1. Jehovah oyom n̄kpọ etie didie ye kpukpru owo?

 EKEDI Jehovah obot owo, enye ọnọ owo ifụre ndimek ndinam n̄kpọ nte enye amade. Kpukpru owo ẹnyene ifụre oro. Se ededi emi afo ebierede, ifụre oro ke ada ebiere oro. Akakan n̄kpọ emi owo ekemede ndibiere, emi onyụn̄ edide ata akpan n̄kpọ edi ndibiere ndiyak idem nnọ Jehovah nnyụn̄ nsịne ke otu ikọt esie emi ẹtiede nte ubon. Se Jehovah oyomde kpukpru owo ẹnam edi oro. Ntak edi ke enye ama mme owo onyụn̄ oyom n̄kpọ ọfọn ye mmọ. Enye oyom mmọ ẹdi ufan esie ẹnyụn̄ ẹdu uwem ke nsinsi.​—Deut. 30:19, 20; Gal. 6:7, 8.

2. Jehovah oyom mme anamidiọk emi mîkabakede esịt kan̄a ẹnam nso? (1 John 2:1)

² Edi inyeneke owo ndomokiet emi Jehovah ọdọhọde ke ana enye anam n̄kpọ ọnọ imọ amama, imaha-ma. Jehovah esiyak owo kiet kiet ebiere se enye edinamde. Nso ikeme nditịbe edieke Christian emi ama akana baptism abiatde ibet Abasi, anamde akwa idiọkn̄kpọ? Enye mîkabakede esịt, ana ẹsio enye ẹfep ke esop. (1 Cor. 5:13) Kpa ye oro, Jehovah enen̄ede oyom anamidiọk oro afiak etiene imọ. Enye oro akam edi akpan  ntak emi enye akanamde Eyen esie edikpa afak mme owo man ẹkeme ndifen mme anamidiọk emi ẹkabarede esịt. (Kot 1 John 2:1.) Abasi nnyịn emi amade nnyịn etieti akam ekpekpe mme anamidiọk ubọk ete ẹkabade esịt.​—Zech. 1:3; Rome 2:4; Jas. 4:8.

3. Idineme nso ke ibuotikọ emi?

³ Jehovah oyom ida akwa idiọkn̄kpọ ye mbon emi ẹnamde utọ n̄kpọ oro nte enye adade. Ke ibuotikọ emi, ẹyeneme nte ikemede ndinam oro. Nte osụk okotde, kama enyịn se (1) nte ẹkenamde n̄kpọ ke esop Corinth ke eyo mme apostle ini owo akanamde akwa idiọkn̄kpọ, (2) se apostle Paul ọkọdọhọde ẹnam ini anamidiọk oro akakabarede esịt, ye (3) se mbụk Bible oro ekpepde nnyịn aban̄a nte Jehovah adade mme Christian emi ẹnamde akwa idiọkn̄kpọ.

NTE ẸKENAMDE N̄KPỌ KE EYO MME APOSTLE INI OWO AKANAMDE AKWA IDIỌKN̄KPỌ

4. Nso iketịbe ke esop Corinth ke eyo mme apostle? (1 Corinth 5:1, 2)

⁴ Kot 1 Corinth 5:1, 2. Ọyọhọ ikata emi Paul akasan̄ade ke nsio nsio ebiet ọkwọrọ ikọ, se enye okokopde nte etịbede ke obufa esop emi ẹkesiakde ke Corinth ama omụm owo mbọribọ. Brọda kiet ke esop oro ke akadan̄ ye n̄wan ete esiemmọ. Ama enyene ndịk ebe nde. Utọ ido oro “[ikakam] idụhe ke otu mme idụt”! Esop ẹkedodop ese ete oro. Edi etie nte ikokụreke ke oro. Anaedi mmọ ẹkekam ẹkere ke imanam etieti nte inamde ntre. Ekeme ndidi ndusụk owo ẹkekere ke mmimọ ndida se enye anamde oro ntre okowụt ke mmimọ imokop mme owo mbọm nte Jehovah inyụn̄ ikere iban̄a mme owo sia mmọ mîfọnke ima. Edi Jehovah isibọpke enyịn ke ini ikọt esie ẹnamde akwa idiọkn̄kpọ. Utọ emiom emiom ido emi ete oro akanamde do ama abiat esop enyịn̄. Ekeme ndidi enye ama anam mme Christian emi ẹkedụkde ndụk ye enye ẹkpebe enye. Paul ọkọdọhọ esop ẹnam ete oro nso?

5. Paul ọkọdọhọ esop ẹnam nso? Ikọ esie ọkọwọrọ nso? (1 Corinth 5:13) (Se ndise n̄ko.)

⁵ Kot 1 Corinth 5:13. Abasi ama ọnọ Paul spirit Esie ewet leta ọdọhọ esop yak ẹsio anamidiọk emi mîkamaha ndikabade esịt do ẹfep. Didie ke akana nti Christian ẹnam n̄kpọ ye enye? Paul ọkọdọhọ mmọ “ẹtre ndidụk ndụk” ye ete oro. Nso ke oro ọkọwọrọ? Paul ama anam an̄wan̄a ke se imọ iketịn̄de oro ọwọrọ n̄ko yak mmọ “ẹkûkam ẹdia n̄kpọ ye utọ owo oro.” (1 Cor. 5:11) Nditie ye owo ndia udia ekeme ndinam itọn̄ọ ndụk ye owo oro. Ama enen̄ede an̄wan̄a ke ikọ Paul  oro ọkọwọrọ yak nditọete ẹkûbre, ẹdia, ẹta, ẹn̄wọn̄ ye ete oro. Oro idiyakke idiọkn̄kpọ esie abiat mbon en̄wen ke esop. (1 Cor. 5:5-7) N̄kpọ en̄wen edi ke edieke mmọ ẹtrede ndidian idem ye ete oro, oro ekeme ndinam enyịn atara enye yak enye okụt ke imọ ima ikpọn̄ usụn̄ Abasi etieti, anam bụt anam enye, onyụn̄ anam enye oyom ndikabade esịt.

6. Ke leta Paul ama okodụk esop ubọk, mmọ ye anamidiọk oro ẹkenam n̄kpọ didie?

⁶ Ke Paul ama ọkọnọ leta oro ẹsọk mme Christian ke Corinth, enye ama ọtọn̄ọ ndikere m̀mê nditọete oro ẹdida didie se imọ ikọdọhọde ẹnam ke leta oro. Nte ini akakade, mbụk emi Titus ekemende ọsọk enye ama enem enye esịt. Nditọete ikọtọhọke ke leta Paul oro. (2 Cor. 7:6, 7) Mmọ ẹma ẹnam se enye ọkọdọhọde ẹnam. N̄kpọ en̄wen edi ke ọfiọn̄ ifan̄ ama ekebe tọn̄ọ Paul ọkọnọ leta oro ẹsọk mmọ, anamidiọk oro ama akabade esịt. Enye ama okpụhọde, etre idiọk ido esie oro, onyụn̄ ọtọn̄ọ ndidu uwem nte Jehovah ọdọhọde. (2 Cor. 7:8-11) Nso ke Paul edidọhọ esop ẹnam idahaoro?

 NTE AKANADE ESOP ẸNAM N̄KPỌ YE ANAMIDIỌK EMI AKAKABAREDE ESỊT DO

7. Ndisio anamidiọk oro mfep ke esop ekenyene nso utọ ufọn? (2 Corinth 2:5-8)

⁷ Kot 2 Corinth 2:5-8. Paul ọkọdọhọ ke “nsuannọ emi ediwak owo ẹnọde [ama] ekem ye utọ owo oro.” Ikọ esie ọkọwọrọ ke ntụnọ oro ama anam utom emi akanade anam ke idem ete oro. Utom oro ekedi nso? Ekedi ndin̄wam enye akabade esịt.​—Heb. 12:11.

8. Nso efen ke Paul ọkọdọhọ esop ẹnam?

⁸ Ke ntak oro, Paul ama ọdọhọ esop ete: “Mbufo ẹkpenyene ndifen nnọ” eyenete emi ekeduede do “nnyụn̄ ndọn̄ enye esịt” nnyụn̄ “[n̄wụt] enye ke mbufo ẹmenen̄ede ẹma enye.” Omokụt do ke Paul ikoyomke yak edi ẹma ẹfiak ẹda ete oro ẹsịn ke esop enye okụre do. Enye okoyom nditọete ẹda se mmọ ẹtịn̄de, se mmọ ẹnamde, ye nte mmọ ẹdidarade ete emi akakabarde esịt do ẹwụt enye ke imefen enye ofụri ofụri, ke imonyụn̄ inen̄ede ima enye. Oro ke mmọ ẹdida ẹnam enye enen̄ede okụt ke enenem mmimọ nte enye afiakde ọnyọn̄ edi esop.

9. Nso ikekeme ndinam ọsọn̄ ndusụk owo nsonso oro ndifen anamidiọk emi ama akakabade esịt do?

⁹ Ndi ama ọsọn̄ ndusụk owo ke esop oro nsonso oro ndifiak nda anamidiọk emi ama akakabade esịt nte eyenete mmọ? Mbụk oro idọhọke, edi etie nte se iketịbede edi oro. Idem n̄kpọ, n̄kọ etịme ido esie ama ada mfịna ọsọk ofụri esop, onyụn̄ ekeme ndidi ama anam ndusụk owo bụt. Anaedi ndusụk owo ẹkekere m̀mê ẹkpesasan̄a didie ẹdara enye ntre ke ini edide mmimọ idi mbon emi ikenen̄erede itịme man ikûnam oburobụt n̄kpọ. (Men Luke 15:28-30 domo.) Edi ntak emi ekedide akpan n̄kpọ esop ndiwụt ke mmimọ imenen̄ede ima eyenete mmimọ emi akafiakde ọnyọn̄ ebịne Jehovah do?

10-11. Nso ikekeme nditịbe ekpedi mbiowo ikenyịmeke ndifen anamidiọk emi akakabarede esịt do?

¹⁰ Kere ise se ikpeketịbede ekpedi mbiowo ikenyịmeke ndifiak nda ete emi ama ekenen̄ede akabade esịt do nsịn ke esop, mîdịghe edi ẹkefiak ẹda enye ẹsịn, nditọete ẹsịn ndiwụt enye ke mmimọ imama enye. Ekeme ndidi “ekikak mfụhọ” ekpekemen enye emen. Anaedi ikpọkọsọn̄ke enye ndikere ke eke imọ okụre. Akam ekeme ndidi enye ekpeketre ndinam se idin̄wamde enye afiak ekpere Abasi.

¹¹ Se ikpakakam idiọkde ikan oro ekpedi ke edieke nditọete ke esop ikenyịmeke ndifen anamidiọk emi ama akakabade esịt do, oro akpakanam mmọ ye Jehovah ẹkûkpere aba. Nso ikpakanam edi ntre? Ntak ekpedi ke oro okpowụt ke mmọ ikpebeke Jehovah emi esifende mme anamidiọk emi ẹkabarede esịt, edi ke mmọ ẹkpebe Satan emi edide esịt itiat, emi mîsituaha owo mbọm. Mmọ ẹkpekekabade ẹdi mbon emi Devil akpadade adian̄ade ete oro ọkpọn̄ Jehovah.​—2 Cor. 2:10, 11; Eph. 4:27.

12. Didie ke esop ẹkekeme ndiwụt ke mmimọ ikpebe Jehovah?

¹² Didie ndien ke esop ke Corinth ẹkekeme ndiwụt ke mmimọ ikpebe Jehovah, ikpebeke Satan? Ekedi mmọ ndinam n̄kpọ ye mme anamidiọk emi ẹkabarede esịt nte Jehovah esinamde. Se se ndusụk mbon emi ẹkewetde Bible ẹketịn̄de ẹban̄a Jehovah mi. David ọkọdọhọ ke Jehovah ‘ọfọn onyụn̄ enyịme ndifen nnọ.’ (Ps. 86:5) Micah ekewet ete: “Anie Abasi ebiet fi, kpa enye emi efende ndudue onyụn̄ adahadedo ke idiọkn̄kpọ?” (Mic. 7:18) Isaiah onyụn̄ ọdọhọ ete: “Yak idiọkowo ọkpọn̄ usụn̄ esie, owo ibak onyụn̄ ọkpọn̄ mme ekikere esie; yak enye onyụn̄ afiak etiene Jehovah, emi edituade enye mbọm, onyụn̄ etiene Abasi nnyịn, koro enye eyefen ke akamba usụn̄.”​—Isa. 55:7.

13. Ntak emi mîkọfọnke ẹbiat ini ndifiak nda ete oro nsịn ke esop? (Se ekebe emi, “ Ini Ewe ke Ẹkefiak Ẹda Ete Oro ke Corinth Ẹsịn ke Esop?”)

 ¹³ Edieke esop ke Corinth ẹkeyomde ndikpebe Jehovah, akana mmọ ẹfiak ẹdara ete emi akakabarede esịt do, ẹda enye ẹsịn ke otu mmọ, ẹnyụn̄ ẹnam enye okụt ke imama enye. Mmọ ndikanam item Paul emi enye ọkọdọhọde yak mmọ ẹfiak ẹdara anamidiọk emi akakabarede esịt do okowụt ke mmọ “[ẹsụk] ibuot ke kpukpru n̄kpọ.” (2 Cor. 2:9) Edi akpanikọ ke ẹkesio enye ẹfep ke esop ke ọfiọn̄ ifan̄ kpọt, edi ntụnọ oro ama enyene ufọn sia ama anam enye akabade esịt. Ntre ufọn ikodụhe ndibiat ini ndifiak nda enye nsịn ke esop.

NTE IKEMEDE NDIKPEBE NTE JEHOVAH ESINAMDE NNENNEN N̄KPỌ ONYỤN̄ ATUADE OWO MBỌM

14-15. Nte ẹkenamde n̄kpọ ye anamidiọk ke esop Corinth ke eset ekpep nnyịn nso? (2 Peter 3:9) (Se ndise n̄ko.)

¹⁴ Ẹkewet mbụk emi aban̄ade nte ẹkenamde n̄kpọ ye anamidiọk emi akakabarede esịt ke Corinth ke eset “ndida nteme nnyịn.” (Rome 15:4) Ke mbụk oro, imekpep ke Jehovah isibọpke enyịn ke ini ikọt esie ẹnamde akwa idiọkn̄kpọ. Jehovah isidọhọke yak ẹtua anamidiọk emi mîkabakede esịt “mbọm,” ẹyak enye esịne ye nti ikọt imọ aka iso odụk ndụk ye mmọ. Jehovah edi Abasi mbọm, edi enye isibọpke enyịn owo ama  anam akwa idiọkn̄kpọ; se enye ọkọdọhọde ke edi idiọkn̄kpọ osụk edi idiọkn̄kpọ, enye ikpụhọkede. (Jude 4) Enye ndikpakam nyak mme anamidiọk emi mîkabakede esịt ẹka iso ẹsịne ke esop ikpowụtke mbọm sia oro ekpesịn ofụri esop ke mfịna.​—N̄ke 13:20; 1 Cor. 15:33.

¹⁵ Kpa ye oro, imekpep ke Jehovah iyomke owo ndomokiet atak. Jehovah oyom ndinyan̄a kpukpru owo, ibọhọke-bọhọ owo oro idịghe se ẹnyan̄ade. Mbon emi ẹkabarede esịt ẹnyụn̄ ẹyomde ndifiak ndi ufan esie ke enye esitua mbọm. (Ezek. 33:11; kot 2 Peter 3:9.) Oro akanam ini ete oro ke Corinth akakabarede esịt onyụn̄ osion̄ode ubọk ọkpọn̄ idiọkn̄kpọ emi enye akanamde, Jehovah ama ada Paul anam esop ẹkụt ke akpana ẹfen ete oro ẹnyụn̄ ẹfiak ẹda enye ẹsịn ke esop.

16. Etie fi didie ke idem ndidiọn̄ọ nte ẹkenamde n̄kpọ ye ete oro ke Corinth?

¹⁶ Nnyịn ndineme nte ẹkenamde n̄kpọ ye ete oro ke Corinth anam ikụt ke Jehovah edi Abasi ima, ke enye ama edinen ido ye unenikpe. (Ps. 33:5) Ndi oro inamke ọdọn̄ fi nditoro Abasi nnyịn n̄kan nte esitorode? N̄kọ kpukpru nnyịn idi mme anamidiọk, imonyụn̄ iyom enye efen nnyịn. Nnyịn owo kiet kiet imenyene ntak ndikọm Jehovah nte enye akayakde Eyen esie edikpa afak nnyịn, koro n̄kpa oro anam ẹkeme ndifen mme idiọkn̄kpọ nnyịn. Enenem nnyịn onyụn̄ ọdọn̄ nnyịn esịt ndidiọn̄ọ ke Jehovah enen̄ede ama ikọt esie, onyụn̄ oyom n̄kpọ ọfọn ye mmọ!

17. Idineme nso ke mme ibuotikọ emi ẹtienede?

¹⁷ Eke nnyịn mfịn-e? Ẹsinam didie n̄kpọ owo ama anam akwa idiọkn̄kpọ? Didie ke mbiowo ẹsiwụt ke mmimọ ikpebe Jehovah, ke ọdọn̄ mmimọ ndin̄wam anamidiọk akabade esịt? Esop ẹkpenam n̄kpọ didie ke ini mbiowo ẹbierede ndisio owo mfep ke esop mîdịghe ẹbiere ndifiak nda owo? Ẹyeneme mme mbụme emi ke mme ibuotikọ emi ẹtienede.