1. Nso ke kpukpru nnyịn ikpama iman nnyịn ẹnam?

SISTA kiet emi ekerede Pauline * ọdọhọ ete: “Toto ke ini emi n̄kọtọn̄ọde ndikpep Bible, ama esidọn̄ mi nte kpukpru owo ke ubon mi ẹkpetienede mi ẹdu ke Paradise. N̄kenen̄ede nyom Wayne ebe mi ye ekpri eyen erenowo nnyịn ẹtiene mi ẹkpono Jehovah.” Ndi emenyene iman * emi mîdiọn̄ọke Jehovah mînyụn̄ imaha enye kan̄a? Ekeme ndidi ọdọn̄ fi nte mmọ ẹkpetienede fi ẹkpono Jehovah nte ọkọdọn̄de Pauline.

2. Mme mbụme ewe ke idibọrọ ke ibuotikọ emi?

² Nnyịn ikemeke ndinyịk iman nnyịn ẹnyịme eti mbụk, edi imekeme ndin̄wam mmọ ẹtie ẹkere ẹban̄a etop Bible emi mmọ ẹkopde ẹnyụn̄ ẹdikpono Jehovah. (2 Tim. 3:14, 15) Ntak emi ikpọkwọrọde ikọ inọ iman nnyịn? Ntak emi ikpekerede iban̄a nte etiede mmọ ke idem? Nso ke ikeme ndinam man in̄wam iman nnyịn ẹtiene nnyịn ẹma Jehovah? Didie ke kpukpru nditọete ke esop nnyịn ẹkeme ndin̄wam nnyịn?

3. Udiana Peter 3:9 owụt ke nso ikpanam ikwọrọ ikọ inọ iman nnyịn?

³ Ekpri ini ayak, Jehovah ọmọn̄ osobo idiọk ererimbot emi. “Mbon oro ẹnyenede eti esịt oro edinamde mmọ ẹnyene nsinsi uwem” kpọt ẹdibọhọ. (Utom 13:48) Imesinen̄ede ibiat ini inyụn̄ ida odudu nnyịn ikwọrọ ikọ inọ mbon emi nnyịn mîkam idiọn̄ọke ke obio nnyịn, ntre nnyịn iduehe edieke ọdọn̄de nnyịn ndikwọrọ n̄ko nnọ iman nnyịn man mmọ ẹditiene ẹkpono Jehovah. Jehovah emi edide edima  Ete nnyịn “[iyomke] baba owo kiet atak edi oyom kpukpru owo ẹkabade esịt.”—Kot 2 Peter 3:9.

4. Nso ndudue ke ikeme ndinam ke ini ikwọrọde ikọ inọ iman nnyịn?

⁴ Inaha ifre ke eti usụn̄ odu emi ikemede ndinam mme owo ẹkop etop emi edinamde ẹnyan̄a mmọ, idiọk usụn̄ onyụn̄ odu. Ke uwụtn̄kpọ, imekeme nditịn̄ ikọ ukpono ukpono ke ini ikwọrọde ikọ inọ mbon emi nnyịn mîfiọkke, edi imekeme nditop iman nnyịn nte ata.

5. Nso ke ikpeti mbemiso idomode ndikwọrọ ikọ nnọ iman nnyịn?

⁵ Ke ini itide akpa ini emi ikodomode ndikwọrọ ikọ nnọ iman nnyịn, ediwak nnyịn imekeme nditua n̄kpọfiọk nte ikanamde n̄kpọ ye mmọ. Apostle Paul ọkọnọ mme Christian item ete: “Ẹyak ikọ mbufo enyene inem kpukpru ini, nte n̄kpọ eke ẹsịnde inụn̄, man mbufo ẹfiọk nte ẹkpenọde owo kiet kiet ibọrọ.” (Col. 4:5, 6) Ọfọn isiti item emi ini ekededi emi ikwọrọde ikọ inọ iman nnyịn. Mîdịghe ntre, imekeme ndinam esịt ayayat mmọ utu ke ndikam n̄n̄wam mmọ ẹkpan̄ utọn̄ ẹnọ nnyịn.

6-7. Nọ uwụtn̄kpọ emi owụtde ntak emi ọfọnde ikere iban̄a nte etiede ebe m̀mê n̄wan nnyịn emi mîdịghe kan̄a Ntiense Jehovah ke idem.

⁶ Kere ban̄a nte etiede mmọ ke idem. Pauline emi iketịn̄de iban̄a ke akpa ikpehe ọdọhọ ete: “Ke nsonso oro, n̄kukụre se n̄kesiyomde ndineme ye ebe mi ekedi n̄kpọ aban̄ade Abasi ye Bible. Nnyịn ikesitiehe ineme iban̄a mme n̄kpọ en̄wen.” Edi Wayne ebe Pauline ikenen̄ekede ifiọk Bible, ntre se n̄wan esie ekesitịn̄de ikesin̄wan̄ake enye. Eketie enye nte ke kpukpru se ibehede n̄wan esie edi n̄kpọ ido ukpono  esie. Enye ekekere ke ẹbian̄a n̄wan imọ ẹmen ẹsịn ke idiọk n̄ka.

⁷ Pauline enyịme ke enyene ini emi imọ ikesiwakde ndidu ye nditọete n̄kan ke mbubreyo ye utịturua—ke mbono esop, ke ukwọrọikọ, m̀mê ke ufọk nditọete. Pauline ọdọhọ ete: “Wayne ama esikop ndobo sia ndusụk ini enye ikesikwe owo ndomokiet ke ufọk ini ọnyọn̄de n̄kpọ edi.” Ama esidọn̄ enye ndidu ye n̄wan ye eyen esie. Enye ikọdiọn̄ọke mbon emi mmọ ẹdude kiet, okonyụn̄ etie enye nte ke n̄wan esie ama mbufa ufan esie emi akan imọ. Wayne ama ọdọhọ ke imọn̄ isio Pauline ndọ. Ndi emekeme ndikere nsio nsio usụn̄ emi Pauline okpokowụtde ke imekere iban̄a nte etiede ebe imọ ke idem?

8. Akpa Peter 3:1, 2 owụt ke nso ikeme ndinen̄ede ntụk iman nnyịn n̄kan?

⁸ Nịm eti uwụtn̄kpọ. Se nnyịn inamde esinen̄ede otụk iman nnyịn akan se itịn̄de. (Kot 1 Peter 3:1, 2.) Pauline ama edikụt ke emi edi akpanikọ. Enye ọdọhọ ete: “Mma mfiọk ke Wayne ama nnyịn, ke enye ikenen̄ekede iyom ndisio mi ndọ. Edi enye ndikọdọhọ ke imọn̄ isio mi ndọ ama anam n̄kụt ke ana ntọn̄ọ ndinam n̄kpọ ye enye nte Jehovah oyomde. Utu ke ndikọbọ ke ndikwọrọ ikọ nnọ enye, akana nnyene eti uwem.” Pauline ama etre ndisidomo ndinyịk ebe esie eneme nneme Bible, onyụn̄ ọtọn̄ọ ndisineme mban̄a mme n̄kpọ en̄wen ye enye. Wayne ama edikụt ke enye anam n̄kpọ emem emem akan akpa, ke eyen mmọ enen̄ede enyene ido onyụn̄ okop item. (N̄ke 31:18, 27, 28) Ini Wayne okokụtde nte Ikọ Abasi anamde n̄wan ye eyen esie ẹkpụhọde, enye ama ọtọn̄ọ ndikpan̄ utọn̄ n̄kop nnyụn̄ ntie n̄kere se Ikọ Abasi etịn̄de.—1 Cor. 7:12-14, 16.

9. Ntak emi anade ika iso idomo ndin̄wam iman nnyịn?

 ⁹ Ka iso domo ndin̄wam iman fo. Jehovah enịm uwụtn̄kpọ ọnọ nnyịn. Enye esika iso ndinọ mme owo ifet ẹkpan̄ utọn̄ ẹkop eti mbụk man mmọ edu uwem ke nsinsi. (Jer. 7:25) Apostle Paul ama onyụn̄ ọdọhọ Timothy aka iso esịn idem an̄wam mme owo. Ntak-a? Sia oro ayanam enye anyan̄a idemesie ye mbon emi ẹkopde uyo esie. (1 Tim. 4:16) Imama iman nnyịn, oro esinam iyom mmọ ẹfiọk akpanikọ emi odude ke Bible. Nte ini akakade, se Pauline eketịn̄de onyụn̄ anamde ama an̄wam ubon esie. Esịt enem enye idahaemi nte ebe esie etienede enye anam n̄kpọ Jehovah. Mmọ mbiba ẹdi mme asiakusụn̄ ofụri ini, ebe esie onyụn̄ edi ebiowo.

10. Ntak emi oyomde inyene ime?

¹⁰ Nyene ime. Ima idu uwem nte Abasi ọdọhọde, ekeme ndisọn̄ iman nnyịn ndinyịme se inịmde ye nte idude uwem idahaemi. Akpa n̄kpọ emi mmọ ẹsiwakde ndikụt esidi ke nnyịn itieneke mmọ idia mme usọrọ ido ukpono aba inyụn̄ itieneke isịn idem ke mbre ukara. Ndusụk iman nnyịn ẹkeme ndiyat esịt ye nnyịn ke nsonso oro. (Matt. 10:35, 36) Edi inaha ikere ke mmọ idikpụhọkede tutu amama. Edieke itrede ndidomo ndinam se inịmde an̄wan̄a mmọ, ọwọrọ imebiere ikpe inọ mmọ ke mmọ idotke ndinyene nsinsi uwem. Jehovah idọn̄ke nnyịn ibiere ikpe inọ mme owo, Jesus ke enye ọnọ utom enye oro. (John 5:22) Edieke inyenede ime ye iman nnyịn, ama aka ko, mmọ ẹkeme ndima ndikop ukwọrọikọ.—Se ekebe emi “ Da Ikpehe Intanet Nnyịn Kpep Iman Fo N̄kpọ.”

11-13. Nte Alice akanamde n̄kpọ ye ete ye eka esie ekpep fi nso?

¹¹ Fọn ido ye iman fo, edi kûyak mmọ ẹnam fi okpụhọ ekikere. (N̄ke 15:2) Da Alice ke uwụtn̄kpọ. Enye okodu ke ebiet emi oyomde usụn̄ ọkpọn̄ ete ye eka esie ini enye ekekpepde n̄kpọ aban̄a Jehovah. Ete ye eka esie ẹma ẹsịn idem etieti ke mbre ukara ikonyụn̄ inịmke ke Abasi odu. Enye ama okụt ke edi se isọpde-sọp itịn̄ nti n̄kpọ emi imọ ikpepde inọ mmọ. Alice ọdọhọ ete: “Edieke mûsọpke-sọp utịn̄ se enịmde unọ ubon mbufo, mmọ ẹyeyat esịt etieti ye afo ẹma ẹdidiọn̄ọ.” Enye ama esiyom mme ibuotikọ emi enye ekerede ke ete ye eka esie ẹyema, utọ nte enye emi aban̄ade ima. Ekem enye eyewet leta ọnọ mmọ etịn̄ se Bible etịn̄de aban̄a ibuotikọ oro, onyụn̄ obụp mmọ se mmọ ẹkerede. (1 Cor. 13:1-13) Enye ama esikọm ete ye eka esie nte mmọ ẹkebọkde enye ẹnyụn̄ ẹsede enye enyịn, esinyụn̄ ọnọ n̄kpọ ẹsọk mmọ. Ini ekededi emi enye akade ekese ete ye eka esie, enye ama esinam se enye ekekeme man an̄wam eka esie n̄kpọ ke ufọk. Esịt ikenemke mmọ akpa akpa oro Alice eketịn̄de se enye enịmde ọnọ mmọ.

¹² Alice ikesitreke ndikot Bible kpukpru usen ini enye akade ekese ete ye eka esie. Alice ọdọhọ ete: “Oro ama anam eka mi okụt ke ndaha Bible mbre mbre.” Ete Alice ama ebiere ndikpep Bible man ọfiọk se inamde eyen esie okpụhọde, onyụn̄ oyom se adade owụt ke Bible inenke. Alice ọdọhọ ke ima inọ ete imọ Bible, inyụn̄ iwet n̄kpọ isịn ke Bible oro inọ enye. Nso ufọn ke oro akanam? Ete Alice ikekwe ndudue ndomokiet ke Bible, utu ke oro, se enye okokotde ama enen̄ede otụk enye.

¹³ Ana ifọn ido ye iman nnyịn, edi inaha iyak mmọ ẹnam nnyịn ikpụhọ ekikere ekpededi ẹyekọbọ nnyịn. (1 Cor. 4:12b) Eka Alice ama ọkọbọ Alice. Enye ọdọhọ ke eka imọ okokot imọ “idiọk eyen” ini imọ ikanade baptism. Nso ke Alice akanam? Enye ọdọhọ ete: “Utu ke ndifep  ndineme mban̄a obufa ido ukpono mi, mma ntịn̄ ukpono ukpono ye enye ke mmebiere ndidi Ntiense Jehovah, ke ndikpụhọke se n̄kebierede oro. Mma ndomo ndinam enye ọfiọk ke mmama enye etieti. Nnyịn mbiba ima itua, mma nnyụn̄ ntem edinem udia nnọ enye. Toto ke ini oro, eka mi ama ọtọn̄ọ ndikụt ke Bible anam mi n̄kpụhọde.”

14. Ntak emi nnyịn mîkpayakke iman nnyịn ẹnam itre ndinam n̄kpọ Jehovah?

¹⁴ Ekeme ndida ini mbemiso enen̄ede an̄wan̄a iman nnyịn ke ida ndinam n̄kpọ Jehovah ke akpan n̄kpọ. Ke uwụtn̄kpọ, eka Alice ama afiak atua ini Alice ekemekde ndidi asiakusụn̄ ofụri ini utu ke ndika ufọkn̄wed ntaifiọk emi ete ye eka esie ẹkeyomde enye aka. Kpa ye oro, Alice ikokpụhọke ekikere. Alice ọdọhọ ete: “Edieke ayakde ubon fo ẹnam fi okpụhọ ekikere ke n̄kpọ kiet emi ekebierede, mmọ ẹkeme ndidomo ndinam fi okpụhọ ekikere ke mme n̄kpọ en̄wen. Edi edieke ọfọnde ido ye mmọ edi uyakke mmọ ẹnam fi etre ndinam se ekebierede, ndusụk mmọ ẹkeme ndikpan̄ utọn̄ nnọ fi.” Ntre ke okonyụn̄ edi ye Alice. Ete ye eka esie ẹdi mme asiakusụn̄ ofụri ini idahaemi, ete esie onyụn̄ edi ebiowo.

15. Didie ke Matthew 5:14-16 ye 1 Peter 2:12 ẹwụt nte “nti utom” nditọete ẹkemede ndin̄wam iman nnyịn?

¹⁵ Jehovah esida “nti utom” emi mme asan̄autom esie ẹnamde odụri mme owo adian idem. (Kot Matthew 5:14-16; 1 Peter 2:12.) Edieke ebe m̀mê n̄wan fo mîdịghe Ntiense Jehovah kan̄a, ndi enye  osobo ye nditọete ke esop mbufo akpa? Pauline emi iketịn̄de iban̄a ke ntọn̄ọ ntọn̄ọ ama esikot nditọete ẹdi ufọk mmọ man Wayne ebe esie ọdiọn̄ọ mmọ. Wayne eti nte brọda kiet akan̄wamde enye ọdiọn̄ọ utọ mme owo emi Mme Ntiense Jehovah ẹdide. Enye ọdọhọ ete: “Enye ama ọbọ nduọkodudu usen kiet ke itieutom man etie ye ami ese bọl.” Wayne ọdọhọ ke oro ama anam imọ ifiọk ke idịghe n̄kpọ ido ukpono kpọt ke enye esima.

16. Ntak emi ikpokotde iman nnyịn mbono esop?

¹⁶ Ata eti usụn̄ kiet emi ikemede ndin̄wam iman nnyịn edi ndidọhọ mmọ ẹtiene nnyịn ẹdi mbono esop. (1 Cor. 14:24, 25) Akpa mbono esop emi Wayne okodụkde ekedi Editi n̄kpa Christ. Se ikanamde enye enyịme ndidụk ekedi ke edidi ke usuana utom, ke ẹyenyụn̄ ẹsọp ẹsuana. Wayne ọdọhọ ete: “Se ẹkekwọrọde ikenen̄ekede in̄wan̄a mi, edi mme owo oro n̄kosobode do ke nti. Mmọ ẹma ẹsan̄a ẹdikọm mi ubọk ke ofụri esịt. Mma n̄kụt ke mmọ ẹdi nti owo.” Ama enyene ebe ye n̄wan kiet emi ẹkesifọnde uwem ye Pauline, ẹsin̄wam enye ẹse eyen esie enyịn ke mbono esop ye ke ukwọrọikọ. Ntre ini Wayne ekebierede ndikpep mban̄a obufa ido ukpono an̄wan esie, enye ama ọdọhọ brọda oro ekpep imọ Bible.

17. Nso ke nnyịn mîkpọduọhọke idem nnyịn iban̄a, edi ntak emi nnyịn mîkpetreke ndin̄wam iman nnyịn?

¹⁷ Esidọn̄ nnyịn nte kpukpru iman nnyịn ẹkpetienede nnyịn ẹkpono Jehovah. Edi ekeme ndidi mmọ idikponoke Jehovah ekpedi itịme se itetịme ndin̄wam mmọ. Ekpetịbe ntre, nnyịn ikpọduọhọke idem nnyịn ke se mmọ ẹbierede. Nnyịn ikemeke ndinyịk owo ndomokiet enịm se nnyịn inịmde. Kpa ye oro, kûfre ke iman fo ẹma ẹkụt nte esịt enemde fi ke ntak emi okponode Jehovah, oro ekeme nditụk mmọ. Sisịn mmọ ke akam. Da mbufiọk kwọrọ ikọ nọ mmọ. Kûtre ndidomo ndin̄wam mmọ! (Utom 20:20) Nịm ke Jehovah ọyọdiọn̄ ukeme fo. Ndien edieke iman fo ẹmekde ndikop uyo fo, ẹyenyan̄a mmọ!