1. Nso akwa ifet ke inyene?

EDI ata n̄kpọ ukpono ndisịne ke esop Jehovah! Imesinen̄ede ikop idatesịt inyụn̄ idu ke emem nte idianade kiet ye nditọete nnyịn ke esop ikpono Jehovah. Nso idi utom fo ke esop Jehovah?

2. Nso uwụtn̄kpọ ke Paul ọkọnọ ke ndusụk leta esie?

² Uwụtn̄kpọ emi apostle Paul ọkọnọde ke ndusụk leta emi enye ekewetde ọnọ mme esop ekeme ndikpep nnyịn ekese mban̄a utom emi inyenede ke esop Abasi. Ke mme leta oro, Paul ekemen esop odomo ye idem owo, emen owo kiet kiet ke esop odomo ye ndido idem owo.—Rome 12:4-8; 1 Cor. 12:12-27; Eph. 4:16.

3. Nso akpan n̄kpọ ita ke idineme ke ibuotikọ emi?

³ Ke ibuotikọ emi, imọn̄ ineme akpan n̄kpọ ita emi ikemede ndikpep nto uwụtn̄kpọ Paul oro. Akpa, iyekpep ke nnyịn owo kiet kiet imenyene utom * ke esop Jehovah. Ọyọhọ iba, iyeneme se ikemede ndinam edieke ọsọn̄de nnyịn ndikụt ke imenyene utom ke esop Jehovah. Ndien ọyọhọ ita, iyeneme ntak emi ikpesịnde idem inam utom emi Jehovah ọnọde owo nnyịn kiet kiet.

4. Nso ke Rome 12:4, 5 ekpep nnyịn?

⁴ Akpa n̄kpọ emi ikemede ndikpep nto uwụtn̄kpọ Paul edi ke nnyịn owo kiet kiet imenyene akpan utom ke ubon Jehovah. Paul ọkọtọn̄ọ uwụtn̄kpọ esie oro ntem: “Kpa nte  nnyịn inyenede ediwak ndido ke idem kiet, edi kpukpru ndido emi inamke orụk utom kiet, kpasụk ntre, okposụkedi nnyịn iwakde, nnyịn idi idem kiet ke Christ, edi idi ndido emi idianade ye kiet eken.” (Rome 12:4, 5) Ikọ Paul oro ọkọwọrọ ke kpa ye emi kpukpru nnyịn inyenede nsio nsio utom ke esop, ke Jehovah ada nnyịn owo kiet kiet ke ọsọn̄urua.

5. Mme “enọ” ewe ke Jehovah ọnọ esop esie?

⁵ Ke ini ẹtịn̄de ẹban̄a mbon emi ẹnyenede utom ke esop Abasi, emekeme ndisọsọp n̄kere ke ẹtịn̄ ẹban̄a mbon emi ẹdade usụn̄ ke esop. (1 Thess. 5:12; Heb. 13:17) Imọdiọn̄ọ ke Jehovah ada Christ emek irenowo emi ẹdide “enọ” ọnọ esop Esie. (Eph. 4:8) Irenowo emi ẹdide “enọ” mi ẹsịne mbon Otu Emi Ẹsede Ẹban̄a Utom Nnyịn, nditọete oro ẹsin̄wamde mbon Otu Emi Ẹsede Ẹban̄a Utom Nnyịn, mbon Kọmiti N̄kọk Itieutom, mme esenyịn circuit, nditọete emi ẹsikpepde n̄kpọ ke mme ufọkn̄wed esop Abasi, * mbiowo, ye mme asan̄autom unamutom. Ẹkeda edisana spirit ẹmek nditọete emi ẹte ẹse mme ọsọn̄urua erọn̄ Jehovah enyịn ẹnyụn̄ ẹsọn̄ọ nditọete ke esop idem.—1 Pet. 5:2, 3.

6. Akpa Thessalonica 2:6-8 owụt ke nditọete irenowo emi ẹdade edisana spirit ẹmek ẹsidomo ndinam nso?

⁶ Ẹda edisana spirit ẹmek nditọete irenowo man ẹnam nsio nsio utom ke esop. Kpa nte nsio nsio ndido idem owo, utọ nte ubọk ye ukot, ẹsinamde n̄kpọ man ofụri idem ọbọ ufọn, nditọete irenowo emi ẹdade edisana spirit ẹmek ẹsisịn idem ẹnam n̄kpọ ke ufọn ofụri esop. Mmọ inamke iyom itoro mbon en̄wen. Utu ke oro, mmọ ẹdomo ndisọn̄ọ nditọete mmọ idem. (Kot 1 Thessalonica 2:6-8.) Imọkọm Jehovah nte enye ọnọde nnyịn utọ irenowo emi mîsibemke iso iyom ufọn idemmọ mi.

7. Nso edidiọn̄ ke ediwak mbon emi ẹnamde utom uyọhọ ini ẹnyene?

⁷ Ẹkeme ndimek ndusụk owo ke esop isụn̄utom, mme akpan asiakusụn̄, m̀mê mme asiakusụn̄ ofụri ini. Ndusụk nditọete ke ofụri ererimbot ẹkam ẹda ndikwọrọ ikọ nnyụn̄ n̄kpep mme owo Bible nte ubọkutom mmọ. Oro anam mmọ ẹn̄wam ediwak owo ẹkabade ẹdi mbet Christ Jesus. Kpa ye emi n̄wakn̄kan ke otu nditọete emi ẹdade ofụri uwem mmọ ẹnam utom ukwọrọikọ mîsinyeneke ediwak n̄kpọ, Jehovah esinen̄ede ọdiọn̄ mmọ. (Mark 10:29, 30) Imama ndima nditọete emi etieti, onyụn̄ enem nnyịn nte mmọ ẹtienede ẹsịne ke esop Jehovah!

8. Nso inam kpukpru mme asuanetop ẹsọn̄ urua ke enyịn Jehovah?

⁸ Ndi mbon emi ẹdade usụn̄ ye mbon emi ẹdude ke utom uyọhọ ini kpọt ẹnyene utom ke esop Jehovah? Idịghe mmọ kpọt! Kpukpru mbon emi ẹsikwọrọde eti mbụk ẹdi ọsọn̄urua n̄kpọ ẹnọ Jehovah ye esop esie. (Rome 10:15; 1 Cor. 3:6-9) Ata akpan utom kiet emi esop Abasi ẹnyenede edi ndinam mme owo ẹdi mbet Ọbọn̄ nnyịn Jesus Christ. (Matt. 28:19, 20; 1 Tim. 2:4) Utom emi edi ata akpa n̄kpọ ọnọ kpukpru owo ke esop, edide owo ana baptism m̀mê edi asuanetop emi mînaha baptism.—Matt. 24:14.

9. Nso inam ima nditọete nnyịn iban?

⁹ Jehovah ọnọ nditọete iban ata akpan utom ẹnam ke esop esie man owụt ke imọ  idaha mmọ ibre mbre. Jehovah ama mme ibanndọ, mme eka, mme ebeakpa, ye nditọete iban emi mîdọhọ ebe emi ẹsọn̄ọde ẹda ẹnam n̄kpọ esie. N̄wed Abasi esiwak nditịn̄ mban̄a iban emi ẹkenamde se Jehovah amade. Bible esitoro mmọ ke mmọ ẹma ẹnyene ọniọn̄, mbuọtidem, ifịk, uko, ẹtat ubọk, ẹnyụn̄ ẹnam nti utom. (Luke 8:2, 3; Utom 16:14, 15; Rome 16:3, 6; Phil. 4:3; Heb. 11:11, 31, 35) Imenen̄ede ikọm Jehovah nte inyenede nditọete iban emi ẹnyenede ukem nti edu emi ke mme esop nnyịn!

10. Nso inam ima mbon emi ẹma ẹkesọn̄?

¹⁰ Enem nnyịn n̄ko ndinyene ediwak mbon emi ẹma ẹkesọn̄ ke esop nnyịn. Nditọete emi ẹma ẹkesọn̄, oro ẹkedade ofụri uwem mmọ ẹnam n̄kpọ Jehovah, ẹdu ke ndusụk esop. Ekeme ndidi ibịghike ndusụk mbon emi ẹma ẹkesọn̄ ẹkedụk esop. Inamke n̄kpọ m̀mê ebịghi mmọ ẹkedụk esop m̀mê ibịghike, idem ekeme ndifịna mmọ ke ntak usọn̄. Oro ekeme ndinam mmọ ẹkûnam n̄kpọ ke esop nnyụn̄ n̄kwọrọ ikọ nte ẹkpemade ndinam. Kpa ye oro, mmọ ẹsinam se ẹkemede ke ukwọrọikọ, ẹsọn̄ọ nditọete idem, ẹnyụn̄ ẹkpep mbon en̄wen utom ke esop! Imesibọ ufọn ito se mmọ ẹdiọn̄ọde. Jehovah ama mmọ ata etieti, imama mmọ n̄ko.—N̄ke 16:31.

11-12. Nso ke mme uyen ke esop mbufo ẹsinam yak ama?

¹¹ Mbon en̄wen ẹdi mme uyen. Mmọ ẹnyene ediwak mfịna sia mmọ ẹkọri ke ererimbot emi Satan akarade onyụn̄ anamde mme owo ẹkere ndiọi n̄kpọ nte enye. (1 John 5:19) Kpa ye oro, esinem nnyịn ndikụt mmọ ẹbọrọde mbụme ke mbono esop, ẹkade ukwọrọikọ, ẹnyụn̄ ẹnyenede uko ẹtịn̄ se mmọ ẹnịmde ke mme ini en̄wen. Mme uyen, mbufo ẹmenyene akpan utom ke esop Jehovah!—Ps. 8:2.

¹² Edi esisọn̄ ndusụk nditọete nnyịn ndinyịme ke mmimọ imenyene ufọn ke esop Jehovah. Nso ikeme ndin̄wam nnyịn owo kiet kiet ikụt ke imenyene ufọn ke esop Jehovah? Ẹyak ise.

13-14. Nso ikeme ndinam ndusụk owo ẹkere ke mmimọ inyeneke ufọn ndomokiet ke esop Jehovah?

¹³ Ọyọhọ n̄kpọ iba emi ikpepde ke uwụtn̄kpọ Paul oro anam iti mfịna emi ediwak owo ẹsinyenede mfịn. Esisọn̄ ediwak owo ndinịm ke mmimọ imenyene ufọn ke esop Jehovah. Paul ekewet ete: “Edieke ukot ọkpọdọhọde ete: ‘Sia mmendịghe ubọk, ami ndịghe ubak idem,’ emi inamke enye okûdi ubak idem. Ndien edieke utọn̄ ọkpọdọhọde ete: ‘Sia mmendịghe enyịn, ami ndịghe ubak idem,’ emi inamke enye okûdi ubak idem.” (1 Cor. 12:15, 16) Nso ke emi ekpep nnyịn?

¹⁴ Edieke afo emende idemfo odomo ye mbon en̄wen ke esop, emekeme ndikere ke imọ inyeneke ufọn ndomokiet ke esop. Ndusụk owo ẹkeme ndinen̄ede ndiọn̄ọ ndinọ utịn̄ikọ, ndinam n̄kpọ ke nde ke nde, mîdịghe ẹnen̄ede ẹdiọn̄ọ ndisọn̄ọ nditọete idem nnyụn̄ ndọn̄ mmọ esịt. Ekeme ndidi afo ekere ke imọ ikemeke ndinam mme n̄kpọ oro ọfọn nte mmọ. Emi owụt ke omosụhọde idem onyụn̄ ọdiọn̄ọ se ekemede ndinam ye se mûkemeke ndinam. (Phil. 2:3) Edi kpeme idem. Edieke esiwakde ndimen idemfo ndomo ye mbon emi ẹdiọn̄ọde ndinam mme n̄kpọ emi n̄kan fi, emekeme ndisua idemfo. Nte Paul okowụtde, amakam ekeme ndikere ke imọ inyeneke ufọn ndomokiet ke esop Jehovah. Nso ikeme ndin̄wam fi akan utọ ekikere oro?

15. Nte ikụtde ke 1 Corinth 12:4-11, nso ke ana kpukpru nnyịn idiọn̄ọ?

¹⁵ Ti ke Jehovah ama ada edisana spirit ọnọ ndusụk Christian ke eyo mme apostle mme utịbe utịbe enọ, edi kpukpru mmọ ikenyeneke ukem ukem enọ. (Kot 1 Corinth 12:4-11.) Jehovah ọkọnọ mmọ nsio nsio enọ onyụn̄ anam mmọ ẹkeme ndinam nsio nsio n̄kpọ, edi Christian kiet kiet ama ọsọn̄ urua ke enyịn Jehovah. Mfịn, nnyịn inyeneke utịbe utịbe enọ edisana spirit. Edi kpa nte ekedide ke  eyo mme apostle, kpukpru nnyịn imọsọn̄ urua ke enyịn Jehovah kpa ye emi nnyịn mîkemeke ndinam n̄kpọ ukem ukem.

16. Ewe item apostle Paul ke ikpanam?

¹⁶ Utu ke ndimen idem nnyịn ndomo ye nditọete en̄wen, ikpakam inam item emi Abasi ọkọnọde apostle Paul spirit esie ewet ete: “Yak owo kiet kiet owụt se utom esie edide, ndien adan̄aoro enye eyenyene ntak ndidat esịt mban̄a idemesie, idịghe ke ndimen idem ndomo ye owo en̄wen.”—Gal. 6:4.

17. Nso ufọn ke idibọ ima inam item emi Paul ọkọnọde?

¹⁷ Edieke inamde item emi Abasi ọkọnọde apostle Paul spirit esie ewet inyụn̄ itiede idụn̄ọde idem nnyịn, imekeme nditọn̄ọ ndikụt ke enyene se nnyịn ikemede ndinam emi mbon en̄wen mîkemeke. Ke uwụtn̄kpọ, ekeme ndinam ebiowo ikemeke ndinọ utịn̄ikọ enem, edi enye ekeme ndinen̄ede ndiọn̄ọ ndikpep owo Bible yak edidi mbet Christ. Onyụn̄ ekeme ndidi enye inen̄ekede idiọn̄ọ ndinam n̄kpọ ke nde ke nde nte mbiowo eken ke esop mmọ, edi enye enen̄ede ọfọn ido onyụn̄ ama nditọete, nditọete ẹsinyụn̄ ẹnyene ifụre ndika mbịne enye n̄kọbọ item Bible. Mîdịghe, ekeme ndidi enye esinen̄ede ama ndikama isenowo. (Heb. 13:2, 16) Ima inen̄ede ikụt ke enyene se nnyịn ikemede ndinam, iyenyene eti ntak ndikop inemesịt mban̄a se ikemede ndinam ke esop. Oro onyụn̄ ekeme ndinam nnyịn ikûfịbe nditọete emi ẹkemede ndinam se nnyịn mîkemeke ndinam.

18. Nso idin̄wam nnyịn idiọn̄ọ ndinam n̄kpọ ọfọn akan nte isinamde?

¹⁸ Inamke n̄kpọ m̀mê nso idi utom nnyịn ke esop, akpana ọdọn̄ kpukpru nnyịn ndisịn idem nnam n̄kpọ Jehovah n̄kan nte inamde, nnyụn̄ nnam se idiọn̄ọde ndinam ọfọn akan nte isinamde. Jehovah ada esop esie ekpep nnyịn n̄kpọ man ikeme ndinam oro. Ke uwụtn̄kpọ, ẹsikpep nnyịn nte ikpọkwọrọde ikọ ọfọn ke mbono esop ufọturua. Ndi ke odomo ndinam se ẹsikpepde do?

19. Nso ke akpanam man ekeme ndika Ufọkn̄wed Mme Ọkwọrọ Obio Ubọn̄?

¹⁹ Akpan usụn̄ en̄wen emi Jehovah adade ekpep nnyịn n̄kpọ edi Ufọkn̄wed Mme Ọkwọrọ Obio Ubọn̄. Nditọete irenowo ye iban emi ẹdude ke utom uyọhọ ini emi ẹdide isua 23 esịm 65 ẹkeme ndika ufọkn̄wed emi. Afo emekeme ndikere ke imọ idikemeke ndika ufọkn̄wed emi tutu amama. Edi utu ke nditie mbat mme n̄kpọ emi mîdiyakke fi aka ufọkn̄wed emi, kam bat mme ntak emi akpamade ndika. Kere se akpanamde man odot ndika. Edieke Jehovah an̄wamde fi, afo onyụn̄ esịnde idem anam n̄kpọ man odot ndika, emekeme ndinam se afo ekekerede ke udûkemeke ndinam.

20. Nso ke Rome 12:6-8 ekpep nnyịn?

²⁰ Ọyọhọ n̄kpọ ita emi ikemede ndikpep nto uwụtn̄kpọ Paul odu ke Rome 12:6-8. (Kot.) Paul etịn̄ ke itien̄wed oro ke mme owo ke esop Jehovah ẹnyene nsio nsio enọ. Edi enye ọsọn̄ọ etịn̄ ke akpana ida enọ ekededi emi inyenede in̄wam nditọete inyụn̄ isọn̄ọ mmọ idem.

21-22. Nso ke ikeme ndikpep nto Robert ye Felice?

²¹ Enyene se iketịbede inọ brọda kiet. Iyom ndikot enye Robert. Ke enye ama okodu ke idụt en̄wen anam n̄kpọ Abasi, ẹma ẹkot enye ọnyọn̄ okodu ke Bethel ke idụt mmọ. Kpa ye emi ẹma ẹkesọn̄ọ ẹdọhọ enye ke inyeneke se enye eduede,  enye ọdọhọ ete: “Esịt ama ọdiọk mi ke ediwak ọfiọn̄ sia n̄kekere ke n̄kanamke utom mi ọfọn. Ama esinyene mme ini emi n̄koyomde ndikpọn̄ Bethel.” Nso ikan̄wam enye afiak okop idatesịt? Ebiowo kiet ama eti enye ke Jehovah esida utom emi ikanamde akpa ekpep nnyịn nte ikemede ndinam utom oro inamde idahaemi ọfọn. Enye ama okụt ke edi se imọ itrede ndikere se ima ikebe, edi ikam ikere nte ikpanamde se imọ ikamade ke ubọk idahaemi.

²² Mbiet n̄kpọ oro ama ọwọrọ Brọda Felice Episcopo. Enye ye n̄wan esie ẹkekụre Ufọkn̄wed Gilead ke 1956. Mmọ ẹma ẹnam utom circuit ke Bolivia. Edi mmọ ẹma ẹnyene eyen ke 1964. Felice ọdọhọ ete: “Ama ọsọn̄ nnyịn ndikpọn̄ utom circuit sia ima ima utom oro etieti. Mma mbiat n̄kpọ nte isua kiet ntie mfụhọ. Edi Jehovah ama an̄wam mi n̄kûtie mfụhọ aba, edi nse obufa utom mi nte ete.” Ndi esitie fi nte eketiede Robert m̀mê Felice? Ndi esịt etịmede fi ke ntak emi mûnyeneke aba mme ifetutom emi ekesinyenede? Ekpedi ntre, esịt eyenen̄ede enem fi edieke osiode esịt ọkpọn̄ n̄kan̄ oro, edi esịnde esịt ke se ekemede ndinam idahaemi nnọ Jehovah ye nditọete fo. Kûsịn ifu ke utom fo, da se afo ekemede ndinam n̄wam nditọete fo, ndien esịt ayadat fi nte ọsọn̄ọde mmọ idem.

23. Nso ke ikpada ini itie inam? Nso ke idineme ke ibuotikọ emi etienede?

²³ Nnyịn owo kiet kiet imọsọn̄ urua ke enyịn Jehovah. Enye oyom nnyịn isịne ke ubon esie. Edieke idade ini itie ikere se ikemede ndinam man isọn̄ọ nditọete idem, inyụn̄ isịnde idem inam oro, imekeme nditre ndikere ke nnyịn inyeneke ufọn ke esop Jehovah! Edi nso kaban̄a nte idade mbon en̄wen ke esop? Nso ke ikpanam man iwụt ke imama inyụn̄ ikpono mmọ? Iyeneme akpan n̄kpọ emi ke ibuotikọ emi etienede.