Ndi ama etịn̄ enyịn okot mme Enyọn̄-Ukpeme ndondo emi? Ọfọn, se m̀mê emekeme ndibọrọ mme mbụme oro ẹtienede mi:

Nso utọ idiọkn̄kpọ ke Jesus eketịn̄ aban̄a ke Matthew 18:15-17?

Jesus eketịn̄ aban̄a n̄kpọ oro owo iba emi ẹnyenede mfịna ẹkemede nditie kiet mbiere, emi ẹkemede ndida nsio owo mfep ke esop edieke owo mîbiereke enye. Utọ idiọkn̄kpọ emi esịne ndibian̄a owo mbọ okụk m̀mê ndibiat owo enyịn̄.—w16.05, p. 7.

Nso ke akpanam man enen̄ede ọbọ ufọn ke ini okotde Bible?

Se akpanamde edi emi: Kot Bible ke ofụri esịt, ndien ke ini okotde, kere nte ekemede ndinam se okotde. Bụp idemfo ete, ‘Didie ke n̄keme ndida se n̄kotde emi n̄n̄wam mbon en̄wen?’ Da mme n̄kpọ oro esop Abasi ẹsiode, emi ẹsidade ẹnam ndụn̄ọde, dụn̄ọde se okotde oro.—w16.05, p. 24-26.

Ndi ọdiọk ndifụhọ n̄kpa owo fo kpa ye emi enịmde ke mme owo ẹyeset?

Ndinịm ke mme owo ẹyeset inamke nnyịn itre ndifụhọ ke ini owo nnyịn akpade. Abraham ama ofụhọ ke ini Sarah akakpade. (Gen. 23:2) Nte ini akade, nnyịn idinen̄ekede ifụhọ aba.—wp16.3, p. 4.

Mmanie ke owo emi akamade nnụk mmọn̄n̄wed ewetn̄wed ye owo itiokiet emi ẹkamade n̄kpọekọn̄, emi ẹdude ke Ezekiel ibuot 9 ẹda ẹban̄a?

Mmọ ẹda ẹban̄a mme angel emi Abasi akadade osobo Jerusalem, emi enye edinyụn̄ adade osobo idiọk ererimbot Satan ke ekọn̄ Armageddon. Mfịn, owo oro akamade nnụk mmọn̄n̄wed ewetn̄wed ada aban̄a Jesus Christ, emi edinịmde mbon emi ẹdibọhọde idiọn̄ọ.—w16.06, p. 16-17.

Nso ikpakanam Bible okûdu?

Se ikpakanamde edi (1) Ikpan̄wed n̄kukịp ye n̄wed ikpa oro ẹkedade ẹwet Bible ẹma ẹsisọp ẹkpụhọ uduọt, ẹmem, ẹnyụn̄ ẹwaha; (2) ediwak mme andikara ye ikpọ owo ufọkabasi ikoyomke ẹkabade, ẹmịn̄, m̀mê ẹnyene Bible; ye (3) ẹma ẹdomo ndikpụhọ n̄kpọ ke esịt.—wp16.4, p. 4-7.

Nso idi ndusụk n̄kpọ emi asan̄autom Abasi akpanamde man odu mmemmem uwem?

Fiọk se enen̄erede oyom, kûnyụn̄ ubiat okụk ntịme ntịme. Biere nte edisibiatde okụk. Nyam, nọ mme owo, mîdịghe duọn̄ọ mme n̄kpọ emi mûyomke. Sụhọde ini oro adade anam utom m̀mê adade an̄wana okụk, nyụn̄ biere nte edisisịnde idem ikwọrọ ikọ.—w16.07, p. 10.

Bible ọdọhọ ke nso inen̄erede ifọn ikan gold m̀mê silver?

Job 28:12, 15 ọdọhọ ke ọniọn̄ emi Abasi ọnọde enen̄ede ọfọn akan gold m̀mê silver. Mmọdo, yak ọniọn̄ emi Abasi ọnọde anam fi enen̄ede osụhọde idem onyụn̄ ọbuọt idem ye Jehovah.—w16.08, p. 18-19.

Ndi ọfọn eyenete enịm ntan̄ebek mfịn?

Ke ndusụk idụt, idiọkke irenowo ndinịm ntan̄ebek emi ẹfatde ediye ediye, ndien emi isikpanke mme owo ndikpan̄ utọn̄ n̄kop eti mbụk. Kpa ye oro, ndusụk nditọete isimaha ndinịm ntan̄ebek. (1 Cor. 8:9) Edi ke mme idụt en̄wen, owo isimaha mbon oro ẹnamde n̄kpọ Abasi ẹnịm ntan̄ebek.—w16.09, p. 21.

Ntak emi ikpenịmde ke mbụk David ye Goliath ke Bible ama etịbe?

Odu owo kiet ke eyo nnyịn emi ọkọniọn̄de ekpere ikpat usukkiet. Goliath akada centimita 15 kpọt ọniọn̄ akan owo oro. David ikedịghe owo n̄ke, koro mme ọdọk isọn̄ nyom n̄kpọeset ẹma ẹkụt itiat emi ẹkewetde “ufọk David.” Jesus Christ ama etịn̄ n̄ko aban̄a David. Mbụk Bible emi enen.—wp16.5, p. 13.

Ntak emi ọniọn̄, ifiọk, ye mbufiọk mîdịghe ukem n̄kpọ?

Owo oro enyenede ifiọk ọdiọn̄ọ ediwak n̄kpọ. Owo oro enyenede mbufiọk esitie ekere ufọn oro imọ idibọde edieke inamde se idiọn̄ọde. Edi owo emi enyenede ọniọn̄ esida ifiọk ye mbufiọk anam n̄kpọ man ọbọ ufọn.—w16.10, p. 18.