Apostle Paul ekewet ọdọhọ mme Christian ke Thessalonica ete: “Edieke owo ekededi mîkopke uyo emi nnyịn inọde ke leta emi, ẹnịm owo emi idiọn̄ọ.” (2 Thess. 3:14) Ikesidọhọ ke ẹketịn̄ ikọ oro ẹnọ mbiowo. Edieke owo akakade iso anam n̄kpọ ikereke item Bible kpa ye edide ẹma ẹnọ enye item ke n̄kpọ oro ediwak ini, mbiowo ẹma ẹkeme ndinọ utịn̄ikọ ke esop ndụri nditọete utọn̄. Ke oro ebede, mme asuanetop ididụkke ndụk ye owo emi ẹma ẹkenịm idiọn̄ọ do.

Edi oyom ikpụhọde se ikesitịn̄de. Item Paul do aban̄a se Christian kiet kiet akpanamde, etiene se itịbede. Ntre ufọn idụhe mbiowo ndinọ utịn̄ikọ ndụri nditọete utọn̄. Nso inam ikpụhọ se ikesitịn̄de iban̄a 2 Thessalonica 3:14? Kere ise se Paul eketịn̄de aban̄a ini enye ọnọde item ke ufan̄ikọ oro.

Paul ọkọdọhọ ke ndusụk owo ke esop oro “[ẹkesan̄a] etịme etịme.” Enye ama ada N̄wed Abasi ọnọ mmọ item, edi mmọ ikamaha ndikop. Akpatre ini emi enye akakade ekese mmọ, enye ama ọdọhọ ete: “Edieke owo ekededi mîmaha ndinam utom, yak enye okûdia n̄kpọ.” Ndusụk owo ẹma ẹsụk ẹsịn ndinam utom nse mban̄a idemmọ kpa ye edide ikenyeneke se inamde mmọ ubọk, inyeneke se inamde ukot. Mfịna en̄wen ekedi ke mmọ ẹma ẹsisịn idem ke se mbon en̄wen ẹnamde emi mîbeheke mmọ. Didie ke akana mme Christian ẹnam n̄kpọ ye utọ mbon emi ẹkesan̄ade etịme etịme do?​—2 Thess. 3:6, 10-12.

Paul ọkọdọhọ: “Ẹnịm owo emi idiọn̄ọ.” Ikọ Greek emi ẹkabarede ikọ oro ẹto ọwọrọ nditịm ndiọn̄ọ utọ owo oro. Paul eketịn̄ ikọ oro ọnọ ofụri esop, idịghe mbiowo kpọt. (2 Thess. 1:1; 3:6) Ntre, mme Christian kiet kiet emi ẹkemede ndidi ẹma ẹkụt eyenete emi mîmaha ndinam item N̄wed Abasi ẹyemek “[nditre] ndidụk ndụk ye” eyenete emi asan̄ade etịme etịme do.

Ndi oro ọkọwọrọ ke ẹkenam n̄kpọ ye enye nte owo emi ẹsiode ẹfep ke esop? Ihih-o, koro Paul ama adian do ete: “Ẹka iso ẹnọ enye item nte eyenete.” Ntre Christian kiet kiet oyosụk anam n̄kpọ ye eyenete emi ẹkenịmde idiọn̄ọ do ke ini ẹkwọrọde ikọ ẹnyụn̄ ẹdụkde mbono esop. Edi mmọ ẹyemek ke mmimọ idibreke, idia, ita, in̄wọn̄ ye enye; ke ikpaka edinam, mmimọ ididianke idem ye enye. Ntak-a? Paul ọkọdọhọ ete: “Man bụt akpanam enye.” Sia edide ẹma ẹnịm Christian oro akasan̄ade etịme etịme do idiọn̄ọ, se enye akanamde oro ekeme ndinam enye bụt, enye onyụn̄ okpụhọde.​—2 Thess. 3:14, 15.

Didie ke mme Christian mfịn ẹkpenam item oro? Akpa, ana ikụt ite ke se owo oro anamde enen̄ede edi “etịme etịme” ido nte Paul ọkọdọhọde. Paul iketịn̄ke iban̄a mbon emi mîmekke ukem se nnyịn imekde ke ntak esịt mmọ, m̀mê emi mîmaha ukem se imade. Enye ikonyụn̄ itịn̄ke iban̄a mbon emi ẹkenamde se iyatde nnyịn. Utu ke oro, enye eketịn̄ aban̄a mbon emi ẹkoide-koi ẹbiere nditre ndinam item emi ẹdade Ikọ Abasi ẹnọ mmọ, kpa ye emi item oro enen̄erede an̄wan̄a.

Mfịn ikpokụt eyenete emi enyenede utọ spirit nsọn̄ibuot oro, a iyebiere ke idem nnyịn ke nnyịn idibreke, idia, ita, in̄wọn̄ ye enye; ke ikpaka edinam, nnyịn ididianke idem ye enye. Sia edide n̄kpọ emi nnyịn ibierede ke idem nnyịn ndinam, idineme enye ye mbon emi idụn̄de ọkọm kiet kpọt, emi ẹdide Mme Ntiense n̄ko. Nnyịn idimenke ikeneme ye mbon emi midịghe mbonubon nnyịn. Idisụk ikọkọm eyenete oro ima ika mbono esop inyụn̄ isan̄a ye enye ikwọrọ ikọ. Enye ama etre idiọkido esie oro, iyafiak itọn̄ọ ndibre, ndia, nta, n̄n̄wọn̄ ye enye.