Ndi ama etịn̄ enyịn okot mme Enyọn̄-Ukpeme isua emi? Ọfọn, se m̀mê emekeme ndibọrọ mme mbụme emi:

‘Ndinam ekikere fo edi obufa’ esịne nso? (Rome 12:2)

Ikụreke ke ndinam nti n̄kpọ ifan̄ yak ibiet eti owo. Esịne n̄ko nditịm nse utọ owo emi idide nnyụn̄ n̄kpụhọde se anade ikpụhọde man idomo nte ikekeme ndidu uwem nte Abasi ọdọhọde.​—w23.01, p. 8-9.

Didie ke ikeme nditat enyịn nse se ikade iso ke ererimbot edi iyakke n̄kpọ ndomokiet adian̄ade nnyịn ọkpọn̄ Abasi?

Imenen̄ede iyom ndidiọn̄ọ nte se itịbede ke ererimbot idahaemi osude prọfesi Bible. Edi inaha idọhọ ke prọfesi Bible edisu ntem m̀mê ntem ke ini esop Abasi mîtịn̄ke kan̄a, sia oro ekeme ndinam esop okûdiana kiet. Utu ke oro, yak isitịn̄ se idude ke n̄wed esop Abasi. (1 Cor. 1:10)​—w23.02, p. 16.

Didie ke baptism Jesus okpụhọde ye eke mme mbet esie?

Jesus akamana odụk idụt emi ẹma ẹkededi inyene Abasi, ntre ikanaha enye ayak idem ọnọ Jehovah nte isiyakde. Ikanaha Jesus akabade esịt ọkpọn̄ idiọkn̄kpọ sia enye ama ọfọn ama, ikonyụn̄ inamke idiọkn̄kpọ akanam.​—w23.03, p. 5.

Didie ke ikeme ndin̄wam mbon en̄wen ẹtiene ẹbọrọ mbụme ke mbono esop?

Nnyịn mîtịn̄ke ikọ awawak, mbon en̄wen ẹyetiene ẹsịn uyo. Imekeme n̄ko nditre ndimen kpukpru se idude ke ikpehe ntịn̄. Ikpanam ntre, mbon en̄wen ẹyenyene se ẹbọrọde.​—w23.04, p. 23.

“Usụn̄ Edisana Ido” ke Isaiah 35:8 ada aban̄a nso?

Akpa, usụn̄ oro akada aban̄a usụn̄ emi mme Jew ẹkesan̄ade ẹto Babylon ẹnyọn̄ obio emana mmọ. Eke eyo nnyịn emi-e? Ke ata ediwak isua mbemiso 1919, ẹma ẹnam ata ediwak n̄kpọ ẹdiọn̄ usụn̄ oro, utọ nte ndikabade nnyụn̄ mmịn̄ mme Bible. Ikọt Abasi ke ẹsan̄a ke “Usụn̄ Edisana Ido” sia usụn̄ oro edinam mmọ ẹka iso ẹtuak ibuot ẹnọ Jehovah mfịn ye ke ini iso ini ukara esie edinamde kpukpru nti n̄kpọ emi enye akaduakde aban̄a isọn̄ emi ẹtịbe.​—w23.05, p. 15-19.

Mme N̄ke ibuot 9 ọnọ nnyịn item aban̄a iban iba emi ẹdade ẹban̄a nso ye nso?

Mme N̄ke etịn̄ aban̄a “ndisịme an̄wan” emi ọnọde mme owo ikot ndien utịt ikot oro edi “Udi,” onyụn̄ etịn̄ aban̄a n̄wan efen emi adade aban̄a “ata ọniọn̄.” Enye oro n̄ko ke okot mme owo, ndien utịt ikot esie edi “usụn̄ asian” ye uwem. (N̄ke 9:1, 6, 13, 18)​—w23.06, p. 22-24.

Didie ke nte Abasi akanamde n̄kpọ ye Lot okowụt ke Enye osụhọde idem onyụn̄ enyene eti ibuot?

Jehovah ọkọdọhọ Lot efehe ọkpọn̄ Sodom aka n̄kan̄ emi etiede obot obot. Ini Lot ekpede Abasi ubọk ete ayak ifehe ika Zoar, Abasi ama enyịme.​—w23.07, p. 21.

Nso ke n̄wan owo emi esisede ndise idan̄ ekeme ndinam?

Ana enye eti ke idịghe enye edi ntak emi ebe esie esisede ndise idan̄. Enye ekpenyene ndisịn ekikere ke nte enye ye Jehovah ẹdide ufan, onyụn̄ etie ekere mbụk iban ke Bible emi esịt eketịmerede ndien Jehovah ọdọn̄ mmọ esịt. Enye ekeme ndin̄wam ebe esie ọkọhọde itie m̀mê n̄kpọ emi ekemede ndinam ndise idan̄ ọdọn̄ enye.​—w23.08, p. 14-17.

Mme owo ẹma ẹfan̄a se inịmde, didie ke ikike ekeme ndin̄wam nnyịn inam n̄kpọ ifụre ifụre?

Imekeme ndida mbụme emi owo obụpde m̀mê se enye afan̄ade ndiọn̄ọ se isịnede enye ke esịt m̀mê se enye ekerede. Oro ayan̄wam nnyịn itetịm inam n̄kpọ ifụre ifụre.​—w23.09, p. 17.

Nte Mary akayakde ẹsọn̄ọ enye idem ekeme ndikpep nnyịn nso?

Ekedi Mary ọdiọn̄ọ ke imọ ididi eka Messiah, enye ama ayak mbon en̄wen ẹsọn̄ọ enye idem. Gabriel ye Elizabeth ẹma ẹtịn̄ ikọ ẹsọn̄ọ Mary idem. Nditọete ẹkeme ndisọn̄ọ nnyịn idem n̄ko.​—w23.10, p. 15.

Didie ke Jehovah ekeme ndibọrọ akam nnyịn?

Enye ọn̄wọn̄ọ ndikop akam nnyịn, oyonyụn̄ emen se iben̄ede ese m̀mê odụk ye uduak esie. (Jer. 29:12) Ukem n̄kpọ ekpetịbe ọnọ nsio nsio owo ndien mmọ ẹbọn̄ akam, Jehovah ekeme ndibọrọ akam oro ke nsio nsio usụn̄. Edi enye iditreke ndika iso n̄n̄wam nnyịn.​—w23.11, p. 21-22.

Rome 5:2 etịn̄ aban̄a “idotenyịn,” edi ntak emi ẹfiakde ẹtịn̄ ẹban̄a enye ke ufan̄ikọ 4?

Ini ẹkwọrọde eti mbụk ẹnọ owo, enye ekeme ndinyene idotenyịn ndidu ke Paradise ke isọn̄ emi n̄kop inem uwem. Edi ke ini ukụt esịmde enye, enye ọyọ onyụn̄ okụt ke Abasi enem esịt ye imọ, enye eyenen̄ede enịm ke iyọbọ se Abasi ọkọn̄wọn̄ọde, oyonyụn̄ okụt nte se ẹken̄wọn̄ọde enen̄erede ebehe enye.​—w23.12, p. 12-13.