1-2. Psalm 34:8 owụt ke idinam didie idiọn̄ọ nte Jehovah ọfọnde?

YAK idọhọ ke ẹnọ fi udia emi mûdiaha akpa. Emekeme ndidiọn̄ọ n̄kpọ mban̄a udia oro ke ndisese ke enyịn kpọt, ndin̄wụne, ndibụp se ẹdade ẹtem, m̀mê ndibụp mbon en̄wen nte udia oro etiede. Edi n̄kukụre se idinamde fi ọdiọn̄ọ m̀mê ayama udia oro edi nditabi nse.

² Imekeme ndidiọn̄ọ nte Jehovah ọfọnde ke ini ikotde Bible, mme n̄wed esop Abasi, ye ke ini ikopde mbon en̄wen ẹtịn̄de nte Jehovah ọdiọn̄de mmimọ. Edi idinen̄ede ikụt nte Jehovah ọfọnde ke ini ‘itabide’ mfọn esie ise ke idem nnyịn. (Kot Psalm 34:8.) Se usụn̄ kiet mi emi ikemede nditabi mfọn Jehovah nse. Yak idọhọ ke iyom ndidụk utom usiakusụn̄, edi ana ision̄o ubọk kan̄a ke ndusụk n̄kpọ man ikeme ndinam. Ekeme ndidi imesiwak ndikot se Jesus ọkọn̄wọn̄ọde ete ke edieke ibemde iso iyom Obio Ubọn̄ Abasi, ke Jehovah ayadian mme n̄kpọ eken ọnọ nnyịn, edi akananam nnyịn ikwe Jehovah anamde utọ n̄kpọ oro ọnọ nnyịn. (Matt. 6:33) Edi nnyịn inịm se Jesus ọkọn̄wọn̄ọde oro, inen̄ekede ibiat okụk nte ikesibiatde, inen̄ede isịn idem ke ukwọrọikọ utu ke utom. Nnyịn ndinam oro ayanam yak ikụt ke Jehovah esinam se Jesus ọkọn̄wọn̄ọde oro. Ọwọrọ ‘imatabi’ mfọn Jehovah ise ke idem nnyịn.

3. Psalm 31:19 ọdọhọ ke mmanie ke Jehovah esifọn mfọn?

³ Jehovah “ọfọn ye kpukpru owo,” idem ye mbon oro mîdiọn̄ọke enye. (Ps. 145:9; Matt. 5:45) Edi mbon oro ẹmade enye ẹnyụn̄ ẹnamde n̄kpọ esie ke ofụri esịt ke enye esinen̄ede ọdiọn̄. (Kot Psalm 31:19.) Yak itịn̄ nti n̄kpọ ifan̄ emi Jehovah anamde ọnọ nnyịn.

4. Didie ke Jehovah esifọn mbon emi ẹtọn̄ọde ndisan̄a n̄kpere enye mfọn?

 ⁴ Ini ekededi emi inamde se Jehovah ekpepde nnyịn, imesikụt nte oro ọfọnde ye nnyịn. Ke uwụtn̄kpọ, ini ikenen̄erede idiọn̄ọ Jehovah inyụn̄ itọn̄ọ ndima enye, enye ama an̄wam nnyịn itre ndikere mme n̄kpọ emi enye mîmaha, ikûnyụn̄ unam mme n̄kpọ oro aba. (Col. 1:21) Ndien ke ima ikayak idem inọ enye inyụn̄ ina baptism, enye ama anam nti n̄kpọ efen efen ọnọ nnyịn, utọ nte ndinam inyene eti esịt nnyụn̄ nnen̄ede n̄kpere enye.—1 Pet. 3:21.

5. Didie ke isikụt mfọn Jehovah ke ini ikwọrọde ikọ?

⁵ Imesikụt mfọn Jehovah ke ini ikwọrọde ikọ. Ndi afo edi owo o-bụt? Ediwak ikọt Jehovah ẹdi mbon o-bụt. Mbemiso afo ekedide Ntiense Jehovah, ekeme ndidi ukpûkekereke-kere ke owo nte imọ ikpọkọkọn̄ usụn̄ufọk owo emi imọ mîdiọn̄ọke akpa idọhọ ke iyom ndikwọrọ ikọ. Edi idahaemi, se esinamde edi oro kpukpru ini. Jehovah onyụn̄ an̄wam fi yak amama ukwọrọikọ! Omokụt n̄ko nsio nsio usụn̄ en̄wen emi Jehovah an̄wamde fi. Jehovah ama an̄wam fi yak omụm idem akama ini owo ọkọdiọkde uwem ye afo ke an̄wautom. Ini owo ekenen̄erede oyom ndidiọn̄ọ n̄kpọ ke Bible, Jehovah ama an̄wam fi yak eti nnennen itie emi okpokotde ọnọ enye. Enye onyụn̄ an̄wam fi yak aka iso ọkwọrọ ikọ idem ke ini mme owo mîmaha ndikop.—Jer. 20:7-9.

6. Didie ke Jehovah ndikpep nnyịn n̄kpọ owụt ke enye ọfọn ido?

⁶ Usụn̄ en̄wen emi Jehovah ọfọnde nnyịn mfọn edi ndikpep nnyịn nte ikpọkwọrọde ikọ. (John 6:45) Ẹsikpep nnyịn nte ikpọkwọrọde ikọ ke mbono esop ufọturua, ẹsinyụn̄ ẹdọhọ nnyịn yak ida mme usụn̄ oro ikwọrọ ikọ. Idem ekeme ndinyek nnyịn ima iyom ndinam n̄kpọ emi nnyịn mînamke akpa, edi ke ini inamde, imekeme ndikụt ke oro ọfọn etieti ye mme owo ke efakutom nnyịn. Ẹsinyụn̄ ẹdọhọ nnyịn ke mbono esop ye ke ikpọ mbono yak idomo ndikwọrọ ikọ ke mme usụn̄ en̄wen emi nnyịn mîkwọrọke akpa. Idem ekeme ndinyụn̄ nnyek nnyịn ndidomo mme usụn̄ oro nse, edi edieke inamde, Jehovah ọyọdiọn̄ nnyịn. Ẹyak ise ndusụk nti n̄kpọ emi Jehovah edinamde inọ nnyịn edieke idomode mbufa usụn̄ emi ise, inamke n̄kpọ m̀mê n̄kpọ etie didie ye nnyịn. Ekem iyese nsio nsio usụn̄ emi ikpesịnde idem ke n̄kpọ Abasi ikan nte isinamde.

7. Didie ke Jehovah edidiọn̄ nnyịn edieke isịnde ukeme ndinam n̄kpọ esie n̄kan nte isinamde?

⁷ Iyekpere Jehovah ikan nte ikperede idahaemi. Yak idọhọ fi n̄kpọ iban̄a ebiowo kiet emi ekerede Samuel, * enye ye n̄wan esie ẹdu ke Colombia ẹkwọrọ ikọ. Ama enem mmọ ndidu ke esop mmọ nnam utom usiakusụn̄. Edi sia mmọ ẹkeyomde ndisịn idem ke n̄kpọ Abasi n̄kan nte mmọ ẹkesịnde, ama ọdọn̄ mmọ ndiwọrọ n̄kan̄wam ke esop emi ẹnen̄erede ẹyom mme ọkwọrọikọ. Edi akana mmọ ẹyak ndusụk n̄kpọ atak. Samuel ọdọhọ ete: “Ima inam se Matthew 6:33 etịn̄de inyụn̄ itre ndidep n̄kpọ ntịme ntịme. Edi enye emi ọkọsọn̄de nnyịn akan ekedi ndiwọrọ n̄kpọn̄ ufọk nnyịn. Ẹkebọp ufọk oro nte imade, nnyịn ikonyụn̄ ikamake isọn ke ufọk oro.” Ini mmọ ẹkewọrọde ẹka obufa esop oro, mmọ ẹma ẹkekụt ke ata ekpri okụk eyekem mmimọ ndida nse mban̄a idem mmimọ ke n̄kan̄ oro. Samuel ọdọhọ ete: “Imokụt nte Jehovah adade nnyịn usụn̄ onyụn̄ ọbọrọde akam nnyịn. Etie nnyịn ke idem nte ke Jehovah  ama nnyịn onyụn̄ enem esịt ye nnyịn idahaemi akan ini en̄wen ekededi.” Ndi enyene usụn̄ emi ekpesịnde idem anam n̄kpọ Abasi akan nte anamde idahaemi? Ekpedi ntre, nịm ke eyekpere Jehovah akan nte ekperede idahaemi, ke enye oyonyụn̄ ese aban̄a fi.—Ps. 18:25.

8. Se Ivan ye Viktoria ẹtịn̄de ekpep fi nso?

⁸ Se inamde inọ Abasi ayanam esịt enem nnyịn. Kop mi se ebe ye n̄wan kiet emi ẹkerede Ivan ye Viktoria ẹtịn̄de; mmọ ẹdi mme asiakusụn̄ ke Kyrgyzstan. Mmọ ikọdọn̄ke ubọk ke ediwak n̄kpọ man ini ekededi emi ẹkotde mmọ ẹdin̄wam ke n̄kpọ Abasi, mmọ ẹkpekeme ndin̄wam, ekpededi edi ndiketiene mbọp n̄kpọ. Ivan ọdọhọ ete: “Ima isisịn idem ata etieti inam utom ekededi emi ẹnọde nnyịn. Kpa ye emi ekesikakde nnyịn ima inyọn̄ idi, esịt ama esinem nnyịn sia ima idiọn̄ọ ke ikada odudu nnyịn inam n̄kpọ Jehovah. Ima inyene nti ufan inyụn̄ ikpep mbufa n̄kpọ, oro ama anam esịt enen̄ede adat nnyịn.”—Mark 10:29, 30.

9. Nso ke sista kiet emi mînen̄ekede ikop idem esinam man enen̄ede esịn idem anam n̄kpọ Abasi? Nso idi ufọn?

⁹ Iyosụk ikop inem ndinam n̄kpọ Jehovah kpa ye emi nnyịn mînen̄ekede ikop idem aba. Ke uwụtn̄kpọ, Mirreh emi odude ke West Africa edi ebeakpa, enye onyụn̄ ọsọn̄. Ini enye ọkọkpọn̄de utom dọkta, enye ama odụk utom usiakusụn̄. Mirreh enyene ata idiọk ewan̄kọ oro mîyakke enye ọkwọrọ ikọ ke ufọk ke ufọk ebe hour kiet. Edi enye esidọn̄ n̄wed ke ukpatn̄kpọ etie ọkwọrọ ikọ ke anyan ini. Enye enyene ediwak ukpepn̄kpọ Bible ye mfiakn̄ka, esinyụn̄ ada fon eneme ikọ Abasi ye ndusụk mmọ. Nso ikanam Mirreh enen̄ede esịn idem anam n̄kpọ Jehovah? Enye ọdọhọ ete: “Mmama Jehovah ye Christ Jesus ata etieti. Mmesinyụn̄ n̄wak ndiben̄e Jehovah ndọhọ an̄wam mi nda ofụri ukeme mi nnam n̄kpọ esie.”—Matt. 22:36, 37.

10. Akpa Peter 5:10 owụt ke nso ufọn ke Jehovah esinam ọnọ mbon emi ẹsịnde idem ẹnam n̄kpọ esie?

¹⁰ Jehovah eyekpep nnyịn ediwak n̄kpọ. Kenny emi edide asiakusụn̄ ke Mauritius ama okụt ke esidi ntre. Ini enye ekpepde akpanikọ, enye ama ọkpọn̄ ufọkn̄wed ntaifiọk, ana baptism, onyụn̄ odụk utom usiakusụn̄. Enye ọdọhọ ete, “Nsidomo nditie nte prọfet Isaiah emi ọkọdọhọde ete: ‘Se mi mi! Dọn̄ mi utom.’ ” (Isa. 6:8) Kenny etiene ọbọp ediwak n̄kpọ ọnọ esop Abasi, enye onyụn̄ etiene an̄wam akabade n̄wed esop Abasi esịn ke usem emana esie. Kenny ọdọhọ ete: “Utom ekededi emi ẹnọde mi, ẹsikpep mi nte n̄kpanamde utom oro yak ọfọn.” Edi idịghe ndinam utom ọfọn kpọt ke enye esikpep. Enye ọdọhọ ete, “Mma n̄kụt n̄ko ke enyene mme n̄kpọ emi mmen̄kemeke ndinam, nnyụn̄ n̄kụt mme edu emi anade n̄kpep ndinyene man nnen̄ede nnyene ufọn nnọ Jehovah ye nditọete.” (Kot 1 Peter 5:10.) Ndi emekeme ndifiak nse nte n̄kpọ etiede ye afo man okụt m̀mê eyekeme ndidi se Jehovah ekpepde n̄kpọ efen efen?

11. Nso ke nditọete iban ke South Korea ẹkenam man ẹkeme ndikwọrọ ikọ? Nso ikedi ufọn? (Se n̄ko ndise ikpaedem Enyọn̄-Ukpeme emi.)

¹¹ Mbon emi ẹma ẹkenam n̄kpọ Jehovah ẹbịghi ẹsisụk ẹkpekpep mbufa n̄kpọ ke ini mmọ ẹdomode mbufa usụn̄ ukwọrọikọ ẹse. Ke ini udọn̄ọ COVID-19, mbiowo ke esop kiet ke South Korea ẹma ẹwet ẹte: “Ndusụk mbon emi ẹkekerede ke idem idiyakke mmimọ ikeme ndikwọrọ ikọ ẹsikwọrọ idahaemi ke fon m̀mê ke kọmputa. Nditọete iban ita emi ẹma ẹkebe isua 80 ẹma ẹkpep nte mmọ ẹkemede ndikama kọmputa n̄kwọrọ ikọ, idahaemi iwakke usen emi mmọ mîsikwọrọke ikọ.” (Ps. 92:14, 15) Ndi akpama ndidomo mbufa n̄kpọ  nse man enen̄ede okụt mfọn Jehovah? Se ndusụk se ekemede ndinam mi.

12. Nso ke Jehovah ọn̄wọn̄ọ ọnọ mbon emi ẹbuọtde idem ye enye?

¹² Kpep ndibuọt idem ke Jehovah. Jehovah ọn̄wọn̄ọ ndinam ediwak nti n̄kpọ nnọ nnyịn edieke ibuọtde idem ye imọ inyụn̄ idade ofụri odudu nnyịn inam n̄kpọ imọ. (Mal. 3:10) Sista Fabiola ke Colombia ama okụt nte Jehovah anamde se enye ọn̄wọn̄ọde emi ọnọ enye. Enye okoyom nditọn̄ọ utom usiakusụn̄ ofụri ini esisịt ini ke enye ama akana baptism. Edi okụkọfiọn̄ esie ke enye ye ebe esie ye nditọ mmọ ita ẹkesikama ẹdia n̄kpọ. Ntre ke ini enye ekesịmde isua ukpọn̄utom, enye ama enen̄ede ọbọn̄ akam ọnọ Jehovah ete an̄wam imọ. Enye ọdọhọ ete: “Esida ini mbemiso ẹtọn̄ọde ndikpe owo okụk ukpọn̄utom emi ẹsikpede kpukpru ọfiọn̄. Edi okịm akada ọfiọn̄ kiet kpọt. Eketie nte utịben̄kpọ!” Enye ama ọtọn̄ọ utom usiakusụn̄ ke ọfiọn̄ iba ebede. Enye ebe isua 70 idahaemi, onyụn̄ anam utom usiakusụn̄ ebe isua 20. Enye an̄wam owo itiaita ẹna baptism. Enye ọdọhọ ete: “Kpa ye emi idem esimemde mi ndusụk usen, Jehovah an̄wam mi kpukpru usen man n̄ka iso nnam usiakusụn̄.”

13-14. Mme uwụtn̄kpọ ewe ẹkeme ndin̄wam nnyịn ibuọt idem ye Jehovah inyụn̄ inen̄ede isịn idem inam n̄kpọ esie?

¹³ Kpep n̄kpọ to mbon emi ẹkebuọtde idem ye Jehovah. Mbon emi ẹkenen̄erede ẹsịn idem ẹnam n̄kpọ Jehovah ẹyọyọhọ Bible. Ediwak ini, Jehovah ekesidiọn̄ mmọ  ke mmọ ẹma ẹkenam n̄kpọ ẹwụt ke imọbuọt idem ye enye. Ke uwụtn̄kpọ, ekedi Abraham ọwọwọrọ ọkpọn̄ ufọk esie—“okposụkedi mîfiọkke ebiet eke enye akade”—ke Jehovah ọkọdiọn̄ enye. (Heb. 11:8) Ekedi Jacob an̄wan̄wana ye angel mbemiso Jehovah ọdiọn̄ enye. (Gen. 32:24-30) Ini nditọ Israel ẹkperede ndidụk Isọn̄ Un̄wọn̄ọ, ekedi mme oku ẹsesịn ikpat ke Akpa Jordan mbemiso mmọn̄ akpa oro atuak ada yak mmọ ẹsan̄a ẹbe.—Josh. 3:14-16.

¹⁴ Emekeme ndikpep n̄kpọ n̄ko nto ikọt Jehovah emi ẹbuọtde idem ye enye mfịn ẹnyụn̄ ẹnen̄erede ẹsịn idem ẹnam n̄kpọ esie. Ke uwụtn̄kpọ, Brọda Payton ye Diana an̄wan esie ẹma ẹsima ndikot mban̄a nditọete emi ẹnen̄erede ẹsịn idem ẹnam n̄kpọ Jehovah, utọ nte mbon emi ẹsiwetde ke ibuotikọ emi, “Mmọ Ẹma Ẹnọ Idemmọ Unyịme Unyịme” ye “Mmọ Ẹma Ẹka Ẹkenam N̄kpọ Abasi.” * Payton ọdọhọ ete: “Ke ini ikotde mbụk mmọ, ekesitie nnyịn nte itetie ise nte owo adiade edinem udia. Nte isede ika, ntre ke ọkọdọn̄ nnyịn ‘nditabi nse nte Jehovah ọfọnde.’ ” Nte ini akade, enye ye n̄wan esie ẹma ẹwọrọ ẹka ebiet emi ẹkeyomde-yom mme ọkwọrọikọ. Ndi afo emesikot mme ibuotikọ oro? Ndi omonyụn̄ ese mme vidio emi, Ndikọkwọrọ Ikọ ke Ebiet Emi Enen̄erede Oyom Usụn̄—Australia ye Ndikọkwọrọ Ikọ ke Ebiet Emi Enen̄erede Oyom Usụn̄—Ireland, emi ẹdude ke jw.org? Mme vidio oro ẹkeme ndin̄wam fi afiak ese usụn̄ emi ekemede ndinen̄ede nsịn idem nnam n̄kpọ Jehovah.

15. Nso ufọn ke idibọ edieke inamde ufan ye mbon emi ẹnịmde n̄kpọ Abasi akpa ke uwem mmọ?

¹⁵ Nam ufan ye mbon emi ẹnịmde n̄kpọ Abasi akpa ke uwem mmọ. Ekeme ndidọn̄ nnyịn ndidia udia emi nnyịn mîdiaha akpa edieke idụkde ndụk ye mbon emi ẹsimade udia oro. Ukem ntre n̄ko, edieke idụkde ndụk ye mbon emi ẹnịmde n̄kpọ Abasi akpa ke uwem mmọ, oro ekeme ndinam itiene iyom usụn̄ ndinen̄ede nsịn idem ke n̄kpọ Abasi. Ntre ke ekedi ye Kent ye Veronica an̄wan esie. Kent ọdọhọ ete: “Mme ufan nnyịn ye mme ubon nnyịn ẹma ẹdọhọ nnyịn idomo ndinam n̄kpọ Jehovah ke mme usụn̄ emi nnyịn mînamke akpa ise. Ima idikụt ke nnyịn ndidian idem ye mbon emi ẹnịmde n̄kpọ Abasi akpa ama anam inyene uko idomo mbufa n̄kpọ ise.” Kent ye Veronica ẹdi mme akpan asiakusụn̄ idahaemi ke Serbia.

16. Nte ikụtde ke uwụtn̄kpọ emi Jesus ọkọnọde ke Luke 12:16-21, ntak emi ikpenyịmede ndiyak n̄kpọ atak nnyịn-e?

¹⁶ Nyịme n̄kpọ atak fi ke ntak Jehovah. Ndinam n̄kpọ Jehovah iwọrọke ke nnyịn idikopke inem uwem aba. (Eccl. 5:19, 20) Edi, edieke nnyịn mînyịmeke ndinen̄ede nsịn idem nnam n̄kpọ Abasi ke ntak emi nnyịn mîyomke ndiyak n̄kpọ atak nnyịn, imekeme ndinam ukem ndudue emi ete kiet emi Jesus eketịn̄de aban̄a akanamde. Ete oro ama ọkọ n̄kpọ obono man okop inem uwem edi inyịmeke ndidiọn̄ọ Abasi. (Kot Luke 12:16-21.) Brọda kiet ke France emi ekerede Christian ọdọhọ ete, “N̄kenen̄ekede nda ini mi nnam n̄kpọ Jehovah nnyụn̄ nse mban̄a ubon mi.” Enye ye n̄wan esie ẹma ẹbiere ndidụk utom usiakusụn̄. Edi akana mmọ ẹkpọn̄ utom mmọ man ẹkeme ndidụk usiakusụn̄. Mmọ ẹma ẹtọn̄ọ ndisisan̄a n̄kwọhọde ufọk ye mme itieutom nnọ mme owo, ẹnyụn̄ ẹyụhọ ye ekpri se mmọ ẹnyenede. Ndi mmọ ẹtua n̄kpọfiọk? Christian ọdọhọ ete, “Ukwọrọikọ enem nnyịn idahaemi akan akpa, esinyụn̄ enem nnyịn ndikụt mbon emi ikpepde Bible ye mbon emi  ikọkwọrọde ikọ inọ ẹkpepde n̄kpọ ẹban̄a Jehovah.”

17. Nso ikeme ndinam ọsọn̄ nnyịn ndidomo obufa usụn̄ ukwọrọikọ nse?

¹⁷ Nyịme ndidomo obufa usụn̄ ukwọrọikọ nse. (Utom 17:16, 17; 20:20, 21) Akana Shirley emi edide asiakusụn̄ ke United States okpụhọde nte enye esikwọrọde ikọ ke ini udọn̄ọ COVID-19. Ke nsonso oro, enye ama emen̄e ndikama fon n̄kwọrọ ikọ. Edi ke esenyịn circuit ama akaka esop mmọ ekekpep mmọ nte ẹkemede ndikama fon n̄kwọrọ ikọ, enye ama ọtọn̄ọ ndisikama fon n̄kwọrọ ikọ. Enye ọdọhọ ete: “Ama enyek mi idem ke nsonso oro, edi idahaemi esinenem mi. Imokụt ediwak owo ikwọrọ ikọ ikan ini ikesikade ke ufọk ke ufọk!”

18. Nso ikeme ndin̄wam nnyịn ọkpọsọn̄ nnyịn ndinam se ikaduakde ndinam nnọ Abasi?

¹⁸ Mek se edinamde nyụn̄ nam se emekde oro. Ima inyene mfịna, imesibọn̄ akam inyụn̄ ida ini ikere se ikpanamde. (N̄ke 3:21) Sonia emi edide asiakusụn̄ ofụri ini ke otu emi ẹsemde usem Romany ke Europe ọdọhọ ete: “Mmesima ndiwewet se nduakde ndinam ke pepa nnyụn̄ nnịm pepa oro ke itie emi ndisọpde n̄kụt. Enyene ndise kiet emi odorode ke okpokoro mi, ẹdrọ ke ndise oro nte usụn̄ asiahade iba. Mma nnyene se anade mmek, mmesise ndise oro nnyụn̄ n̄kere m̀mê se mmekde edida mi ikesịm m̀mọ̀n̄.” Sonia esidomo ukeme esie mbak enye idiyak mfịna anam idem emem enye. Enye ọdọhọ ete: “Mfịna ekededi emi nnyenede ekeme nditie nte ibibene emi mîyakke mbe, mîdịghe etie nte ebọp emi ayakde mbe nsịm n̄kan̄ eken; etiene nte ndade n̄kpọ oro.”

19. Nso ke ikpebiere ndinam?

¹⁹ Jehovah esidiọn̄ nnyịn ke ediwak usụn̄. Edieke idomode ofụri ukeme nnyịn nditoro enye, iyowụt enye ke imama kpukpru edidiọn̄ emi enye ọdiọn̄de nnyịn do. (Heb. 13:15) Oro ekeme ndisịne nnyịn ndiyom mbufa usụn̄ ndinen̄ede nsịn idem nnam n̄kpọ esie, ndien oro ayanam enye ọdiọn̄ nnyịn akan nte ọkọdiọn̄de. Kpukpru usen, yak isiyom usụn̄ nte ‘ikpatabide ise nte Jehovah ọfọnde.’ Oro ayanam itie nte Jesus emi ọkọdọhọde ete: “Udia mi edi ndinam uduak enye emi ọkọdọn̄de mi nnyụn̄ nnam utom esie mma.”—John 4:34.