1-2. Ntak emi isidụkde Editi kpukpru isua?

 JESUS ama akpa ke ibuot nnyịn man ikeme ndinyene nsinsi uwem. Enye akakpa n̄kpọ nte isua 2,000 emi ekebede. Okoneyo oro mbemiso ẹkewotde enye, Jesus ama ọdọhọ mme mbet esie ẹsinam edinam ẹti se imọ iyomde ndinam nnọ mmọ. Akana uyo ye wine ẹdu ke edinam oro, edi edinam oro idiwakke n̄kukọhọ, editịm idinyụn̄ idụhe.​—1 Cor. 11:23-26.

² Isinam se Jesus ọkọdọhọde oro sia imama enye etieti. (John 14:15) Kpukpru isua ke ini Editi, imesida ini ibọn̄ akam itie ikere se n̄kpa esie anamde ọnọ nnyịn. Esinenem nnyịn ndisịn idem n̄kwọrọ ikọ nnyụn̄ n̄kot adan̄a ediwak owo nte ikekeme ẹditiene ẹdụk. N̄kpọ efen edi ke imesinen̄ede ibiere ke nnyịn idiyakke n̄kpọ ndomokiet akpan nnyịn ndidụk Editi.

3. Nso ke idineme ke ibuotikọ emi?

³ Ke ibuotikọ emi, imọn̄ ineme nte ikọt Jehovah ẹsidomode ofụri ukeme mmọ nditi n̄kpa Jesus. Iyeneme (1) nte mmọ ẹsinịmde Editi nte Jesus ọkọdọhọde ẹnịm, (2) nte mmọ ẹsikotde mbon en̄wen ẹditiene ẹdụk, ye (3) nte mmọ ẹsinịmde Editi ọkpọkọm ọsọn̄ didie.

4. Mme akpan n̄kpọ ewe ke ẹsitịn̄ ke Editi kpukpru isua? Ntak emi nnyịn mîkpadaha mme n̄kpọ oro ntre ntre? (Luke 22:19, 20)

⁴ Kpukpru isua ke Editi, imesikop ukwọrọikọ emi ẹdade Bible ẹkwọrọ ẹnyụn̄ ẹbọrọde ndusụk mbụme. Imesikop ntak emi akanade ẹfak owo ye nte n̄kpa owo kiet ekemede ndinam ẹfen idiọkn̄kpọ ediwak owo. Ẹsiti nnyịn se uyo ye wine ẹdade ẹban̄a, ye mbon emi ẹkpetade uyo ẹnyụn̄ ẹn̄wọn̄de wine. (Kot Luke 22:19, 20.) Imesikere n̄ko utọ inem uwem emi anade ebet mbon emi ẹdoride enyịn ndidu uwem ke isọn̄. (Isa. 35:5, 6; 65:17, 21-23) Ikpanaha ida mme n̄kpọ oro ntre ntre-o. Ediwak biliọn owo idiọn̄ọke kpukpru oro, mmọ idiọn̄ọke se n̄kpa Jesus ekemede ndinam nnọ mmọ, isinyụn̄ inịmke Editi nte Jesus ọkọdọhọde ẹnịm. Ntak edide ntre?

5. Ẹketọn̄ọ ndinịm Editi didie ke ata ediwak mme apostle ẹma ẹkekpan̄a?

⁵ Ke ata ediwak mme apostle Jesus ẹma ẹkekpan̄a, ikebịghike mbon emi ẹkebian̄ade idem ẹte ke idi mme Christian ẹma ẹn̄wọn ẹdụk esop Abasi. (Matt. 13:24-27, 37-39) Mmọ ẹma ẹsitịn̄ “ukwan̄ ikọ man ẹdụri mme mbet ẹnọ idemmọ.” (Utom 20:29, 30) Ukwan̄ n̄kpọ kiet emi mmọ ẹketọn̄ọde ndikpep ekedi ke Jesus ikawaha idemesie “ini kiet kpọt ndibiom mme idiọkn̄kpọ ediwak owo” nte Bible ọdọhọde, edi ke ana ẹnam uwa Jesus oro ediwak ini. (Heb. 9:27, 28) Ata ediwak owo ẹnịm ukpepn̄kpọ oro idiọn̄ọke ke edi nsu. Mmọ ẹsisop idem ke ufọkabasi mmọ ke ubọk ke ubọk, ndusụk ini kpukpru usen, man ẹnam edinam emi ẹkotde “Holy Communion” m̀mê “Mass.” b Ndusụk ufọkabasi isinịmke eke mmọ ke ubọk ke ubọk ntre, edi okpobụp ata ediwak mbon mmọ m̀mê nso ke n̄kpa Jesus anam ọnọ mmọ, oyokụt ke inen̄ekede in̄wan̄a mmọ. Ndusụk ẹkeme ndikere, ‘Ndi n̄kpa emi Jesus akakpade ekeme ndinam efen mme idiọkn̄kpọ mi?’ Nso isinam mmọ ẹsibụp mbụme emi? Ndusụk ini edi ke ntak emi mmọ ẹnịmde se mme owo ẹsidọhọde ẹte ke n̄kpa Jesus ikemeke-keme ndinam ẹfen idiọkn̄kpọ mme owo. Didie ke mme mbet Jesus ẹsin̄wam utọ mme owo emi?

6. Nso ke owo ifan̄ emi ẹketịn̄de enyịn ẹdụn̄ọde Ikọ Abasi ẹkedibiere etisịm 1872?

⁶ Ke 1870, owo ifan̄ ẹma ẹtịn̄ enyịn ẹdụn̄ọde Ikọ Abasi. Charles Taze Russell akada mmọ usụn̄. Mmọ ẹkeyom ndidiọn̄ọ se n̄kpa Jesus ọkọwọrọde ye nte akpanade ẹti n̄kpa esie oro. Etisịm 1872, mmọ ẹma ẹbiere ke Jesus akakpa afak ofụri ubonowo. Se mmọ ẹkekụtde ke Bible ke mmọ ẹkeda ẹbiere. Edi ikedịghe mmọ ẹdiọn̄ọ oro, mmọ ẹdop uyo ẹtie. Utu ke oro, mmọ ẹma ẹwet se mmọ ẹkediọn̄ọde oro ke mme n̄wed, mme n̄wedmbụk n̄kpọntịbe, ye mme magazine man mbon en̄wen ẹtiene ẹdiọn̄ọ. Ndien ikebịghike, mmọ ẹma ẹtọn̄ọ ndisinịm Editi ini kiet ke isua ukem nte mme Christian eyo mme apostle ẹkesinịmde.

7. Nso ufọn ke idia ito se mbon emi ẹketịn̄de enyịn ẹdụn̄ọde Bible ẹkekụtde?

⁷ Se irenowo ifan̄ oro ẹkedụn̄ọrede ẹkụt ke ata eset oro enyene ufọn ọnọ nnyịn mfịn. Didie? Jehovah atat nnyịn enyịn yak idiọn̄ọ se n̄kpa Jesus ọwọrọde ye se n̄kpa  oro edinamde inọ nnyịn ye ofụri ubonowo. (1 John 2:1, 2) Imekpep n̄ko ke ndusụk mbon emi ẹnamde se inemde Abasi esịt ẹyeka ẹkedu ke heaven, ikpaha tutu amama, ke ediwak miliọn eken ẹyedu uwem ke isọn̄ ke nsinsi. Nnyịn ndidiọn̄ọ adan̄a nte Jehovah amade nnyịn, ye ufọn emi nnyịn owo kiet kiet idiade ito n̄kpa Jesus anam inen̄ede ikpere enye. (1 Pet. 3:18; 1 John 4:9) Imesikot mbon en̄wen ẹditiene nnyịn ẹdụk Editi emi isinịmde nte Jesus ọkọdọhọde ẹnịm, ukem nte nditọete nnyịn ke eset ẹkesinamde.

8. Nso ke ikọt Jehovah ẹnam man ẹkeme ndikot mbon en̄wen Editi? (Se ndise.)

⁸ Idịghe mfịn ke ikọt Jehovah ẹketọn̄ọ ndikot mme owo Editi. Ke 1881, ẹma ẹkot nditọete ke United States ẹdisop idem ke ufọk brọda kiet ke Allegheny ke Pennsylvania ẹdụk akpan edinam oro. Aka ko, esop kiet kiet ẹkesidinịm Editi mmọ. Ke March 1940, ẹma ẹdọhọ mme asuanetop ke edieke owo ekededi ke ebiet emi mmọ ẹsikwọrọde ikọ ẹdimade ndidụk Editi, ke mmọ ẹkeme ndikot enye. Ke 1960, Bethel ẹma ẹmịn̄ mme n̄wedikot ẹnọ mme esop. Akpa ini emi ẹkemịn̄de n̄wedikot Editi ẹnọ mme owo ekedi oro. Tọn̄ọ oro ẹmịn̄ ediwak, idịghe n̄kpọ miliọn ifan̄, ẹdi ke biliọn ke biliọn. Nso isinam itịme ntre ndikot mme owo Editi?

9-10. Mmanie ẹsidia ufọn ikot emi isikotde mme owo ẹdidụk Editi? (John 3:16)

⁹ Ntak kiet emi isikotde mbon en̄wen ẹditiene ẹdụk Editi edi ke iyom mbon emi ẹdidide ke akpa ini ẹdiọn̄ọ se Jehovah ye Jesus ẹnamde ẹnọ kpukpru nnyịn. (Kot  John 3:16.) Akam nnyịn edi yak se mmọ ẹkụtde ẹnyụn̄ ẹkopde ke Editi anam ọdọn̄ mmọ ndidiọn̄ọ n̄kpọ efen efen onyụn̄ ọdọn̄ mmọ ndidi mme asan̄autom Jehovah. Edi enyene mbon en̄wen emi ẹsidiade ufọn n̄ko.

¹⁰ Imesitiene ikot mbon emi mîsidụkke mbono esop aba. Isikot mmọ man iti mmọ ke Abasi osụk amama mmọ. Ediwak mmọ ẹsinyịme ndidi, esinyụn̄ enem nnyịn tutu ndikụt mmọ. Mmọ ndidụk Editi esiti mmọ nte ekesinemde mmọ ndinam n̄kpọ Jehovah. Kop uwụtn̄kpọ Sista Monica. c Enye akafiak ọtọn̄ọ ndikwọrọ ikọ ini udọn̄ọ COVID-19 enyen̄ede ererimbot. Ke enye ama okodụk Editi eke isua 2021, enye ama ọdọhọ ete: “Editi isua emi ekedi ata akpan Editi ọnọ mi. Akpa ini mfiakde ntọn̄ọ ukwọrọikọ edi emi ke isua 20 ama ekebe, mmonyụn̄ n̄kot mme owo Editi. N̄kadaha edem ke utom emi sia mmenen̄ede mma se Jehovah ye Jesus ẹnamde ẹnọ mi.” (Ps. 103:1-4) Edide mme owo ẹyenyịme ndidi Editi m̀mê idinyịmeke, iyesịn idem ikot mbon en̄wen sia imọdiọn̄ọ ke oro enem Jehovah esịt.

11. Didie ke Jehovah ọdiọn̄ kpukpru se inamde man ikot mme owo Editi? (Haggai 2:7)

¹¹ Jehovah enen̄ede ọdiọn̄ ofụri se inamde man ikot mme owo Editi. Ke 2021, kpa ye emi udọn̄ọ COVID-19 ekenyen̄ede ofụri ererimbot inyụn̄ iyakke idụk Editi nte isidụkde, owo 21,367,603 ẹma ẹdụk. Idịghe ekpri ibat ekedi oro, ekpere ndisịm ibat Mme Ntiense Jehovah ke ofụri ererimbot utịm ikaba ye ubak! Edi imọdiọn̄ọ ke idịghe ibat oro kpọt enen̄ede ebehe Jehovah, mme owo emi ẹkedụkde ebehe enye n̄ko. (Luke 15:7; 1 Tim. 2:3, 4) Imenịm ke Jehovah esin̄wam nnyịn ikụt mbon emi ẹnyenede eti esịt ima ikot mme owo Editi.​—Kot Haggai 2:7.

12. Nso ikeme ndinam ọsọn̄ nnyịn ndidụk Editi? (Se ndise.)

¹² Jesus ama ọdọdọhọ ete, ke mme akpatre usen ke iyosobo kpukpru orụk mfịna utọ nte, ukọbọ emi mbonubon nnyịn ẹkọbọde nnyịn, ekọn̄, udọn̄ọ, ye ediwak n̄kpọ eken. (Matt. 10:36; Mark 13:9; Luke 21:10, 11) Ndusụk ini, mme n̄kpọ emi ẹsinam ọsọn̄ nnyịn nditi n̄kpa Christ. Nso ke nditọete nnyịn ẹnam man mme n̄kpọ ntre idikpan mmọ ndidụk Editi? Didie ke Jehovah an̄wam mmọ?

13. Didie ke Jehovah ọkọdiọn̄ Artem nte enye ekenyenede uko onyụn̄ ebierede ndinịm Editi ini enye odude ke ufọk-n̄kpọkọbi?

¹³ N̄kpọkọbi. Nditọete nnyịn emi ẹdọn̄de ke ufọk-n̄kpọkọbi ke ntak emi mmọ ẹnamde n̄kpọ Abasi ẹsinam se mmọ ẹkekeme man ẹti n̄kpa Christ. Kop uwụtn̄kpọ Brọda Artem mi. Ke ini Editi isua 2020, enye ye owo inan̄ efen ẹkefaha ke ubet ufọk-n̄kpọkọbi emi mîkponke ikan itie uken̄idem. Kpa ye emi enye okodude ke ufọk-n̄kpọkọbi, enye ama ekeme ndinyene mme n̄kpọ emi enye edidade nte n̄kpọ idiọn̄ọ Editi, okonyụn̄ aduak ndinọ utịn̄ikọ Editi oro sụk enye, sụk idem. Edi mbon n̄kpọkọbi eken emi ẹkedọn̄ọde ye enye ẹma ẹsin̄wọn̄ sika etieti ẹnyụn̄ ẹkpe ntịme tutu. Nso ke Brọda Artem akanam? Enye ama ọdọhọ mmọ m̀mê mmọ ẹkeme nditre ndin̄wọn̄ sika nnyụn̄ n̄kpe ntịme ke hour kiet kpọt. Ama akpa brọda oro idem nte mmọ ẹkenyịmede ke mmimọ idinamke mme  n̄kpọ oro ke ini Editi oro. Artem ọdọhọ ete, “Mma ndọhọ mmọ ke nyetịn̄ se Editi edide nnọ mmọ.” Kpa ye emi mmọ ẹkedọhọde ke mmimọ iyomke ndikop n̄kpọ ndomokiet mban̄a Editi, ke mmọ ẹma ẹkekụt se Artem akanamde ke ini Editi oro ẹnyụn̄ ẹkopde se enye eketịn̄de, mmọ ẹma ẹbụp enye nsio nsio n̄kpọ ẹban̄a Editi.

14. Nso ke ẹkenam man ẹkeme ndinịm Editi kpa ye emi udọn̄ọ COVID-19 ekenyen̄ede ererimbot?

¹⁴ Udọn̄ọ COVID-19. Ini udọn̄ọ oro ekenyen̄ede ofụri ererimbot, ikọt Jehovah ikekemeke ndisop idem ọtọkiet ndụk Editi. Edi oro ikakpanke mmọ ndidụk. d Mme esop emi ẹkenyenede Intanet ẹma ẹda Intanet ẹdụk. Edi ediwak miliọn mme owo emi mîkenyeneke Intanet ẹkenam didie? Ke ndusụk idụt, ẹma ẹdiomi yak ẹbre utịn̄ikọ Editi ke TV m̀mê ke radio. N̄kpọ efen edi ke mme n̄kọk itieutom ẹma ẹrekọd utịn̄ikọ oro ke se ibede usem 500 man mbon emi ẹdude ke ata nsannsan ebiet ẹkeme ndinịm Editi. Nti ikọt Abasi ẹma ẹkụt ẹte ke utịn̄ikọ oro ẹsịm nditọete oro ubọk.

15. Nso ke ekpep oto Sue emi esikpepde Bible ye Mme Ntiense Jehovah?

 ¹⁵ Ukọbọ ke ubon. N̄kpọ kiet emi anamde enen̄ede ọsọn̄ ndusụk owo ndidụk Editi edi nte mbonubon mmọ ẹkọbọde mmọ. Kop se iketịbede inọ Sue emi esikpepde Bible ye Mme Ntiense Jehovah. Usen kiet mbemiso Editi eke isua 2021, Sue ama ọdọhọ sista emi esikpepde enye Bible ke imọ idikemeke ndidụk Editi, ke ndusụk mbonubon mmimọ ẹsịn imọ mmọn̄ ke idịbi ẹnyen̄e etieti. Sista oro ama okot Luke 22:44, ekem ọdọhọ enye ke ima inyene mfịna, ke ọkpọfọn ikpebe Jesus ke ndibọn̄ akam nnọ Jehovah nnyụn̄ mbuọt idem ye Jehovah ke ofụri esịt. Edem usen oro, Sue ama etịm uyo ye wine Editi enịm, ekem ekese Akam Usenubọk usen Editi ke jw.org. Mbubreyo usen oro, enye ama esịne ikpọn̄ ke ubet esie akama fon okop utịn̄ikọ Editi. Ke Editi ama okokụre, enye ama ọnọ sista emi esikpepde enye Bible etop ete: “Afo ama ọsọn̄ọ mi idem tutu mkpọn̄ emi ekebede. Mma nnam kpukpru se n̄kekemede man ndụk Editi, Jehovah ama onyụn̄ an̄wam mi. N̄kemeke nditịn̄ nte esịt enemde mi, nnyụn̄ ndiọn̄ọke nte n̄kpọkọmde Jehovah!” Edieke utọ n̄kpọ oro etịbede ọnọ fi, ndi emekere ke Jehovah ekeme ndin̄wam fi?

16. Nso inam inịm ke Jehovah ọyọdiọn̄ ofụri se inamde man ikeme ndidụk Editi? (Rome 8:31, 32)

¹⁶ Esinem Jehovah etieti ndikụt ofụri se inamde man iti n̄kpa Jesus. Imenịm ke enye ọyọdiọn̄ nnyịn enye ama okụt nte iwụtde ke imama se enye akanamde ọnọ nnyịn. (Kot Rome 8:31, 32.) Ntre, ẹyak ibiere ndidụk Editi isua emi, inyụn̄ ibiere ke ini Editi emi iyesịn idem ke n̄kpọ Abasi ikan nte isisịnde.