1. Ntak emi baptism edide ata akpan n̄kpọ? (Se akpa ndise ibuotikọ emi.)

ATA ediwak mbon oro isikpepde Bible ẹsina baptism kpukpru isua. Ediwak ke otu mmọ ẹdi mme uyen ye mbon oro mîsịmke kan̄a isua 13, ndien eyedi ẹkekpep mmọ Ikọ Abasi toto ke edet iba. Ndi afo emesịne ke otu mmọ? Edieke edide emesịne, amanam etieti. Ana kpukpru ikọt Abasi ẹna baptism sia baptism edi kiet ke otu n̄kpọ emi anade owo anam man enyene edinyan̄a.​—Matt. 28:​19, 20; 1 Pet. 3:21.

2. Ntak emi mûkpayakke ndịk anam fi ndina baptism?

² Kpa ye oro baptism asan̄ade ye uwak edidiọn̄, enye onyụn̄ asan̄a ye mbiomo. Ntak emi idọhọde ntre? N̄kọ emeti ke usen emi akanade baptism ke ẹma ẹbụp fi mbụme emi: “Sia Jesus Christ ama akakpa ọnọ fi, ndi amakabade esịt ọkpọn̄ mme idiọkn̄kpọ fo onyụn̄ ayak idemfo ọnọ Jehovah man anam uduak esie?” Afo ama ọbọrọ “ih” ke ofụri esịt. Afo ndikana baptism okowụt ke ama ayak idem ọnọ Jehovah onyụn̄ enen̄ede ọn̄wọn̄ọ ke imọ iyama enye, inyụn̄ ida ndinam uduak esie  nte ata akpan n̄kpọ ke uwem fo. Idịghe ekpri un̄wọn̄ọ ke akanam oro. Ndi akpana atua n̄kpọfiọk nte akanamde utọ un̄wọn̄ọ oro? N̄wan̄ansa-o. Idụhe se ifọnde nte owo ndiyak idem nnọ Jehovah. Edieke owo mîyakke idem inọ Jehovah, ọwọrọ ayak ọnọ Satan. Satan iyomke Jehovah anyan̄a fi man enyene nsinsi uwem. Ekpenen̄ede enem enye edieke ọkpọkpọn̄de Jehovah edida ye enye.

3. Nso edidiọn̄ ke afo ọbọ ke ntak emi ayakde idem ọnọ Jehovah?

³ Sia afo ama ekesịn ndida ye Satan, kere ban̄a nte Jehovah ọdiọn̄de fi ke ntak emi ayakde idem ọnọ enye onyụn̄ ana baptism. Idahaemi emekeme nditịn̄ uko uko ete: “Jehovah ada ye ami; ndifeheke ndịk. Nso ke owo ekeme ndinam mi?” (Ps. 118:6) Edi ata n̄kpọ ukpono ndida ye Jehovah nnyụn̄ mfiọk ke enye ama fi.

4, 5. (a) Ntak emi idọhọde ke enyene-idem enyene ndibiere ndikpono Jehovah? (b) Nso ke kpukpru ikọt Abasi ẹsisobo edide mmọ ẹdi ikpọ owo m̀mê mme uyen?

⁴ Ke emi ama akana baptism mi, ti ke ete ye eka fo idikponoke Jehovah inọ fi. Idem ọkpọkọm osụk odụn̄ ye mmọ, afo ke idemfo enyene ndibiere ndikpono Jehovah edieke oyomde enye anyan̄a fi. Ntak emi ekpesitide oro? Sia ufiọkke idomo emi afo edisobode. Ke uwụtn̄kpọ, ekeme ndidi akana baptism ini mûsịmke isua 13. Edi ke emi ama okodụk isua uyen mi, emekeme ndisobo mme idomo oro mûkosoboke ini ekedide eyenọwọn̄; n̄ko mme n̄kpọ oro mîkesidọn̄ke fi ẹkeme nditọn̄ọ ndidọn̄ fi idahaemi. N̄kaiferi kiet ọkọdọhọ ete: “Idụhe eyenọwọn̄ emi edidọhọde ke imọ idịghe aba Ntiense Jehovah ke ntak emi enye mîtieneke ita cake usọrọ usen emana ke ufọkn̄wed. Edi ke ini eyen oro esịmde isua emi idan̄ esinen̄erede ọdọn̄ owo, ana enye enen̄ede enịm ke idụhe se ifọnde nte ndinịm ibet Abasi.”

⁵ Idịghe mme uyen kpọt ẹsisobo idomo ke ẹma ẹkena baptism. Idem mbon oro ẹnade baptism ke ẹma ẹkekpon owo ẹsisobo idomo oro mmọ mîkekereke. Utọ idomo oro ekeme ndidi udọn̄ọ, mfịna ke ndọ m̀mê ke itieutom. Idụhe owo emi mîdisoboke idomo, ntre ana kpukpru nnyịn ibiere ndisọn̄ọ nda ye Jehovah inamke n̄kpọ m̀mê nso itịbe.​—Jas. 1:​12-14.

6. (a) Ọwọrọ nso ndiyak ofụri uwem fo nnọ Jehovah? (b) Didie ke Philippi 4:​11-13 ekeme ndin̄wam fi?

⁶ Edieke etide ke ama ọn̄wọn̄ọ ọnọ Jehovah emi edide Andikara ofụri ekondo ke imọ iyada ofụri uwem imọ inam n̄kpọ esie, emi ayan̄wam fi ọsọn̄ọ ada anam n̄kpọ esie inamke n̄kpọ m̀mê nso itịbe. Emi ọwọrọ ke ayaka iso anam n̄kpọ esie ekpededi ete m̀mê eka fo, m̀mê mme ufan fo ikponoke Jehovah aba. (Ps. 27:10) Inamke n̄kpọ m̀mê nso iwọrọ fi, ben̄e Jehovah an̄wam fi aka iso enyene uko anam n̄kpọ esie nte afo ọkọn̄wọn̄ọde.​—Kot Philippi 4:​11-13.

7. Nso ke ọwọrọ ndisan̄a ke ‘ndịk ye nnyekidem nnam edinyan̄a fo ọwọrọ usụn̄’?

⁷ Jehovah oyom fi edi ufan imọ. Ntre ana esịn idem anam se idin̄wamde fi aka iso edi ufan esie ye se idinyụn̄ inamde enye anyan̄a fi. Philippi 2:12 ọdọhọ yak afo ‘aka iso asan̄a ke ndịk ye nnyekidem anam edinyan̄a fo ọwọrọ usụn̄.’ Emi ọwọrọ ke ana afo esitie ekere se akpanamde man aka iso edi ufan Jehovah onyụn̄ ọsọn̄ọ ada ye enye inamke n̄kpọ m̀mê nso itịbe. Kûkere ke amama uwa. Ndusụk ikọt Abasi oro ẹma ẹkenam n̄kpọ esie ẹbịghi ẹma ẹkam ẹwaha ẹkpọn̄ usụn̄. Ntre, nso idin̄wam fi aka iso anam edinyan̄a fo ọwọrọ usụn̄?

8. Ndikpep Bible esịne nso ye nso, ntak emi ọfọnde esitie ke idemfo ekpep Bible?

⁸ Edieke oyomde ndidi ufan Jehovah, ana esikpan̄ utọn̄ okop se enye etịn̄de, esinyụn̄ etịn̄ ikọ ye enye. Sitie ke idemfo kpep Bible, sia ndikpep Bible edi akpan usụn̄ kiet emi isikpan̄de utọn̄ ikop se Jehovah etịn̄de. Emi esịne ndikot nnyụn̄ ntie n̄kere se okotde ke Bible ye mme n̄wed esop Abasi. Ti ke ukpepke Bible man enyene ifiọk ibuot kpọt, kûnyụn̄ ukpep Bible nte eyen ufọkn̄wed emi okotde n̄wed omụm ọdọn̄ ke ibuot man ekewet udomo ebe. Edi ke ini ekpepde Bible, domo ndikụt mbufa n̄kpọ oro ekpepde aban̄a Jehovah. Emi ayan̄wam fi etetịm ekpere enye, enye oyonyụn̄ ekpere fi.​—Jas. 4:8.

9. Mme n̄kpọ ewe oro esop Jehovah osion̄ode ke afo esida ekpep Bible?

⁹ Esop Jehovah osion̄o ediwak n̄kpọ emi ẹdin̄wamde fi ekpep Bible ọfọn. Ke uwụtn̄kpọ, edieke odụkde jw.org/efi aka SE BIBLE EKPEPDE > MME UYEN, oyokụt ibuotikọ emi “Mme N̄kpọ Ndida N̄kpep Bible.” Se ẹdọn̄de do ayan̄wam fi ekpep n̄kpọ oto mme mbụk Bible. Ibuotikọ oro “Nso ke Bible Enen̄ede Ekpep?” emi odude ke jw.org/efi eneme n̄ko nsio nsio n̄kpọ emi ẹdin̄wamde fi enen̄ede enịm se afo ekpepde ke Bible. Enye oyonyụn̄ an̄wam fi anam se enịmde an̄wan̄a mbon en̄wen. Emekeme n̄ko ndikot Ẹdemede! Ikọmbakara eke April 2009, page 23-26, emi eketịn̄de se n̄kparawa owo ẹkpenamde man esinem mmọ ndikot Bible ye ibuotikọ emi “ ” emi odude ke jw.org/efi eneme n̄ko nsio nsio n̄kpọ emi ẹdin̄wamde fi enen̄ede enịm se afo ekpepde ke Bible. Enye oyonyụn̄ an̄wam fi anam se enịmde an̄wan̄a mbon en̄wen. Emekeme n̄ko ndikot Ẹdemede! Ikọmbakara eke April 2009, page 23-26, emi eketịn̄de se n̄kparawa owo ẹkpenamde man esinem mmọ ndikot Bible ye ibuotikọ emi “Nte Okpokotde Bible Man Enen̄ede Adia Ufọn” ke Enyọn̄-Ukpeme No 1, 2017, page 4-6. Ndikpep n̄kpọ nnyụn̄ ntie n̄kere se ekpepde ayan̄wam fi anam edinyan̄a fo ọwọrọ usụn̄.​—Kot Psalm 119:105.

10. Ntak emi asan̄autom Abasi oro ama akana baptism akpadade akam ke akpan n̄kpọ?

¹⁰ Ndikpep Bible edi usụn̄ kiet emi isikpan̄de utọn̄ ikop se Jehovah etịn̄de, edi isitịn̄ ikọ ye enye ke ini ibọn̄de akam. Nnyịn ikpọbọn̄ke akam sia ẹnyụn̄ ẹdọhọde ẹbọn̄, ikponyụn̄ idaha akam nte ibọk mfọniso. Edi ikpada akam ke akpan n̄kpọ sia akam edi nneme emi nnyịn inemede ye Andibot nnyịn. Jehovah oyom fi eneme nneme ye imọ. (Kot Philippi 4:6.) Bible ọdọhọ fi ‘otop mbiomo fo ọnọ  Jehovah’ ke ini n̄kpọ ekededi etịmerede fi esịt. (Ps. 55:22) Ese didie item emi? Ediwak nditọete ẹdọhọ ke item emi an̄wam mmimọ. Enye ekeme ndin̄wam fi n̄ko!

11. Ntak emi afo ekpesikọmde Jehovah?

¹¹ Nnyịn ikpesibọn̄ke akam sụk ini iyomde Jehovah an̄wam nnyịn. Bible ọdọhọ ‘iwụt esịtekọm.’ (Col. 3:15) Ndusụk ini imesitie ikere mfịna nnyịn tutu ifre ediwak n̄kpọ emi Jehovah anamde ọnọ nnyịn. Se se nnyịn ikpanamde mi mbak idifre se Jehovah anamde ọnọ nnyịn: Kpukpru usen, yom n̄kpọ ita ke nsụhọde n̄kaha emi Jehovah anamde ọnọ fi, nyụn̄ kọm enye ke mme n̄kpọ oro. Abigail emi akanade baptism ini edide isua 12 ọdọhọ ete: “Idụhe owo ndomokiet ke ofụri ekondo emi ikpọkọmde nte Jehovah. Akpana isikọm Jehovah ke kpukpru se enye anamde ọnọ nnyịn. Ndisọpke mfre ikọ emi: Edieke Jehovah ekpesinọde nnyịn n̄kukụre se isitide ikọm enye, idianke n̄kpọ ndomokiet, n̄kpọ ekpetie didie ye nnyịn?”

12, 13. Ntak emi ekpetiede ekere nte Jehovah ọfọnde ye afo?

¹² Jehovah ama anyan̄a Edidem David osio ke ediwak afanikọn̄. Ntak edi oro enye ọkọkwọde ete: “Mbufo ẹtabi ẹnyụn̄ ẹse nte Jehovah ọfọnde; owo emi enyenede enye nte ebiet ubọhọ okop inemesịt.” (Ps. 34:8) Itien̄wed emi owụt ke ọfọn isitie ikere nte Jehovah ọfọnde ye nnyịn. Ke ini okotde Bible ye mme n̄wed nnyịn, onyụn̄ odụkde mbono esop, oyokụt nte Abasi esin̄wamde ikọt esie ẹsọn̄ọ ẹda ẹnam n̄kpọ esie. Nte afo enen̄erede ekpere Jehovah, domo ndikụt nte Jehovah ọfọnde ye afo. Ndi omokụt ubọk Jehovah ke uwem fo?

¹³ Ndikeme ndisan̄a n̄kpere Jehovah ye Eyen esie edi akpan usụn̄ kiet emi kpukpru nnyịn itabide mfọn Jehovah ise. Jesus ọkọdọhọ ete: “Baba owo kiet ikemeke nditiene mi ibọhọke Ete, emi ọkọdọn̄de mi, odụri enye edi.” (John 6:44) Ndi emekere ke Jehovah odụri fi adian idem? Afo emekeme ndikere, ‘Ete ye eka mi ke Jehovah okodụri adian idem, ami nnyụn̄ ntetiene mmọ.’ Edi ti ke tọn̄ọ ini akayakde idem ọnọ Jehovah onyụn̄ ana baptism ke okowụt ke Jehovah edi ata akpan ufan fo. Jehovah enen̄ede ọfiọk fi. Bible ọdọhọ ete: “Edieke owo ekededi amade Abasi, Abasi ọfiọk owo emi.” (1 Cor. 8:3) Ntre sikọm Jehovah nte enye anamde fi odu ke esop esie.

14, 15. Didie ke ukwọrọikọ ekeme ndin̄wam fi enen̄ede enịm se ekpepde?

¹⁴ Usụn̄ en̄wen emi Jehovah ọfọnde ye afo edi nte enye esinọde fi uko ọkwọrọ ikọ ọnọ mme owo, edide ke ufọk ke ufọk m̀mê ke ufọkn̄wed. Esisọn̄ ndusụk uyen ndikwọrọ ikọ nnọ nditọ ufọkn̄wed mmọ. Ekeme ndidi an̄wan̄a fi se isinamde ọsọn̄ mmọ, sia ndusụk mmọ isifiọkke nte nditọ ufọkn̄wed mmọ ẹdinamde n̄kpọ mmọ ẹma ẹyom ndikwọrọ ikọ nnọ mmọ. Ekeme ndimem utom ndikwọrọ ikọ nnọ eyen ufọkn̄wed mbufo kiet akan ndikwọrọ nnọ ediwak mmọ. Nso idin̄wam fi edieke idem esinyekde fi?

¹⁵ Tie kere ntak emi afo enịmde se ekpepde ke Bible. Edieke odụkde jw.org/efi aka SE BIBLE EKPEPDE > MME UYEN, oyokụt ibuotikọ emi “N̄wed Ukpepn̄kpọ.” Se ẹdọn̄de do ayan̄wam fi etie ekere se afo enịmde, ntak emi enịmde se afo ekpepde ke Bible, oyonyụn̄ an̄wam fi ekeme ndinam se afo enịmde an̄wan̄a mbon en̄wen. Ama enen̄ede enịm se ekpepde, onyụn̄ ọfiọk nte ekemede ndinam se enịmde oro an̄wan̄a mbon  en̄wen, edinenem fi ndinam mme owo ẹdiọn̄ọ Jehovah.​—Jeremiah 20:​8, 9.

16. Nso ikeme ndin̄wam fi enyene uko ọkwọrọ ikọ?

¹⁶ Idem ekeme ndisụk nnyek fi ndikwọrọ ikọ kpa ye oro ekemede ndinam se enịmde an̄wan̄a owo. Sista kiet emi edide isua 18, okonyụn̄ anade baptism ini edide isua 13, ọdọhọ ete: “Mmọdiọn̄ọ ke se nnịmde edi akpanikọ, edi ndusụk ini esisọn̄ mi nditịn̄ se nnịmde nnọ owo.” Nso in̄wam enye akan mfịna emi? Enye ọdọhọ ete: “Mmesima nditọn̄ọ ye nneme, ekem ntop n̄kpọ Ikọ Abasi nsịn. Nditọ ufọkn̄wed nnyịn ẹsima nditịn̄ mban̄a se mmọ ẹsinamde, ami n̄ko mmesitiene ntịn̄ se nsinamde. Ndusụk ini nte isụk inemede nneme, mmesitịn̄ se idinamde mmọ ẹnọ mi utọn̄, utọ nte, ‘Ini n̄kekpepde owo Bible urua oko, mma n̄kụt . . . ’ Ekem nyaka iso ke nneme mi. Kpa ye oro n̄kotopde-top nneme Bible nsịn, ediwak ini mmọ ẹsiyom ndifiọk nte nsikpepde owo Bible. Ndusụk ini mmọ ẹsibụp mi se Bible ekpepde. Ndisinam ntem esinam emem mi utom ndikwọrọ ikọ. Esịt esinen̄ede enem mi ke ini n̄kwọrọde ikọ nnọ mme owo!”

17. Didie ke afo ndima se afo enịmde edin̄wam fi ọkwọrọ ikọ?

¹⁷ Mme owo ẹyema ndikpan̄ utọn̄ nnọ fi edieke okponode mmọ onyụn̄ owụtde ke imama mmọ. Olivia emi edide isua 17, okonyụn̄ anade baptism ini mîsịmke isua 13, ọdọhọ ete: “Idem ama esinyek mi sia n̄kekere ke edieke edide nte ntetịn̄ ekpri n̄kpọ, ami nsiak Bible, ke mme owo ẹdida ke mmemen n̄kpọ Abasi mbiom ke ibuot.” Ekem enye ama etre ndikere nte mme owo ẹdidade enye onyụn̄ ọtọn̄ọ ndikere se enye akpanamde man mme owo ẹkpan̄ utọn̄ ẹnọ enye. Enye ama etie ekere ete: “Ediwak mme uyen ifiọkke n̄kpọ ndomokiet iban̄a Mme Ntiense Jehovah. Nnyịn kpọt ke mmọ ẹdiọn̄ọ nte Mme Ntiense Jehovah. Nte nnyịn inamde n̄kpọ edinam mmọ ẹkpan̄ utọn̄ ẹnọ nnyịn. Nnyịn idikemeke ndikwọrọ ikọ nnọ mmọ edieke iyakde bụt anam nnyịn, mînyụn̄ inyeneke uko itịn̄ se inịmde ke akpanikọ inọ mmọ. Oro ekeme ndinam mmọ ẹkere ke inemke nnyịn ndidi Mme Ntiense Jehovah. Emi onyụn̄ ekeme ndinam mmọ ẹkûkpan̄ utọn̄ ẹnọ nnyịn. Edi edieke nnyịn isimade nditịn̄ se inịmde uko uko, etie nte oro ayanam mmọ ẹkpono nnyịn.”

18. Nso idin̄wam fi anam edinyan̄a fo ọwọrọ usụn̄?

¹⁸ Se inemede ke ibuotikọ emi owụt ke akpana esịn idem anam edinyan̄a fo ọwọrọ usụn̄, kûnyụn̄ udedei uda enye ke n̄kpọ mbubru. Se idin̄wamde fi anam edin̄yan̄a fo ọwọrọ usụn̄ edi ndisikot Bible nnyụn̄ ntie n̄kere se okotde, ndisibọn̄ akam nnọ Jehovah, ndisinyụn̄ ntie n̄kere se Jehovah anamde ọnọ fi. Ndinam mme n̄kpọ emi ayanam fi enen̄ede ekpere Jehovah onyụn̄ edi ufan esie. Emi oyonyụn̄ anam fi enyene uko etịn̄ se enịmde ọnọ mbon en̄wen.​—Kot Psalm 73:28.

19. Ntak emi ekpesịnde idem anam edinyan̄a fo ọwọrọ usụn̄?

¹⁹ Jesus ọkọdọhọ ete: “Edieke owo ekededi oyomde nditiene mi, yak enye akan̄ idemesie onyụn̄ emen eto ndutụhọ esie aka iso etiene mi.” (Matt. 16:24) Edieke afo oyomde ndidi mbet Christ, ana ayak idem ọnọ Jehovah onyụn̄ ana baptism. Emi ayanam ọbọ ediwak edidiọn̄ idahaemi onyụn̄ odori enyịn ndidu uwem ke nsinsi ke obufa ererimbot. Mmọdo, nen̄ede sịn idem nam edinyan̄a fo ọwọrọ usụn̄!