Ẹsiak edu usụkkiet emi anade Christian enyene ke itie Bible oro. Itie oro ọdọhọ ke “mbun̄wụm spirit edi ima, idatesịt, emem, anyanime, mfọnido, eti ido, mbuọtidem, ifụre ifụre ido, [ye] mfara ke idem.” Edi nti edu emi spirit Abasi ekemede ndin̄wam nnyịn inyene ikụreke ke oro.

Isan̄a didie idiọn̄ọ? Mbemiso apostle Paul asiakde mbun̄wụm spirit, enye ọkọdọhọ ke “mme utom obụkidem . . . ẹdi use, mbubiam ido, obukpo ido, ukpono ndem, ubụpekpo, usua, utọk, ufụp, obom obom iyatesịt, ndomoidem, ubahade, isio n̄ka, isịnenyịn, mbun̄wọn̄i, uyom uyom usọrọ, ye mme n̄kpọ eke ẹbietde mmọ emi.” (Gal. 5:19-21) Ntre ekpedi Paul ama oyom ndisụk mbat “mme utom obụkidem” n̄ka, enye akpakasiak mbon en̄wen, utọ nte eke Colossae 3:5. Ukem ntre n̄ko, ke enye ama akasiak nti edu usụkkiet oro, enye ama ọdọhọ: “Ibet ndomokiet ibiọn̄ọke orụk edu emi.” Emi owụt ke Paul ikodomoke ndisiak kpukpru nti edu emi edisana spirit ekemede ndin̄wam nnyịn inyene.

Se inamde itịn̄ ntre edi nnyịn ndimen mbun̄wụm spirit ndomo ye mbun̄wụm un̄wana emi Paul akasiakde ke leta emi enye ekewetde ọnọ esop Ephesus ete: “Mbun̄wụm un̄wana esịne kpukpru orụk eti ido ye edinen ido ye akpanikọ.” (Eph. 5:8, 9) Omokụt do ke eti ido ye edinen ido ye akpanikọ ẹsịne ke otu mme edu emi Bible okotde “mbun̄wụm un̄wana,” edi “eti ido” afiak esịne n̄ko ke otu mme edu emi Bible okotde “mbun̄wụm spirit.”

Ukem ntre n̄ko, Paul ama abat nti edu itiokiet emi enye ọkọdọhọde Timothy enyene, oro edi, “edinen ido, uten̄e Abasi, mbuọtidem, ima, ime, ye ifụre ifụre ido.” (1 Tim. 6:11) Ita kpọt ke otu oro (mbuọtidem, ima, ye ifụre ifụre ido) ke ẹsiak ke otu “mbun̄wụm spirit.” Edi spirit Abasi mîn̄wamke Timothy, enye idikemeke ndinyene edinen ido, uten̄e Abasi, ye ime.—Men Colossae 3:12; 2 Peter 1:5-7 domo.

Ntre Galatia 5:22, 23 ibatke kpukpru mme edu emi anade Christian enyene. Spirit Abasi ekeme ndin̄wam nnyịn inyene mme edu usụkkiet emi ẹkotde “mbun̄wụm spirit.” Edi enyene ediwak edu efen emi anade inyene man isọn̄ idem ke esop inyụn̄ ‘imen obufa owo emi ẹkebotde ekekem ye uduak Abasi ke ata edinen ido ye akpanikọ isịne.’—Eph. 4:24.