NDI enyene se akpamade ndinam ke esop Abasi emi mûkemeke ndinam idahaemi? Ekeme ndidi akpama ndinyene ifetutom emi owo en̄wen enyenede, mîdịghe edi ke ọdọn̄ fi ndika iso nnam utom emi afo ekesinamde m̀mê ndisụk nnyene ifetutom emi ekenyenede. Edi idahaemi usọn̄, udọn̄ọ, nsọn̄ọn̄kpọ, m̀mê mbiomo ubon iyakke fi anam ndusụk n̄kpọ aba. Akam ekeme ndidi se ẹkpụhọde ke esop Abasi anam ẹdọhọ fi okûkama aba ifetutom emi afo akakamade ke ediwak isua. Inamke n̄kpọ m̀mê nso idi ntak, ekeme nditie fi nte unamke kpukpru se akpamade ndinam ke n̄kpọ Abasi. Imọdiọn̄ọ ke utọ n̄kpọ emi ekeme ndinam esịt etịmede fi. Kpa ye oro, nso ikeme ndin̄wam fi okûsutie ufụhọ kpukpru ini unyụn̄ uyat esịt? Nso ikeme ndin̄wam fi aka iso adat esịt?

Mbụk John Andinịm Owo Baptism ekeme ndikpep nnyịn akpan n̄kpọ emi edin̄wamde nnyịn ika iso ikop idatesịt. John ama anam ikpọ utom, edi etie nte enye ikekereke ke se ikediwọrọde enye ọkpọwọrọ enye. Etie nte enye ikekereke ke imọ iyedisịne ke ufọk-n̄kpọkọbi ebịghi akan ini emi imọ idade ikwọrọ ikọ. Kpa ye oro, John ama aka iso ndikop idatesịt ke ofụri eyouwem esie. Nso ikan̄wam enye? Didie ke ikeme ndika iso n̄kop idatesịt kpa ye emi n̄kpọ mîsan̄ake nte ikekerede?

Ke n̄kpọ nte April isua 29 eyo Christ, John ama ọtọn̄ọ utom emi Jehovah ọkọnọde enye ete anam mme owo ẹfiọk Messiah emi edidide. Enye ama ọkwọrọ ete: “Ẹkabade esịt, koro obio ubọn̄ heaven ke asan̄a ekpere.” (Matt. 3:2; Luke 1:12-17) Ediwak owo ẹma ẹnam se enye ọkọkwọrọde. Otuowo ẹma ẹkam ẹto anyan usụn̄ ẹdikop ukwọrọikọ esie, ndien ediwak owo ẹma ẹkabade esịt ẹnyụn̄ ẹna baptism. John ama onyụn̄ enyene uko odụri mme adaiso ido ukpono emi ẹkedade idem ke edinen utọn̄ ete ke ẹyesobo mmọ ibọhọke mmọ ẹkabade esịt. (Matt. 3:5-12) Se ikedide akpan n̄kpọ ikan ke otu se enye akanamde ekedi ndinịm Jesus baptism ke n̄kpọ nte October isua 29 eyo Christ. Ọtọn̄ọde ke ini oro, enye ekesinam mme owo ẹtiene Jesus emi ekedide Messiah oro ẹken̄wọn̄ọde.—John 1:32-37.

Ke ntak akpan utom emi John akanamde, Jesus ọkọdọhọ ete: “Ke otu mmọ eke iban  ẹmande, akananam owo idahake ida emi okponde akan John Andinịm Owo Baptism.” (Matt. 11:11) Imenịm ke esịt ama enem John ke kpukpru edidiọn̄ oro Jehovah ọkọdiọn̄de enye. Ukem nte John, ediwak owo mfịn ẹbọ ediwak edidiọn̄ ẹto Jehovah. Uwụtn̄kpọ kiet edi Brọda Terry. Enye ye Sandra an̄wan esie ẹma ẹnam utom uyọhọ ini ẹbe isua 50. Terry ọdọhọ ete: “Mmanam ediwak inem inem utom ke esop Abasi. Mma ndi asiakusụn̄ ofụri ini, nnam utom ke Bethel, ndi akpan asiakusụn̄, esenyịn circuit, ye esenyịn district, ndien idahaemi mfiak ndi akpan asiakusụn̄.” Esinem ndikama nsio nsio ifetutom ke esop Abasi, edi nte idikụtde ke mbụk John, esiyom isịn ukeme inam n̄kpọ man ikeme ndika iso n̄kop idatesịt ini n̄kpọ okpụhọrede ke uwem nnyịn.

John Andinịm Owo Baptism ama esima utom ekededi emi Jehovah ọkọnọde enye, n̄kpọ kiet emi akanamde enye aka iso okop idatesịt ekedi oro. Ke uwụtn̄kpọ, ke Jesus ama akana baptism, mme mbet John ẹma ẹtọn̄ọ ndisụhọde ke adan̄aemi eke Jesus ẹketọn̄ọde ndiwak. N̄kpọ oro ama afịna mme mbet John tutu mmọ ẹkebụp enye ẹte: “Sese, owo emi ke enịm owo baptism ndien kpukpru owo ke ẹka ẹbịne enye.” (John 3:26) John ama ọbọrọ mmọ ete: “Ebendọ edi andinyene n̄wanndọ. Edi, ke ini ufan ebendọ adade okop enye uyo, adara etieti ndikop uyo ebendọ. Ntre ẹmenam idatesịt mi emi ọyọhọ.” (John 3:29) John ikodomoke idem ye Jesus, enye ikonyụn̄ ikereke ke utom imọ iwọrọke n̄kpọ ke ntak emi utom Jesus okponde akan eke imọ. Utu ke oro, enye ama aka iso okop idatesịt sia enye ama ama utom esie nte “ufan ebendọ.”

Nte John ekesede n̄kpọ ama etiene an̄wam enye aka iso okop idatesịt kpa ye emi utom esie mîkememke. Ke uwụtn̄kpọ, John ekedi Nazirite toto ke emana, ntre ikanaha enye ọn̄wọn̄ wine. (Luke 1:15) Jesus ama etịn̄ nte uwem John mîkawakke n̄kukọhọ ete: “John ama edi idiaha n̄kpọ inyụn̄ in̄wọn̄ke n̄kpọ.” Edi Jesus ye mme mbet esie iketiehe ntre sia ibet Nazirite ikọbọpke mmọ. (Matt. 11:18, 19) N̄kpọ efen edi ke kpa ye emi John mîkanamke utịben̄kpọ ndomokiet, enye ama okop ke mme mbet Jesus, esịnede mbon emi ẹkesidide mbet imọ, ẹnyene odudu ndinam utịben̄kpọ. (Matt. 10:1; John 10:41) Utu ke ndiyak utọ n̄kpọ oro afịna enye, enye ama aka iso esịn idem anam se Jehovah ọkọdọn̄de enye.

Nnyịn n̄ko iyaka iso ikop idatesịt edieke idade utom emi Jehovah ọnọde nnyịn idahaemi ke ọsọn̄urua. Terry emi iketịn̄de iban̄a ọdọhọ ete: “Se ikesibehede mi ekedi utom ekededi oro ẹnọde mi nnam.” Ke ini enye afiakde ese ofụri isua emi enye anamde utom ofụri ini ọnọ Abasi, enye ọdọhọ ete: “Mmama kpukpru se n̄kanamde, ntuaha n̄kpọfiọk ndomokiet.”

Esịt ekeme ndinen̄ede ndat nnyịn edieke itiede ikere se inamde utom ke esop Abasi ọsọn̄ urua. Se inamde utom ke esop Abasi ọsọn̄ urua edi ke enye anam idi “nsan̄autom Abasi.” (1 Cor. 3:⁠9) N̄kpọ emi idade ke ọsọn̄urua ayaka iso eye edieke isitịmde enye ikama. Ukem ntre n̄ko, iyaka iso ikop idatesịt edieke isikerede iban̄a nte edide ata n̄kpọ ukpono ndidi nsan̄autom Jehovah. Nnyịn idimenke se inamde idomo ye eke mbon en̄wen. Nnyịn idinyụn̄ idaha ke ifetutom nnyịn ekpri akan enye emi ẹnọde mbon en̄wen.—Gal. 6:⁠4.

Ekeme ndidi John ama ọfiọk ke utom imọ idibịghike, edi etie nte enye ikọfiọkke ke ọyọsọp etre ntre. (John 3:30) Ke isua 30 eyo Christ, n̄kpọ nte ọfiọn̄ itiokiet tọn̄ọ enye ekenịm Jesus baptism, Edidem Herod ama omụm enye ọkọkọbi. Kpa ye oro, John ama anam se enye ekekemede man aka iso etịn̄ se inende. (Mark 6:17-20) Nso idin̄wam enye aka iso okop idatesịt ini n̄kpọ okpụhọrede ke uwem esie mi? Enye ama aka iso esịn esịt esie ke se idide akpan n̄kpọ inọ Jehovah.

John ama esịne ke ufọk-n̄kpọkọbi okop aban̄a ikpọ utom emi Jesus anamde. (Matt. 11:2; Luke 7:18) Enye ama enịm ke Jesus edi Messiah. Edi anaedi enye ama ekere nte Jesus edisan̄ade inam kpukpru se N̄wed Abasi ọkọdọhọde ke Messiah ayanam. Sia John ama ọkọfiọk ke Messiah edidi edidem, anaedi enye ama ekere m̀mê Jesus  ọyọsọp ọtọn̄ọ ndikara, m̀mê enye oyonyụn̄ edinam ẹsio imọ ke ufọk-n̄kpọkọbi. Ama ọdọn̄ John ndinen̄ede mfiọk se Jesus edinamde, ntre enye ama osio mbet esie iba ọdọn̄ ẹkebụp Jesus ẹte: “Nte afo edi Enye Emi Enyenede Ndidi m̀mê nnyịn ikpodori enyịn ke owo efen?” (Luke 7:19) Ini mmọ ẹnyọn̄de ẹdi, anaedi John ama enen̄ede akpan̄ utọn̄ nte mmọ ẹbụkde nte Jesus ọkọkde mme owo udọn̄ọ onyụn̄ ọdọn̄de mmọ ẹdidọhọ enye ẹte: “Mme nnan ẹkụt usụn̄, mbụn̄ọ ẹsan̄a isan̄, ẹnam mbon akpamfia ẹsana, inan ẹkop n̄kpọ, ẹnam mme akpan̄kpa ẹset, ẹnyụn̄ ẹkwọrọ eti mbụk ẹnọ mme ubuene.”—Luke 7:20-22.

Imenịm ke se John okokopde oro ama ọsọn̄ọ enye idem. Se enye okokopde ama ọsọn̄ọ ke Jesus ke osu mme prọfesi emi ẹban̄ade Messiah. Kpa ye emi Jesus mîkanamke ẹsio enye ke ufọk-n̄kpọkọbi, John ama ọfiọk ke utom imọ ikatakke-tak. Enye ama enyene ntak ndidat esịt kpa ye se ikọwọrọde enye.

Edieke isịnde esịt ke utom Jehovah ukem nte John, iyekeme ndinyene ime nyọ ye idatesịt. (Col. 1:9-11) Ndikot Bible nnyụn̄ ntie n̄kere se ikotde ayan̄wam nnyịn iyọ, oyonyụn̄ an̄wam nnyịn ifiọk ke se ededi emi inamde inọ Abasi itakke-tak. (1 Cor. 15:58) Sandra ọdọhọ ete: “Ami ndikot ibuot kiet ke Bible kpukpru usen an̄wam mi ntetịm n̄kpere Jehovah, onyụn̄ an̄wam mi n̄wụk enyịn nse enye utu ke ndise idemmi.” Imekeme n̄ko ndisitie n̄kere se nditọete nnyịn ẹnamde ẹnọ Jehovah, emi ekeme ndin̄wam nnyịn itre ndikere mban̄a idem nnyịn kpọt, edi ikere se Jehovah anamde. Sandra afiak ọdọhọ ete: “Edinam TV nnyịn an̄wam nnyịn ikpere esop Abasi, inyụn̄ ika iso ikop idatesịt ke utom nnyịn.”

Ke ekpri ini oro John Andinịm Owo Baptism ọkọkwọrọde ikọ, enye akada ukem “spirit ye odudu Elijah” ọkwọrọ, enye okonyụn̄ edi “owo emi n̄kpọ esitụkde nte nnyịn.” (Luke 1:17; Jas. 5:17) Edieke isimade utom emi Jehovah ọnọde nnyịn inyụn̄ isịnde esịt ke ndinam n̄kpọ Jehovah ukem nte John, nnyịn n̄ko imekeme ndika iso n̄kop idatesịt ke se inamde ke esop Abasi inamke n̄kpọ m̀mê nso itịbe inọ nnyịn.