1. Nso ke ediwak owo ẹdomo ndinam ke esop Abasi?

 NTE ererimbot emi osụk ekperede utịt, utom emi inyenede ndinam awak etieti. (Matt. 24:14; Luke 10:2; 1 Pet. 5:2) Kpukpru nnyịn iyom ndisịn ofụri ukeme nnyịn nnam n̄kpọ Jehovah. Ediwak owo ke ẹsịn idem ẹnam nsio nsio n̄kpọ ke esop. Ndusụk ẹduak ndidi mme asiakusụn̄, ndusụk ẹduak ndika Bethel, m̀mê nditiene mbọp n̄kpọ nnọ esop Abasi. Ediwak nditọete irenowo ke ẹnyụn̄ ẹsịn idem ẹnam n̄kpọ man ẹdot ndidi mme asan̄autom unamutom m̀mê mbiowo. (1 Tim. 3:1, 8) Jehovah ama okụt ikọt esie ẹsiode esịt ẹnam mme n̄kpọ emi ẹnọ enye, esinem enye!—Ps. 110:3; Isa. 6:8.

2. Ekeme nditie nnyịn didie ke idem edieke nnyịn mîkemeke ndinam ndusụk n̄kpọ emi ikaduakde ndinam nnọ Jehovah?

² Edieke edide imetịme ke anyan ini ndinam se ikaduakde ndinam nnọ Jehovah edi nnyịn isụk ikemeke, idem ekeme nditọn̄ọ ndimem nnyịn. N̄kpọ en̄wen emi ekemede ndinam idem emem nnyịn edi edieke owo mînọhọ nnyịn ndusụk utom emi ikpamade ndinam ke ntak isua emana m̀mê n̄kpọ en̄wen ntre. (N̄ke 13:12) Nte etiede Melissa ke idem edi oro. * Enye akpama ndika Bethel m̀mê Ufọkn̄wed Mme Ọkwọrọ Obio Ubọn̄, edi enye ikemeke. Enye ọdọhọ ete: “Mmokpon mbe n̄kpọ mbiba emi. Idahaemi nditetie n̄kop. Oro esinam idem emem mi ndusụk ini.”

3. Nso ke ekeme ndiyom ndusụk owo ẹnam man ẹdot se ẹdiande utom ẹnọ ke esop?

³ Ekeme ndiyom ndusụk nditọete emi ẹdide uyen ẹnyụn̄ ẹkopde idem ẹnen̄ede ẹdiọn̄ọ idem kan̄a ẹnyụn̄ ẹnyene ndusụk edu mbemiso mmọ ẹdotde se ẹdiande utom ẹnọ ke esop. Mmọ ẹkeme ndidiọn̄ọ n̄kpọ, ẹsisọsọp ẹbiere se ẹkpenamde, ẹnyụn̄ ẹben̄e idem ndinam se ededi emi ẹdọn̄de mmọ. Edi ekeme  ndiyom mmọ ẹkpep ndinen̄ede nnyene ime, ndisitịn̄ enyịn nnam n̄kpọ, m̀mê ndikpono mbon en̄wen. Edieke esịnde idem enyene nti edu emi akpanade enyene, ẹkeme ndinọ fi ifetutom ke ini emi mûkodorike enyịn. Yak idọhọ fi n̄kpọ iban̄a Nick. Ama afịna enye etieti ini enye esịmde isua 20 owo imekke enye asan̄autom unamutom. Enye ọdọhọ ete, “N̄kekere ke enyene se mmennamke ọfọn.” Edi Nick ikayakke idem emem enye. Enye ama esịn idem anam n̄kpọ ke esop, onyụn̄ esịn idem ọkwọrọ ikọ. Idahaemi, enye edidi owo Kọmiti N̄kọk Itieutom.

4. Nso ke idineme ke ibuotikọ emi?

⁴ Ndi idem emem fi ke ntak emi mûkemeke ndinam kan̄a se akaduakde ndinam nnọ Jehovah? Ekpedi ntre, dọhọ Jehovah nte etiede fi ke idem. (Ps. 37:5-7) Dọhọ nditọete emi ẹsọn̄de idem ke esop ẹteme fi se akpanamde man enen̄ede anam n̄kpọ Abasi, nyụn̄ domo ofụri ukeme fo ndinam se mmọ ẹdọhọde. Akpanam ntre, ẹkeme ndinọ fi ifetutom emi oyomde do, mîdịghe afo ekeme ndinam se akaduakde ndinam. Edi ifetutom emi afo oyomde ekeme ndinam isịmke fi ubọk idahaemi, ukem nte edide ye Melissa emi iketịn̄de iban̄a ke ikpehe iba. Nso ke akpanam man aka iso okop idatesịt? Imọn̄ ineme n̄kpọ ita emi ẹdin̄wamde nnyịn ibọrọ mbụme oro: (1) se idinamde fi okop idatesịt, (2) se akpanamde man enen̄ede okop idatesịt, ye (3) mme n̄kpọ emi afo ekpemekde ndinam man enen̄ede okop idatesịt.

5. Edieke iyomde esịt adat nnyịn, ikpesịn esịt ke nso? (Ecclesiastes 6:9)

⁵ Ecclesiastes 6:9 etịn̄ se ikemede ndinam esịt adat nnyịn. (Kot.) Itie oro owụt ke owo emi adarade se ‘enyịn esie okụtde’ esiyụhọ se enye enyenede. Ke uwụtn̄kpọ, utọ owo oro esiyụhọ ye se enye ekemede ndinam idahaemi. Edi owo emi “asan̄ade oyom” se ubọk esie mîsịmeke idiyụhọke se enye enyenede. Nso ke oro ekpep nnyịn? Se idin̄wamde nnyịn ikop idatesịt edi nnyịn ndisịn esịt ke se inyenede, inyụn̄ iyomke se ubọk nnyịn mîdisịmeke.

6. Ewe uwụtn̄kpọ ke iyom ndineme idahaemi? Nso ke iyom ndinen̄ede nse ke uwụtn̄kpọ oro?

⁶ Sia esidide eyo esiere, iyom obufa n̄kpọ emi ikpanamde, ndi imekeme ndinen̄ede nyụhọ se ikemede ndinam idahaemi? Ih. Imekeme ndidara ye se ikemede ndinam idahaemi, idịghe ndinyụn̄ nda se ikụtde ndaha. Idinam didie? Ẹyak ineme uwụtn̄kpọ talent emi Jesus ọkọnọde ke Matthew 25:14-30, man ikụt nte idinamde. Imọn̄ inen̄ede ise nte mbụk oro ekpepde nnyịn se ikpanamde man ikop idatesịt, ye se ikpanamde man inen̄ede idat esịt ke se ikemede ndinam idahaemi.

7. Tịn̄ mbụk talent emi Jesus ọkọnọde.

⁷ Ke mbụk emi Jesus ọkọnọde aban̄a talent, enyene ete kiet emi okoyomde ndika isan̄. Mbemiso enye adahade, enye ama okot ifụn esie ita ọnọ mmọ kiet kiet talent ẹda ẹnam mbubehe. * Sia enye ọkọdiọn̄ọde se owo mmọ kiet kiet ekemede ndinam, enye ama ọnọ akpa ofụn oro talent ition, ọnọ ọyọhọ iba talent iba, onyụn̄ ọnọ ọyọhọ ita talent kiet. Akpa ye udiana ofụn oro ẹma ẹsịn idem ẹnam mbubehe man okụk oro odori udori ọnọ eteufọk mmọ. Edi ọyọhọ ofụn ita ikemenke okụk emi ẹkenọde enye inam n̄kpọ ndomokiet. Eteufọk esie ama onyụn̄ ebịn enye.

8. Nso inam ikere ke anaedi esịt ama adat akpa ofụn oro?

⁸ Anaedi esịt ama enen̄ede enem akpa ofụn oro nte eteufọk esie ọkọnọde enye talent ition. Idịghe ekpri okụk ekedi oro. Eteufọk esie  ndinọ enye utọ ediwak okụk oro okowụt ke enye ama enịm ke ofụn oro iditọhọ imọ edem ke isọn̄! Edi ọyọhọ ofụn iba oro? Enye ekpekekere ke imọ inen̄ekede inyene ufọn sia talent emi ẹkenọde enye ikawakke nte se ẹkenọde akpa ofụn oro. Edi enye akanam nso?

9. Nso ke ọyọhọ ofụn iba oro mîkanamke? (Matthew 25:22, 23)

⁹ Kot Matthew 25:22, 23. Jesus ikọdọhọke ke ọyọhọ ofụn iba oro ama ọtọhọ nte ẹkenọde imọ talent iba kpọt. Enye ikonyụn̄ idọhọke ke ofụn oro ama ọdọhọ ete: ‘Ndi n̄kukụre se ẹnọde mi edi emi? Nso ke ofụn emi ẹnọde talent ition anam emi mmen̄kemeke ndinam? Ekpedi eteufọk nnyịn ekere ke nnen̄ekede nnyene ufọn, akpana n̄ketịbi isọn̄ mbụk talent iba esie nnyụn̄ nda ini oro nnam mbubehe idemmi.’

10. Ọyọhọ ofụn iba oro akanam nso ye talent emi ẹkenọde enye?

¹⁰ Ukem nte akpa ofụn oro, ọyọhọ ofụn iba oro ikadaha utom emi ẹkedọn̄de enye ibre mbre, ama onyụn̄ esịn idem anam n̄kpọ ọnọ eteufọk esie. Oro ama anam enye enyene talent iba adian ke iba emi ẹkenọde enye. Eteufọk esie ama ọnọ enye utịp ke ntak emi enye ekesịnde idem anam se ẹkedọn̄de enye. Esịt ama adat eteufọk esie, eteufọk esie onyụn̄ ọdọhọ ke enye odot se imọ idiande utom en̄wen inọ!

11. Nso ke ikpanam man esịt enen̄ede adat nnyịn?

¹¹ Ukem nte ofụn emi ẹkenọde talent iba do, nnyịn n̄ko ikpesịn idem inam se ededi emi ẹnọde nnyịn ke esop, esịt eyenen̄ede adat nnyịn. Nen̄ede sịn idem kwọrọ ikọ nyụn̄ tiene sịn idem nam n̄kpọ ke esop. (Utom 18:5; Heb. 10: 24, 25) Sitịm idem ka mbono esop man se ọbọrọde ọsọn̄ọ nditọete idem. Se ededi emi ẹkpenọde fi anam ke mbono esop ufọturua, sịn idem nam ọfọn. Ekpedi enyene akpan utom emi ẹnọde fi anam ke esop, sibak ka kanam; kûdi mfịn afo anam, n̄kpọn̄ unamke. Kûda utom ekededi nte edi ekpri utom, ke idịghe se adade ini anam. Kam sịn idem kpep utom oro man enen̄ede ọdiọn̄ọ ndinam. (N̄ke 22:29) Ama enen̄ede esịn idem anam n̄kpọ Jehovah, eyenen̄ede ekpere enye, oyonyụn̄ enen̄ede okop idatesịt. (Gal. 6:4) Oyonyụn̄ enen̄ede emem fi utom ndinem esịt ye mbon en̄wen ẹma ẹnọ mmọ utom emi afo okoyomde-yom.—Rome 12:15; Gal. 5:26.

12. Nso ke Melissa ye Nick ẹkenam man ẹnen̄ede ẹkop idatesịt?

¹² N̄kọ ke eteti Melissa emi ọkọdọhọde ke ikpama ndika Bethel m̀mê ndika Ufọkn̄wed Mme Ọkwọrọ Obio Ubọn̄? Kpa ye emi enye mîkemeke ndika ndomokiet ke otu oro, enye ọdọhọ ete: “Mmenen̄ede nsịn idem nnam utom usiakusụn̄ mi, nnyụn̄ ndomo ndikwọrọ ikọ ke kpukpru usụn̄ emi ẹdọhọde ikwọrọ. Emi anam nnen̄ede n̄kop idatesịt.” Nso ikan̄wam Nick ini owo mîkemekke enye asan̄autom unamutom? Enye ọdọhọ ete: “Mma nsịn idem nnam se n̄kemede, utọ nte ndisika ukwọrọikọ nnyụn̄ mbọrọ mbụme emi ọsọn̄ọde owo idem ke mbono esop. Mma nsịn n̄wed nyom ndika Bethel, ẹma ẹnyụn̄ ẹkot mi ndi Bethel isua emi eketienede.”

13. Nso ufọn ke edibọ edieke esịnde idem anam se osụk anamde idahaemi? (Ecclesiastes 2:24)

¹³ Edieke esịnde idem anam se anamde idahaemi, ndi ẹyedian utom efen ẹnọ fi nte ini akade? Ẹkeme ndidian nte ẹkediande ẹnọ Nick. Edi owo mîdianke, esịt ayadat fi akan nte ekedide, oyonyụn̄ enen̄ede okop inemesịt ke se ekemede ndinam nnọ Jehovah idahaemi ukem nte Melissa. (Kot Ecclesiastes 2:24.) N̄kpọ efen emi edinamde enen̄ede okop idatesịt edi ndidiọn̄ọ ke kpukpru se anamde ẹnem Jesus Christ Eteufọk nnyịn esịt.

14. Ke ini ikerede nsio nsio n̄kpọ emi ikpemekde ndinam nnọ Jehovah, nso ke ikpesiti?

¹⁴ Nnyịn ndisịn ofụri ukeme nnyịn nnam se inamde idahaemi inọ Jehovah iwọrọke ke akpana itre ndikere m̀mê enyene n̄kpọ en̄wen emi ikemede ndinam nnọ enye. Akpana ika iso imek mme n̄kpọ emi ẹdin̄wamde nnyịn inen̄ede idiọn̄ọ ndikwọrọ ikọ, ndikpep owo Bible, inyụn̄ inen̄ede inyene ufọn inọ nditọete nnyịn. Se idin̄wamde nnyịn edi ndinen̄ede n̄kere nte ikpan̄wamde mbon en̄wen utu ke ndikere nte ikpan̄wamde idem nnyịn.—N̄ke 11:2; Utom 20:35.

15. Siak ndusụk n̄kpọ emi ekpemekde, emi ẹkemede ndinam fi enen̄ede okop idatesịt.

¹⁵ Nso ye nso ke ekeme ndimek ndinam? Dọhọ Jehovah an̄wam fi ọdiọn̄ọ mme n̄kpọ emi ekpemekde, emi mîdikponke ikan fi. (N̄ke 16:3; Jas. 1:5) Ke  akpa ikpehe ke ibuotikọ emi, ẹma ẹtịn̄ nsio nsio n̄kpọ emi owo ekemede ndinam, utọ nte ndidi asiakusụn̄ unọ un̄wam, asiakusụn̄ ofụri ini, ndika Bethel, m̀mê nditiene mbọp n̄kpọ nnọ esop Abasi. Ndi emekeme ndimek kiet ke otu emi? Ndi emekeme ndikpep usem en̄wen nda n̄kwọrọ ikọ, mîdịghe ọwọrọ okodụn̄ ke ebiet en̄wen ọkwọrọ ikọ? Edieke enen̄erede oyom ndidiọn̄ọ n̄kpọ mban̄a se itịn̄de emi, kot ibuot 10 ke n̄wed Ẹtịm Nnyịn Idem Man Inam Uduak Jehovah nyụn̄ neme n̄kpọ emi ye mbiowo mbufo. * Nte osụk esịnde idem anam n̄kpọ man ekeme ndinam mme n̄kpọ emi  itịn̄de iban̄a mi, mme owo ẹyekụt ke afo ke etịme, esịt oyonyụn̄ enen̄ede adat fi.

16. Nso ke akpanam edieke mûkemeke ndinam n̄kpọ emi ekemekde kan̄a?

¹⁶ Edi nso ke akpanam edieke mûkemeke ndinam kan̄a ekededi ke otu mme n̄kpọ emi ekemekde ndinam, emi isiakde ke ibuotikọ emi? Yom n̄kpọ en̄wen emi ekerede ke idikponke ikan fi domo ndinam ise. Se ndusụk mi.

17. Akpa Timothy 4:13, 15 ọdọhọ ke eyenete erenowo akpanam nso man enen̄ede ọdiọn̄ọ ndikpep owo n̄kpọ?

¹⁷ Kot 1 Timothy 4:13, 15. Ekpedi edi eyenete erenowo emi ama akana baptism, emekeme ndidomo ndinọ utịn̄ikọ nnyụn̄ n̄kpep mme owo ikọ Abasi ọfọn akan nte esinamde. Ntak edi ke edieke ‘esịnde idem’ ọdiọn̄ọ ndikot n̄wed, ndinọ utịn̄ikọ, ndinyụn̄ n̄kpep mme owo ikọ Abasi ọfọn, ayan̄wam mme owo. Biere ndikpep nnyụn̄ nnam nsio nsio n̄kpọ emi ẹsiakde ke ekpri ediye n̄wed Sịn Idem Kpep Ndikot N̄wed Nnọ Owo Nnyụn̄ N̄kpep Owo N̄kpọ. Men mme n̄kpọ oro kiet kiet. Nen̄ede sịn idem kpep mmọ ke ufọk. Ẹma ẹnọ fi utịn̄ikọ, domo ndinam se ekekpepde oro. Dọhọ udiana ọnọitem m̀mê mbiowo en̄wen emi “ẹnamde utom ọkpọsọn̄ ke utịn̄ikọ ye ukpepn̄kpọ” ẹteme fi mme n̄kpọ en̄wen emi akpanamde. * (1 Tim. 5:17) Ama enyene utịn̄ikọ, nen̄ede domo ndinam se ẹtịn̄de ke n̄wed oro. Edi nen̄ede domo n̄ko ndin̄wam mbon en̄wen ẹbuọt idem ke Abasi, m̀mê ndin̄wam mmọ ẹnam se mmọ ẹkpepde. Ama anam ntre, afo eyenen̄ede okop idatesịt, mmọ n̄ko ẹyenen̄ede ẹkop idatesịt.

18. Nso idin̄wam nnyịn inam mme n̄kpọ emi ikemekde ndinam ke ini ikwọrọde ikọ?

¹⁸ Kpukpru nnyịn ke ẹdọn̄ ikwọrọ ikọ inyụn̄  inam mme owo ẹdi mbet Christ. (Matt. 28:19, 20; Rome 10:14) Ndi akpama ndinen̄ede ndiọn̄ọ nte akpanamde akpan utom emi? Dụn̄ọde n̄wed Sịn Idem Kpep Ndikot N̄wed Nnọ Owo Nnyụn̄ N̄kpep Owo N̄kpọ, ekem biere mme n̄kpọ emi edinamde man an̄wam fi anam se ekpepde ke n̄wed oro. Mme n̄kpọ efen emi ẹdude ke N̄wed Mbono Esop Uwem ye Utom Nnyịn Mme Christian ye ke mme vidio emi ẹsibrede ke mbono esop ufọturua ẹda ẹwụt nte ikpọkwọrọde ikọ ẹkeme ndin̄wam fi n̄ko. Domo nsio nsio n̄kpọ se man ọdiọn̄ọ se idinen̄erede in̄wam mme owo ke efakutom mbufo. Ama anam mme n̄kpọ emi ẹtịn̄de mi, eyenen̄ede ọdiọn̄ọ ndikwọrọ ikọ nnyụn̄ n̄kpep owo n̄kpọ, ndien emi ayanam enen̄ede okop idatesịt.—2 Tim. 4:5.

19. Nso ikeme ndin̄wam fi enyene mme edu emi Abasi amade?

¹⁹ Ke ini osụk ekerede nsio nsio n̄kpọ emi ekpemekde ndinam, enyene kiet emi edide ata akpan n̄kpọ emi mîkpanaha efre, oro edi, ndinyene nti edu emi Abasi amade. (Gal. 5:22, 23; Col. 3:12; 2 Pet. 1:5-8) Nso idin̄wam fi enyene mme edu emi? Yak idọhọ ke oyom ndinen̄ede mbuọt idem ye Abasi. Emekeme ndikot mme ibuotikọ ke mme n̄wed nnyịn, emi ẹtịn̄de mme n̄kpọ emi ẹdin̄wamde fi enen̄ede ọbuọt idem ye Abasi. N̄kpọ efen emi ekemede ndinen̄ede n̄n̄wam fi edi ndise mme n̄kpọ ke edinam TV nnyịn emi ẹtịn̄de se nditọete ẹkenamde ini mmọ ẹnyenede nsio nsio mfịna, emi owụtde ke mmọ ẹnen̄ede ẹbuọt idem ye Abasi. Ekem afo ekere nsio nsio usụn̄ emi ekemede ndinam ukem se mmọ ẹkenamde oro.

20. Nso ke ikpanam man inen̄ede ikop idatesịt, ikûnyụn̄ uwak ndikere ke nnyịn inyeneke ufọn?

²⁰ Ọdọn̄ kpukpru nnyịn ndinam n̄kpọ Jehovah n̄kan nte inamde idahaemi. Iyanam nte ọdọn̄de nnyịn oro ke obufa ererimbot. Edi edieke isịnde ofụri ukeme nnyịn inam se ikemede ndinam idahaemi, esịt eyenen̄ede adat nnyịn, nnyịn idinyụn̄ iwakke ndikere ke nnyịn inyeneke ufọn. Se idide akpan n̄kpọ ikan oro edi ke oro ayanam ẹkpono ẹnyụn̄ ẹtoro Jehovah Abasi nnyịn emi edide “Abasi inemesịt.” (1 Tim. 1:11) Ntre ẹyak idat esịt ke se ikemede ndinam idahaemi!