1-2. Nso ke nnyịn mîkpetreke ndinam ke ima ikana baptism? Ntak-a?

 ESIYAK ebịghi didie mbemiso anamde ufọk fo asana? Ekeme ndidi mbemiso ọkọwọrọde okodụn̄ do ama ada ini otụn̄ọde, ọkpọri, ọkwọhọde enye asana. Edi ekpedi aka ko afo udọn̄ke enyịn aba, nso iditịbe? Ekpri ekpri ini ufọk oro ayafiak edehe. Mûyomke ufọk fo edi okụt-asiak-etap, ana esinam enye asana ke ubọk ke ubọk.

² Mbiet n̄kpọ oro ke ana inam ye ekikere ye edu uwem nnyịn. Mbemiso ikanade baptism, ima isịn idem inam se akpanade inam man “iyet kpukpru se isabarede obụkidem ye spirit ifep ke idem nnyịn.” (2 Cor. 7:1) Edi idahaemi ana inam item apostle Paul emi ọdọhọde ika iso ‘ikabade idi obufa.’ (Eph. 4:23) Ntak anade ika iso inen̄ede n̄kpọ ke uwem nnyịn? Ntak edi ke ite ibọp enyịn itat, ndek ndek n̄kpọ ererimbot emi ẹkeme ndinam idehe ke enyịn Jehovah. Edieke nnyịn mîyomke oro etịbe inyụn̄ iyomde ndika iso nsana ke enyịn Jehovah, anaedi anam anam nnyịn ise se isikerede, ise uwem nnyịn, ye se isidọn̄de nnyịn.

3. ‘Ndinam ekikere fo edi obufa’ ọwọrọ nso? (Rome 12:2)

³ Nso ke ana inam man inam ekikere nnyịn edi obufa, oro edi, ikpụhọde nte isikerede n̄kpọ? (Kot Rome 12:2.) Ndinam n̄kpọ edi obufa idịghe sụk ndidiọn̄ n̄kpọ ifan̄ m̀mê  ndikpụhọde n̄kpọ ifan̄ ke n̄kpọ oro. Ke uwụtn̄kpọ, nnyịn ndibana ufọk iwọrọke ke imanam ufọk oro edi obufa. Ukem ntre n̄ko, ndinam nti n̄kpọ ifan̄ mbiet eti owo iwọrọke ke imanam ekikere nnyịn edi obufa. Edieke iyomde ndinam ekikere nnyịn edi obufa, ana itịm ise utọ owo emi idide inyụn̄ ikpụhọde se anade ikpụhọde man idomo nte ikekeme ndidu uwem nte Jehovah ọdọhọde. Se itịn̄de emi idịghe n̄kpọ ini kiet, edi se idinamde ke ubọk ke ubọk.

4. Ikpanam nso man nnyịn idikere n̄kpọ nte ererimbot emi?

⁴ Ima ifọn ima, kpukpru se inamde ẹdinenem Jehovah. Edi nnyịn ifọnke ima kan̄a, ntre ana itetịme man ikeme ndinam se inemde enye. Ndi ama okụt ke Rome 12:2 ke apostle Paul ọkọdọhọ ke ana inam ekikere nnyịn edi obufa man idiọn̄ọ se Abasi oyomde inam? Utu ke ndiyak ererimbot emi ẹnam ikere n̄kpọ nte mmọ ẹkerede, ana isitịm idụn̄ọde idem nnyịn ise m̀mê se ibierede ke usen ke usen ye se ibierede ndida uwem nnyịn nnam ẹnen̄ede ẹdi nte Abasi ekerede n̄kpọ, idịghe nte ererimbot ẹkerede.

5. Ikpanam didie idiọn̄ọ m̀mê imenen̄ede inịm ke usen Jehovah ekpere? (Se ndise.)

⁵ Se uwụtn̄kpọ kiet mi. Jehovah oyom ‘isọn̄ọ inyene edidu usen esie ke ekikere.’ (2 Pet. 3:12) Bup idemfo: ‘Ndi nte ndude uwem owụt ke an̄wan̄a mi ke ererimbot emi ọmọn̄ okokụre? Ndi ami ndibiere ndika ufọkn̄wed ntaifiọk ye utọ utom emi mbierede ndinam ẹwụt ke ndinam n̄kpọ Jehovah ke nda ke akpan n̄kpọ n̄kan? Ndi mmenịm ke Jehovah eyese aban̄a mi ye mbonubon mi, mîdịghe ndi mmesitịmede esịt kpukpru ini mban̄a se ididiade, se idisịnede, ye mme n̄kpọ ntre?’ Kere nte edinemde Jehovah  enye ama okụt nte idomode ndinem enye esịt ke se ededi emi iyomde ndinam.​—Matt. 6:25-27, 33; Phil. 4:12, 13.

6. Nso ke ana ika iso inam?

⁶ Ana isise se isikerede kpukpru ini, ndien edieke ikụtde se akpanade ikpụhọde, nnyịn ikpụhọde. Paul ọkọdọhọ mbon Corinth ete: “Ẹka iso ẹdomo ẹse m̀mê mbufo ẹdu ke mbuọtidem, ẹka iso ẹwụt se mbufo ẹdide.” (2 Cor. 13:5) Ndidu “ke mbuọtidem” idịghe sụk ndidụk mbono esop m̀mê ndikwọrọ ikọ, esịne n̄ko se ikerede, se idọn̄de nnyịn, ye se iduakde. Ntre ana isikot Ikọ Abasi, ikpep ndikere n̄kpọ nte Jehovah ekerede, inyụn̄ idomo nte ikekeme ndinam se inemde Jehovah esịt. Mme n̄kpọ oro ẹdin̄wam nnyịn ika iso inam ekikere nnyịn edi obufa.​—1 Cor. 2:14-16.

7. Ephesus 4:31, 32 owụt ke nso efen ke ikpanam? Ntak ekemede ndisọn̄ nnyịn ndinam?

⁷ Kot Ephesus 4:31, 32. Ke ima ikokpụhọde nte isikerede n̄kpọ, ana ‘imen obufa owo isịne.’ (Eph. 4:24) Nnyịn idiwan̄ke-wan̄ ubọk itie yak oro etịbe. Mme edu emi anade inen̄ede itịme nditre ẹsịne idiọk udu, iyatesịt, ye ifụtesịt. Ntak ekemede ndisọn̄ nnyịn ndinam oro edi ke ndusụk ndiọi uwem emi ẹsesịne owo ke iyịp. Ke uwụtn̄kpọ, ke Mme N̄ke 29:22, ẹtịn̄ ẹban̄a “owo iyatesịt” ye “owo ifụtesịt.” Ndusụk owo etie ntre. Ikọ oro, “owo iyatesit” ye “owo ifụtesit” ọwọrọ ke utọ mbon oro ẹsidi ekpri ekpri n̄kpọ mmọ ẹyat esịt mîdịghe ẹfụt esịt. Ekeme ndidi se owo osụk etịmede nditre idiọk uwem emi ama ekesịne owo ke iyịp ke enye ama akana baptism ama. Mbụk Brọda Stephen emi iyomde ndibụk owụt ke edi ntre.

8-9. Didie ke mbụk Stephen owụt ntak emi anade ika iso idomo ndisio akani owo nduọk?

⁸ Ama esisọn̄ Brọda Stephen ndimụm esịt n̄kama. Enye ọdọhọ ete: “Idem ke mma n̄kana baptism, n̄kosụk n̄n̄wan̄wana ndisimụm idem n̄kama ke ini esịt ayatde mi. Ke uwụtn̄kpọ, isan̄ kiet ke ini n̄kosụk n̄kwọrọde ikọ ke ufọk ke ufọk, mma nda n̄kụt inọ osiode radio ke moto mi. Mma mbịne enye, ndien ke ini enye okụtde ke mmọn̄ mmụm imọ, enye ama ayak radio oro enịm efehe. Ke ini n̄ketịn̄de se iketịbede nnọ nditọete oro ikọkwọrọde ikọ ntre, ebiowo kiet ke otu oro ama obụp mi ete: ‘Stephen, ekpedi ama omụm inọ oro, nso ke akpakanam enye?’ Mbụme oro ama odụk mi ọkpọ onyụn̄ anam mbiere ndinam se n̄kekeme man ntie emem emem.” b

⁹ Mbụk Stephen owụt ke idiọk uwem emi ikenyenede ekeme ndisio iso nnyan ke ini owo mîdorike enyịn, idem ke ima ikekere ke ima iduọk utọ uwem oro. Utọ n̄kpọ oro ekpetịbe ọnọ fi, kûyak idem emem fi kûnyụn̄ ukere ke udịghe eti Christian. Apostle Paul ama akam ọdọhọ ete: “Ke ini nyomde ndinam se inende, se idiọkde odu ye ami.” (Rome 7:21-23) Idụhe Christian ndomokiet emi ọfọnde ama, kpukpru nnyịn imenyene ndiọi uwem emi ẹdide anam anam mmọ ẹsio iso ẹnyan, ukem nte ntọn̄ ye mbio emi ẹma ẹkekpọri ẹsio ẹsifiakde ẹdiyọhọ ufọk. Ntre, ana isịn idem inam n̄kpọ man ika iso isana ke enyịn Abasi. Idinam didie?

10. Nso ke ikpanam man idiyak idiọk uwem eberi nnyịn ọduọk? (1 John 5:14, 15)

¹⁰ Bọn̄ akam nọ Jehovah ban̄a idiọk uwem emi ọsọn̄de fi nditre do, nịm ke enye oyokop  akam oro oyonyụn̄ an̄wam fi. (Kot 1 John 5:14, 15.) Jehovah idinamke utịben̄kpọ yak idiọk uwem oro osop, edi enye ekeme ndisọn̄ọ fi idem man afo udûyak idiọk uwem oro eberi fi ọduọk. (1 Pet. 5:10) Nte Jehovah osụk an̄wamde fi, domo ndinam n̄kpọ mban̄a akam emi ọkọbọn̄de, oro edi, kûnam mme n̄kpọ emi ẹkemede ndinam idiọk uwem oro afiak osio iso anyan. Ke uwụtn̄kpọ, kpeme idem ye mme fim, mme edinam TV, m̀mê mme n̄wed emi ẹnamde idiọk uwem emi osụk oyomde nditre do etie nte edi eti n̄kpọ. Kûsunyụn̄ ukere mme n̄kpọ emi mîfọnke.​—Phil. 4:8; Col. 3:2.

11. Nso ye nso ke ikpanam man ika iso imen obufa owo isịne?

¹¹ Omosio akani owo ọduọk, edi ana emen obufa owo esịne. Edinam didie? Ama ekpep aban̄a nti edu Jehovah, biere ndikpebe enye. (Eph. 5:1, 2) Ke uwụtn̄kpọ, ama okot mbụk Bible emi aban̄ade nte Jehovah ekefende owo, bụp idemfo, ‘Ndi mmesifen mbon en̄wen?’ Ama okot aban̄a nte mbọm mme ubuene akanamde Jehovah, bụp idemfo, ‘Ndi mbọm nditọete emi mînyeneke n̄kpọ esinam mi, ndi mmanam n̄kpọ n̄wụt ke mbọm mmọ anam mi?’ Men obufa owo sịne man aka iso anam ekikere fo edi obufa. Ama anam ndudue kûwowot idem, nyene ime.

12. Didie ke Bible okokpụhọde Stephen?

¹² Stephen emi iketịn̄de iban̄a ama ekeme ndimen obufa owo nsịne sụn̄sụn̄ sụn̄sụn̄. Enye ọdọhọ ete: “Tọn̄ọ n̄kana baptism, mmosobo ediwak n̄kpọ emi akpanamde nduọ obom. Edi mmekpep ndisimụm idem n̄kama mîdịghe ndaha n̄kpọn̄ mbon oro ẹdomode ndiyat mi esịt. Ediwak owo, esịnede n̄wan mi, ẹtoro mi ke nte nsidomode ndimụm idem n̄kama ke mme ini ntem. Ami ke idemmi n̄kpekereke ke mmekeme ndikpụhọde ntem! Edi idịghe odudu idemmi ke nda nnam emi. Emi akam owụt ke Bible enyene odudu ndikpụhọde owo.”

13. Nso idinam nti n̄kpọ ẹsidọn̄ nnyịn? (Galatia 5:16)

¹³ Kot Galatia 5:16. Jehovah esinọ nnyịn edisana spirit esie man an̄wam nnyịn ikeme ndinam se inende. Ima ikpep Ikọ Abasi, imesiyak spirit oro ada nnyịn usụn̄. Usụn̄ en̄wen emi isinyenede spirit oro edi ndidụk mbono esop. Ke mme mboho Ikọ Abasi oro, isisop idem ye nditọete nnyịn emi ẹtienede nnyịn ẹtịme ndinam nnennen n̄kpọ, ndien oro esisọn̄ọ nnyịn idem. (Heb. 10:24, 25; 13:7) Ima ibọn̄ akam ikpe Jehovah ubọk ite an̄wam nnyịn itre idiọk uwem, enye ayanam edisana spirit esie ọsọn̄ọ nnyịn idem man idiọk uwem oro idiberi nnyịn iduọk. Imekeme ndisikpep Ikọ Abasi, isibọn̄ akam, isinyụn̄ idụk mbono esop, kpa ye oro, ndiọi n̄kpọ isụk itreke ndidọn̄ nnyịn. Edi mme n̄kpọ oro ẹyen̄wam nnyịn ikûnam ndiọi n̄kpọ emi ẹdọn̄de nnyịn. Galatia 5:16 ọdọhọ ke mbon emi ẹsan̄ade ke spirit “idinamke baba n̄kpọ kiet emi ọdọn̄de obụkidem.”

14. Ntak emi anade ika iso inam se idinamde nti n̄kpọ ẹdọn̄ nnyịn?

¹⁴ Ima itọn̄ọ ndinam mme n̄kpọ emi ẹn̄wamde nnyịn inen̄ede ikpere Jehovah, inaha itre. Ana inyụn̄ ika iso inam se idinamde nti n̄kpọ ẹdọn̄ nnyịn. Ntak-a? Enyene asua nnyịn kiet emi mîsiduọkke odudu. Idomo emi esidomode nnyịn yak inam se mîfọnke edi asua oro. Idem ke ima ikana baptism ima, mme n̄kpọ emi anade ikpeme idem utọ nte ndibre mbre mfọniso, ndin̄wọn̄ ọkpọsọn̄ mmịn mbe ubọk, m̀mê  ndise oburobụt ndise ẹkeme ndisụk ndọn̄ nnyịn. (Eph. 5:3, 4) Brọda nnyịn kiet emi edide akparawa ọdọhọ ete: “N̄kpọ kiet emi osụk enen̄erede edi n̄kpọ mfịna ọnọ mi edi nte nsimade erenowo nte erenowo akpamade n̄wan. N̄kekere ke ekpri ekpri ini ke utọ n̄kpọ oro eyetre ndidọn̄ mi, edi ke ọdọdọn̄ mi tutu emi.” Edieke idiọkn̄kpọ enen̄erede ọdọn̄ fi, nso ikeme ndin̄wam fi?

15. Didie ke ndidiọn̄ọ ke ndiọi n̄kpọ ndidọn̄ owo edi “se isiwakde nditịbe nnọ owo” ekeme ọdọn̄ nnyịn esịt? (Se ndise.)

¹⁵ Nte osụk odomode nditre ndinam idiọkn̄kpọ emi enen̄erede ọdọn̄ fi, diọn̄ọ ete ke idịghe afo ikpọn̄ enyene utọ mfịna oro. Bible ọdọhọ ete: “Idomo isịmke mbufo ibọhọke se isiwakde nditịbe nnọ owo.” (1 Cor. 10:13a) Ẹketịn̄ ikọ oro ye nditọete irenowo ye iban emi ẹkedụn̄de ke Corinth. Ndusụk mmọ ẹkesidi mme esịn efịbe, irenowo emi ẹdan̄de ye irenowo, iban emi ẹdan̄de ye iban, ye mme akpammịn. (1 Cor. 6:9-11) Ndi emekere ke ndiọi n̄kpọ ikesidọn̄ke mmọ aba ke mmọ ẹma ẹkena baptism? Nnyịn ikereke ntre. Kpa ye emi ẹkeyetde kpukpru mmọ aran, mmọ ikosụk ifọnke ima. Imenịm ke ini ke ini ke ndiọi n̄kpọ ẹma ẹsisụk ẹdọn̄ mmọ. Akpana oro ọdọn̄ nnyịn esịt. Ntak idọhọde ntre edi ke oro owụt ke se ededi emi ọdọn̄de fi emi osụk an̄wanade nditre, ama ọdọdọn̄ owo en̄wen enye onyụn̄ ekeme nditre. Afo emekeme ndika iso ‘nsọn̄ọ nda ke mbuọtidem sia ọfiọkde ete ke ofụri otu nditọete ke ererimbot ke ẹsobo ukem ndutụhọ oro.’​—1 Pet. 5:9.

16. Nso afia ke ikpekpeme idem? Ntak-a?

¹⁶ Kûkere ke idụhe owo ndomokiet emi se ifịnade fi edin̄wan̄ade enye, sia ata idiọk afia edi oro. Utọ ekikere oro ekeme ndinam fi ekere ke idotenyịn idụhe, ke udûkemeke nditre ndinam idiọkn̄kpọ emi ọdọn̄de fi. Bible itịn̄ke ntre, akam ọdọhọ: “Abasi  edi anam-akpanikọ, idinyụn̄ iyakke ẹdomo mbufo ẹbe se mbufo ẹkemede ndiyọ, edi enye oyosio usụn̄ ubọhọ ọnọ mbufo ke ini idomo man mbufo ẹkeme ndiyọ enye.” (1 Cor. 10:13b) Ntre, ọkpọkọm idiọkn̄kpọ emi ọdọn̄de nnyịn ọsọn̄ ubọk didie, imekeme nditre ndinam n̄kpọ oro. Edieke iyakde Jehovah an̄wam nnyịn, iyọsọn̄ọ ida ye enye, nnyịn idînyụn̄ inamke ndiọi n̄kpọ emi ẹdọn̄de nnyịn.

17. Okposụkedi emi nnyịn mîdikemeke nditre ndiọi n̄kpọ ndidọn̄ nnyịn, nso isịne nnyịn ke ubọk ndinam?

¹⁷ Se se mîkpanaha efre mi: Sia mûfọnke uma, udûkemeke nditre ndiọi n̄kpọ ndidọn̄ fi. Edi ama ọdọn̄ fi, emekeme ndisio enye mfep ke esịt fo usọp usọp, ukem nte Joseph ọkọsọpde-sọp efehe ọkpọn̄ n̄wan Potiphar. (Gen. 39:12) Kûyak ndiọi n̄kpọ emi ẹdọn̄de fi ẹda fi ẹbọp ekpan̄!

18-19. Nte isụk idomode ndinam ekikere nnyịn edi obufa, nso ye nso ke ikeme ndibụp idem nnyịn?

¹⁸ Nnyịn ndinam ekikere nnyịn edi obufa ọwọrọ nnyịn ndikaka iso n̄kụt ete ke se ikerede ye se inamde ẹnem Jehovah esịt. Ntre, sidụn̄ọde idemfo nyụn̄ bụp idemfo ete: ‘Ndi nte nnamde n̄kpọ owụt ke mmokụt ke utịt enen̄ede ekpere? Ndi ke mmen obufa owo nsịne? Ndi ke nyak spirit Jehovah ada mi usụn̄ man n̄keme nditre ndinam ndiọi n̄kpọ emi ẹdọn̄de mi?’

¹⁹ Nte osụk odụn̄ọrede idem fo ese, kûyom mfọnmma. Kam nem esịt ke se ekemede ndinam. Edieke okụtde se anade okpụhọde, kpụhọde, kûyak idem emem fi. Utu ke oro, nam item Philippi 3:16 emi ọdọhọde ete: “Ke udomo oro nnyịn ima ikanam n̄kọri, ẹyak nnyịn ika iso itịm isan̄a kpa ke ido emi.” Ama anam ntre, nịm ke Jehovah ọyọdiọn̄ fi nte osụk odomode ndinam ekikere fo edi obufa.