Mme edu emi Jesus ekekpepde ke heaven ẹma ẹn̄wam enye edi eti nsan̄autom ini enye edide isọn̄. Ama esinem mme owo ndinam utom ye enye. Nso ke ikeme ndikpep nto Jesus? Edieke itịmde ise nte enye ekesinamde n̄kpọ ye mme owo, iyokụt n̄kpọ ita emi ẹdin̄wamde nnyịn idi nti nsan̄autom, inyụn̄ inen̄ede idiana ye nditọete nnyịn.

Eti nsan̄autom esisụhọde idem, ada ke mme nsan̄autom imọ ẹdi n̄kpọ n̄ko, inyụn̄ idomoke ndinam nte ke imọfọn ikan mmọ. Jesus ama ekpep utọ nsụhọdeidem oro oto Ete esie. Kpa ye edide Jehovah kpọt odot se ẹkotde Andibot, enye ama oyom ẹtiene ẹkụt se Eyen imọ akadianade ye imọ anam. Se Abasi eketịn̄de ke Genesis 1:26 anam idọhọ ntre. Enye ọkọdọhọ: “Yak nnyịn inam owo isịn ke mbiet nnyịn.” Oro ama anam Jesus okụt ke Enye osụhọde idem.—Ps. 18:35.

Jesus ama osụhọde idem n̄ko ini enye okodude ke isọn̄. Ekesidi enye ama anam n̄kpọ yak ẹtoro enye, enye emen itoro oro ọnọ Abasi sia Abasi kpọt odot ndibọ itoro oro. (Mark 10:17, 18; John 7:15, 16) Jesus ama esidomo ndinam n̄kpọ emem emem ye mme mbet esie. Enye akada mmọ nte ufan, idịghe ifịn. (John 15:15) Enye ama akam eyet mmọ ukot man ekpep mmọ ndisụhọde idem n̄ko. (John 13:5, 12-14) Ọfọn ikpebe enye, ikpono mbon emi ẹnamde utom ye nnyịn, utu ke ndisibem iso nyom ufọn idem nnyịn. Edieke ‘isikponode kiet eken’ inyụn̄ ifịnake idem iban̄a m̀mê anie ke ẹtoro ke utom emi inamde, imekeme ndinam se nnyịn mîkpekereke ke imekeme ndinam.—Rome 12:10.

 Owo emi osụhọrede idem ọdiọn̄ọ ke “[ẹsikụt] unen ke ini mme ọnọitem ẹwakde.” (N̄ke 15:22) Inamke n̄kpọ m̀mê nso utọ ifiọk ke inyene ke uwem, m̀mê nso ke inyụn̄ idiọn̄ọ ndinam, ana iti ke idụhe owo ndomokiet emi kpukpru ifiọk ererimbot emi ọdọn̄ọde enye ke ibuot. Jesus ke idemesie ama akam ọdọhọ ke enyene mme n̄kpọ emi imọ mîdiọn̄ọke. (Matt. 24:36) Enye ama esinyụn̄ ama ndikop ekikere mme mbet esie kpa ye emi mmọ mîkọfọnke ima. (Matt. 16:13-16) Imosụk ise mmọ mîkesifeheke-fehe enye! Ukem ntre, ke ini isụhọrede idem iti ke enyene mme n̄kpọ emi nnyịn mîkemeke ndinam inyụn̄ iyak mbon en̄wen ẹtịn̄ ekikere mmọ, iyodu ke emem ye mmọ, idiana kiet, inyụn̄ ‘ikụt unen’ ke se inamde.

Enen̄ede ọfọn mbiowo ẹkpebe edu Jesus emi nte mmọ ẹsụk ẹnamde n̄kpọ ye mbiowo eken. Ọfọn mmọ ẹti ke edisana spirit ekeme ndin̄wam ebiowo ekededi etịn̄ n̄kpọ emi edin̄wamde otu mbiowo ẹbiere nnennen n̄kpọ. Edieke nte mbiowo ẹnamde n̄kpọ ayakde kpukpru owo ẹkeme nditịn̄ ekikere esịt mmọ ke ini mmọ ẹnyenede mbono mbiowo, se mmọ ẹdibierede ọyọfọn ye kpukpru owo ke esop.

Eti nsan̄autom esinam n̄kpọ ke eti ibuot ye mbon emi ẹnamde utom ye enye. Usụn̄ en̄wen okpodu se ẹnamde n̄kpọ yak osụk ọfọn, enye esinyịme ẹnam isinyụn̄ ikọn̄ke iyịre ke ekikere esie. Jesus ama okụt ediwak ini nte Ete esie owụtde ke imekere iban̄a mbon en̄wen. Ke uwụtn̄kpọ, Jehovah ama ọdọn̄ enye edi isọn̄ edikpa afak mme owo kpa ye emi mme owo ẹkedotde n̄kpa.—John 3:16.

Edieke Jesus okokụtde ke ọfọn imọ ikpụhọde ekikere, ke oro idinyụn̄ ibiatke ibet Abasi, enye ama esinam ntre. Ti nte enye akan̄wamde n̄wan Phoenicia kiet, kpa ye edide ẹkedọn̄ enye aka ebịne nditọ Israel kpọt. (Matt. 15:22-28) N̄kpọ efen edi ke Jesus ikodorike enyịn ke mme mbet esie ẹyenam n̄kpọ nte mmọ ẹfọn ẹma. Ke Peter emi ekedide ata akpan ufan esie ama akakan̄ enye ke iso mme owo, Jesus ama enyịme ndifen nnọ enye. Ekem ko enye ama ọnọ Peter ikpọ utom anam. (Luke 22:32; John 21:17; Utom 2:14; 8:14-17; 10:44, 45) Nte Jesus akanamde n̄kpọ ye mme owo anam ikụt ke ifọnke isikọn̄ iyịre ke ekikere nnyịn man kpukpru owo ẹkụt ke imenyene eti ibuot.—Phil. 4:5.

Nnyịn ndinyene eti ibuot ayan̄wam nnyịn idiọn̄ọ se ikpanamde man ikeme ndidiana ye utọ owo ekededi nnam n̄kpọ. Jesus ama enen̄ede ọfọn uwem ye mbon emi ẹkekperede enye tutu idiọkesịt anam mme asua esie ẹdọhọ ke enye edi  “ufan mme ọbọ a-tax ye mme anamidiọk” emi ẹkekopde ukwọrọikọ esie. (Matt. 11:19) Ndi imekeme ndikpebe Jesus inyụn̄ idiana ye mbon en̄wen inam n̄kpọ kpa ye emi inyenede nsio nsio edu? Brọda Louis emi ama akanam utom circuit ke ediwak isua onyụn̄ anam utom ye nsio nsio owo ke Bethel ọdọhọ ete: “Ndinam utom ye nsio nsio owo emi mîfọnke ima etie nte ndida nsio nsio itiat emi ẹdide ndusụk n̄kpri, ndusụk ikpọ, mbọp ibibene. Sia itiat oro mîdịghe ukem ukem, ọyọsọn̄ utom. Edi ama ọdiọn̄ọ nte atan̄de nsio nsio itiat oro ọkọk, ibibene oro edisụk idi nnennen ẹma ẹbọp ẹma. Mmesidomo n̄ko ndikpụhọde nte nnamde n̄kpọ man ndu ke emem ye mbon en̄wen, man nnyụn̄ ndian ubọk ye mmọ nnam utom Abasi.” Ata eti uwem ke brọda oro enyene oro!

Didie ke ikeme ndinam n̄kpọ ke eti ibuot ye nditọete ke esop nnyịn? Imekeme ndinam ntre ini isan̄ade ye mbon otu an̄wautom nnyịn ikwọrọ ikọ. Ẹkeme ndidian nnyịn ye mme asuanetop emi ẹnyenede ubon, m̀mê emi ẹsọn̄ọde nnyịn, m̀mê emi nnyịn isọn̄ọde. Ndi imekeme ndisan̄a sụn̄sụn̄ mîdịghe idomo usụn̄ ukwọrọikọ en̄wen ise man ukwọrọikọ etiene enem mmọ?

Eti nsan̄autom ‘esinyịme ndibuana se enye enyenede’ ye mbon en̄wen. (1 Tim. 6:18) Nte Jesus osụk anamde utom ye Ete esie, enye ama okụt ke Ete imọ ikedịpke imọ n̄kpọ ndomokiet. Ini Jehovah “anamde enyọn̄,” Jesus ama odu do okụt onyụn̄ ekpep n̄kpọ. (N̄ke 8:27) Ekem ko ini Jesus odude ke isọn̄, enye ama ekpep mme mbet esie ‘kpukpru n̄kpọ oro enye okokopde oto’ Ete esie. (John 15:15) Ẹyak ikpebe Jehovah inyụn̄ inyịme nditeme mbon en̄wen se idiọn̄ọde. Eti nsan̄autom isidịpke mbon emi ẹnamde utom ye enye se akpanade mmọ ẹdiọn̄ọ m̀mê se enye ọdiọn̄ọde ke ayan̄wam mmọ, ke ntak emi enye oyomde kpukpru owo ẹsụk ẹsịne enye ke idak. Esinenem enye ndinam mbon en̄wen ẹdiọn̄ọ nti n̄kpọ emi enye ọdiọn̄ọde.

Imekeme nditịn̄ ikọ n̄ko nsọn̄ọ mbon emi ẹnamde utom ye nnyịn idem. Ndi isinemke nnyịn ke ini owo ọkọmde nnyịn ke se inamde? Jesus ama esidi mbet esie ẹma ẹnam nti n̄kpọ, enye ọkọm mmọ. (Men Matthew 25:19-23 ye Luke 10:17-20 domo.) Enye ama akam ọdọhọ mme mbet esie ke mmọ ‘ẹyenam utom eke okponde akan’ se imọ inamde. (John 14:12) Ke okoneyo emi ekesierede usen emi ẹkewotde enye, Jesus ama otoro mme apostle esie emi ẹkesọn̄ọde ẹda ye enye ete: “Mbufo ẹdi mmọ emi ẹsọn̄ọde ẹda ye ami ke idomo mi.” (Luke 22:28) Kere nte ikọ esie ọkọsọn̄ọde mmọ idem onyụn̄ an̄wamde mmọ ẹsịn idem ẹnam n̄kpọ Abasi! Edieke nnyịn n̄ko isitorode mbon emi ẹnamde utom ye nnyịn, esịt eyenen̄ede enem mmọ, ekeme ndidi oro ayanam mmọ ẹnen̄ede ẹsịn idem ẹnam n̄kpọ Abasi.

Brọda Kayode ọdọhọ ete: “Eti nsan̄autom idịghe owo emi ọfọnde ama-o, edi edi owo emi esinamde esịt enem mbon emi ẹdude ye enye inyụn̄ iyakke utom akakak mmọ akaha.” Ndi afo edi utọ nsan̄autom oro? Emekeme ndibụp ndusụk nditọete emi ẹnamde utom ye afo m̀mê afo etie didie. Edieke esinemde-nem mmọ ndinam utom ye afo ukem nte ekesinemde mme mbet Jesus ndinam utom ye enye, emekeme ndikọn̄ ubọk ke esịt ntịn̄ se apostle Paul eketịn̄de ete: “Nnyịn idi nsan̄autom ndinam mbufo ẹnyene idatesịt.”—2 Cor. 1:24.