Idụhe n̄kpọ ndomokiet ke Bible m̀mê ke n̄wed mbụkeset emi owụtde ke utọ n̄kpọ oro ama etịbe.

Nte ẹkabarede itie N̄wed Abasi emi ke ediwak Bible anam ndusụk owo ẹkere ke mme owo ke eyo Paul ẹma ẹsina baptism ẹnọ mme akpan̄kpa. Ke uwụtn̄kpọ, Edisana Ŋwed Abasi Ibom esịn ufan̄ikọ oro ntem: “Edieke mînamke nam mme akpan̄kpa ẹset, nso idi ndien ntak emi mmọ ẹnade baptism ẹban̄a mmọ oro?”

Edi kop se ntaifiọk iba emi ẹnamde ndụn̄ọde ẹban̄a Bible ẹtịn̄de. Dr. Gregory Lockwood ọdọhọ ke “tọn̄ọ akananam ke owo ikwe n̄kpọ ndomokiet ke Bible m̀mê ke n̄wed mbụkeset emi owụtde ke mme owo ẹma ẹsina baptism ẹnọ mme akpan̄kpa.” Prọfesọ Gordon D. Fee ama ewet mbiet n̄kpọ oro ete: “Idụhe uwụtn̄kpọ ndomokiet ke Bible m̀mê ke n̄wed mbụkeset emi owụtde ke ẹma ẹsina baptism ẹnọ mme akpan̄kpa. Obufa Testament itịn̄ke n̄kpọ ndomokiet iban̄a utọ baptism oro. Idụhe n̄kpọ ndomokiet emi owụtde ke mme Christian eyo mme apostle, m̀mê mme ufọkabasi emi ẹkesiakde ke mme apostle ẹma ẹkekpa, ẹma ẹsinịm utọ baptism oro.”

Bible ọdọhọ ke akana mme mbet Jesus ‘ẹkenam mme owo ke kpukpru idụt ẹdi mbet esie, ẹnịm mmọ baptism, ẹnyụn̄ ẹkpep mmọ ẹnam kpukpru n̄kpọ emi enye eketemede mmọ.’ (Matt. 28:19, 20) Mbemiso owo akanade baptism edi mbet Christ, akana enye ekpep aban̄a Jehovah ye Eyen esie, enịm ke mmọ ẹdu, okop uyo mmọ. Owo emi ama akakpa ikekemeke ndinam oro, Christian en̄wen ikonyụn̄ ikemeke ndinam oro nnọ enye.—Eccl. 9:5, 10; John 4:1; 1 Cor. 1:14-16.

Nso ke ikọ Paul ọkọwọrọ ndien?

Ndusụk owo ke Corinth ẹkedọhọ ke owo idinamke mme akpan̄kpa ẹset. (1 Cor. 15:12) Paul ama owụt ke se mmọ ẹketịn̄de ikenenke. Enye ama ọdọhọ mmọ ke imesikụt n̄kpa ke enyịn ke usen ke usen. Imọdiọn̄ọ ke oro iwọrọke ke enye akakpa ata ata n̄kpa. Kpa ye kpukpru se enye okosobode ke usen ke usen oro, enye ama enịm ke ima ikpa, ke Abasi ayanam imọ iset ikodu ke heaven ukem nte akanamde Jesus eset okodu ke heaven.—1 Cor. 15:30-32, 42-44.

Akana mme Christian ke Corinth ẹdiọn̄ọ ke sia Abasi ama ekeyet mmimọ aran, ke mmimọ iyosobo idomo ke usen ke usen, ekem ikpa mbemiso ẹnam mmimọ iset. Ini mmọ ‘ẹkenade baptism ẹdụk ke Christ Jesus,’ mmọ ‘ẹkena baptism ẹdụk ke n̄kpa esie’ n̄ko. (Rome 6:3) Oro ọkọwọrọ ke mmọ ẹyesobo idomo ẹnyụn̄ ẹkpa ukem nte Jesus, ndien Abasi anam mmọ ẹset ẹkedu ke heaven.

Ke isua iba ama ekebe tọn̄ọ Jesus akana baptism, enye ama ọdọhọ mme apostle esie iba ete: ‘Mbufo ẹyena baptism emi ami nnade.’ (Mark 10:38, 39) Idịghe ini ẹkenịmde Jesus baptism ke mmọn̄ ke enye eketịn̄ ikọ emi. Ikọ esie ọkọwọrọ ke imọ ndika iso nsọn̄ọ nda ye Jehovah ayanam ẹwot imọ. Paul ama ewet ke mme Christian oro ẹyetde aran ‘ẹyetiene Jesus ẹkụt ndutụhọ, ẹnyụn̄ ẹda ubọn̄ ye enye.’ (Rome 8:16, 17; 2 Cor. 4:17) Oro owụt ke akana mmọ ẹkpa mbemiso ẹnam mmọ ẹset ẹkedu ke heaven.

Se itịn̄de emi owụt ke enen ndikabade ikọ Paul ntem: “Mîdịghe ntre, nso ke mmọ eke ẹnade baptism kaban̄a uduak edidi mme akpan̄kpa ẹdinam? Edieke owo mîdinamke mme akpan̄kpa ẹset, ntak emi ẹnịmde mmọ baptism kaban̄a utọ uduak oro?”