1. Nso ke akparawa kiet akanam ke enye ama okokop utịn̄ikọ kiet emi ẹkenọde ke akamba mbono ke 1935?

EKPRI akparawa kiet akana baptism ke 1926 ini enye edide isua 18. Ete ye eka esie ẹkedi Nditọ Ukpepn̄kpọ Bible. Ẹkesikot Mme Ntiense Jehovah ntre ini oro. Akparawa oro ekenyene nditọeka irenowo iba ye nditọeka iban iba. Ete ye eka mmọ ẹma ẹkpep mmọ ẹnam n̄kpọ Jehovah Abasi ẹnyụn̄ ẹkpebe Jesus Christ. Ini oro, kpukpru Nditọ Ukpepn̄kpọ Bible ẹma ẹsita uyo ẹnyụn̄ ẹn̄wọn̄ wine Editi, akparawa oro ama esitiene ata onyụn̄ ọn̄wọn̄ kpukpru isua. Edi ke enye ama okokop akpan utịn̄ikọ kiet emi ibuotikọ ekedide “Akwa Udịmowo,” enye ikaduakke heaven aba. Brọda J. F. Rutherford ọkọnọ utịn̄ikọ oro ke 1935 ke akamba mbono ke Washington, D.C., U.S.A. Nso ke Nditọ Ukpepn̄kpọ Bible ẹkedidiọn̄ọ ke akamba mbono oro?

2. Tịn̄ akpanikọ Bible kiet emi Brọda Rutherford akanamde an̄wan̄a ke utịn̄ikọ esie.

² Brọda Rutherford ama anam ẹdiọn̄ọ ke utịn̄ikọ esie mbon emi ẹdidide “akwa udịmowo” (King James Version), m̀mê “akwa otuowo” emi ẹsiakde ke Ediyarade 7:9. Mbemiso ini oro, Nditọ Ukpepn̄kpọ Bible ẹkekere ke ikpehe mme owo enye emi ẹyetiene ẹka heaven, edi ke mmọ idikarake nte ndidem ye Jesus, sia mmọ mîkenen̄ekede isọn̄ọ ida ye Abasi. Brọda Rutherford ama okot mme itie N̄wed Abasi owụt ke Abasi imekke akwa otuowo ẹka heaven, ke mmọ ẹdi mme erọn̄ en̄wen * emi Christ  enyenede, emi ẹdibọhọde “akwa ukụt” inyụn̄ idu uwem ke isọn̄ emi ke nsinsi. (Edi. 7:14) Jesus ọkọdọhọ ete: “Mmonyụn̄ nnyene mme erọn̄ en̄wen, emi mîtoho ke ufọkerọn̄ emi; ana nda mmọ oro n̄ko ndi, ndien mmọ ẹyekop uyo mi, mmọ ẹyenyụn̄ ẹkabade ẹdi otuerọn̄ kiet, ekpemerọn̄ kiet oyonyụn̄ odu.” (John 10:16) Mme erọn̄ en̄wen emi ẹdi nti ikọt Jehovah emi ẹdoride enyịn ndidu uwem ke nsinsi ke Paradise ke isọn̄. (Matt. 25:31-33, 46) Ẹyak ise nte se ẹkenamde an̄wan̄a oro akanamde ediwak ikọt Jehovah ye akparawa isua 18 oro ẹkûduak heaven aba.—Ps. 97:11; N̄ke 4:18.

3-4. Nso ke ediwak owo emi ẹkeduakde heaven ẹkedidiọn̄ọ ke akamba mbono 1935? Nso ikanam mmọ ẹdiọn̄ọ?

³ Ekedi Brọda Rutherford ọnọ utịn̄ikọ oro aka, enye obụp mbụme emi akaduaide mme owo idem ete: “Mbọk, nte kpukpru mbon oro ẹnyenede idotenyịn ndidu uwem ke nsinsi ke isọn̄ ẹkeme ndidaha nda?” N̄kpọ nte owo 20,000 ẹkedụk mbono oro. Brọda kiet emi eketienede odụk mbono oro ọdọhọ ke mbon oro ẹkedahade ẹda ẹma ẹwak ẹbe mbahade iba. Brọda Rutherford ama ọdọhọ ete: “Sese! Akwa udịmowo!” Otuowo ẹma ẹsio n̄kpo idara. Mbon oro ẹkedahade ẹda ẹma ẹdikụt ke Abasi ikemekke mmimọ ika heaven. Ama edinen̄ede an̄wan̄a mmọ ke Abasi ikadaha edisana spirit iyet mmọ aran. Edem usen oro, owo 840 ẹma ẹna baptism, n̄wakn̄kan ẹkedi mme erọn̄ en̄wen.

⁴ Akparawa oro iketịn̄de iban̄a do ye ediwak ikọt Abasi efen ẹma ẹtre ndisita uyo nnyụn̄ n̄n̄wọn̄ wine Editi ke mmọ ẹma ẹkekop utịn̄ikọ oro. Brọda kiet emi okosụhọrede idem ọkọdọhọ ete: “Akpatre ini emi n̄katade uyo nnyụn̄ n̄n̄wọn̄ wine Editi ekedi ke 1935. Mma ndidiọn̄ọ ke Jehovah idaha edisana spirit esie imek mi n̄ka heaven, ke ndidu uwem ke nsinsi ke isọn̄, nnyụn̄ ntiene nnam enye edi Paradise.” Nte eketiede brọda oro ke okonyụn̄ etie ediwak owo. (Rome 8:16, 17; 2 Cor. 1:21, 22) Tọn̄ọ ini oro, mbon akwa otuowo ẹka iso ndiwak, mmọ ẹnyụn̄ ẹdiana kiet ye mbon emi ẹyetde aran emi ẹsụk ẹdude ke isọn̄, ẹnam n̄kpọ Jehovah.

5. Jehovah ada didie mbon emi ẹtrede ndita uyo nnyụn̄ n̄n̄wọn̄ wine Editi?

⁵ Jehovah ada didie mbon emi ẹketrede ndita uyo nnyụn̄ n̄n̄wọn̄ wine Editi ke 1935 ama ekebe? Mfịn, ekpedi enyene Ntiense Jehovah emi ama akana baptism, emi ekesitade uyo onyụn̄ ọn̄wọn̄de wine Editi, ekem enye edikụt ke Jehovah idaha edisana spirit esie imek imọ, onyụn̄ etre, Jehovah ada enye didie? (1 Cor. 11:28) Ndusụk owo ẹkesita uyo ẹnyụn̄ ẹn̄wọn̄ wine Editi sia mmọ ẹkekere ke mmimọ idika heaven. Edi mmọ ẹkpenyịme ke ikanam ndudue, ẹtre ndita uyo nnyụn̄ n̄n̄wọn̄ wine Editi, ẹnyụn̄ ẹka iso ẹsọn̄ọ ẹda ẹnam n̄kpọ Jehovah, Jehovah ayabat mmọ esịn ke otu mme erọn̄ en̄wen. Kpa ye oro mmọ mîtaha uyo inyụn̄ in̄wọn̄ wine Editi aba, mmọ ẹsụk ẹdodụk Editi sia mmọ ẹnen̄ede ẹma se Jehovah ye Jesus ẹnamde ẹnọ mmọ.

6. Nso ke Jesus ọdọhọ mme angel ẹnam?

⁶ Sia akwa ukụt enen̄erede ekpere, ọkpọfọn ifiak ise se Ediyarade ibuot 7 etịn̄de aban̄a mbon emi ẹyetde aran ye  akwa otuowo. Jesus ama ọdọhọ mme angel ẹka iso ẹmụm ofụm mbinan̄ emi ẹdidade ẹsobo isọn̄ ẹkama. Inaha mmọ ẹsana ofụm oro ẹyak tutu ẹfịk kpukpru mme Christian oro ẹyetde aran idiọn̄ọ, oro edi, tutu Jehovah ọdọhọ ke mmọ ẹsọn̄ọ ẹda ẹsịm akpatre. (Edi. 7:1-4) Mme Christian oro ẹyetde aran ẹyekedi ndidem ye mme oku ke heaven ke ntak emi mmọ ẹsọn̄ọde ẹda ye Abasi ẹsịm akpatre. (Edi. 20:6) Kpukpru owo 144,000 emi ẹyetde aran ẹma ẹkekem ibat ke heaven, Jehovah, Jesus, ye mme angel ẹyenen̄ede ẹdat esịt.

7. Ediyarade 7:9, 10 owụt ke mmanie ke John okokụt ke n̄kukụt? Nso ke mmọ ẹkenam? (Se ndise ikpædem Enyọn̄-Ukpeme emi.)

⁷ Ke John ama eketịn̄ aban̄a ndidem ye mme oku 144,000, enye ama okụt n̄kpọ efen emi ekenemde enye. Enye okokụt “akwa otuowo” emi ẹbọhọde Armageddon. Otu enye emi ẹnen̄ede ẹwak tutu owo ikemeke ndibat. (Kot Ediyarade 7:9, 10.) Mmọ “ẹsịne mfia ọfọn̄idem,” oro owụt ke mmọ iyakke n̄kpọ ndomokiet ke ererimbot Satan emi anam mmọ ẹdehe. Mmọ ẹnyụn̄ ẹsọn̄ọ ẹda ye Abasi ye Christ. (Jas. 1:27) Mmọ ẹfiori ẹte ke se Jehovah ye Jesus emi edide Eyenerọn̄ Abasi ẹnamde anam ẹnyan̄a mmimọ. Mmọ ẹnyụn̄ ẹkama ndakeyop ke ubọk, emi owụt ke mmọ ẹda Jesus nte Edidem emi Jehovah emekde, esịt onyụn̄ enem mmọ etieti.—Men John 12:12, 13 domo.

8. Ediyarade 7:11, 12 ọdọhọ ke nso ke mbon emi ẹdude ke heaven ẹnam ini mmọ ẹkụtde akwa otuowo?

⁸ Kot Ediyarade 7:11, 12. Mbon emi ẹdude ke heaven ẹkenam nso ini mmọ ẹkụtde akwa otuowo? John ọdọhọ ke ekedi kpukpru mbon emi ẹdude ke heaven ẹkụt akwa otuowo, mmọ ẹdat esịt ẹtoro Abasi. Eyenem kpukpru mbon emi ẹdude ke heaven ndikụt akwa otuowo ẹbọhọde akwa ukụt. Ini oro ke n̄kukụt emi edisu.

9. Ediyarade 7:13-15 ọdọhọ ke nso ke akwa otuowo ẹnam idahaemi?

⁹ Kot Ediyarade 7:13-15. John ọdọhọ ke akwa otuowo “ẹyet ọfọn̄idem mmọ ẹnam afia ke iyịp Eyenerọn̄.” Oro ọwọrọ ke esịt mmọ asana, Jehovah onyụn̄ ama mmọ. (Isa. 1:18) Mmọ ẹma ẹyak idem ẹnọ Jehovah, ẹna baptism, ẹnen̄ede ẹbuọt idem ke n̄kpa emi Jesus ekedikpade afak nnyịn, ẹnyụn̄ ẹdi ufan Abasi. (John 3:36; 1 Pet. 3:21) Oro anam Abasi ama mmọ, oro onyụn̄ anam mmọ ẹdot ndinam ‘edisana utom nnọ enye uwemeyo ye okoneyo’ mi ke isọn̄. Mmọ ẹnen̄ede ẹsịn idem ke n̄kpọ Abasi. Mmọ ẹnyụn̄ ẹdi n̄wakn̄kan ke otu mbon emi ẹkwọrọde ikọ ẹnyụn̄ ẹkpepde mme owo ẹban̄a Obio Ubọn̄ Abasi. N̄kpọ emi aban̄ade Obio Ubọn̄ Abasi edi akpa n̄kpọ ke uwem mmọ.—Matt. 6:33; 24:14; 28:19, 20.

10. Nso ke akwa otuowo ẹnịm ke Abasi ayanam ọnọ mmimọ? Ewe un̄wọn̄ọ ke mmọ ẹtie ẹbet?

¹⁰ Akwa otuowo emi ẹdibọhọde akwa ukụt ẹnịm ke Abasi ayaka iso ekpeme mmimọ sia “Enye emi etiede ke ebekpo ayatat tent esie ofụk mmọ.” Ini oro ndien ke un̄wọn̄ọ emi mme erọn̄ en̄wen ẹketiede ẹbet ke ata anyan ini edisu. Un̄wọn̄ọ oro ọdọhọ ke “[Abasi] ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba.”—Edi. 21:3, 4.

11-12. (a) Ediyarade 7:16, 17 owụt ke n̄kpọ editie didie ye akwa otuowo ke ini iso? (b) Nso ke mme erọn̄ en̄wen ẹkeme ndinam ke ini Editi? Ntak emi mmọ ẹkpenamde oro?

¹¹ Kot Ediyarade 7:16, 17. Ndusụk ikọt  Jehovah inyeneke okụk idep udia ke ntak nsọn̄ọn̄kpọ, ekọn̄, m̀mê ke ntak emi ẹsịnde ntịme ke edem mmọ. Ẹdọn̄ ndusụk ikọt Abasi n̄ko ke ufọk-n̄kpọkọbi ke ntak emi mmọ ẹnamde n̄kpọ Jehovah. Kpa ye oro, esịt enem akwa otuowo sia mmọ ẹdiọn̄ọ ke ima ibọhọ idiọk ererimbot emi ke mmimọ iyenyene udia barasuene, ke Jehovah oyonyụn̄ ekpep mmimọ ediwak n̄kpọ. Ini ẹdisobode ererimbot Satan emi, iyatesịt Jehovah emi etiede nte “ọkpọsọn̄ ufiop” idisịmke akwa otuowo. Akwa ukụt ama efịt ebe, Jesus ayada mbon emi ẹdibọhọde usụn̄ esịm “mmọn̄ uwem.” Oro ọwọrọ ke enye ayan̄wam mmọ ẹnyene nsinsi uwem. Idịghe ekpri n̄kpọ ke Abasi edinam inọ akwa otuowo oro! Ke otu ediwak biliọn owo oro ẹdude uwem tọn̄ọ Abasi okobot ererimbot emi, mmọ ẹkeme ndisịne ke otu mbon emi mîkpaha akanam, mîdinyụn̄ ikpaha tutu amama!—John 11:26.

¹² Kpukpru se Abasi aduakde ndinam nnọ mme erọn̄ en̄wen emi anam mmọ ẹkọm Jehovah ye Jesus! Kpa ye emi Jehovah mîmekke mmọ ẹka heaven, enye osụk ama mmọ ukem ukem nte enye amade mbon emi enye emekde ẹka heaven. Mbon oro ẹyetde aran ye mme erọn̄ en̄wen ẹkeme nditoro Abasi ye Christ. Usụn̄ kiet emi mmọ ẹnamde emi edi mmọ ndidụk Udia Mbubreyo Ọbọn̄.

13-14. Ntak emi kpukpru owo ẹkpedụkde Editi n̄kpa Christ?

¹³ Ke isua ifan̄ emi ebede mi, se isiwakde nditịbe edi ke emekeme ndibat owo 1,000 ke otu mbon emi ẹdụkde Editi ukwe owo ndomokiet ke esịt oro se ita uyo inyụn̄ in̄wọn̄ wine Editi. N̄wakn̄kan esop ke ofụri ererimbot inyeneke owo ndomokiet se isita uyo inyụn̄ in̄wọn̄ wine Editi. Ke otu mbon emi ẹsidụkde Editi, mbon emi ẹdoride enyịn ndidu uwem ke isọn̄ ẹwak ẹkan. Nso isinam mmọ ẹdụk ndien? Ukem se isinam owo aka ndọ ufan esie esinam mmọ ẹdụk. Mme owo ẹsika ndọ ufan mmọ man ẹwụt ke imama ufan mmimọ, ke inyụn̄ iyom ndiberi mmọ edem. Kpasụk ntre n̄ko, mme erọn̄ en̄wen ẹsidụk Editi sia mmọ ẹyom ndiwụt ke imama Christ ye mbon emi ẹyetde aran, ke imonyụn̄ iben̄e idem ndiberi mmọ  edem. Ntak efen edi ke mmọ ẹsida oro ẹwụt ke imama nte Christ ekedikpade afak mmimọ, sia oro anam mmọ ẹdori enyịn ndidu uwem ke nsinsi ke isọn̄.

¹⁴ Akpan ntak efen edi ke mmọ ẹyom ndinam se Jesus ọkọdọhọde. Ini Jesus ọkọtọn̄ọde Udia Mbubiteyo Ọbọn̄ ye nti mme apostle esie, enye ọkọdọhọ mmọ ete: “Ẹka iso ẹnam emi nditi mi.” (1 Cor. 11:23-26) Ntre mme erọn̄ en̄wen ẹyeka iso ẹdụk Udia Mbubreyo Ọbọn̄ adan̄a nte ndusụk mbon emi ẹyetde aran ẹsụk ẹkade iso ẹdu ke isọn̄ emi. Mmọ ẹsikam ẹsịn idem ẹkot ofụri owo ẹditiene mmọ ẹdụk Editi.

15. Nso ke nnyịn owo kiet kiet ikeme ndinam ntoro Abasi ye Christ ini idụkde Editi?

¹⁵ Imesitoro Abasi ye Christ ini idiande uyo ikwọ ikwọ inyụn̄ ibọn̄ akam ke ini idụkde Editi. Ibuotikọ utịn̄ikọ Editi isua emi edi, “Wụt ke Amama Se Abasi ye Christ Ẹnamde Ẹnọ Fi!” Utịn̄ikọ oro ayanam idọdiọn̄ ima se Jehovah ye Christ ẹnamde ẹnọ nnyịn. Ini ẹdimende uyo ye wine ẹsan̄a, iyeti ke mmọ ẹda ẹban̄a ikpọkidem ye iyịp Jesus. Iyeti ke Jehovah akayak Eyen esie edikpa ke ibuot nnyịn man nnyịn idu uwem. (Matt. 20:28) Edidọdọn̄ kpukpru mbon emi ẹmade Ete nnyịn eke heaven ye Eyen esie ndidụk Editi.

16. Nso ye nso ke mbon oro ẹyetde aran ẹda ẹbiet mme erọn̄ en̄wen?

¹⁶ Mbon emi ẹyetde aran isọn̄ke urua ke enyịn Abasi ikan mme erọn̄ en̄wen. Jehovah ama mmọ ukem ukem. Se inamde idiọn̄ọ ntre edi ke kpa uwem edima Eyen esie emi enye adade edep mbon oro ẹyetde aran ke enye onyụn̄ ada edep mme erọn̄ en̄wen. N̄kukụre ukpụhọde edi ke mbon oro ẹyetde aran ẹdori enyịn ndika heaven, mme erọn̄ en̄wen ẹdori enyịn ndidu uwem ke isọn̄. Edi ana otu mbiba emi ẹka iso ẹsọn̄ọ ẹda ye Abasi ye Christ. (Ps. 31:23) Ti n̄ko ke Abasi inọhọ mbon otu kiet edisana spirit okpon akan mbon otu enye eken. Emi ọwọrọ ke Jehovah esinọ owo kiet kiet edisana spirit esie etiene udomo un̄wam se owo oro oyom.

17. Nso ke mbon oro ẹyetde aran emi ẹsụk ẹdude ke isọn̄ ẹtie ẹbet?

¹⁷ Mbon emi ẹyetde aran ikadaha-da idotenyịn uka heaven imana. Abasi esinọ mmọ idotenyịn oro. Mmọ ẹsikere ẹban̄a idotenyịn mmọ, ẹsịn ke akam, esinyụn̄ ọdọdọn̄ mmọ ndikọbọ utịp mmọ ke heaven. Mmọ idiọn̄ọke nte idem emi mmọ ẹdinyenede ke heaven editiede. (Phil. 3:20, 21; 1 John 3:2) Kpa ye oro,  ọdọn̄ mmọ ndikokụt Jehovah, Jesus, mme angel, ye mbon eken emi ẹyetde aran. Ọdọn̄ mmọ ndikadiana ye mmọ ke Obio Ubọn̄ heaven.

18. Nso idọn̄ mme erọn̄ en̄wen?

¹⁸ Ọdọdọn̄ mme erọn̄ en̄wen ndidu uwem ke isọn̄ emi ke nsinsi kpa nte esidọn̄de kpukpru owo toto ke emana. (Eccl. 3:11) Ọdọdọn̄ mmọ ndikụt ini emi mmọ ẹditienede inam ofụri isọn̄ emi edi Paradise. Ọdọn̄ mmọ ndikụt ini emi mmọ ẹdibọpde ufọk idemmọ, ẹtọ in̄wan̄, idem onyụn̄ ọsọn̄ mmọ ye nditọ mmọ. (Isa. 65:21-23) Ọdọdọn̄ mmọ ndidu uwem ini emi mmọ ẹdikemede ndika nsio nsio itie ke ererimbot emi, ndisan̄a nse mme obot, akai, inyan̄ibom, nnyụn̄ n̄kpep mban̄a nsio nsio n̄kpọ emi Jehovah okobotde. Se inemde mmọ ikan edi ke edidi eyo esiere, mmọ ẹtetịm ẹkpere Jehovah.

19. Nso ke kpukpru nnyịn isinam ke ini Editi? Nso usen ke idinịm Editi isua emi?

¹⁹ Jehovah aduak nti n̄kpọ ke ini iso ọnọ mbon emi ẹma ẹkeyak idem ẹnọ enye. (Jer. 29:11) Ini Editi edi ata akpan ini emi nnyịn owo kiet kiet isinen̄erede itoro Abasi ye Christ ke se mmọ ẹnamde ẹnọ nnyịn man idikeme ndidu uwem ke nsinsi. Editi edi n̄kponn̄kan mbono esop emi ata mme Christian ẹsinịmde. Idinịm Editi isua emi ke Saturday, March 27, 2021 ke utịn ama okosụhọde. Ediwak owo ẹyedụk Editi isua emi owo ndomokiet ifịnake mmọ. Mbon en̄wen ẹyenyụn̄ ẹdụk kpa ye emi ẹkọbọde mmọ. Ndusụk ẹdisịne ke esịt ufọk-n̄kpọkọbi ẹnịm. Jehovah, Jesus, mme angel, ye mbon emi ẹyetde aran oro ẹma ẹkeset ẹka heaven ẹyetie ke heaven ẹse nte idinịmde Editi isua emi. Akam nnyịn edi yak Editi isua emi enem kpukpru owo, edide idinịm nte esop, otu, m̀mê ididu ikpọn̄ inịm!