Kpa ye oro ikọt Abasi ẹsinamde se mmọ ẹkekeme man ẹkpeme idemmọ, mmọ isibiatke ibet Abasi. Bible owụt ke ifọnke asan̄autom Abasi enyene ikan̄ ada ekpeme idem mbak mme owo idinam enye n̄kpọ. Kop ntak idọhọde ntre mi:

Jehovah idaha uwem ibre mbre, akpan akpan uwem owo. David emi eketienede ewet psalm ama ọdiọn̄ọ ke Jehovah ‘ọkọtọn̄ọ uwem.’ (Ps. 36:9) Ntre, asan̄autom Abasi idinamke n̄kpọ ndomokiet emi edinamde enye owot owo onyụn̄ akama iyịp owo ke ini enye odomode ndikpeme idem esie ye inyene esie.​—Deut. 22:8; Ps. 51:14.

Imọdiọn̄ọ ke awawak n̄kpọ emi ẹkemede ndikama n̄wot owo. Edi iwakke n̄kpọ emi esisọpde owot owo nte ikan̄, edide ẹdedue m̀mê ẹkokoi ẹda ẹtop owo. * Mme ama-uke ẹsisan̄a ye idem ẹka ufọk owo, ntre n̄kpọ ekeme ndidiọk enyịn edieke mmọ ẹkụtde ke nnyịn imenyene ikan̄, oro akam ekeme ndinam ẹwot owo.

Mbemiso ẹkewotde Jesus, enye ama ọdọhọ mme mbet esie ẹdep akan̄kan̄, edi ikedịghe man mmọ ẹda ẹkpeme idem. (Luke 22:​36, 38) Enyene se Jesus okoyomde ndikpep mmọ. Enye okoyom ndikpep mmọ ke ikpanaha mmọ ẹn̄wana ye mbon emi ẹdide ntịme ye  mmọ. (Luke 22:52) Ke Peter ama akada akan̄kan̄ esie esịbe ofụn akwa oku kiet utọn̄, Jesus ama ọdọhọ enye ete: “Sịn akan̄kan̄ fo ke itie esie.” Ekem enye ama etịn̄ n̄kpọ emi an̄wamde mme mbet esie tutu esịm mfịn, ete: “Kpukpru owo eke ẹmende akan̄kan̄ ẹdikpa ke akan̄kan̄.”​—Matt. 26:​51, 52.

Nte Micah 4:3 ọkọdọhọde, ikọt Jehovah “[ẹda] akan̄kan̄ mmọ ẹdom n̄kpọ ufụn̄isọn̄ ẹnyụn̄ ẹda eduat mmọ ẹdom ikwa udiọn̄ eto.” Mme owo ẹfiọk ke ikọt Jehovah ẹdi mbon emem. Mmọ ẹsinam se apostle Paul eketịn̄de ete: “Ẹkûda idiọk ẹsio owo usiene idiọk. . . . Edieke usụn̄ odude, adan̄a nte mbufo ẹkekeme, ẹtie ke emem ye kpukpru owo.” (Rome 12:​17, 18) Paul ama anam se enye eketịn̄de emi kpa ye ofụri se ikọwọrọde enye, ye se “mbon n̄wo” ẹkenamde enye. Enye ikabiatke ibet Abasi man ekpeme idemesie. (2 Cor. 11:26) Enye ama ọbuọt idem ye Abasi onyụn̄ enịm ke ọniọn̄ emi odude ke Bible “ọfọn akan n̄kpọ en̄wan.”​—Eccl. 9:18.

Ikọt Abasi ẹda uwem ke ata akpan n̄kpọ ẹkan inyene. “Uwem [owo] itoho ke mme n̄kpọ emi enye enyenede.” (Luke 12:15) Edieke inọ mînyịmeke ndision̄o idem n̄kpọn̄ nnyịn kpa ye oro ikpede enye ubọk, ọfọn inam item Jesus emi: “Ẹkûn̄wana ye idiọkowo.” Emi ọwọrọ ke ekeme ndifọn iyak enye emen se ededi emi enye oyomde. (Matt. 5:​39, 40; Luke 6:29) * Edi mfọnn̄kan n̄kpọ edi nnyịn nditre ndisio idem nnyan nnọ inọ. Edieke nnyịn ‘mîdaha se inyenede iwụt idem,’ edieke mme owo ẹnyụn̄ ẹfiọkde ke nnyịn idi mbon emem, etie nte mme ama-uke idifịnake nnyịn.​—1 John 2:16; N̄ke 18:10.

Ikọt Abasi isinamke n̄kpọ emi ekemede ndinam esịt afịna mbon en̄wen. (Rome 14:21) Idem ekeme ndikpa ndusụk nditọete, esịt akam ekeme ndifịna mmọ edieke mmọ ẹfiọkde ke eyenete enyene ikan̄ man ada ekpeme idemesie mbak owo idinam enye n̄kpọ. Ukara ẹkeme ndinọ nnyịn unen ndinyene ikan̄. Edi imosụk ikeme nditre ndinyene ikan̄ mbak emi idifịna nditọete nnyịn.​—1 Cor. 10:​32, 33; 13:​4, 5.

Ikọt Abasi ẹsinịm eti uwụtn̄kpọ. (2 Cor. 4:2; 1 Pet. 5:​2, 3) Edieke mbiowo ẹdiọn̄ọde ke eyenete enyene ikan̄ man ada ekpeme idemesie mbak mme owo idinam enye n̄kpọ, mmọ ẹyenọ enye item. Edieke eyenete oro mîduọkke ikan̄ oro, ọwọrọ enye inịmke eti uwụtn̄kpọ. Utọ eyenete oro ididotke ndikama ifetutom ekededi ke esop. Kpasụk ntre ke edidi ye eyenete oro akade iso anam utom oro ẹkamade ikan̄. Ọkpọfọn enye oyom utom en̄wen anam! *

Enyene-idem enyene ndimek nte enye edisan̄ade ikpeme idemesie, ubon esie, ye inyene esie. Enye edinyụn̄ imek utọ utom emi enye edinamde. Edi enye ikpayakke se enye emekde anam enye abiat ibet Abasi. Abasi ọkọnọ nnyịn ibet esie koro enye amade nnyịn. Sia ikọt Abasi ẹmade ibet esie, mmọ isimaha ndinyene ikan̄ nda n̄kpeme idem mbak mme owo idinam mmọ n̄kpọ. Mmọ ẹdiọn̄ọ ke edieke mmimọ ibuọtde idem ye Jehovah inyụn̄ inamde se Bible etịn̄de, idem ọkpọkọm n̄kpọ ananam mmimọ, ke ididịghe ke nsinsi.​—Ps. 97:10; N̄ke 1:33; 2:​6, 7.