1-2. (a) Ini ewe ke ndusụk owo ẹsinen̄ede ẹti owo mmọ emi akakpade? (b) Nso ke Jesus ọkọtọn̄ọ okoneyo emi ekesierede usen emi ẹkewotde enye?

ISISỤK iteti mbon nnyịn emi ẹkekpade inamke n̄kpọ m̀mê ebịghi didie tọn̄ọ mmọ ẹkekpa. Ini emi ndusụk owo ẹsitide mbon mmọ ẹkan esidi ama ọwọn̄ọde edisịm ini emi mmọ ẹkekpade.

² Enyene owo kiet emi inen̄erede ima, emi edide ama ọwọn̄ọde edisịm usen emi enye akakpade, nnyịn itiene mme owo ke miliọn ke miliọn ke ofụri ererimbot isop idem iti n̄kpa esie. Owo oro edi Jesus Christ. (1 Pet. 1:8) Isisop idem man iti nte enye akakpade man afak nnyịn osio ke idiọkn̄kpọ ye n̄kpa. (Matt. 20:28) Jesus ke idemesie okoyom mme mbet esie ẹsiti n̄kpa imọ. Okoneyo emi ekesierede usen emi ẹkewotde enye, enye ama ọtọn̄ọ akpan edinam kiet onyụn̄ ọdọhọ ete: “Ẹka iso ẹnam emi nditi mi.”​—Luke 22:19.

3. Nso ke idineme ke ibuotikọ emi?

³ Ibat ibat ke otu mbon emi ẹsidụkde Editi ẹdori enyịn ndidu uwem ke heaven. Edi ediwak miliọn mbon emi ẹdoride enyịn ndidu mi ke isọn̄ ẹsisụk ẹtetiene ẹdụk. Ke ibuotikọ emi, imọn̄ ineme se isinamde ọdọdọn̄ otu mbiba oro ndidụk Editi ke isua ke isua. Iyeneme n̄ko ufọn emi isibọde ke ini idụkde. Yak ibem iso ineme ndusụk se isinamde mbon emi ẹyetde aran ẹdụk.

4. Nso inam mbon emi ẹyetde aran ẹsita uyo ẹnyụn̄ ẹn̄wọn̄ wine Editi?

⁴ Mbon emi ẹyetde aran ẹsita uyo ẹnyụn̄ ẹn̄wọn̄ wine Editi kpukpru isua. Nso inam mmọ ẹdot ndita uyo nnyụn̄ n̄n̄wọn̄ wine Editi? Se iketịbede okoneyo emi ekesierede usen emi ẹkewotde Jesus anam idiọn̄ọ ibọrọ mbụme oro. Ke Jesus ye mme apostle esie ẹma ẹkekụre Passover, Jesus ama ọtọn̄ọ Udia Mbubreyo Ọbọn̄. Enye ama ọnọ mme apostle esie 11 emi ẹkesọn̄ọde ẹda ye enye uyo ye wine ete ẹta ẹnyụn̄ ẹn̄wọn̄. Jesus ama etịn̄ aban̄a ediomi iba ọnọ mmọ​—obufa ediomi ye ediomi Obio Ubọn̄. * (Luke 22:​19, 20, 28-30) Ediomi mbiba oro ama anam mme apostle oro ye ibat ibat mbon en̄wen ẹdot ndidi ndidem ye mme oku ke heaven. (Edi. 5:10; 14:1) N̄kukụre mbon emi ẹdotde ndita uyo nnyụn̄ n̄n̄wọn̄ wine Editi ẹdi nyọhọ-nsụhọ ke otu mbon emi ẹyetde aran, emi ẹsịnede ke ediomi mbiba oro.

5. Nso ke mbon emi ẹyetde aran ẹdiọn̄ọ ẹban̄a se Abasi ọn̄wọn̄ọde ọnọ mmọ?

⁵ N̄kpọ en̄wen emi esinamde ọdọdọn̄ mbon emi ẹyetde aran ndidụk Editi edi ke mmọ ẹsida ini edinam oro ẹtie ẹkere se Abasi ọn̄wọn̄ọde ọnọ mmọ. Se Jehovah ọn̄wọn̄ọde ọnọ mmọ idịghe ekpri​—enye ayanam mmọ ẹdu utọ uwem emi mîkemeke ndikpa mînyụn̄ ikemeke ndibiara ke heaven, anam mmọ ẹdiana ye Jesus Christ ye mbon eken ke otu 144,000 ẹkara, ndien n̄kponn̄kan edi ke mmọ ẹyekụt Jehovah Abasi iso ye iso! (1 Cor. 15:​51-53; 1 John 3:2) Kpa ye kpukpru se Jehovah ọn̄wọn̄ọde ọnọ mmọ oro, mmọ ẹdiọn̄ọ ke edieke mmimọ mîsọn̄ọke ida isịm utịt, ke kpukpru oro ayatak mmimọ. (2 Tim. 4:​7, 8) Esinem mbon emi ẹyetde aran ata etieti nditie n̄kere se Jehovah ọn̄wọn̄ọde ọnọ mmọ ke heaven. (Titus 2:13) Edi nso kaban̄a “mme erọn̄ en̄wen”? (John 10:16) Nso idi ndusụk ntak emi ẹsinamde mmọ ẹdụk Editi?

6. Nso isinam mme erọn̄ en̄wen ẹdụk Editi?

⁶ Esinem mme erọn̄ en̄wen ndidụk Editi kpa ye emi mmọ mîsitaha uyo inyụn̄ in̄wọn̄ wine Editi. Akpa ini emi ẹkekotde mme erọn̄ en̄wen san̄asan̄a ẹdọhọ ẹtiene ẹdụk Editi ekedi ke 1938. Ẹkewet ke Enyọn̄-Ukpeme Ikọmbakara March 1, 1938, ẹte: “Enen̄ede ọfọn onyụn̄ odot yak [mme erọn̄ en̄wen] ẹtiene ẹdụk edinam emi ẹnyụn̄ ẹse se ikade iso. . . . Ini oro ekpedi ata ini idatesịt ọnọ mmọ n̄ko, ntre ke esinyụn̄ edi.” Ukem nte esinemde ndika usọrọ ndọ owo n̄ketie nse se ẹnamde, esinem mme erọn̄ en̄wen n̄ko ndidụk Editi ntiene nse se ẹnamde.

7. Nso isinam ọdọdọn̄ mme erọn̄ en̄wen ndikop utịn̄ikọ Editi?

⁷ Mme erọn̄ en̄wen ẹsitiene ẹtie ẹkere se Jehovah ọn̄wọn̄ọde ndinam nnọ mmọ. Esidọdọn̄ mmọ ndikop utịn̄ikọ Editi sia ata ediwak se ẹsinemede ke utịn̄ikọ oro ẹsiban̄a se Christ ye owo 144,000 emi ẹdidianade ye enye ẹkara ẹdinamde ẹnọ ndinen owo ke Tọsịn Isua Ukara Christ. Jesus Christ emi edide Edidem ayada owo 144,000 emi ẹdidianade ye enye ẹkara ke heaven usụn̄ yak  mmọ ẹnam isọn̄ emi akabade edi Paradise, ẹnyụn̄ ẹn̄wam mbon emi ẹnamde se Abasi amade ẹfọn ẹma. Esinem ediwak miliọn mbon emi ẹdụkde Editi ndikere nte nti n̄kpọ emi Jehovah ọn̄wọn̄ọde ọnọ mmọ ẹdisude, utọ nte mbon emi ẹdude ke Isaiah 35:​5, 6; 65:​21-23; ye Ediyarade 21:​3, 4. Mmọ nditie n̄kere nte mmimọ ye mbon mmimọ ididude ke Obio Ubọn̄ Abasi, esinam se Jehovah ọn̄wọn̄ọde ọnọ mmọ enen̄ede ọdọn̄ mmọ onyụn̄ anam mmọ ẹnen̄ede ẹbiere ke mmimọ iditreke ndikpono Jehovah.​—Matt. 24:13; Gal. 6:9.

8. Nso en̄wen isinam mme erọn̄ en̄wen ẹdụk Editi?

⁸ N̄kpọ en̄wen emi esinamde mme erọn̄ en̄wen ẹdụk Editi edi ke mmọ ẹyom ndiwụt ke imama mbon emi ẹyetde aran inyụn̄ in̄wam mmọ. Ikọ Abasi ama ọdọdọhọ ke mme erọn̄ en̄wen ye mbon emi ẹyetde aran ẹyenen̄ede ẹdiana kiet. Inam didie idiọn̄ọ? Yak ineme n̄kpọ ifan̄ emi ẹnamde idiọn̄ọ.

9. Prọfesi Zechariah 8:23 owụt ke mme erọn̄ en̄wen ẹda didie mbon emi ẹyetde aran?

⁹ Kot Zechariah 8:23. Prọfesi emi anam yak inen̄ede ikụt nte mme erọn̄ en̄wen ẹdade nditọete mmọ emi ẹyetde aran. Mbon emi ẹyọhọde ẹsụhọ ke otu mbon emi ẹyetde aran ke ẹkot “eyen Jew” ye “mbufo” ke itie Bible oro. (Rome 2:​28, 29) Mme erọn̄ en̄wen ẹdi “owo duop eke ẹtode ke kpukpru usem mme idụt.” Itie oro ndidọhọ ke mmọ ‘ẹmụm utọn̄ ọfọn̄’ eyen Jew ọwọrọ ke mmọ ẹsọn̄ọ ẹda ye mbon emi ẹyetde aran, ẹdiana ye mmọ ẹtuak ibuot ẹnọ Jehovah. Ke ntre, mme erọn̄ en̄wen nditiene ndụk Editi esiwụt ke mmọ ẹnen̄ede ẹsọn̄ọ ẹda ye mbon emi ẹyetde aran.

10. Nso ke Jehovah anam man osu prọfesi emi odude ke Ezekiel 37:​15-19, 24, 25?

¹⁰ Kot Ezekiel 37:​15-19, 24, 25. Jehovah anam mbon emi ẹyetde aran ye mme erọn̄ en̄wen ẹnen̄ede ẹdiana kiet ẹnam n̄kpọ esie man prọfesi oro osu. Prọfesi oro asiak eto iba. Mbon emi ẹdoride enyịn ndika heaven ẹda ẹban̄a eto “eke Judah” (oro edi esien emi ndidem Israel ẹkesitode), ndien mbon emi ẹdoride enyịn ndidu ke isọn̄ ẹda ẹban̄a eto ‘eke Ephraim.’ * Jehovah ayatan̄ otu mbiba oro adian kiet mmọ ẹkabade “eto kiet.” Emi ọwọrọ ke mmọ ẹdiana kiet ẹnam n̄kpọ Jehovah, ndien Jesus Christ edi Edidem mmọ. Ke ini mbon emi ẹyetde aran ye mme erọn̄ en̄wen ẹdụkde Editi kpukpru isua, mmọ isidụkke nte nsio nsio otu iba, ẹsidụk nte “otuerọn̄ kiet” emi ẹnyenede “ekpemerọn̄ kiet.”​—John 10:16.

11. Nso idi ata akpan usụn̄ emi mme “erọn̄” emi ẹsiakde ke Matthew 25:​31-36, 40 ẹn̄wamde nditọete Christ?

¹¹ Kot Matthew 25:​31-36, 40. Mme erọn̄ en̄wen ke Jesus okokot “erọn̄” ke itien̄wed emi. Mmọ ẹdi ndinen owo emi ẹdidude ke utịt ini, emi ẹdoride enyịn ndidu uwem ke isọn̄. Akpan usụn̄ kiet emi mmọ ẹkade iso ndin̄wam nditọete Christ edi nditiene n̄kwọrọ eti mbụk Obio Ubọn̄ ke ofụri ererimbot nnyụn̄ nnam mme owo ẹdi mbet Christ. Idịghe ekpri utom edi oro.​—Matt. 24:14; 28:​19, 20.

12-13. Tịn̄ mme usụn̄ en̄wen emi mme erọn̄ en̄wen ẹn̄wamde nditọete Christ.

¹² Kpukpru isua, mme erọn̄ en̄wen ẹsisịn idem ẹn̄wam nditọete Christ ẹkot  mme owo yak ẹditiene ẹdụk Editi ama ayak urua ifan̄ ndikem usen Editi. (Se ekebe emi “ Ndi Emetịm Idem Ọnọ Ini Editi?”) Mme erọn̄ en̄wen ke nsio nsio esop ke ofụri ererimbot ẹsinam ndutịm n̄ko man ẹkụt ẹte ke owo itreke ndinịm Editi kpa ye emi edide owo emi ẹyetde aran ndomokiet idụhe ke ata ediwak esop. Esinem mme erọn̄ en̄wen ata etieti ndinam mme n̄kpọ emi nnọ nditọete Christ sia mmọ ẹdiọn̄ọ ke Jesus ada nte ke se mmimọ inamde inọ nditọete imọ, ke inam inọ imọ.​—Matt. 25:​37-40.

¹³ Nso idi ntak efen emi esinamde kpukpru nnyịn idụk Editi, edide idori enyịn ndidu uwem ke heaven m̀mê ke isọn̄?

14. Nso ke Jehovah ye Jesus ẹnam ẹwụt ke imama nnyịn ata etieti?

¹⁴Isiyom ndiwụt ke enem nnyịn nte Jehovah ye Jesus ẹmade nnyịn. Jehovah anam ediwak n̄kpọ owụt ke imama nnyịn, edi enyene kiet emi akande kpukpru. Abasi nnyịn ndikayak edima Eyen esie edibọ ufen onyụn̄ akpa ke ibuot nnyịn ama owụt nte enye amade nnyịn eketre. (John 3:16) Imọdiọn̄ọ n̄ko ke Jesus ndikenyịme ndidikpa nnọ nnyịn owụt ke enye ama nnyịn etieti n̄ko. (John 15:13) Idụhe se nnyịn ikpanamde inọ Jehovah ye Jesus yak ekekem ke usiene utọ ima emi mmọ emade nnyịn do. Edi imekeme ndiwụt mmọ ke imama se mmọ ẹnamde ẹnọ nnyịn. Nte idude uwem ke usen ke usen ediwụt oro. (Col. 3:15) Imesidụk Editi n̄ko man iti utọ ima oro mmọ ẹmade nnyịn do, inyụn̄ ikere nte ikpamade mmọ n̄ko.

15. Nso inam mbon emi ẹyetde aran ye mme erọn̄ en̄wen ẹnen̄ede ẹma nte Jesus ekedikpade afak nnyịn?

¹⁵Isiyom ndiwụt ke imenen̄ede ima nte Jesus ekedikpade afak nnyịn. (Matt. 20:28) Mbon emi ẹyetde aran ẹnen̄ede ẹma nte Jesus ekedikpade afak nnyịn sia oro anam mmọ ẹkeme ndibọ se Jehovah ọn̄wọn̄ọde ọnọ mmọ. Mmọ ndibuọt idem ke n̄kpa Jesus anam Jehovah abat mmọ ke ndinen, onyụn̄ ada mmọ enyene nte nditọ. (Rome 5:1; 8:​15-17, 23) Mme erọn̄ en̄wen n̄ko ẹma nte Jesus ekedikpade afak nnyịn. Mmọ ndibuọt idem ke iyịp Jesus anam mmọ ẹkeme ndikpere Jehovah, ẹkeme ndinam n̄kpọ nnọ Enye, ẹnyụn̄ ẹdori enyịn ndibọhọ “akwa ukụt.” (Edi. 7:​13-15) Usụn̄ kiet emi mbon emi ẹyetde aran ye mme erọn̄ en̄wen ẹwụtde ke imenen̄ede ima nte Jesus ekedikpade afak nnyịn edi ndisidụk Editi kpukpru isua.

16. Nso en̄wen isinam idụk Editi?

¹⁶ Ntak en̄wen emi esinamde idụk Editi edi ke iyom ndinam se Jesus ọkọdọhọde. Nnyịn isidaha ewụhọ emi enye okowụkde okoneyo oro enye ọkọtọn̄ọde edinam emi ibre mbre, edide idori enyịn ndikodu ke heaven, m̀mê ke isọn̄. Enye ọkọdọhọ ete: “Ẹka iso ẹnam emi nditi mi.”​—1 Cor. 11:​23, 24.

17. Didie ke Editi esinam inen̄ede ikpere Jehovah?

¹⁷Esinam inen̄ede ikpere Jehovah. (Jas. 4:8) Nte ima ikeneneme, Editi esinam yak inen̄ede ikere iban̄a kpukpru se Jehovah ọn̄wọn̄ọde ndinam nnọ nnyịn, ye akwa ima emi enye amade nnyịn. (Jer. 29:11; 1 John 4:​8-10) Nnyịn nditie n̄kere kpukpru oro esinam yak inen̄ede  ima Jehovah, inyụn̄ inen̄ede ikpere enye.​—Rome 8:​38, 39.

18. Nnyịn nditie n̄kere nte Jesus akawade idem ọnọ nnyịn esinam inam nso?

¹⁸Esinam ọdọn̄ nnyịn ndikpebe Jesus. (1 Pet. 2:21) Usen ifan̄ mbemiso esịmde usen Editi, isinen̄ede ikot mme itie Bible emi ẹtịn̄de ẹban̄a se Jesus akanamde urua kiet mbemiso ẹwotde enye ye se iketịbede inọ enye urua oro, n̄kpa esie, ye ediset ke n̄kpa esie. Ndien utịn̄ikọ Editi esinam iti nte Jesus amade nnyịn. (Eph. 5:2; 1 John 3:16) Nnyịn ndikot nnyụn̄ ntie n̄kere nte Jesus akawade idem ọnọ nnyịn esinam enen̄ede ọdọn̄ nnyịn “ndika iso nsan̄a nte enye akasan̄ade.”​—1 John 2:6.

19. Nso idinam Jehovah aka iso ama nnyịn?

¹⁹Esinam idọdiọn̄ ibiere ndika iso ndi ufan Jehovah. (Jude 20, 21) Se idinamde Jehovah aka iso ama nnyịn edi nnyịn ndidomo ofụri ukeme nnyịn n̄kop uyo esie, nnam enyịn̄ esie asana, nnyụn̄ nnam enye adat esịt. (N̄ke 27:11; Matt. 6:9; 1 John 5:3) Editi esinam idọdiọn̄ ibiere ndidu uwem ke usen ke usen nte n̄kpọ eke idọhọde Jehovah, ‘Nyom fi ama mi ke nsinsi!’

20. Siak nti ntak emi ẹkpenamde isidụk Editi.

²⁰ Imenyene nti ntak emi ẹsinamde idụk Editi, edide idori enyịn ndidu uwem ke nsinsi ke heaven m̀mê ke isọn̄. Ke ini isopde idem kpukpru isua ke usen Editi, imesiti n̄kpa owo emi inen̄erede ima, oro edi Jesus Christ. N̄kponn̄kan edi ke imesiti akakan ima emi Jehovah amade nnyịn, nte enye ọkọnọde Eyen esie edikpa afak nnyịn. Editi isua emi ọduọ ke Friday, April 15, 2022. Imama Jehovah ye Eyen esie etieti. Ke ntre, ama ọwọn̄ọde edisịm usen emi Jesus akakpade, idụhe n̄kpọ efen emi ekpedide akpan n̄kpọ akan nnyịn nditiene ndụk Editi n̄kpa esie.