹben̄e idem mbemiso ẹnade baptism man mmọ ẹkpekeme ndisọn̄ọ nda nnam n̄kpọ Jehovah “tutu esịm utịt.” (Matthew 24:13) Nso idin̄wam mme uyen ẹbiere ndinam n̄kpọ Jehovah ke nsinsi? Ẹyak ise ise.

3. (a) Didie ke ikọ Jesus ye eke Peter ẹnam nnyịn idiọn̄ọ ke baptism edi ata akpan n̄kpọ? (Matthew 28:19, 20; 1 Peter 3:21) (b) Ewe mbụme ke iyom ndineme mban̄a, ndien ntak-a?

³ Ndi afo edi uyen, ndien ọdọn̄ fi ndina baptism? Edieke edide ntre, ata eti n̄kpọ ọdọn̄ fi oro! Edi ata n̄kpọ ukpono ndina baptism nnyụn̄ ndi Ntiense Jehovah. Se kpukpru Christian ẹkpenamde edi oro, emi onyụn̄ edi kiet ke otu n̄kpọ emi anade owo anam man ọbọhọ akwa ukụt. (Matthew 28:19, 20; 1 Peter 3:21) Ke ini afo anade baptism, ọwọrọ ọmọn̄wọn̄ọ ndinam n̄kpọ Jehovah ke nsinsi. Imọdiọn̄ọ ke emenen̄ede oyom ndinam se ọn̄wọn̄ọde emi, ntem mme mbụme emi ẹyen̄wam fi ọdiọn̄ọ m̀mê emeben̄e idem ndina baptism: (1) Ndi mmokpon nnyụn̄ ndiọn̄ọ idem n̄kem ndibiere ndina baptism? (2) Ndi ami ke idemmi mbiere ndinam emi? (3) Ndi mmọdiọn̄ọ se owo ndiyak idem nnọ Jehovah ọwọrọde? Yak ineme mme mbụme emi.

4, 5. (a) Ntak emi mîdịghe ikpọ owo kpọt ẹkpena baptism? (b) Nso ke ndikpon ndiọn̄ọ idem ọwọrọ?

⁴ Bible idọhọke ke ikpọ owo kpọt ẹkpena baptism, inyụn̄ isiakke isua emi anade owo esịm mbemiso enye anade baptism. Mme N̄ke 20:11 ọdọhọ ete: “Se eyenọwọn̄ anamde ke ẹda ẹfiọk m̀mê edinam esie asana onyụn̄ enen.” Emi owụt ke eyenọwọn̄ ekeme ndifiọk ndinam eti n̄kpọ onyụn̄ ọfiọk se ndiyak idem nnọ Abasi ọwọrọde. Ntre, baptism edi ata akpan n̄kpọ emi eyenọwọn̄ emi okponde, ọdiọn̄ọde idem ekem, onyụn̄ ayakde idem ọnọ Jehovah, akpanamde.—Mme N̄ke 20:7.

⁵ Nso ke ndikpon ndiọn̄ọ idem ọwọrọ? Ndikpon ndiọn̄ọ idem idịghe n̄kpọ isua emana m̀mê owo ndinyene idem akwaowo. Owo emi okponde ọdiọn̄ọ idem ke Bible okot owo ‘oro ọkọride  esịm ọyọhọ idaha.’ Enye ọdọhọ ke utọ owo emi ọnọ ‘ukeme ufiọk n̄kpọ esie ukpep’ man enye ọdiọn̄ọ se inende ye se ikwan̄ade. (Mme Hebrew 5:14) Utọ owo emi ọdiọn̄ọ se inende onyụn̄ ebiere ke idemesie ndinam se inende. Ọsọsọn̄ owo ndinam enye anam idiọkn̄kpọ. Enye isibetke-bet owo editeme enye anam se inende. Ana uyen emi anade baptism esinam se inende ekpededi ete ye eka esie, m̀mê akwaowo en̄wen idụhe ye enye.—Men Philippi 2:12 domo.

6, 7. (a) Tịn̄ se ikpakanamde Daniel ọkpọn̄ Abasi ke ini enye okodude ke Babylon. (b) Didie ke Daniel okowụt ke imọdiọn̄ọ idem?

⁶ Ndi uyen ekeme ndidiọn̄ọ idem ntem? Da Daniel ke uwụtn̄kpọ. Ekeme ndidi enye ekedi uyen ke ini ẹkemende enye ẹkpọn̄ ete ye eka esie ẹka Babylon. Daniel okodụn̄ ye mbon emi mîkokponoke Jehovah. Edi n̄kpọ eketie didie ye Daniel? Ẹma ẹnen̄ede ẹkpono enye ke Babylon. Enye ekedi kiet ke otu n̄kparawa ifan̄ oro ẹkemekde ẹte ẹnam utom ẹnọ edidem. (Daniel 1:3-5, 13) Etie nte akwa itie emi enye ekenyenede ke Babylon ikpekesịmke enye ubọk, edieke enye okpokodude ke Israel.

⁷ Ndi akwa itie emi ama anam ibuot okpon enye? Ndi enye ama ayak mbon Babylon ẹbiat enye m̀mê ẹnam enye etre ndikpono Abasi? Baba! Bible ọdọhọ ke ini Daniel okodude ke Babylon, enye ama “ebiere ke esịt esie ete imọ idisabakede idem,” idinyụn̄ isịnke ubọk ke n̄kpọ ekededi emi edinamde imọ ikpono abasi mmọ. (Daniel 1:8)  Oro owụt ke enye ama enen̄ede ọdiọn̄ọ idem.

8. Nso ke uwụtn̄kpọ Daniel ekeme ndikpep fi?

⁸ Nso ke uwụtn̄kpọ Daniel ekeme ndikpep fi? Uyen oro ọdiọn̄ọde idem idikpọn̄ke se enye enịmde ke akpanikọ, ekpededi ẹyom ndinam enye nso. Enye itiehe nte okube emi edide ama odu ke ebiet emi etiede awawa awawa, enye okpụhọ etie awawa awawa, onyụn̄ odu ke ebiet emi etiede ndatndat ndatndat, enye okpụhọ etie ndatndat ndatndat. Enye isidịghe owo Abasi ke Ufọkmbono Obio Ubọn̄ edi ama esịm ufọkn̄wed enye edi owo ererimbot. Enye esisọn̄ọ ada ke ini ẹdomode enye idomo.—Kot Ephesus 4:14, 15.

9, 10. (a) Ntak emi ọfọnde mme uyen ẹkere ẹban̄a nte mmọ ẹkenamde n̄kpọ ke ini ẹkedomode mmọ? (b) Nso ke ndina baptism ọwọrọ?

⁹ Imọdiọn̄ọ ke idụhe owo eke ọfọnde ama, ikpọ owo ye nditọwọn̄ ẹsinam ndudue ndusụk ini. (Ecclesiastes 7:20) Edi edieke oyomde ndina baptism, ọkpọfọn odụn̄ọde idemfo ese m̀mê emenen̄ede ebiere ndinịm ewụhọ Jehovah. Bụp idemfo ete, ‘Ndi emehe mi ndisikop uyo Jehovah?’ Afo akanam n̄kpọ didie ke ini ẹkedomode fi idomo? Ndi ama ọdiọn̄ọ nnennen n̄kpọ emi akpanamde? Ndi enyene n̄kpọ emi enen̄erede ọdiọn̄ọ, ndien owo ọdọhọ fi esịn idem anam man edi n̄kpọ ke ererimbot Satan emi? Edieke se ikọwọrọde Daniel ọkpọwọrọde fi, ndi ọkpọdiọn̄ọ se Jehovah oyomde fi anam?—Ephesus 5:17.

¹⁰ Ntak emi ọfọnde ọdiọn̄ọ ibọrọ mbụme emi? Koro emi ayan̄wam fi ọdiọn̄ọ ke baptism idịghe n̄kpọ mbubru. Ke ini anade baptism, afo anam mme owo ẹdiọn̄ọ ke ama anam akpan un̄wọn̄ọ ọnọ Jehovah. Afo ama ọn̄wọn̄ọ ke iyada ofụri esịt imọ ima enye inyụn̄ inam n̄kpọ esie ke nsinsi. (Mark 12:30) Kpukpru mbon emi ẹnade baptism ana ẹnen̄ede ẹbiere ndinam se mmọ ẹken̄wọn̄ọde ẹnọ Jehovah.—Kot Ecclesiastes 5:4, 5.

11, 12. (a) Nso ke owo oro oyomde ndina baptism okpokụt ete ke imanam? (b) Nso idin̄wam fi ada baptism nte Jehovah adade?

¹¹ Bible ọdọhọ ke kpukpru ikọt Jehovah, esịnede mme uyen, ẹyenam n̄kpọ Jehovah ke imaesịt. (Psalm 110:3) Ntem, ana owo emi oyomde ndina baptism okụt ete ke imọ ibiere ke idemmọ ndina baptism. Ntre, ọkpọfọn afiak odụn̄ọde ntak emi oyomde ndina baptism, akpan akpan edieke edide ẹkemaman fi ẹsịn ke esop.

¹² Ekeme ndidi omokụt ediwak owo ẹnade baptism, ndusụk ẹdi ufan fo m̀mê nditọeka fo. Edi ana enen̄ede ekpeme mbak udûkere ke imokpon ikem ndina baptism m̀mê ke akpana ina koro mbon en̄wen ke ẹna. Nso idin̄wam fi ada baptism nte Jehovah adade? Da  ini tie kere ntak emi baptism edide ata akpan n̄kpọ. Ibuotikọ emi ye enye oro etienede ẹyenam fi ọdiọn̄ọ ediwak ntak emi baptism edide ata akpan n̄kpọ.

13. Nso idin̄wam fi ọfiọk m̀mê emebiere ke ofụri esịt fo ndina baptism?

¹³ N̄kpọ kiet emi edin̄wamde fi ọfiọk m̀mê emebiere ke ofụri esịt fo ndina baptism edi nditie n̄kere nte esibọn̄de akam. Ndi emesibọn̄ akam ọnọ Jehovah kpukpru ini? Nso ke afo esitịn̄ ke ini ọbọn̄de akam? Ibọrọ mbụme emi ekeme ndiwụt adan̄a nte afo enen̄erede ekpere Jehovah. (Psalm 25:4) Ediwak ini, Jehovah esida mme n̄kpọ oro ẹwetde ke Bible ọbọrọ akam nnyịn. N̄kpọ en̄wen oro edinamde enen̄ede ekpere Jehovah onyụn̄ anam n̄kpọ esie ke ofụri esịt, edi ndinyene ata eti ndutịm emi edin̄wamde fi ekpep Ikọ Abasi kpukpru ini. (Joshua 1:8) Bụp idemfo ete: ‘Ndi mmesitie ke idemmi n̄kpep Bible kpukpru ini? Ndi ẹsikpakpak mi ndụk Utuakibuot Ubon nnyịn?’ Nte afo ọbọrọde mbụme emi edin̄wam fi ọfiọk m̀mê afo ke idemfo ebiere ndina baptism.

14. Tịn̄ nte owo ndiyak idem nnọ Abasi okpụhọrede ye owo ndina baptism.

¹⁴ Etie nte ndusụk uyen idiọn̄ọke ke ndiyak idem nnọ Abasi ye ndina baptism idịghe ukem n̄kpọ. Ndusụk uyen ẹkeme ndidọhọ ke mmimọ imayak idem inọ Jehovah, edi iben̄eke idem kan̄a ndina baptism. Ndi owo ekeme ndiyak idem nnọ Jehovah edi iben̄eke idem ndina baptism? Afo ayak idem ọnọ Jehovah ke ini ọbọn̄de akam ọnọ enye onyụn̄ ọn̄wọn̄ọde ndinam n̄kpọ esie ke nsinsi. Ke ini afo anade baptism, afo anam mbon en̄wen ẹdiọn̄ọ ke ama ayak idem ọnọ Jehovah. Ntre, mbemiso afo anade baptism, ọfọn ọdiọn̄ọ se owo ndiyak idem nnọ Abasi ọwọrọde.

15. Nso ke owo ndiyak idem nnọ Abasi ọwọrọ?

¹⁵ Ke ini ayakde idem ọnọ Jehovah, afo ọdọhọ Jehovah ke enye edinyene fi idahaemi, onyụn̄ ọn̄wọn̄ọ ke ndinam n̄kpọ esie edidi ata akpan n̄kpọ ke uwem fo. (Kot Matthew 16:24.) Utọ un̄wọn̄ọ emi idịghe n̄kpọ mbubru. (Matthew 5:33) Ntre, didie ke afo ekeme ndiwụt ke idịghe afo enyene idemfo aba, edi ke Jehovah edinyene fi idahaemi?—Rome 14:8.

16, 17. (a) Nọ uwụtn̄kpọ emi owụtde se ndiyak idem nnọ Abasi ọwọrọde. (b) Nso ke idọhọ Abasi ke ini iyakde idem inọ enye?

¹⁶ Kere ban̄a uwụtn̄kpọ emi. Yak idọhọ ke ufan fo edep ubomisọn̄ ọnọ fi. Enye ọkpọn̄ n̄wed ubomisọn̄ oro ọnọ fi onyụn̄ ọdọhọ ete, “Afo enyene ubomisọn̄ emi. Edi ami ndisikama ukpọhọde, ami ndisinyụn̄ n̄wat.” Ndi ọkpọdọhọ owo ke afo enyene ubomisọn̄ oro? Akpada didie utọ ufan oro?

¹⁷ Ke ini owo ayakde idem ọnọ Jehovah, enye ọdọhọ Abasi ete: “Mmọkpọn̄ uwem mi nnọ fi, afo edinyene mi.” Jehovah oyom owo emi ọn̄wọn̄ọde ke iyada uwem imọ inam n̄kpọ esie anam se enye ọn̄wọn̄ọde oro. Edi nso iditịbe edieke owo oro mîkopke uyo Jehovah onyụn̄ edịbede oyom ima ye owo ererimbot, mîdịghe enyịmede ndinam utom emi mîyakke enye enyene ini aka ukwọrọikọ m̀mê odụk mbono  esop? Owo oro anamde emi inamke se enye ọkọn̄wọn̄ọde ọnọ Jehovah. Enye etie nte owo emi ọnọde owo ubomisọn̄ edi akama ukpọhọde. Ke ini iyakde idem inọ Jehovah, nnyịn idọhọ enye ite, “Afo enyene mi, idịghe ami nnyene idemmi.” Ntem ana inam se Jehovah amade kpukpru ini ekpededi idịghe se nnyịn ikpamade ndinam edi oro. Ẹyak nnyịn ikpebe Jesus emi ọkọdọhọde ete: “N̄koto heaven nsụhọde ndi, idịghe man ndinam uduak idemmi, edi man ndinam uduak enye emi ọkọdọn̄de mi.”—John 6:38.

18, 19. (a) Didie ke ikọ Rose ye Christopher ẹwụt ke ndina baptism anam ikop inemesịt ndinam n̄kpọ Jehovah? (b) Afo ada didie ndina baptism?

¹⁸ Se inemede emi owụt ke baptism idịghe n̄kpọ mbubru. Edi ata n̄kpọ ukpono ndiyak idem nnọ Jehovah nnyụn̄ nna baptism. Mme uyen oro ẹmade Jehovah ẹnyụn̄ ẹfiọkde se ndiyak idem nnọ enye ọwọrọde, ẹsima ndiyak idem nnọ enye nnyụn̄ nna baptism. Mmọ isituaha n̄kpọfiọk ndinam emi. Rose, uyen emi ama akana baptism ọdọhọ ete: “Mmama Jehovah, idụhe n̄kpọ emi enemde mi nte ndinam n̄kpọ esie. Mmenen̄ede ndiọn̄ọ ke n̄kanam nnennen n̄kpọ ke ini n̄kebierede ndina baptism.”

¹⁹ Nso ke aban̄a Christopher emi iketịn̄de iban̄a ke ntọn̄ọ ntọn̄ọ ibuotikọ emi? Enye ada didie ubiere emi enye akanamde ndina baptism ke ini enye ekedide isua 12? Enye ọdọhọ ke esịt enen̄ede enem imọ nte ikebierede ndina baptism ini oro. Enye ọkọtọn̄ọ utom usiakusụn̄ ofụri ini ke ini enye ekededi isua 17. Enye ekedi asan̄autom unamutom ke ini enye ekededi isua 18, onyụn̄ odu ke Bethel idahaemi. Enye ọdọhọ ete: “N̄kanam nnennen n̄kpọ ke ini n̄kebierede ndina baptism. Mmada ofụri uwem mi nnam n̄kpọ nnọ Jehovah ye esop esie.” Didie ke afo ekeme ndiben̄e idem ndina baptism? Ẹyebọrọ mbụme emi ke ibuotikọ oro etienede.