Ndi ama etịn̄ enyịn okot mme Enyọn̄-Ukpeme isua emi? Ọfọn, se m̀mê emekeme ndibọrọ mme mbụme emi:

Nso ufọn ke idibọ edieke isinemede nneme ye Jehovah, ikpan̄de utọn̄ inọ enye, inyụn̄ ikerede iban̄a enye?

Se imekde ndinam ọyọfọn, iyenen̄ede idiọn̄ọ ndikpep owo Ikọ Abasi, inen̄ede ibuọt idem ye Abasi, inyụn̄ inen̄ede ima enye.​—w22.01, p. 30-31.

Didie ke ndibuọt idem ye Jehovah ndinyụn̄ n̄kop uyo nnọ mbon emi enye ọdọhọde ẹda nnyịn usụn̄ ẹdin̄wam nnyịn?

Mbiowo ẹkpebiere n̄kpọ mîdịghe ẹdọhọ inam n̄kpọ, nnyịn inyụn̄ ikereke m̀mê n̄kam ndi eti n̄kpọ ke ẹdọhọ inam, iyọtọn̄ọ idahaemi inịm ke nte Jehovah ọdọhọde inam n̄kpọ ọfọn akan. Ke ini akwa ukụt, iyọsọsọp inam se ẹdọhọde ọkpọkọm editie nnyịn esen esen m̀mê ke idifọnke.​—w22.02, p. 4-6.

Nso ikedi ufọn angel ndikọdọhọ Zechariah ke “ẹkụt urụk udomon̄kpọ ke ubọk Zerubbabel [emi akakarade mme Jew]”? (Zech. 4:8-10)

N̄kukụt oro akanam ikọt Abasi ẹkụt ke kpa ye emi temple oro ẹsụk ẹbọpde ke ubọk mîdidịghe okop-edi-ndise, ke ẹyebọp enye ẹsio, ke oyonyụn̄ ekem ye se Abasi oyomde.​—w22.03, p. 16-17.

Ikpanam nso man nte isitịn̄de ikọ edi se ẹkpekpebede? (1 Tim. 4:12)

Edi nnyịn ndisitịn̄ ikọ sụn̄sụn̄, ukpono ukpono ini ikwọrọde ikọ, ikwọ ikwọ ke ofụri esịt, isiwak ndibọrọ mbụme ke mbono esop, itịn̄ akpanikọ, itịn̄ se idisọn̄ọde owo idem, inyụn̄ iyakke ikọ isụn̄i ọwọrọ nnyịn ke inua.​—w22.04, p. 6-9.

Nso inam se ẹtịn̄de ẹban̄a ikpọ unam inan̄ (mme ukara) ke Daniel ibuot 7 ẹdu ke idem idiọk unam kiet ke Ediyarade 13:1, 2?

Idiọk unam emi ẹtịn̄de ẹban̄a ke Ediyarade 13 idaha iban̄a ukara idụt kiet kpọt, utọ nte ukara Rome. Ada aban̄a kpukpru ukara emi ẹfịkde ubonowo tutu esịm emi.​—w22.05, p. 9.

Nso idi akpan usụn̄ emi idiwụtde ke imenịm ke Jehovah eyenen̄ede n̄kpọ obon?

Owo ọkpọsọn̄ọ nnyịn enyịn, edue nnyịn, mîdịghe anam nnyịn ata idiọk n̄kpọ, iyodomo ndisio se enye akanamde nnyịn mfep ke esịt, itre ndiyat esịt ye enye, inyụn̄ iyak se iketịbede isịn Jehovah ke ubọk. Se ededi emi idiọkn̄kpọ emi ikadade ito Adam akabiatde, Jehovah eyenen̄ede.​—w22.06, p. 10-11.

Nso ke eyenete emi ọbọn̄de akam ke mbono esop ekpeti?

Ikpanaha enye ada ifet oro ọnọ item m̀mê ọnọ ntọt. Ufọn idụhe enye nditịn̄ “uwak ikọ” akpan akpan ke akam emi ẹbọn̄de ẹtọn̄ọ mbono esop. (Matt. 6:7)​—w22.07, p. 24-25.

Didie ke “mbon oro ẹkenamde se idiọkde” ẹdiset “ẹdụk ikpe”? (John 5:29)

Owo ididaha se mmọ ẹkenamde mbemiso mmọ ẹkpade ibiere ikpe inọ mmọ. Ẹyetịm ẹse nte mmọ ẹdidude uwem ke ẹma ẹkenam mmọ ẹset ẹnyụn̄ ẹda oro ẹbiere ikpe ẹnọ mmọ.​—w22.09, p. 18.

Nso ke J. F. Rutherford eketịn̄ ke akamba mbono ke September 1922, emi akanamde ukwọrọikọ enen̄ede ọdọn̄ mme owo?

Ke akamba mbono ke Cedar Point, Ohio, U.S.A., enye ọkọdọhọ ete: “Edidem ada ubọn̄! Mbufo ẹdi mme ọnọ-ntọt esie. Mmọdo ẹtan̄a, ẹtan̄a, ẹtan̄a, Edidem ye Obio Ubọn̄ esie!”​—w22.10, p. 3-5.

Ewe usụn̄ ita ke Isaiah ibuot 30 owụt nte Abasi esin̄wamde nnyịn iyọ?

Isaiah ibuot 30 owụt (1) ke enye esitịm akpan̄ utọn̄ okop akam nnyịn onyụn̄ ọbọrọ mmọ, (2) ke enye esiteme nnyịn se ikpanamde, ye (3) ke enye esidiọn̄ nnyịn idahaemi onyụn̄ ọn̄wọn̄ọ ndidiọn̄ nnyịn ke ini iso.​—w22.11, p. 9.

Ntak ikemede ndidọhọ ke Psalm 37:10, 11, 29 ama osu ke eset, ke oyosu n̄ko ke ini iso?

Ikọ David oro owụt nte n̄kpọ ọkọfọnde ke Israel ke eset, utọ nte ke ini ukara Solomon. Jesus ama etịn̄ aban̄a Paradise emi edide ke iso onyụn̄ etịn̄ se idude ke ufan̄ikọ 11. (Matt. 5:5; Luke 23:43)​—w22.12, p. 8-10, 14.