IBUOTIKỌ UKPEPN̄KPỌ 8
ỌYỌHỌ IKWỌ 130 Sifen Nọ Owo
Didie ke Ekeme Ndifen Mbon En̄wen Nte Jehovah Esifende?
“Kpa nte Jehovah ekefende mbufo ke ofụri esịt, ẹfen mbon en̄wen kpasụk ntre.”—COL. 3:13.
AKPAN N̄KPỌ EMI IDINEMEDE
Ke ibuotikọ emi, iyeneme mme n̄kpọ emi ikemede ndinam man ikeme ndifen owo emi eduede nnyịn.
1-2. (a) Ini ewe ke ekeme ndinen̄ede nsọn̄ nnyịn ndifen owo? (b) Didie ke Denise ekefen ọnọ owo?
NDI esisọn̄ fi ndifen mbon en̄wen? Esisọn̄ ediwak nnyịn akpan akpan ekpedi se owo eketịn̄de m̀mê akanamde ama abiak nnyịn esịm akpatre. Edi enyene mme n̄kpọ emi ikemede ndinam man itre ndiyat esịt inyụn̄ ifen enye. Kop uwụtn̄kpọ Sista Denise a mi. Okpokop se enye ekefende owo, edikere m̀mê enye edi angel. Ke 2017, enye, ebe esie, nditọ mmọ ition, ye ufan mmọ kiet ẹkeka ndise obufa Ibuot Itie-Utom Mme Ntiense Jehovah. Ke usụn̄ unyọn̄, draiva en̄wen ama ọkpọn̄ n̄kan̄ esie awat editọ moto mmọ. Denise ama osụhọ. Enye ekedemede, enye ama edikop ke nditọ esie ẹda unan eti-eti, ke Brian ebe esie ama akpa. Ini Denise afiakde ekere se iketịbede usen oro, enye ọdọhọ ete: “Ibuot ama oyon̄ mi, n̄kekere ke okịm okụre.” Aka ko Denise ama edikop ke idịghe nte ke draiva oro ọkọn̄wọn̄ mmịn m̀mê akada ọkpọsọn̄ ibọk, inyụn̄ idịghe nte ke enye ekese fon m̀mê akanam n̄kpọ en̄wen emi mîkayakke enye okụt mmimọ. Ntre, enye ama ọbọn̄ akam ọdọhọ Jehovah anam esịt ana imọ sụn̄.
2 Ẹma ẹmụm draiva oro ẹkesịn ke cell, ekem ẹkot enye ikpe ẹte ke owot owo. Edi ete kiet emi anamde utom ke ufọkesop oro ama ọdọhọ Denise ke se enye editịn̄de ke ẹdida ẹbiere m̀mê ẹyekọbi ete oro. Denise ọdọhọ ete: “Eketie nte owo emen ikwa okpok urụk ke unan mi emi ẹma ẹkekịm ẹma, an̄wan̄a galọn inụn̄ kiet ọdọn̄. Eketie mi ntre sia akana mfiak n̄kpọhọde mbụk n̄kpọntịbe emi akabiakde mi akan ke uwem mi.” Ke urua ifan̄ ama ekebe tọn̄ọ aksiden oro eketịbe, Denise ama etie ke ufọkesop eben̄e idem nditịn̄ ikọ ke iso ete emi akanamde enye se ikabiakde enye idụk ọkpọ. Nso ke Denise eketịn̄? Enye ama ọdọhọ ebiere-ikpe yak atua ete oro mbọm. b Enye eketịn̄ ama, ebiere-ikpe oro ama ọtọn̄ọ eyet ete: “Ke ofụri isua 25 emi ndide ebiere-ikpe, akananam n̄kopke utọ n̄kpọ emi ke ufọkesop emi ndude. Akananam n̄kopke nte ubon owo emi ẹduede ẹkpede ubọk ọnọ owo emi ekeduede mmọ. Akananam n̄kopke ikọ emi owụtde ke ẹma m̀mê ke ẹfen owo.”
3. Nso ikan̄wam Denise efen owo emi ekeduede enye?
3 Nso ikan̄wam Denise efen ete oro? Enye ekekere aban̄a nte Jehovah esifende nnyịn. (Mic. 7:18) Ima inen̄ede ima nte Jehovah esifende nnyịn, ọyọdọn̄ nnyịn ndifen mbon en̄wen.
4. Nso ke Jehovah oyom inam? (Ephesus 4:32)
4 Jehovah oyom isifen mbon en̄wen ke ofụri esịt nte enye esifende nnyịn. (Kot Ephesus 4:32.) Enye oyom iben̄e idem ndisifen mbon emi ẹnamde se ibiakde nnyịn. (Ps. 86:5; Luke 17:4) Ke ibuotikọ emi, imọn̄ ineme n̄kpọ ita emi ẹdin̄wamde nnyịn isinen̄ede ifen mbon en̄wen.
KÛNAM NTE INYENEKE SE ITỊBEDE
5. Mme N̄ke 12:18 owụt ke ekeme nditie nnyịn didie ke idem owo akpanam se ibiakde nnyịn?
5 Se owo etịn̄de m̀mê anamde ekeme ndibiak nnyịn eti-eti akpan akpan ekpedi enye edi ufan nta-ndia nnyịn m̀mê owo ke ubon nnyịn. (Ps. 55:12-14) Ndusụk ini, n̄kpọ oro ekeme ndibiak nnyịn nte ẹmen ikwa ẹkịm nnyịn. (Kot Mme N̄ke 12:18.) Imekeme ndidomo ndinam nte inen̄ekede ibiak nnyịn, mîdịghe inam nte n̄kpọ iketịbeke. Ndinam ntre etie nte owo ndikịm nnyịn ke ikwa edi nnyịn isụk iyak ikwa oro owụhọ do. Ukem ntre, edieke n̄kpọ abiakde nnyịn ndien nnyịn inam nte n̄kpọ iketịbeke, ubiak oro idisụhọkede ubọk.
6. Owo ama edue nnyịn, ikeme ndinam n̄kpọ didie?
6 Owo ama edue nnyịn, akpa n̄kpọ emi idinamde ekeme ndidi ndiyat esịt. Bible owụt ke imekeme ndiyat esịt edi odụri nnyịn utọn̄ ete ikûyak iyatesịt akan nnyịn ubọk. (Ps. 4:4; Eph. 4:26) Ntak edi ke imekeme ndikanam se mîkpanaha inam. Ndien iwakke nte owo ediyatde esịt ifiak ikanam eti n̄kpọ. (Jas. 1:20) Ti ke owo ekpedue nnyịn, ekeme ndiyat nnyịn; edi m̀mê iyaka iso iyat esịt, enye oro esịne nnyịn ke ubọk.
Owo ekpedue nnyịn, ekeme ndiyat nnyịn; edi m̀mê iyaka iso iyat esịt, enye oro esịne nnyịn ke ubọk
7. Nso en̄wen ikeme nditịbe nnọ nnyịn owo ama anam se ibiakde nnyịn?
7 Ẹma ẹnam se ibiakde nnyịn, idịghe esịt kpọt ke isiyat, mme n̄kpọ en̄wen ẹkeme ndidiana. Kop uwụtn̄kpọ Sista Ann. Enye ọdọhọ ete: “Ini n̄kedide ekpri, ete mi ama ọkpọn̄ eka mi ekemen edep mi ọdọ. Eketie mi nte ẹsịn mi. Ini mmọ ẹnyenede nditọ, eketie mi nte ẹbọ mi itie. Ofụri isua emi n̄kponde, eketie mi nte owo iyomke mi.” Sista Georgette etịn̄ nte eketiede enye ke idem ini ebe esie ọkọkpọn̄de enye ebịne n̄wan efen. Enye ọdọhọ ete: “Ami ye ebe mi ikedi ufan toto ke ekpri. Ikesisan̄a ntre inam utom usiakusụn̄! Esịt ama obụn̄ọ mi.” Sista Naomi ọdọhọ ete: “Akananam n̄kpekereke ke ebe mi akpanam se ikpabiakde mi. Ntre ini enye ọkọdọhọde mi ke imọ imesidịbe ise ndise idan̄, eketie mi nte enye ọtọ mi edem ke isọn̄.”
8. (a) Tịn̄ ndusụk ntak emi ọfọnde isifen inọ mbon en̄wen. (b) Nso ufọn ke isidia ima ifen mbon en̄wen? (Se ekebe oro, “ Ikpanam Nso Ekpedi Se Owo Akanamde Nnyịn Abiak Nnyịn Ebe Nde?”)
8 Ama-edi se mbon en̄wen ẹtịn̄de m̀mê ẹnamde ye nnyịn, enye oro nnyịn ikemeke ndinyan̄a. Edi imekeme ndidomo ndimụm idem n̄kama, iyatke esịt ibe nde. Ntak-a? Ntak edi ke imama Jehovah, imonyụn̄ idiọn̄ọ ke Jehovah oyom ifen mme owo. Edi ikpayak se ẹkenamde nnyịn aka iso ata nnyịn ikan̄ ke esịt, nnyịn inyụn̄ ifenke, imekeme ndikanam se nnyịn mîkpanamke, ikọnọ idem unan m̀mê udọn̄ọ. (N̄ke 14:17, 29, 30) Kop uwụtn̄kpọ Sista Christine. Enye ọdọhọ ete: “Esịt ama enen̄ede ayat mi, udûsọpke ukụt mi imam ke iso. Nsidia etịme etịme n̄kpọ, ndehe idap ọfọn, ekpri ekpri n̄kpọ ayayat mi, afafịna mi. Ama etie ntre, nsitie ikọ ikọ ye ebe mi ye mbon en̄wen.”
9. Ntak emi akpanade itre ndiyat esịt ke se owo akanamde nnyịn?
9 Idem ekpededi owo emi akanamde se ibiakde nnyịn idịghe idikpe ubọk, enyene se ikemede ndinam yak ubiak oro osụhọde ubọk. Nso idi oro? Georgette emi ima iketetịn̄ iban̄a ọdọhọ ete: “Se akani ebe mi akanamde oro ama abiak mi ebịghi, edi mma ndisio n̄kpọ oro mfep ke esịt nnyụn̄ nyatke esịt ye enye aba. Emem emi n̄kenyenede ke ntak oro ikedịghe ekpri.” Ima itre ndiyat esịt ke se owo akanamde nnyịn, nnyịn idiyakke ubiak oro anam ikọdiọk uwem ye mbon en̄wen. N̄kpọ en̄wen edi ke iyanam idem nnyịn ufọn. Iyobiomode idem nnyịn mbiomo enye oro inịm inyụn̄ ifiak ikop inem uwem. (N̄ke 11:17) Edi edinam didie edieke osụk ọsọn̄de fi ndifen owo oro?
SE IDIN̄WAMDE FI ETRE NDIYAT ESỊT
10. Ntak emi ọfọnde yak inọ idem nnyịn ini yak esịt enen̄ede osụhọde nnyịn? (Se mme ndise n̄ko.)
10 Akpanam nso man etre ndiyat esịt ke se owo akanamde fi? N̄kpọ kiet edi ndinọ idemfo ini yak esịt enen̄ede osụhọde fi. Owo ama ada unan idiọk idiọk ndien ẹsọbọ enye unan oro, ana ẹyak ini ebe yak unan oro akpa. Ukem oro n̄ko, ekeme ndidi se inọde idem ini yak esịt enen̄ede osụhọde nnyịn mbemiso ikemede ndifen owo oro ke ofụri esịt.—Eccl. 3:3; 1 Pet. 1:22.
Owo ama ada unan, eyedi se ẹsọbọde ọfọn ẹnyụn̄ ẹyak ini ebe man unan oro akpa; ukem oro n̄ko, eyedi se inọde idem ini yak esịt enen̄ede osụhọde nnyịn man ikeme ndifen owo ke ofụri esịt (Se ikpehe 10)
11. Didie ke akam ekeme ndin̄wam fi efen owo emi eduede fi?
11 Bọn̄ akam dọhọ Jehovah an̄wam fi ekeme ndisifen owo. c Ann emi ima iketetịn̄ iban̄a etịn̄ nte akam akan̄wamde enye ete: “Mma ndọhọ Jehovah efen owo nnyịn kiet kiet ke ubon ke se iketịn̄de m̀mê se ikanamde emi mikọfọnke. Ekem mma n̄wet leta ndọhọ ete mi ye obufa n̄wan esie ke mmefen mmọ.” Ann ọdọhọ ke ikememke inọ imọ ndinam oro. Edi enye ọdọhọ n̄ko ete: “Akam mi edi yak nte ndomode ndifen ete mi ye n̄wan esie nte Jehovah esifende nnyịn anam mmọ ẹdikpep ẹban̄a Jehovah.”
12. Ntak emi ọfọnde iberi edem ke Jehovah utu ke ndinam n̄kpọ ntiene nte etiede nnyịn ke idem? (Mme N̄ke 3:5, 6)
12 Beri edem ke Jehovah, kûnam n̄kpọ utiene nte etiede fi ke idem. (Kot Mme N̄ke 3:5, 6.) Jehovah ọdiọn̄ọ se ifọnde ye nnyịn kpukpru ini. (Isa. 55:8, 9) Tutu amama enye ididọhọke inam n̄kpọ emi edinọde nnyịn unan. Ntre enye ama ọdọhọ ifen mme owo, yak inịm ke enye ọdiọn̄ọ ke ima ifen, iyadia ufọn. (Ps. 40:4; Isa. 48:17, 18) Edi ikpetiene nte etiede nnyịn ke idem, ekeme ndinam tutu amama nnyịn idikemeke ndifen owo. (N̄ke 14:12; Jer. 17:9) Naomi emi ima iketetịn̄ iban̄a ọdọhọ ete: “Nsonso oro, n̄kekere ke nduehe nte mmemfenke ebe mi nte enye ekesisede ndise idan̄. N̄kekere ke n̄kpefen enye, ke enye ayafiak anam se ibiakde mi, mîdịghe ke enye eyefre nte edinam esie oro akabiakde mi eketre. Mma n̄kere n̄ko ke an̄wan̄a Jehovah nte etiede mi ke idem. Edi ama ọtọn̄ọ ndin̄wan̄a mi nte ke kpa ye emi an̄wan̄ade Jehovah, ke oro iwọrọke ke enye enyịme ke nte etiede mi ke idem oro enen-o. Jehovah ọdiọn̄ọ nte etiede mi ke idem onyụn̄ ọdiọn̄ọ ke ayada ini mbemiso esịt enen̄ede osụhọde mi, edi enye oyom mfen ebe mi.” d
KPEP NDIKERE NTI N̄KPỌ
13. Rome 12:18-21 owụt ke nso ke akpana inam?
13 Owo ama anam se ibiakde nnyịn ata eti-eti, imekeme ndibiere ke nnyịn idifiakke itịn̄ se iketịbede oro aba. Edi mbọk yak ikûtre do. Ekpedi owo oro ekedi brọda m̀mê sista, se ibehede nnyịn edi ndinam emem. (Matt. 5:23, 24) Utu ke ndiyat esịt, iyom nditua enye mbọm. Utu ke ndisịn n̄kpọ oro ke esịt, iyom ndifen enye. (Kot Rome 12:18-21; 1 Pet. 3:9) Nso ikeme ndin̄wam nnyịn inam oro?
14. Nso ke ikpodomo ndinam? Ntak-a?
14 Akpana idomo ndida owo emi eduede nnyịn nte Jehovah adade. Jehovah esimek ndise nti n̄kpọ emi mme owo ẹnamde. (2 Chron. 16:9; Ps. 130:3) Ikpoyom eti n̄kpọ ke idem mme owo, iyokụt; ekpedi inyụn̄ iyom idiọk, iyokụt idiọk oro. Ekpedi nti n̄kpọ mme owo ke iyom, eyenen̄ede emem nnyịn utom ndifen mmọ. Kop uwụtn̄kpọ Brọda Jarrod. Enye ọdọhọ ete: “N̄kpekere mban̄a ediwak nti n̄kpọ emi mmade ke idem brọda emi eduede mi, esifiak emem mi utom ndifen nnọ enye.”
15. Ntak emi ekemede ndifọn afo ọdọhọ owo ke emefen enye?
15 Akpan n̄kpọ en̄wen emi ọfọnde ekere ndinam edi afo ndidọhọ owo emi ekeduede fi ke emefen enye. Ntak-a? Naomi emi ima iketetịn̄ iban̄a ọdọhọ ete: “Ebe mi ama obụp mi ete, ‘Ndi emefen ọnọ mi?’ Ini nyomde ndikụbọde inua ndọhọ enye, ‘Mmefen nnọ fi,’ uyo ama ababa mi ke itọn̄. Ini oro ke ekeditara mi ke enyịn ke n̄kefenke enye ke ofụri esịt. Aka ko, mma n̄keme ndikụbọde inua ndọhọ enye, ‘Mmefen nnọ fi.’ Ama akpa mi idem ndikụt nte mmọn̄eyet ọkọhọde enye ke enyịn ye nte ekenemde mi ke idem. Tọn̄ọ oro, mmafiak nyak idem nnọ enye. Ami ye enye imafiak idi itai ye aban̄.”
16. Nso ke ekpep aban̄a ndifen nnọ owo?
16 Jehovah oyom isifen mme owo. (Col. 3:13) Kpa ye oro, ekeme ndisụk nsọn̄ nnyịn. Edi edi n̄kpọ emi ikemede ndinam edieke idomode nditre ndiyat esịt ye owo oro inyụn̄ inamke nte n̄kpọ iketịbeke. Ima inam ntre, iyọtọn̄ọ ndikere mbufa n̄kpọ inyụn̄ ida owo oro nte ikesidade.—Se n̄ko ekebe emi, “ N̄kpọ Ita Emi Ẹkemede Ndin̄wam Nnyịn Ifen Mme Owo.”
SỊN EKIKERE KE UFỌN EMI EDIDIADE AMA EFEN ỌNỌ OWO
17. Ntak emi ikpefende mbon en̄wen?
17 Ntak emi ikpefende mme owo ẹwawak. Se ndusụk mi. Akpa, idikpebe Jehovah Ete nnyịn emi esituade owo mbọm, iyonyụn̄ inem enye esịt. (Luke 6:36) Ọyọhọ iba, iyowụt ke imama nte enye esifende nnyịn. (Matt. 6:12) Ọyọhọ ita, nnyịn idinọhọ idem nnyịn udọn̄ọ, iyonyụn̄ inen̄ede ikpere mme ufan nnyịn.
18-19. Nso ikeme nditịbe ima ifen owo?
18 Ima ifen mbon en̄wen, nti n̄kpọ emi nnyịn mîkodorike enyịn ẹkeme nditịbe. Da ke uwụtn̄kpọ se iketịbede inọ Denise emi iketịn̄de iban̄a ke ntọn̄ọ ntọn̄ọ. Draiva emi ekedide ntak aksiden oro ama ebiere ndiwot idem ẹma ẹbiere ikpe ẹnọ enye ẹma. Denise ikọdiọn̄ọke se itịn̄de emi ini oro, edi nte Denise ekefende draiva oro ama enem draiva oro tutu enye ọtọn̄ọ ndikpep Bible ye Mme Ntiense Jehovah.
19 Imekeme ndikere ke ndifen owo esịne ke otu mme n̄kpọ emi enen̄erede ọsọn̄ nnyịn ndinam. Edi nnyịn ndifen owo ekeme n̄ko ndinam inyene edidiọn̄ emi edide akananam nnyịn inyeneke. (Matt. 5:7) Ke ntak oro, ẹyak inam ofụri se ikekeme ndikpebe Jehovah nnyụn̄ mfen mme owo nte enye esifende.
ỌYỌHỌ IKWỌ 125 “Mme Atua Owo Mbọm Ẹkop Inemesịt!”
a Ẹkpụhọ ndusụk enyịn̄.
b Ke utọ n̄kpọ ntem, Christian kiet kiet edibiere se enye edinamde.
c Ka jw.org kese mbufa ikwọ emi, “Ẹfen Ẹnọ Kiet Eken,” “Sifen Nọ Owo,” ye “Friends Again.”
d Ebe m̀mê n̄wan owo ekpese ndise idan̄, idiọkn̄kpọ edi oro, esinyụn̄ abiak owo enye eken. Edi se N̄wed Abasi ekpepde owụt ke n̄wan m̀mê ebe owo emi esede ndise idan̄ ikemeke ndida oro ndian̄ade ndọ.
