Deuteronomy 22:25-27 inen̄ekede iban̄a ndise m̀mê erenowo oro edue m̀mê iduehe, sia ẹfọfiọk ke enye edue. Ibet emi akan̄wam yak ẹkụt ke eyenan̄wan oro iduehe. Fiak se nte n̄kpọ oro asan̄ade.

Ufan̄ikọ 23 ye 24 etịn̄ aban̄a erenowo emi omụmde n̄wan emi okodụkde ediomi ndọ ye owo adan̄ “ke obio.” Ẹyebiom erenowo oro ikpe ke esịn efịbe sia ẹda n̄wan emi okodụkde ediomi ndọ ye owo do nte n̄wan owo. Nso ikanam ẹtiene ẹbiom n̄wan oro ikpe? ‘Enye ikofiorike n̄kpo ke obio.’ Ekpedi enye ama ofiori n̄kpo, mme owo ẹkpekesụk ẹkop ẹnyụn̄ ẹdinyan̄a enye. Edi enye ikofiorike. Ntre enye n̄ko ama etiene esịn efịbe, ẹma ẹnyụn̄ ẹbiom mmọ mbiba ikpe.—Deut. 22:23, 24.

Edi ikedịghe ntre ini eyenan̄wan oro anamde se ẹtịn̄de ke Deuteronomy 22:25-27. Itie oro ọdọhọ ete: “Edi edieke edide ke in̄wan̄ ke eren oro okokụt eyenan̄wan emi okodụkde ediomi ndọ ye owo en̄wen, onyụn̄ omụm enye adan̄, eren oro akadan̄de enye kpọt enyene ndikpa, ẹkûnam eyenan̄wan oro n̄kpọ. Enye inamke idiọkn̄kpọ eke odotde n̄kpa, koro ikọ emi etie nte emi owo adahade ke enyọn̄ owot ekemmọ owo. Koro enye okokụt eyenan̄wan emi ke in̄wan̄. Eyenan̄wan emi okodụkde ediomi ndọ mi ama ofiori n̄kpo, edi owo ikodụhe ndinyan̄a enye.”

Emi ama anam mme ebiereikpe ẹda ke n̄wan oro iduehe. Ntak-a? Ẹkeda nte ke enye “ama ofiori n̄kpo, edi owo ikodụhe ndinyan̄a enye.” Ntre, n̄wan oro ikesịnke efịbe. Edi ẹma ẹbiom erenowo oro ikpe ke esịn efịbe onyụn̄ adan̄ owo ke n̄kanubọk sia enye ‘okomomụm n̄wan oro okodụkde ediomi ndọ ye owo adan̄.’

Ntre kpa ye oro ibet emi okodomode ndin̄wam yak ẹkụt ke n̄wan oro iduehe, n̄kukụre se itien̄wed oro owụtde edi ke erenowo oro edue ke ndidan̄ owo ke n̄kanubọk nnyụn̄ nsịn efịbe. Imenịm ke mme ebiereikpe ẹma ‘ẹsitịm ẹdụn̄ọde’ se iketịbede ẹnyụn̄ ẹbiere n̄kpọ oro ẹtiene se Abasi ama eketetịn̄ afiak etịn̄ nnennen nnennen.—Deut. 13:14; 17:4; Ex. 20:14.