Ndi emekeme ndida se idude ke mme Enyọn̄-Ukpeme 2019 mbọrọ mme mbụme emi?

Nso ke un̄wọn̄ọ Abasi emi: “N̄kpọekọn̄ ekededi eke ẹdibotde ẹban̄a fi idikwe unen” ọwọrọ? (Isa. 54:17)

Imenịm ke Jehovah eyekpeme nnyịn mbak “oyobio mbon ufịk” idinam nnyịn n̄kpọ. (Isa. 25:4, 5) Tutu amama, mme asua nnyịn idikemeke ndinam nnyịn n̄kpọ emi edisọn̄de ikan Abasi ndinen̄ede.—w19.01, p. 6-7.

Didie ke nte Abasi akanamde n̄kpọ ye mbon Canaan ye nditọ Israel emi ẹkesọn̄de ibuot ye enye anam ikụt ke enye ama unenikpe?

Abasi ama ekpe ikpe ọnọ mbon emi ẹkesinamde oburobụt idan̄ m̀mê emi ẹkesifiomode iban ye nditọwọn̄. Enye ama ọdiọn̄ mbon emi ẹkekopde uyo esie ẹnyụn̄ ẹkpede unenikpe ẹnọ mme owo.—w19.02, p. 22-23.

Ikpanam n̄kpọ didie ke ini owo emi mîdịghe asan̄autom Jehovah ọbọn̄de akam?

Imekeme ndidop uyo inyụn̄ inam n̄kpọ ukpono ukpono. Edi nnyịn idisịnke “amen” ke akam oro, idinyụn̄ itieneke imụm mbon en̄wen ubọk ini ẹbọn̄de akam oro. Imekeme ndibọn̄ akam eke nnyịn ke esịt.—w19.03, p. 31.

Ntak emi ndisabade eyenọwọn̄ edide ata akwa idiọkn̄kpọ?

Ndisabade eyenọwọn̄ edi ndinam idiọkn̄kpọ ndian eyen oro, esop Abasi, ukara, ye Abasi. Ke ebiet emi ibet ukara ọdọhọde ẹtọt ẹnọ ukara ke ini owo asabarede eyenọwọn̄, mbiowo ẹsinam se ibet ọdọhọde.—w19.05, p. 9-10.

Didie ke afo ekeme ndikpụhọde utọ owo emi afo enen̄erede edi?

Mme akpan n̄kpọ emi akpanamde: Bọn̄ akam nọ Jehovah. Tie kere se ekpepde man enen̄ede ọfiọk utọ owo emi afo edide. Fiọk mbon emi anamde ufan.—w19.06, p. 11.

Nso ke ikpanam idahaemi man iben̄e idem inọ ukọbọ?

Ana inam n̄kpọ man itetịm ikpere Jehovah. Nen̄ede nịm ke Jehovah ama nnyịn, ke enye ididehe-dei ikpọn̄ nnyịn. Kot Bible kpukpru usen, nyụn̄ bọn̄ akam kpukpru ini. Nen̄ede nịm ke mme n̄kpọ emi Abasi ọn̄wọn̄ọde ndida Obio Ubọn̄ esie nnam ẹyesu. Mụm mme itie Bible emi amade akan ye mme ikwọ emi ẹtorode Jehovah dọn̄ ke ibuot.—w19.07, p. 2-4.

Nso ke ikeme ndinam man in̄wam iman nnyịn ẹnyene edinyan̄a?

Enen̄ede ọfọn ikere iban̄a nte etiede mmọ ke idem, inịm eti uwụtn̄kpọ, inyene ime, inyụn̄ ifọn ido.—w19.08, p. 15-17.

Nso inam utom emi Jesus ọnọde nnyịn ọnọ nnyịn nduọkodudu? (Matt. 11:28)

Imenyene mbiowo emi ẹmade nnyịn, inyene ata nti ufan, ye mfọnn̄kan utom.—w19.09, p. 23.

Didie ke Abasi ekeme ndinam ọdọn̄ nnyịn ndinam n̄kpọ esie onyụn̄ ọnọ nnyịn odudu inam? (Phil. 2:13)

Nte ikotde Ikọ Abasi inyụn̄ itiede ikere se ikotde, Abasi ekeme ndinam ọdọn̄ nnyịn ndinam n̄kpọ esie onyụn̄ ọnọ nnyịn odudu inam. Spirit esie ekeme ndin̄wam nnyịn inam se idiọn̄ọde ndinam ọfọn akan nte isinamde.—w19.10, p. 21.

Nso ke ikpanam mbemiso imekde akpan n̄kpọ?

N̄kpọ ition emi ẹkeme ndin̄wam fi: Nen̄ede nam ndụn̄ọde. Ben̄e Jehovah ọnọ fi ọniọn̄. Kere ntak emi oyomde ndinam n̄kpọ oro. Diọn̄ọ nnennen se oyomde ndinam. Diọn̄ọ se ekemede ndinam ye se mûkemeke ndinam.—w19.11, p. 27-29.

Ndi ukpepn̄kpọ ukpọn̄ ikpaha ke nsinsi ọkọtọn̄ọ ini Satan eketịn̄de ikọ ye Eve?

Se enye eketịn̄de iwụtke ntre. Satan ọkọdọhọ Eve ke enye idikpaha, ikọdọhọke ke enyene se idiwọrọde enye ke idem ika iso idu uwem. Nnyịn ikereke ke owo ndomokiet ama emen nsunsu ukpepn̄kpọ ekededi ebe Ukwọ. Etie nte mme owo ẹma ẹtọn̄ọ ndinịm ke ukpọn̄ isikpaha mbemiso Abasi asuan mbon emi ẹkebọpde tọwa Babel.—w19.12, p. 15.