NDI omokụt ke ediwak owo ke ererimbot mfịn ẹkere ke akpana ẹnam n̄kpọ ye mmimọ nte imedi n̄kpọ ikan mbon efen, se ẹnyụn̄ ẹnamde ẹnọ mmimọ akpana edi san̄asan̄a? Ọkpọkọm ẹnam nso ẹnọ mmọ, mmọ ẹkere ke imodot se ẹnamde ẹkan oro ẹnọ. Ibụk ye unana ediwụt esịtekọm anam mmọ ẹkere n̄kpọ ntre. Mme edu oro ẹwụt ke idu ke mme akpatre usen.​—2 Tim. 3:2.

Se idude edi ke edu ibụk idịghe obufa n̄kpọ. Adam ye Eve ẹma ẹmek ke idemmọ se idide eti ye se idide idiọk, utịp se mmọ ẹkemekde oro ama ọdiọk tutu. Ke ediwak isua ama ekebe, Edidem Uzziah emi akakarade Judah ekekere ke imọ imenyene unen ndifọp incense ke temple, edi ata akamba ndudue ke enye akanam oro. (2 Chron. 26:18, 19) Mbiet mfịna oro ke mme Pharisee ye mme Sadducee ẹkenyene. Mmọ ẹkenịm ke ntak emi mmimọ itode ubon Abraham ke akpana Abasi anam n̄kpọ ye mmimọ nte imedi n̄kpọ ikan mbon efen.​—Matt. 3:9.

Mme owo emi ẹdide ibụk ye mbon ntan̄idem ẹyọyọhọ nnyịn idem, ndien edu mmọ oro ekeme ndibe nnyịn. (Gal. 5:26) Akpan utom okpodu, imekeme nditọn̄ọ ndikere ke nnyịn idot se ẹkpenọde utọ utom oro mîdịghe ke nte ẹnamde n̄kpọ ye nnyịn akpana ọfọn akan nte ẹnamde ye mbon efen. Nso ke ikpanam man nnyịn idikere n̄kpọ ntre? Akpa, ana idiọn̄ọ nte Jehovah adade n̄kpọ oro. Enyene n̄kpọ iba ke Bible emi ẹdin̄wamde nnyịn.

Jehovah esibiere se idotde ndinyene. Yak ise ndusụk uwụtn̄kpọ.

• Ke ubon, ana n̄wan okpono ebe yak enye okụt ke ẹkpono imọ, ebe onyụn̄ ama n̄wan esie yak enye  okụt ke ẹma imọ. (Eph. 5:33) Ebe ikpanaha emen mbre ima emi enye ekpebrede ye n̄wan esie ekebre ye owo efen, n̄wan ikponyụn̄ inaha emen mbre ima emi enye ekpebrede ye ebe esie ekebre ye owo efen. (1 Cor. 7:3) Mme ete ye eka ẹyom nditọ mmọ ẹkpono mmọ, idiọk idụhe ke se mmọ ẹyomde oro. Nditọ ẹnyụn̄ ẹdori enyịn mme ete ye eka mmọ ndinen̄ede mma mmọ nnyụn̄ nse mban̄a mmọ, inyụn̄ inyeneke se idiọkde do.​—2 Cor. 12:14; Eph. 6:2.

• Ke esop, mbiowo emi ẹsịnde idem ẹnam utom ẹdot se ikponode. (1 Thess. 5:12) Edi mmọ inyeneke unen ndikakara nditọ-ete mmọ.​—1 Pet. 5:2, 3.

• Abasi ọnọ ukara unen ndidọhọ mbon emi mmọ ẹkarade ẹkpe tax ẹnyụn̄ ẹkpono mmimọ.​—Rome 13:1, 6, 7.

Se Jehovah ọnọde nnyịn ke ntak emi enye amade nnyịn okpon akan se idotde ndinyene. Sia idide mme anamidiọk, n̄kukụre se nnyịn idotde edi n̄kpa. Ikanke-kan oro. (Rome 6:23) Kpa ye oro, edidiọn̄ emi Jehovah ọdiọn̄de nnyịn ke ntak emi enye amade nnyịn nsinsi ima awak eti-eti. (Ps. 103:10, 11) Edidiọn̄ ekededi emi enye ọdiọn̄de nnyịn m̀mê utom ekededi emi otode enye esịm nnyịn ubọk edi ke ntak mfọnido esie emi nnyịn mîdotke.​—Rome 12:6-8; Eph. 2:8.

Kpeme idem ye ido mbon ererimbot. Imekeme nditọn̄ọ ndikere ke imodot se ẹnamde n̄kpọ ẹnọ ẹkan nte ẹnamde ẹnọ mbon efen edi nnyịn idiọn̄ọke. Jesus akada uwụtn̄kpọ mme anamutom emi ẹkekpede mmọ denarius kiet anam ẹkụt nte ekemede ndimem utom owo nditọn̄ọ ndikere n̄kpọ ntre. Ndusụk mme anamutom ẹketọn̄ọ utom oro ata usenubọk ẹnyụn̄ ẹnam utom ofụri usen oro. Mmọ ẹkenam utom oro ke ufiop eyo. Edi mbon eken ẹkenam utom ke hour kiet kpọt. Akpa otu mbonutom oro ẹkekere ke sia edide mmimọ ikanam utom tọn̄ọ usenubọk tutu mbubreyo, ke akpana okụk mmimọ okpon akan eke mbon eken. (Matt. 20:1-16) Ke ukpepn̄kpọ emi Jesus akadade uwụtn̄kpọ emi ọnọ, enye okowụt ke akpana mbon emi ẹtienede imọ ẹyụhọ ye se Abasi amade ndinam nnọ mmọ.

Siwụt esịtekọm, kûnyịk mbon efen ẹnọ fi n̄kpọ. (1 Thess. 5:18) Kpebe apostle Paul. Enye ikọdọhọke nditọ-ete ke Corinth yak ẹnọ enye se adade ese aban̄a idem, kpa ye edide enye ama enyene unen ndinam ntre. (1 Cor. 9:11-14) Akpana isikọm mme  owo ke kpukpru n̄kpọ emi mmọ ẹnọde nnyịn, ikûnyụn̄ unyenyịk mme owo ẹnọ nnyịn n̄kpọ.

Sụhọde idem. Owo ama ekere aban̄a idemesie akaha, enye esitọn̄ọ ndikere ke se imọ inyenede ikemke-kem, ke akpana imọ inyene ikan oro. Ata idiọk ekikere edi oro. Ndisụhọde idem ayan̄wam nnyịn ikûkere n̄kpọ ke utọ usụn̄ oro.

Ke n̄kpọ nsụhọde-idem emi, prọfet Daniel enịm ata eti uwụtn̄kpọ. Ubon emi enye okotode, nte enye ekeyede onyụn̄ ọdiọn̄ọde n̄kpọ, ye mme n̄kpọ emi enye ekekemede ndinam ẹkpekenam enye ekere ke nte ẹkenamde n̄kpọ ye imọ yak ọfọn akan mbon efen ama odot, ke mme utom emi ẹkenyụn̄ ẹnọde imọ inam ẹnyụn̄ ẹdot n̄ko. (Dan. 1:3, 4, 19, 20) Edi Daniel ama aka iso osụhọde idem. Edu emi akanam enye ọsọn̄ urua ke enyịn Jehovah.​—Dan. 2:30; 10:11, 12.

Ibụk ye ntan̄idem ẹyọyọhọ kpukpru itie ke ererimbot emi; ẹyak nnyịn ikûnyene utọ mme edu oro. Utu ke oro, ẹyak ika iso ikop idatesịt ke se ededi emi Jehovah ọdiọn̄de nnyịn ke ntak mfọnido esie oro nnyịn mîdotke.