1. Nso ke ikeme ndinam man esịt enem Jehovah?

 KERE nte ọnọde owo emi afo amade san̄asan̄a enọ emi eyede onyụn̄ enyenede ufọn ọnọ enye. Oyofụhọ edieke owo oro emende enọ fo oro ekesịn ke ekebe okịbi inyụn̄ ikereke-kere n̄kpọ ika n̄kan̄ oro aba! Edi edieke owo oro adade enọ fo oro anam n̄kpọ onyụn̄ ọkọmde fi ke ntak emi ọkọnọde enye enọ oro, esịt eyenem fi. Nso ke in̄wan̄wana nditịn̄? Jehovah ama ọnọ Eyen esie edikpa ọnọ nnyịn. Ana-edi esịt eyenen̄ede enem Enye ima iwụt ke imama ọsọn̄urua enọ oro ye nte Enye amade nnyịn. Ima esie oro akanam enye ọnọ nnyịn ufak!​—John 3:16; Rome 5:7, 8.

2. Nso ke idineme ke ibuotikọ emi?

² Edi nte ini akade, imekeme nditọn̄ọ ndida ufak emi edide enọ emi Jehovah ọnọde nnyịn nte n̄kpọ mbubru. Enye oro editie nte nnyịn ndimen enọ Abasi nsịn ke ekebe n̄kịbi. Kpa ye emi enemde nnyịn ndinyene enọ oro, ebiet emi inịmde enye iyakke nnyịn ikeme ndikụt enye m̀mê ndikere mban̄a enye. Man oro iditịbe, kpukpru ini ana isinam n̄kpọ emi edinamde ika iso iwụt ke imama se Abasi ye Christ ẹnamde ẹnọ nnyịn. Ibuotikọ emi ekeme ndin̄wam nnyịn inam oro. Ke ibuotikọ emi, imọn̄ ineme ufọn emi idiade idaha-emi ke ntak ufak ye ufọn emi ikemede ndidia ke ini iso. Imọn̄ ineme n̄ko se ikemede ndinam n̄wụt ke imama nte Jehovah amade nnyịn akpan akpan ke ini Editi emi.

UFỌN EMI IDIADE IDAHA-EMI

3. Tịn̄ ufọn kiet emi idiade ke ntak ufak idaha-emi.

³ Emi itetie mi, ke idia ufọn ito ufak emi Christ ekekpede. Ke  uwụtn̄kpọ, ke ntak ufak, Jehovah esifen mme idiọkn̄kpọ nnyịn. Ibiomoke enye ndifen nnyịn-o, edi enye efen sia se enye oyomde ndinam edi oro. Andiwet Psalm kiet ama etịn̄ nte enye amade nte Jehovah esifende idiọkn̄kpọ nnyịn. Enye ọkọdọhọ ete: “Koro afo ọfọnde, O Jehovah, onyụn̄ enyịmede ndifen nnọ.”​—Ps. 86:5; 103:3, 10-13.

4. Jehovah ọkọnọ ufak ke ntak mmanie? (Luke 5:32; 1 Timothy 1:15)

⁴ Ndusụk owo ẹkeme ndikere ke mmimọ idotke se Jehovah efende. Akpanikọ edi oro-o, sia nnyịn ndomokiet idotke se Jehovah efende. Apostle Paul ama ọdiọn̄ọ ke imọ “[idotke] se ẹkotde apostle.” Kpa ye oro, enye ọkọdọhọ ete: “Oto ke mfọnido Abasi oro owo mîdotke ke ami ndi se ndide emi.” (1 Cor. 15:9, 10) Ima ikabade esịt ikpọn̄ mme idiọkn̄kpọ nnyịn Jehovah esifen nnyịn. Ntak-a? Enye ifenke nnyịn ke ntak emi idotde se enye efende, edi efen ke ntak emi enye amade nnyịn. Ekpedi esifịna fi ke afo udotke se Jehovah efende, ti ke Jehovah ikọnọhọ ufak ke ntak mbon emi ẹfọnde ẹma, edi ọkọnọ ke ntak mme anamidiọk emi ẹkabarede esịt.​—Kot Luke 5:32; 1 Timothy 1:15.

5. Ndi owo nnyịn ndomokiet ekeme ndikọn̄ ubọk ke esịt ndọhọ ke imọ imodot se Jehovah efende? Ntak ọbọrọde ntre?

⁵ Owo nnyịn ndomokiet inaha ekere ke ana Jehovah efen nnyịn sia inamde n̄kpọ esie ke ediwak isua. Edi imọdiọn̄ọ ke Jehovah ama kpukpru se inamde inọ enye tutu esịm mfịn emi. (Heb. 6:10) Enye ọkọnọ Eyen esie edikpa ọnọ nnyịn ke ata mfọn idịghe man ọnọ nnyịn utịp ke se inamde inọ enye. Ntre, ikpọfọnke ikere ke sia ima ikanam ediwak n̄kpọ inọ Jehovah ke imodot se enye efende. Ikpenịm utọ n̄kpọ oro, ọwọrọ ikere ke ufọn ikodụhe Jesus ndikedikpa nnọ nnyịn.​—Men Galatia 2:21 domo.

6. Nso ikanam Paul esịn idem anam n̄kpọ Abasi?

⁶ Paul ama ọdiọn̄ọ ke idịghe se imọ inamde anam imọ idot se Abasi efende. Edieke edide ntre, ntak emi enye ekesịnde idem anam n̄kpọ Abasi? Enye ikanamke mme n̄kpọ oro man owụt ke imọ imodot se Jehovah efende, edi man enye owụt ke imọ imama utọ mfọn emi Jehovah ọfọnde imọ emi imọ mîdotke. (Eph. 3:7) Ukem nte Paul, imesika iso isịn idem inam n̄kpọ Jehovah, idịghe man enye atua nnyịn mbọm, edi man iwụt ke imama nte enye esikam atuade nnyịn mbọm.

7. Tịn̄ usụn̄ en̄wen emi idiade ufọn ito ufak idaha-emi. (Rome 5:1; James 2:23)

⁷ Usụn̄ en̄wen emi idiade ufọn ito ufak idaha-emi edi ke imekeme nditetịm n̄kpere Jehovah. a Ima ineneme ke ibuotikọ emi ekebede ke ini ikamanade nnyịn ikekpereke Abasi. Edi ke ntak ufak, imekeme ndidu ke “emem ye Abasi” ndien ke ntak emi idude ke emem ye enye do, imekeme ndikpere enye.​—Kot Rome 5:1; James 2:23.

8. Ntak emi ikpọkọmde Jehovah ke nte ikemede ndibọn̄ akam nnọ enye?

⁸ Kere ufọn kiet emi idiade ke ntak idide ufan ye Jehovah. Imekeme ndibọn̄ akam nnọ enye. Idịghe akam emi isibọn̄de ke mbono esop kpọt ke Jehovah esikop-o. Enye esikop akam nnyịn owo kiet kiet. Akam ekeme ndinam esịt ana nnyịn sụn̄ onyụn̄ anam inyene emem. Edi ikụreke ke oro. Enye ekeme ndinam itetịm idi ufan Abasi. (Ps. 65:2; Jas. 4:8; 1 John 5:14) Ini Jesus okodude ke isọn̄, enye ama esibọn̄ akam ke ubọk ke ubọk sia enye ama ọdiọn̄ọ ke Jehovah ke okokop akam imọ, ndien ke akam oyonyụn̄ anam imọ ye Ete imọ itetịm ikpere. (Luke 5:16) Esịt enen̄ede enem nnyịn sia ke  ntak emi Jesus akakpade ọnọ nnyịn, imekeme ndidi ufan Jehovah, imakam ikeme ndibọn̄ akam nnọ enye!

UFỌN EMI IKEMEDE NDIDIA KE INI ISO

9. Didie ke mbon emi ẹsọn̄ọde ẹda ẹtuak ibuot ẹnọ Jehovah ẹdidia ufọn ufak ke ini iso?

⁹ Didie ke ikọt Jehovah emi ẹsọn̄ọde ẹda ẹtuak ibuot ẹnọ enye ẹdidia ufọn ufak ke ini iso? Jehovah ayanam mmọ ẹdu nsinsi uwem. Ediwak owo ẹkere ke owo ikemeke ndidu nsinsi uwem sia ke ediwak tọsịn isua emi ẹbede mme owo ke ẹkpan̄a. Edi se Jehovah akaduakde ke ntọn̄ọ ntọn̄ọ ekedi mme owo ndidu uwem ke nsinsi. Ekpedi Adam ikanamke idiọkn̄kpọ, idụhe eke ekpekerede ke owo ikemeke ndidu nsinsi uwem. Ndien kpa ye emi edide ke ekeme ndisọn̄ idaha-emi ndikere nte owo edikemede ndidu uwem ke nsinsi, imekeme ndinịm ke iyodu sia Jehovah ama anam akakan n̄kpọ emi ekemede ndinam idu nsinsi uwem; enye ama ọnọ edima Eyen esie edikpa ọnọ nnyịn.​—Rome 8:32.

10. Mbon emi ẹyetde aran ye mme erọn̄ en̄wen ẹdori enyịn ke nso?

¹⁰ Kpa ye emi nsinsi uwem edide edidiọn̄ emi idinyenede ke ini iso, Jehovah oyom nnyịn ikere iban̄a enye idaha-emi. Mbon oro ẹyetde aran ẹdori enyịn ndikodu uwem ke heaven ntiene Christ n̄kara isọn̄ emi. Utọ uwem oro eyenem mmọ tutu. (Edi. 20:6) Mme erọn̄ en̄wen ẹdori enyịn ndidu uwem ke Paradise ke isọn̄ emi. Ini oro, ubiak ididụhe aba, ufen idụhe aba, owo inyụn̄ ifụhọke aba. (Edi. 21:3, 4) Ndi afo esịne ke otu mme erọn̄ en̄wen emi ẹdoride enyịn ndidu nsinsi uwem ke isọn̄ emi? Ndika heaven itiehe nte owo ndimen akpa, ndien ndidu uwem ke isọn̄ etie nte n̄kpọ emi ẹdọhọde owo, ‘Nyụn̄ bọ mi-e ke omonyụn̄ etịme!’ Nte Jehovah okobotde nnyịn owụt ke enye okoyom nnyịn idu uwem ke isọn̄ emi. Inua ikemeke ndibụk utọ inemesịt emi idikopde ke isọn̄ emi.

11-12. Tịn̄ ndusụk edidiọn̄ emi idoride enyịn ndinyene ke Paradise. (Se mme ndise n̄ko.)

¹¹ Kere nte uwem fo editiede ke Paradise ke  isọn̄. Udûfịnake idem aba m̀mê ọyọdọn̄ọ m̀mê ayakpa. (Isa. 25:8; 33:24) Jehovah ọyọnọ fi kpukpru nti n̄kpọ emi oyomde. Nso ye nso ke edima ndikpep? Ndi ayama ndikpep ediwak n̄kpọ mban̄a mme unam? Ndi ayama ndikpep ndida n̄kpọ ubre ikwọ mbre ikwọ? Nso kaban̄a ndidrọ n̄kpọ? Imenịm ke ẹyeyom mme owo emi ẹsidrọde mbuwed ufọk, mme ọbọpufọk ye mme ọtọ-in̄wan̄. Imenịm n̄ko ke ẹyeyom mbon emi ẹdisede n̄kpọ iban̄a udia, mbon emi ẹdibotde mme n̄kpọ-utom, ye mbon emi ẹditọde mme ikọn̄, mme eto, ye mme flawa ẹnyụn̄ ẹnam mmọ ẹye. (Isa. 35:1; 65:21) Ama odu nsinsi uwem, eyenyene ini ekpep se ededi utom emi akpamade ndikpep.

¹² Eyenem nnyịn tutu ndidara mbon emi ẹdisetde ẹdi. (Utom 24:15) Kere n̄ko nte edinemde fi ndikpep ediwak n̄kpọ efen mban̄a Jehovah nte osụk ekpepde aban̄a ediwak n̄kpọ emi enye okobotde! (Ps. 104:24; Isa. 11:9) Enye emi edinemde fi ikan edidi nte atuakde ibuot ọnọ Jehovah ndomo mben̄e n̄kpọ ndomokiet inamke esịt afịna fi! Ndi eyemen utọ mme edidiọn̄ emi edinyenede ke ini iso okpụhọ ye “inemesịt idiọkn̄kpọ . . . ibio ini”? (Heb. 11:25) Udûnamke utọ n̄kpọ oro! Nnyịn idituaha n̄kpọfiọk ke se ededi emi iyakde atak man inyene mme edidiọn̄ oro. Ti ke Paradise emi edidude ke isọn̄ ididịghe n̄kpọ emi idoride enyịn ke nsinsi nsinsi ite ke eyedi. Usen kiet usen kiet, ididodụn̄ ke Paradise oro. Nnyịn ikpenyeneke ndomo edidiọn̄ kiet ke otu se ibatde oro ekpedi Jehovah ikamaha nnyịn tutu enye ọnọ Eyen esie edikpa ọnọ nnyịn!

WỤT KE AMAMA NTE JEHOVAH AMADE FI

13. Didie ke ikeme ndiwụt ke imama nte Jehovah amade nnyịn? (2 Corinth 6:1)

¹³ Didie ke ikeme ndiwụt Jehovah ke imama nte enye ọkọnọde nnyịn ufak? Edi nnyịn ndida utom esie nte se idide akpan n̄kpọ ikan ke uwem nnyịn. (Matt. 6:33) Idem n̄kpọ, n̄kọ Jesus akakpa “man mbon oro ẹdude uwem ẹkûdu aba ẹnọ idemmọ, edi ẹdu ẹnọ enye emi akakpade ọnọ mmọ onyụn̄ esetde.” (2 Cor. 5:15) Nnyịn iyomke ndifre ntak emi Jehovah ọfọnde nnyịn mfọn emi nnyịn mîdotke.​—Kot 2 Corinth 6:1.

14. Didie ke ikeme ndibuọt idem ye Jehovah inyụn̄ inam se enye ọdọhọde inam?

¹⁴ Imekeme n̄ko ndiwụt ke imama se Jehovah anamde ọnọ nnyịn ke nnyịn ndibuọt idem ye enye nnyụn̄ nnam se enye ọdọhọde inam. Didie ke idinam oro? Ima inyene mme n̄kpọ ndibiere, utọ nte ebiet emi ikpakade ufọkn̄wed iketre mîdịghe utọ utom emi ikpanamde, ana ikere se Jehovah okpoyomde nnyịn inam iban̄a n̄kpọ oro. (1 Cor. 10:31; 2 Cor. 5:7) Enyene utịben̄kpọ emi esitịbede ima inam se iwụtde ke imọbuọt idem ye Jehovah. Iyetetịm ibuọt idem ye enye inyụn̄ inen̄ede ikpere enye. Imesinen̄ede idori enyịn ke iyodu uwem ke nsinsi.​—Rome 5:3-5; Jas. 2:21, 22.

15. Didie ke ikeme ndiwụt ke imama se Abasi anamde ọnọ nnyịn ke ini Editi?

¹⁵ Usụn̄ en̄wen odu emi ikemede ndiwụt ke  imama nte Jehovah amade nnyịn. Edi nnyịn ndida ini Editi emi n̄wụt Jehovah adan̄a nte imade nte enye ọkọnọde nnyịn ufak. Ke ẹsiode ẹfep nnyịn ndidụk Editi oro, imekeme ndikot mbon en̄wen ẹtiene ẹdụk. (1 Tim. 2:4) Nam yak an̄wan̄a mbon emi afo okotde Editi se ẹsinamde ke Editi. Se idin̄wamde fi edi afo ndiwụt mmọ vidio Ntak Emi Jesus Akakpade? ye Ti N̄kpa Jesus ke jw.org. Mbiowo ẹkpenyene ndikụt ẹte ke mmọ ẹkot mbon emi mîdụkke mbono esop aba. Kere nte idatesịt edikponde ke heaven ye ke isọn̄ edieke ndusụk erọn̄ Jehovah emi ẹma ẹkesop ẹfiakde ẹnyọn̄ ẹtiene enye! (Luke 15:4-7) Ke Editi, ẹyak ikụt ite ke nnyịn ikọmke idem nnyịn ikpọn̄, edi ke akpan mme owo emi ikọmde ẹdi mbufa owo m̀mê mbon emi edide ebịghi mmọ idụkke Editi. Iyom yak mmọ ẹkụt ke ẹdara mmimọ!​—Rome 15:7.

16. Ntak emi ikpesịnde idem ikwọrọ ikọ ke ini Editi ikan nte isikwọrọde?

¹⁶ Ndi emekeme ndisịn idem nnam n̄kpọ Abasi ke ini Editi emi n̄kan nte esinamde? Eti usụn̄ ndiwụt ke amama kpukpru se Abasi ye Christ ẹnamde ẹnọ nnyịn edi oro. Nte isịnde idem ika ukwọrọ-ikọ ntre ke idinen̄ede ikụt ke Jehovah ke an̄wam nnyịn, ndien enye oro ayanam itetịm ibuọt idem ye enye. (1 Cor. 3:9) N̄kpọ en̄wen emi edinamde edi afo ndikụt ete ke omokot mme itie Bible emi ẹsikotde ke ini Editi emi odude ke Ẹdụn̄ọde N̄wed Abasi ke Usen ke Usen m̀mê ke chart emi odude ke n̄wed mbono esop ufọturua. Amakam ekeme ndida mme itie Bible oro nnam ukpepn̄kpọ idemfo.

17. Nso isinem Jehovah? (Se n̄ko ekebe emi, “ Mme Usụn̄ Emi Ikemede Ndiwụt ke Imama Nte Jehovah Amade Nnyịn.”)

¹⁷ Imọdiọn̄ọ ke nte n̄kpọ etiede ye afo ekeme ndinam iyakke anam kpukpru se itịn̄de ke ibuotikọ emi. Edi ti ke Jehovah isimenke se afo anamde ikodomo ye se mbon en̄wen ẹnamde. Enye okụt se idude fi ke esịt. Esịt esinem enye enye ama okụt se afo anamde ke ofụri esịt man owụt ke amama ọsọn̄urua enọ emi enye ọkọnọde nnyịn, oro edi, enye ndikọnọ Eyen esie akpa afak nnyịn.​—1 Sam. 16:7; Mark 12:41-44.

18. Ntak emi imade se Jehovah Abasi ye Jesus Christ ẹnamde ẹnọ nnyịn-e?

¹⁸ N̄kukụre n̄kpọ emi anamde Jehovah esifen mme idiọkn̄kpọ nnyịn, idi ufan esie, inyụn̄ idori enyịn ndinyene nsinsi uwem edi ke ntak emi enye ọkọnọde Eyen esie edikpa afak nnyịn. Ẹyak ika iso iwụt ke imama nte Jehovah amade nnyịn sia ima oro anam enye oyom ndinọ nnyịn mme edidiọn̄ emi. (1 John 4:19) Ẹyak iwụt n̄ko ke imama Jesus emi ekenen̄erede ama nnyịn tutu enye enyịme ndikpa nnọ nnyịn ini enye odude ke isọn̄!​—John 15:13.