Yom N̄kpọ Emi Enen̄erede Ọfọn Akan Gold
Ndi akanam omoyom gold onyụn̄ okụt enye? Ibat ibat owo emi ẹyomde gold ẹsikụt. Edi, ediwak miliọn owo ẹkụt n̄kpọ emi enen̄erede ọfọn akan gold, oro edi, ọniọn̄ emi Abasi ọnọde. Owo ikemeke “ndida ata gold n̄kpụhọ mbọ enye.”—Job 28:12, 15.
IMEKEME ndidọhọ ke mbon oro ẹmade Bible ẹtie nte mbon oro ẹsidọkde isọn̄ ẹyom gold. Oyom mbon oro ẹmade Bible ẹsịn idem ẹdụn̄ọde enye man ẹnyene ọniọn̄ emi Abasi ọnọde. Man ikeme ndinam emi, ẹyak ineme usụn̄ ita emi ẹsidade ẹyom gold.
KE INI OKỤTDE EKPRI MBEN̄E GOLD!
Yak idọhọ ke akasan̄a ke mbeninyan̄. Nte okosụk asan̄ade, afo okụt ata ekpri itiat emi esemde ndien afo onụhọ emen onyụn̄ okụt ke edi ekpri mben̄e gold. Enye ekpri etieti onyụn̄ enen̄ede ọsọn̄ ndikụt akan ata eti daimọn. Afo asuan enyịn ete ise m̀mê iyokụt en̄wen.
Kpasụk ntre ke ekedi akpa ini emi Mme Ntiense Jehovah ẹkedide ufọk fo ẹdineme n̄kpọ ke Bible ye afo. Ekeme ndidi ke eteti akpa n̄kpọ emi okokụtde ke Bible emi eketiede nte okụt ekpri mben̄e gold. Eyedi emi eketịbe akpa ini emi okokụtde enyịn̄ Abasi Jehovah ke Bible. (Ps. 83:18) Anaedi ẹma ẹkpep fi n̄ko ke emekeme ndidi ufan Jehovah. (Jas. 2:23) Afo ama ọsọsọp ọfiọk ke omokụt n̄kpọ emi enen̄erede ọfọn akan gold! Anaedi ama ọdọn̄ fi ndifiọk mme n̄kpọ en̄wen mban̄a Abasi.
SỊN IDEM YOM!
Ndusụk ini, n̄kpri mben̄e gold ẹsiboho ke ndusụk mbeninyan̄. Gold emi ẹsibuaha ye mbat. Mbon oro ẹsiyomde gold ẹsision̄o gold emi ẹkpade ediwak miliọn naira ke mbat emi.
Ke ini ọkọtọn̄ọde ndikpep Bible ye Mme Ntiense Jehovah, afo eketie nte owo emi asan̄ade oyom n̄kpri mben̄e gold ke mbeninyan̄. Nditie n̄kere mme itie N̄wed Abasi kiet kiet oro ekpepde ama anam fi etetịm ọfiọk n̄kpọ aban̄a Abasi. Nte afo akakade iso ndikpep n̄kpọ mban̄a Jehovah, ntre ke afo ekedifiọk nte akpasan̄ade ekpere enye, se akpanamde man enye ama fi, ye se okponyụn̄ anamde man enyene nsinsi uwem.—Jas. 4:8; Jude 20, 21.
Ndi emesisịn idem ekpep Bible nte mme owo ẹsisịnde idem ẹyom gold?
Kpa nte owo emi esiyomde gold esisịnde idem oyom ebiet emi n̄kpri mben̄e gold odude ke mbeninyan̄, ekeme ndidi afo ama enen̄ede esịn idem oyom ndifiọk ediwak n̄kpọ mban̄a Abasi. Ke ama ekedi edifiọk mme akpan n̄kpọ oro Bible Matt. 28:19, 20.
ekpepde, anaedi emi ama anam fi ayak idem ọnọ Jehovah onyụn̄ ana baptism.—KA ISO NDISỊN IDEM NYOM!
Owo emi esiyomde gold ekeme ndikụt n̄kpri mben̄e gold ke esịt ikpọ itiat. Gold emi esidude ke ndusụk itiat emi esiwak tutu oyom ẹbobom itiat oro man ẹkeme ndision̄o enye. Edi owo isisọpke ifiọk adan̄a nte gold awakde ke itiat, sia itiat ekeme ndinen̄ede n̄kpon edi ata ekpri gold esịne ke esịt. Kpa ye oro, owo emi esiyomde gold esisịn idem obom itiat oro man osion̄o gold ọkpọkọm ekpri didie, sia enye ọdiọn̄ọ adan̄a nte gold ọsọn̄de urua.
Kpasụk ntre n̄ko, ke ama ọkọfiọk “akpa ukpepn̄kpọ emi aban̄ade Christ,” oyom enen̄ede esịn idem ekpep mbufa n̄kpọ en̄wen ke Bible onyụn̄ anam se ekpepde. (Heb. 6:1, 2) Nso ke afo ekeme ndinam man aka iso ọbọ ufọn ke ini ekpepde Bible ke idemfo, kpa ye oro edide emekpep Bible ke ediwak isua idahaemi?
Ma ndisikpep Bible. Kûkot enye enyọn̄ enyọn̄, nen̄ede kere ban̄a se okotde. Edieke akade iso ndisịn idem n̄kpep Bible, Abasi ayada fi usụn̄ onyụn̄ anam fi enyene ọniọn̄. (Rome 11:33) Ke ini afo ekpepde Bible, da mme n̄kpọ emi esop Abasi ẹsion̄ode ndida nnam ndụn̄ọde dụn̄ọde se ekpepde man enen̄ede ọfiọk Bible. Nyene ime ke ini oyomde ndausụn̄ ye ibọrọ mbụme fo ke Bible. Dọhọ mbon en̄wen ẹtịn̄ mme itie N̄wed Abasi ye mme n̄kpọ oro mmọ ẹkekotde ke n̄wed nnyịn, emi ẹnen̄erede an̄wam mmọ. Nam mbon en̄wen ẹfiọk mme n̄kpọ oro okokụtde ke ini ekpepde Bible.
Edi ti ke ukpepke Bible man enyene ifiọk ibuot kpọt. Apostle Paul ọkọdọhọ ke “ifiọk ananam owo okohode idem.” (1 Cor. 8:1) Mmọdo, nen̄ede sụhọde idem nyụn̄ buọt idem ye Jehovah. Ndisinịm ukpepn̄kpọ Bible ubon nnyụn̄ n̄kpep Bible ke idemfo kpukpru ini ayan̄wam fi odu uwem nte Jehovah oyomde, onyụn̄ anam fi ekeme ndin̄wam mbon en̄wen. Se ikam ikande oro edi ke afo eyenen̄ede okop inemesịt sia omokụt n̄kpọ emi enen̄erede ọfọn akan gold!—N̄ke 3:13, 14.