Ihih-o. Se David ekewetde ekedi akpanikọ onyụn̄ ekeme nditịbe.

Tịm kere se enye ekewetde ke ufan̄ikọ oro ye ke mme ufan̄ikọ en̄wen emi enye eketịn̄de mbiet n̄kpọ oro. Enye ọkọdọhọ ke Psalm 61:8 ete: “Ami nyọkwọ edinem ikwọ nnọ enyịn̄ fo ke nsinsi, man nsio mme akan̄a mi ke usen ke usen.” Ke Psalm 86:12, enye ọdọhọ: “O Jehovah Abasi mi, ami mmotoro fi ke ofụri esịt mi, nyonyụn̄ nnọ enyịn̄ fo ubọn̄ ke nsinsi.” Ndien ke Psalm 145:1, 2, enye ọdọhọ: “[Nyotoro] enyịn̄ fo ke nsinsi nsinsi.”

Se David eketịn̄de ikedịghe ikọ n̄kponinua, enye ikonyụn̄ ikereke ke imọ idikpaha tutu amama. Enye ama ọdiọn̄ọ ke Jehovah ama ọdọhọ ke n̄kpa edidi utịp idiọkn̄kpọ; David ke idemesie ama ọdọhọ ke imọ idi anamidiọk. (Gen. 3:3, 17-19; Ps. 51:4, 5) Enye ama ọdiọn̄ọ ke mbon emi ẹkebuọtde idem ye Abasi, utọ nte Abraham, Isaac, ye Jacob, ẹma ẹkpa. David ama ọdiọn̄ọ ke imọ iyakpa usen kiet. (Ps. 37:25; 39:4) Edi se enye eketịn̄de ke Psalm 61:8 okowụt ke ama ọdọn̄ enye nditoro Abasi ke nsinsi, oro edi, adan̄a nte enye odude uwem, ke se enye okonyụn̄ ebierede ndinam ekedi oro.​—2 Sam. 7:12.

Se idude ke ikọ enyọn̄ ibuotn̄wed Psalm 18, 51, ye 52 ẹwụt ke ndusụk ini David ekesiwet se ikọwọrọde enye. David emi ekedide ekpemerọn̄ eketịn̄ aban̄a Jehovah ke ọyọhọ Psalm 23 nte ekpemerọn̄ emi adade owo usụn̄, ọdọn̄de owo esịt, onyụn̄ ekpemede owo. Oro akanam David oyom ndinam n̄kpọ nnọ Abasi ke ‘ofụri eyouwem esie.’​—Ps. 23:6.

Kûfre ke Jehovah ọkọdọhọ David ewet mme n̄kpọ emi enye ekewetde. Ndusụk se enye ekewetde ẹkedi se iditịbede anyan ini ke iso. Ke uwụtn̄kpọ, ke Psalm 110, David ama ewet aban̄a ini emi Ọbọn̄ esie editiede ke “ubọk nnasia [Abasi]” ke heaven, ẹnyụn̄ ẹnọ enye odudu etieti. Akana enye ada odudu oro anam nso? Akana ada akan mme asua Abasi onyụn̄ “[ekpe] ikpe ke otu mme idụt” ke isọn̄. Messiah emi akanade anam se ẹketịn̄de oro okoto ubon David. Akana enye etie ke heaven akara onyụn̄ edi “oku ke nsinsi.” (Ps. 110:1-6) Jesus ama owụt ke prọfesi Psalm 110 oro akaban̄a imọ, ke edinyụn̄ etịbe ke ini iso.​—Matt. 22:41-45.

Jehovah ọkọdọhọ David ewet se iketịbede ke eyo esie ye se iditịbede ke ini iso, ini ẹdinamde David eset edidu uwem ke isọn̄ onyụn̄ ekeme nditoro Jehovah ke nsinsi. Oro anam ikụt ke se ẹtịn̄de ke Psalm 37:10, 11, 29 akaban̄a se iketịbede ke Israel ke eset, ye se iditịbede ke ofụri isọn̄ ke ini iso ini Abasi edinamde kpukpru se enye ọkọn̄wọn̄ọde.​—Se ikpehe 8 ke ibuotikọ emi “Afo Oyodu ye Ami ke Paradise” ke Enyọn̄-Ukpeme emi.

Psalm 61:8 ye mme ufan̄ikọ en̄wen emi ẹtịn̄de mbiet n̄kpọ oro ẹwụt ke David okoyom nditoro Jehovah ini oro ke Israel tutu enye akpa. Onyụn̄ owụt n̄ko se David edikemede ndinam ke ini iso, Jehovah ama anam enye eset.