1-2. Nso utịbe utịbe n̄kpọ iketịbe ke usen Pentecost isua 33 eyo mme apostle?

ENYENE se iketịbede usenubọk Sunday kiet ke Jerusalem ke usen Pentecost isua 33 eyo mme apostle. N̄kpọ nte mbet 120 ẹkesop idem ke ubet enyọn̄ ufọk kiet. (Utom 1:13-15; 2:1) Usen ifan̄ ke edem, Jesus ama ọdọhọ mmọ yak mmọ ẹkûkpọn̄ Jerusalem sia enyene san̄asan̄a enọ kiet emi akanade mmọ ẹbọ. (Utom 1:4, 5) Nso iketịbe?

² “Kpa idaha oro uyom oto heaven ọwọrọ emi ebietde uyom ata ọkpọsọn̄ ofụm.” Uyom oro ama ọyọhọ ofụri ufọk oro. Ekem “mme edeme eke ẹbietde edemeikan̄” ẹma ẹdoro ke ibuot mme mbet oro kiet kiet, ndien kpukpru mmọ “ẹyọhọ ye edisana spirit.” (Utom 2:2-4) Utịbe utịbe usụn̄ oro ke Jehovah akan̄wan̄a edisana spirit esie ọduọk mme mbet oro. (Utom 1:8) Mmọ ẹkedi akpa mme owo emi ẹkedade edisana spirit ẹyet aran * ẹnyụn̄ ẹnam ẹdori enyịn ndikakara ye Jesus ke heaven.

3. Nso inam mbon emi ẹkedude ke ubet enyọn̄ oro ke usen Pentecost mîkeyịkke ke ẹda edisana spirit ẹyet mmimọ aran?

³ Ekpedi ama etiene esịne ke otu mme mbet oro ẹkesopde idem ke ubet enyọn̄ oro, tutu amama ukpûfreke se iketịbede usen oro. N̄kpọ emi ebietde edemeikan̄ ama edidoro fi ke ibuot, afo onyụn̄ ọtọn̄ọ ndisem nsio nsio usem! (Utom 2:5-12) Inyeneke se ikpanamde fi eyịk m̀mê ẹma ẹda edisana spirit  ẹyet fi aran. Edi ndi kpukpru mbon emi ẹyetde aran ke ẹsiyet aran ke utịbe utịbe usụn̄ ntre? Ndi ẹsiyet kpukpru mmọ aran ini mmọ ẹsịmde ukem ukem ini ke uwem mmọ? Idịghe ntre-o. Isan̄a didie idiọn̄ọ?

4. Ndi kpukpru mbon emi ẹkeyetde aran ke eyo mme apostle ke ẹkeyet ke ukem ukem ini ke uwem mmọ? Nam an̄wan̄a.

⁴ Ẹyak ineme iban̄a ini emi ẹkemede ndiyet owo aran. Idịghe mme Christian emi ẹkedide n̄kpọ nte owo 120 kpọt ke ẹkeda edisana spirit ẹyet aran ke usen Pentecost isua 33 eyo mme apostle. Kpa usen oro, ẹma ẹnọ n̄kpọ nte owo 3,000 efen edisana spirit oro Jesus ọkọn̄wọn̄ọde. Ẹkeyet mmọ aran kpa usen emi mmọ ẹkenade baptism. (Utom 2:37, 38, 41) Edi ke mme isua emi ẹketienede, idịghe kpukpru mme Christian emi ẹkeyetde aran ke ẹkeyet aran ke usen emi mmọ ẹkenade baptism. Ke mbon Samaria ẹma ẹkena baptism, ini ama ebe mbemiso ẹyetde mmọ aran. (Utom 8:14-17) Cornelius ye ikọtufọk esie ikakam inaha baptism kan̄a ini ẹyetde mmọ aran. Akanam utọ enye oro iketịbeke akpa.—Utom 10:44-48.

5. Udiana Corinth 1:21, 22 owụt ke nso isitịbe ẹma ẹda edisana spirit ẹyet owo aran?

⁵ Ẹyak ineme n̄ko se isitịbede ini ẹdade edisana spirit ẹyet owo aran. Akpa akpa ini emi ẹyetde owo aran, ekeme ndisọn̄ ndusụk mmọ ndinyịme ke Jehovah emek mmimọ. Mmọ ẹkeme ndikere m̀mê nso inam Abasi emek mmimọ. Ekeme ndidi mbon en̄wen emi ẹyetde aran idikereke ntre. M̀mê mmọ ẹkere m̀mê ikereke, apostle Paul ama etịn̄ se isitịbede inọ kpukpru mbon emi ẹyetde aran ete: “Ke mbufo ẹma ẹkenịm ke akpanikọ, ẹma ẹfịk mbufo idiọn̄ọ * ke edisana spirit oro ẹken̄wọn̄ọde, emi edide idiọn̄ọ udeme emi ẹbemde iso ẹnọ nnyịn.” (Eph. 1:13, 14) Oro owụt ke Jehovah esida edisana spirit esie anam mme Christian oro ẹdiọn̄ọ ke imọ imemek mmọ. Ntre ẹnọ mmọ edisana spirit nte “idiọn̄ọ [ubiọn̄ m̀mê en̄wọn̄ọ]” emi anamde mmọ ẹnịm ke mmimọ ididu uwem ke nsinsi ke  heaven ke ini iso, idịghe ke isọn̄.—Kot 2 Corinth 1:21, 22.

6. Nso ke ana Christian emi ẹyetde aran anam man enye ekeme ndika heaven?

⁶ Ẹma ẹyet Christian aran, ndi oro ọwọrọ ke enye iditreke-tre ndika heaven? Iwọrọke. Enye ọdiọn̄ọ ke ẹmek imọ ika heaven. Edi ana enye eti item emi ọdọhọde ete: “Nditọete, ẹdọdiọn̄ ẹsịn ofụri ukeme mbufo ndinam ikot eke ẹkekotde mbufo ye edimek eke ẹkemekde mbufo ẹnyene nsọn̄ọ; koro edieke mbufo ẹkade iso ndinam mme n̄kpọ emi mbufo idituakke ukot iduọn̄ọ.” (2 Pet. 1:10) Oro ọwọrọ ke kpa ye emi ẹmekde Christian emi ẹyetde aran ndika heaven, n̄kukụre se idinamde enye aka edi enye ndisọn̄ọ nda ye Abasi nsịm akpatre.—Phil. 3:12-14; Heb. 3:1; Edi. 2:10.

7. Mbon emi ẹyetde aran ẹsinam didie ẹdiọn̄ọ ke ẹmek mmimọ ika heaven?

⁷ Edi owo esinam didie ọdiọn̄ọ ke ẹmek imọ ika heaven? Imenen̄ede ikụt ibọrọ mbụme emi ke se Paul ekewetde ọnọ ẹsọk mme owo ke Rome emi “ẹkekotde ẹte ẹdidi ndisana owo.” Enye ọkọdọhọ mmọ ete: “Mbufo ikọbọhọ spirit ufụn oro anamde ẹfiak ẹkop ndịk, edi mbufo ẹkebọ spirit emi anamde ẹda nnyịn ẹnyene nte nditọ, onyụn̄ oto ke spirit emi nnyịn ifiori ite: ‘Abba, Ete!’ Spirit Abasi etiene spirit nnyịn etie ntiense ete nnyịn idi nditọ Abasi.” (Rome 1:7; 8:15, 16) Ntre Abasi ada edisana spirit esie anam mbon emi ẹyetde aran ẹdiọn̄ọ ke ẹmek mmọ ẹka heaven.—1 Thess. 2:12.

8. Didie ke 1 John 2:20, 27 owụt ke idịghe owo edisọn̄ọ inọ mme Christian emi ẹyetde aran ke ẹyet mmọ aran?

⁸ Jehovah anam mbon emi enye emekde ẹka heaven ẹnen̄ede ẹdiọn̄ọ ke imọ imemek mmọ. (Kot 1 John 2:20, 27.) Imọdiọn̄ọ ke kpa esop emi Jehovah adade ekpep kpukpru nnyịn eken n̄kpọ ke enye ada ekpep mme Christian emi ẹyetde aran n̄kpọ n̄ko. Edi idịghe owo edisọn̄ọ inọ mmọ ke ẹyet mmọ aran. Jehovah ada edisana spirit esie emi edide akakan odudu ke ekondo anam mmọ ẹnen̄ede ẹdiọn̄ọ ke ẹyet mmọ aran!

9. Ephesus 1:18 owụt ke nso isitịbe inọ owo ẹma ẹyet enye aran?

⁹ Se isitịbede inọ owo ke Abasi ama ekeyet enye aran ekeme ndisọn̄ ndin̄wan̄a ata ediwak ikọt Abasi mfịn. Nso inam edi ntre? Ntak edi ke owo iyetke mbon oro aran. Abasi okobot owo man odu uwem ke isọn̄ ke nsinsi, idịghe ke heaven. (Gen. 1:28; Ps. 37:29) Edi Jehovah emek ndusụk owo ẹkedu uwem ke heaven. Ntre ke ini enye eyetde mmọ aran, enye esinam mmọ ẹkûdori enyịn aba ndidu uwem ke isọn̄, onyụn̄ enen̄ede okpụhọde nte mmọ ẹkerede n̄kpọ man mmọ ẹdori enyịn ndidu uwem ke heaven.—Kot Ephesus 1:18.

10. Nso ke ‘nditọn̄ọ ntak mmana’ ọwọrọ? (Se n̄ko ikọ idakisọn̄.)

¹⁰ Ẹma ẹda edisana spirit ẹyet mme Christian aran, mmọ ‘ẹtọn̄ọ ntak ẹmana’ m̀mê “ẹmana ẹto enyọn̄.” * Jesus ama owụt ke idụhe nte ẹdikemede ndinam etịm an̄wan̄a owo emi owo mîyetke aran nte esitiede owo ke idem ke ini enye ‘ọtọn̄ọde ntak amana’ m̀mê ‘otode spirit amana.’—John 3:3-8.

11. Tịn̄ nte owo esisan̄ade ọtọn̄ọ ndikpụhọde nte enye ekerede n̄kpọ ẹma ẹyet enye aran.

¹¹ Didie ke mme Christian emi ẹyetde aran ẹsitọn̄ọ ndikpụhọde nte mmọ ẹkerede  n̄kpọ ẹma ẹyet mmọ aran? Mbemiso Jehovah ekeyetde mme Christian emi aran, ama ọdọn̄ mmọ ndidu uwem ke isọn̄ ke nsinsi. Ama enen̄ede ọdọn̄ mmọ ndikụt ini emi Jehovah edinamde kpukpru idiọkn̄kpọ ẹtre, onyụn̄ anam isọn̄ edi Paradise. Ekeme ndidi mmọ ẹma ẹsitie ẹkere nte mmimọ idikụtde nte owo ke ubon mmọ m̀mê ufan mmọ esetde. Edi ke ẹma ẹkeyet mmọ aran, mmọ ẹma ẹtọn̄ọ ndikpụhọde nte mmọ ẹkerede n̄kpọ. Ntak-a? Idịghe nte ke ikọdọn̄ke mmọ aba ndidu uwem ke nsinsi ke isọn̄. Idịghe editịmede esịt m̀mê ọkpọsọn̄ ufen akanam mmọ ẹkpụhọ nte ẹkerede n̄kpọ. Ikonyụn̄ idịghe mmọ ẹtie-ẹtie, mmọ ẹtọn̄ọ ndikere ke ndidu uwem ke nsinsi ke isọn̄ eyefek mmimọ. Utu ke oro, Jehovah akada edisana spirit esie okpụhọde nte mmọ ẹkerede n̄kpọ ye idotenyịn emi mmọ ẹnyenede.

12. Akpa Peter 1:3, 4 owụt ke mme Christian emi ẹyetde aran ẹda didie idotenyịn emi mmọ ẹnyenede?

¹² Owo emi ẹyetde aran ekeme ndikere ke imọ idotke ndinyene utọ ọsọn̄urua ifet oro. Edi enye idehe-dei iyịk m̀mê Jehovah ama emek imọ. Esịt esidadat enye, enye onyụn̄ ọkọm Abasi enye ama eti nte imọ ididude uwem ke heaven.—Kot 1 Peter 1:3, 4.

13. Mme Christian emi ẹyetde aran ẹse didie uwem ke isọn̄ emi?

¹³ Ndi se itịn̄de oro ọwọrọ ke mbon emi ẹyetde aran ẹyoyom n̄kpa? Apostle Paul ama ọbọrọ mbụme emi ini enye ekemende obụkidem mmọ odomo ye tent. Enye ọkọdọhọ ete: “Ke akpanikọ, nnyịn emi idude ke tent emi idu ke mmụm, onyụn̄ efịghe nnyịn; koro nnyịn iyomke ndisio enye nnịm, edi iyom ndimen enye eken nsịne, man uwem ekpemen se idikpade emen.” (2 Cor. 5:4) Idịghe nte ke uwem odorode mme Christian emi tutu mmọ ẹyom n̄kpa ke mbrenyịn. Uwem akam enenem mmọ, mmọ ẹnyụn̄ ẹyom ndidiana ye mbon ubon mmọ ye mme ufan mmọ nnam n̄kpọ Jehovah kpukpru usen. Edi inamke n̄kpọ m̀mê mmọ ẹnam nso, mmọ isifreke ọsọn̄urua idotenyịn emi mmọ ẹnyenede ke ini iso.—1 Cor. 15:53; 2 Pet. 1:4; 1 John 3:2, 3; Edi. 20:6.

14. Nso ye nso mîwụtke ke ẹda edisana spirit ẹyet owo aran?

¹⁴ Ekeme ndidi afo ke ekere m̀mê ẹkam ẹda edisana spirit ẹyet imọ aran. Ekpedi ntre, kere ban̄a mme akpan mbụme emi: Ndi esinen̄ede ọdọn̄ fi ndinam uduak Jehovah? Ndi emekere ke imọ imesinen̄ede isịn idem ikwọrọ ikọ? Ndi emesinen̄ede esịn idem ekpep Ikọ Abasi onyụn̄ ama ndikpep mban̄a “mme ntotụn̄ọ n̄kpọ Abasi”? (1 Cor. 2:10) Ndi etie fi nte ke Jehovah enen̄ede ọdiọn̄ utom ukwọrọikọ fo? Ndi esitie fi nte ke obiomo fi ke idem ndin̄wam mbon en̄wen ẹkpep ẹban̄a Jehovah? Ndi enyene mme akpan usụn̄ ke uwem fo emi afo okụtde ke Jehovah an̄wam fi? Edieke ọbọrọde ih ke kpukpru mme mbụme emi, ndi oro owụt ke ẹmek fi aka heaven? Ihih, iwụtke. Ntak mîwụtke? Sia ekeme nditie kpukpru ikọt Jehovah ke idem ntem n̄ko, edide ẹyet mmọ aran m̀mê owo iyetke. Jehovah onyụn̄ ekeme ndida edisana spirit esie nnam asan̄autom esie ekededi anam kpukpru se isiakde emi, inamke n̄kpọ m̀mê enye odori enyịn ndika heaven m̀mê odori enyịn ndidu ke isọn̄. Afo ndikam n̄kekere m̀mê ẹda edisana spirit ẹyet imọ aran owụt ke owo iyetke fi aran. Mbon emi Jehovah emekde isikereke-kere m̀mê ẹyet mmimọ aran m̀mê owo iyetke. Mmọ ẹdọdiọn̄ọ!

15. Inam didie idiọn̄ọ ke idịghe kpukpru mbon emi Abasi ọnọde spirit esie ke enye emek yak ẹka heaven?

 ¹⁵ Ediwak nti ikọt Abasi emi Abasi ọkọnọde mmọ edisana spirit esie ẹyọyọhọ ofụri Bible; edi mmọ ikodorike enyịn ndikodu uwem ke heaven. Edisana spirit akada David usụn̄. (1 Sam. 16:13) Edisana spirit akanam mme ntotụn̄ọ n̄kpọ emi ẹban̄ade Jehovah ẹn̄wan̄a enye, onyụn̄ ada enye usụn̄ yak ewet ndusụk n̄wed Bible. (Mark 12:36) Kpa ye ofụri oro, apostle Peter ọkọdọhọ ke David “ikọdọkke ikodụk heaven.” (Utom 2:34) John Andinịm Owo Baptism ama “ọyọhọ ye edisana spirit.” (Luke 1:13-16) Jesus ọkọdọhọ ke ikodụhe owo ndomokiet emi okokponde akan John, edi enye ama ọdọhọ n̄ko ke John idisịneke ke otu mbon emi ẹdidude ke Obio Ubọn̄ heaven. (Matt. 11:10, 11) Jehovah ama ada edisana spirit esie ọnọ mmọ odudu ẹnam utịbe utịbe n̄kpọ, edi enye ikadaha spirit oro imek mmọ ẹkedu uwem ke heaven. Ndi emi ọwọrọ ke mbon emi ẹmekde ẹka heaven ẹnam n̄kpọ Abasi ẹkan mmọ? Iwọrọke ntre. N̄kukụre se ọwọrọde edi ke Jehovah edinam mmọ ẹset ẹfiak ẹdidu uwem ke Paradise ke isọn̄.—John 5:28, 29; Utom 24:15.

16. Nso idotenyịn ke n̄wakn̄kan mme asan̄autom Abasi mfịn ẹnyene?

¹⁶ N̄wakn̄kan ke otu mme asan̄autom Abasi ke isọn̄ mfịn idorike enyịn ndikodu uwem ke heaven. Mmọ ẹdori enyịn ndidu uwem ke isọn̄ ini Obio Ubọn̄ Abasi edikarade mmọ, kpa nte Abraham, Sarah, David, John Andinịm Owo Baptism, ye ediwak irenowo ye iban eken ke Bible ẹkedoride.—Heb. 11:10.

17. Mme mbụme ewe ke idibọrọ ke ibuotikọ oro etienede?

¹⁷ Sia ndusụk mbon emi ẹyetde aran ẹsụk ẹdude ke otu ikọt Abasi mfịn, oro ekeme ndinam ibụp ndusụk mbụme. (Edi. 12:17) Ke uwụtn̄kpọ, mbon emi ẹyetde aran ẹkpeda idemmọ didie? Edieke owo ke esop mbufo ọtọn̄ọde ndita uyo nnyụn̄ n̄n̄wọn̄ wine Editi, afo akpanam n̄kpọ didie ye enye? Nso ke akpanam edieke okụtde ke ibat mbon emi ẹdọhọde ke ẹyet mmimọ aran akaka iso ọdọk? Ndi akpana ayak oro afịna fi? Iyọbọrọ mme mbụme emi ke ibuotikọ oro etienede.