1. Ọyọhọ John 3 ufan̄ikọ 3 ye 4 owụt ke nso isinam esịt enem nnyịn?

NDI ọmọdiọn̄ọ adan̄a nte esịt ekenemde apostle John ini enye okopde ke mbon emi enye akan̄wamde ẹdiọn̄ọ akpanikọ ke ẹkaka iso ẹsọn̄ọ ẹda ẹnam n̄kpọ Jehovah? Nti Christian emi ẹma ẹnyene ediwak mfịna, John ama onyụn̄ esịn idem an̄wam mmọ ẹka iso ẹsọn̄ọ ẹda ye Jehovah, sia enye akada mmọ nte nditọ esie. Esinem nnyịn n̄ko ima ikụt ata ata nditọ nnyịn m̀mê mbon emi ikan̄wamde ẹdiọn̄ọ akpanikọ ẹyakde idem mmọ ẹnọ Jehovah ẹnyụn̄ ẹkade iso ẹnam n̄kpọ esie.—Kot 3 John 3, 4.

2. Nso ikanam John ewet mme leta oro?

² Etie nte John okodụn̄ ke Ephesus m̀mê ke mbọhọ oro ke isua 98 eyo mme apostle. Ekeme ndidi enye ọkọwọrọ okodụn̄ do ke ẹma ẹkesio enye ke ufọk-n̄kpọkọbi ke isuo Patmos. Ke n̄kpọ nte isua 98 eyo mme apostle oro ke edisana spirit Jehovah akanam enye ewet leta ita man an̄wam mme Christian emi ẹkesọn̄ọde ẹda ye Abasi ẹka iso ẹbuọt idem ye Jesus ẹnyụn̄ ẹka iso ẹsan̄a ke akpanikọ.

3. Mme mbụme ewe ke idibọrọ?

³ Mme apostle Jesus ẹma ẹkpan̄a ẹma, John kpọt okosụhọ. Ama afịna enye nte mbon emi ẹkekpepde nsu ke esop ẹkedade ukpepn̄kpọ mmọ ẹbiat nditọete. * (1 John 2:18, 19, 26) Mbon mfiakedem oro ẹkedọhọ ke imọdiọn̄ọ Abasi, edi mmọ ikenịmke mme ewụhọ Jehovah. Ẹyak ineme item emi Abasi ọkọnọde John spirit esie ewet. Nte isụk inemede item oro, iyọbọrọ mbụme ita emi: Nso ke owo ndisan̄a ke akpanikọ ọwọrọ? Nso ikeme ndinam nnyịn ikûsan̄a ke akpanikọ aba? Didie ke ikeme ndin̄wam kiet eken man ika iso isan̄a ke akpanikọ?

4. Akpa John 2:3-6 ye 2 John 4, 6 ẹwụt ke nso ke ana inam man isan̄a ke akpanikọ?

⁴ Ana idiọn̄ọ akpanikọ emi odude ke Bible man ikeme ndisan̄a ke akpanikọ. N̄kpọ efen edi ke ana ‘inịm mme ewụhọ Jehovah.’ (Kot 1 John 2:3-6; 2 John 4, 6.) Idụhe eke okokopde uyo Jehovah nte Jesus; enye ama onyụn̄ enịm ata eti uwụtn̄kpọ ọnọ nnyịn. Ntre akpan usụn̄ kiet emi iwụtde ke imokop uyo Jehovah edi nnyịn ndikpebe Jesus adan̄a nte ikekeme.—John 8:29; 1 Pet. 2:21.

5. Nso ke ana inịm?

⁵ Edieke iyomde ndika iso nsan̄a ke akpanikọ, ana inịm ke Jehovah edi Abasi akpanikọ, ke kpukpru se enye ekpepde nnyịn ke Bible emi edide Ikọ esie ẹdi akpanikọ. Ana inịm n̄ko ke Jesus edi Messiah oro ẹken̄wọn̄ọde. Ediwak owo mfịn inịmke ke ẹma ẹyet Jesus aran, ke enye edi Edidem Obio Ubọn̄ Abasi. John ama odụri mme owo utọn̄ ete ke “ediwak mbon abian̄a” ẹdu emi ẹkemede ndida mbon emi mînen̄ekede inịm akpanikọ emi aban̄ade Jehovah ye Jesus ntụn usụn̄. (2 John 7-11) John ama ewet ete: “Anie edi osu nsu ke mîdịghe owo emi ọdọhọde ete ke Jesus idịghe Christ?” (1 John 2:22) N̄kukụre se mîdiyakke ẹbian̄a nnyịn edi nnyịn ndikpep Ikọ Abasi. Oro edinam idiọn̄ọ Jehovah ye Jesus. (John 17:3) Ini oro ndien ke idinịm ke imenyene akpanikọ.

6. Tịn̄ n̄kpọ kiet emi ekemede ndinam mme uyen emi ẹdide Ntiense Jehovah ẹkûsan̄a ke akpanikọ aba.

⁶ Ana kpukpru mme Christian ẹkpeme mbak ẹdida ekikere owo ẹtụn mmọ usụn̄. (1 John 2:26) Akpana mme uyen emi ẹdide Mme Ntiense Jehovah ẹnen̄ede ẹkpeme idem ke afia emi. Sista Alexia * eyen France emi edide isua 25 ọdọhọ ete: “Ini n̄kodude ke ufọkn̄wed, ẹma ẹkpep ke mme n̄kpọ ẹkefoforo ẹnyụn̄ ẹkpep mme ekikere owo eken; oro ama esifịna mi. Ndusụk ini, ekesitie mi nte mme ukpepn̄kpọ oro ẹdi akpanikọ. Edi mma n̄kere ke ifọnke n̄kpọn̄ se Jehovah adade Bible ekpep mi n̄kabade nda se ẹkpepde mi ke ufọkn̄wed.” Alexia ama ekpep n̄wed emi ekerede Life—How Did It  Get Here? By Evolution or by Creation? Ke ufan̄ urua ifan̄, enye ikeyịkke aba se Bible ekpepde. Alexia ọdọhọ ete: “Mma ndụn̄ọde n̄kụt ke idemmi ke se Bible ekpepde edi akpanikọ. Mma nnyụn̄ n̄kụt ke ndidu uwem nte Bible ọdọhọde edinam mi n̄kop idatesịt nnyụn̄ nnyene emem.”

7. Nso ke ana ikpeme mbak nnyịn idinam? Ntak-a?

⁷ Mfịna kiet emi ekikere owo esidade edi esidi ndinam owo odu uwem esịt iba. Edi ana kpukpru mme Christian, edide uyen m̀mê ikpọ owo, ẹkpeme mbak mmọ ẹdidi ke ẹnam n̄kpọ Jehovah, ke ẹnam ndiọi n̄kpọ. John ama owụt ke nnyịn ikemeke ndidi isan̄a ke akpanikọ, idu oburobụt uwem. (1 John 1:6) Edieke iyomde Abasi ama nnyịn idahaemi ye ke ini iso, ana isiti kpukpru ini ke Jehovah okụt se inamde. Edieke itịmde ikere, iyokụt ke ndedịbe idiọkn̄kpọ ndomokiet idụhe sia kpukpru se inamde ẹna in̄wan̄ ke iso Jehovah.—Heb. 4:13.

8. Nso ke nnyịn mîkpadaha nte ererimbot ẹdade?

⁸ Inaha ida idiọkn̄kpọ nte ererimbot ẹdade. Apostle John ekewet ete: “Edieke nnyịn idọhọde ite: ‘Nnyịn inyeneke idiọkn̄kpọ,’ nnyịn ibabian̄a idem nnyịn.” (1 John 1:8) Mbon mfiakedem ke eyo John ẹkedọhọ ke owo ekeme ndikokoi nnam idiọkn̄kpọ edi osụk aka iso edi ufan Abasi. Nnyịn idụn̄ ye mbon emi ẹkerede n̄kpọ ntem n̄ko. Ediwak owo ẹdọhọ ke imọdiọn̄ọ Abasi, edi mmọ idaha idiọkn̄kpọ nte Jehovah adade, akpan akpan ke n̄kpọ emi aban̄ade idan̄. Se Jehovah adade ke edi oburobụt ido, mmọ ẹdọhọ ke etiene esịt owo m̀mê ke se ifọnde ye mmimọ edi oro.

9. Nso ufọn ke mme uyen ẹdibọ edieke mmọ ẹnamde nnennen n̄kpọ emi Bible ekpepde?

⁹ Ekeme ndinen̄ede nsọn̄ mme uyen emi ẹdide Christian ndida idan̄ nte Abasi adade sia nditọ ufọkn̄wed mmọ m̀mê mbon itieutom mmọ idaha n̄kpọ oro nte Abasi adade. Se ikọwọrọde Brọda Aleksandar edi  oro. Enye ọdọhọ ete: “Ndusụk nditọiban ke ufọkn̄wed nnyịn ẹma ẹdomo ndinam mi ndan̄ ye mmọ. Sia mmen̄kenyeneke ufan an̄wan nnyụn̄ nsịn ndidan̄ ye mmọ, mmọ ẹma ẹdọhọ ke nsidan̄ irenowo nte ami.” Utọ n̄kpọ oro ọkpọwọrọ fi, ti ke edieke ọsọn̄ọde ada anam nnennen n̄kpọ emi Bible ekpepde, ke udûsueneke idemfo, udûmenke udọn̄ọ, udûnyeneke iduọesịt, oyonyụn̄ aka iso edi ufan Jehovah. Ndien ini ekededi emi ebede idomo, eyetetịm emem fi utom ndinam se inende. Ti n̄ko ke oburobụt usụn̄ emi ererimbot ẹdade idan̄ edi ubọkutom Satan. Ntre ama esịn ndikere n̄kpọ nte mbon ererimbot emi, ‘amakan andidiọk.’—1 John 2:14.

10. Didie ke 1 John 1:9 an̄wam nnyịn inam n̄kpọ Jehovah, esịt ibiomke nnyịn?

¹⁰ Imenyịme ke Jehovah enyene unen ndidọhọ nnyịn se idide idiọkn̄kpọ. Imesinyụn̄ idomo nte ikekeme nditre ndinam idiọkn̄kpọ. Edi ima inam idiọkn̄kpọ, imesibọn̄ akam iyarade se ikanamde inọ Jehovah. (Kot 1 John 1:9.) Ndien ekpedi ikanam akwa idiọkn̄kpọ, imesika ibịne mbiowo emi Jehovah emekde ete ẹse nnyịn enyịn ikọdọhọ ẹn̄wam nnyịn. (Jas. 5:14-16) Edi ikpanaha ika iso iyak esịt amia nnyịn ufen ke idiọkn̄kpọ emi ikanamde ke ini edem. Ntak-a? Edima Ete nnyịn ama anam Eyen esie akpa ke ibuot nnyịn man ẹkeme ndifen mme idiọkn̄kpọ nnyịn. Ini Jehovah ọdọhọde ke iyefen idiọkn̄kpọ mbon emi ẹkabarede esịt, enye inyụn̄ itịn̄ke-tịn̄, eyefen. Ntre idụhe n̄kpọ ndomokiet emi ekemede ndikpan nnyịn ndinam n̄kpọ Jehovah ye esịt emi n̄kpọ mîbiomke.—1 John 2:1, 2, 12; 3:19, 20.

11. Nso ke ikeme ndinam mbak ndiọi ukpepn̄kpọ ẹdinam nnyịn itre ndibuọt idem ye Abasi?

¹¹ Ana isịn ukpepn̄kpọ mbon mfiakedem. Toto ke ini emi ẹketọn̄ọde esop Christian, Devil ke ada ediwak mbon abian̄a odomo ndinam nti ikọt Abasi ẹyịk se  Bible ekpepde. Ke ntak oro, ọfọn idiọn̄ọ ukpụhọde ke ufọt akpanikọ ye nsu. * Mme asua nnyịn ẹkeme ndida Intanet ye mme n̄kpọ ntre ndomo ndinam nnyịn ikûnen̄ede ubuọt idem ye Jehovah ikûnyụn̄ unen̄ede uma nditọete nnyịn. Ti ke ubọkutom Satan edi oro; kûnyụn̄ uyak enye anam fi utọ n̄kpọ oro!—1 John 4:1, 6; Edi. 12:9.

12. Ntak emi ikpanamde n̄kpọ man inen̄ede inịm mme akpanikọ emi ikekpepde?

¹² Edieke nnyịn mîyomke Satan okụt unen, ana inen̄ede ibuọt idem ye Jesus inyụn̄ inyịme nte Abasi adade enye anam uduak Esie. Ana inyụn̄ inen̄ede ibuọt idem ye n̄kukụre mbon emi Jehovah adade ada esop esie usụn̄ mfịn. (Matt. 24:45-47) Nnyịn ndikpep Ikọ Abasi kpukpru ini edinam mbuọtidem nnyịn etetịm ọsọn̄. Ndien mbuọtidem nnyịn editie nte eto emi orụn̄ esie enen̄erede ọdọn̄ n̄kam ke isọn̄. Paul ama etịn̄ mbiet n̄kpọ oro ini enye ekewetde leta ọnọ esop Colossae. Enye ọkọdọhọ ete: “Sia mbufo ẹma ẹkenyịme Christ Jesus Ọbọn̄, ẹka iso ẹsan̄a nte mbon oro ẹbuanade n̄kpọ ye enye, ẹdọn̄ n̄kam ẹnyụn̄ ẹkọri ke enye ẹnyụn̄ ẹsọn̄ọ ẹda ke mbuọtidem.” (Col. 2:6, 7) Edieke Christian anamde n̄kpọ man enye enen̄ede ọbuọt idem ye Abasi, idụhe se Satan m̀mê mbon emi ẹdade ye enye ẹdinamde yak enye etre ndisan̄a ke akpanikọ.—2 John 8, 9.

13. Nso ke idori enyịn ndikụt? Ntak-a?

¹³ Ana idori enyịn ke ererimbot ẹyesua nnyịn. (1 John 3:13) John eti nnyịn ke “ofụri ererimbot esịne ke idak odudu andidiọk.” (1 John 5:19) Nte utịt ererimbot emi enen̄erede ekpere, ntre ke esịt etetịm ayat Satan. (Edi. 12:12) Idịghe n̄kari n̄kari n̄kpọ nte oburobụt ido m̀mê nsu mbon mfiakedem kpọt ke enye esida an̄wana ye nnyịn, enye esida n̄ko ọkpọsọn̄ ukọbọ an̄wana ye nnyịn. Satan ọdiọn̄ọ ke ini emi imọ inyenede ndida ndomo ndinam nnyịn itre utom ukwọrọikọ m̀mê ndinam nnyịn itre ndibuọt idem ye Abasi edi ata ekpri. Ntre ikpaha nnyịn idem nte ndusụk idụt ẹkpande nnyịn ndinam ndusụk se isinamde inọ Abasi m̀mê ẹtrede utom nnyịn ofụri ofụri. Kpa ye oro, nditọete nnyịn ke mme idụt oro ke ẹka iso ẹyọ. Mmọ ke ẹwụt ke ọkpọkọm andidiọk otop nso utọ ekọn̄ ye nnyịn, ke iyọsọn̄ọ ida ye Jehovah!

14. Tịn̄ usụn̄ kiet emi ikemede ndin̄wam nditọete nnyịn ẹka iso ẹsan̄a ke akpanikọ.

¹⁴ Edieke iyomde nditọete nnyịn ẹka iso ẹsan̄a ke akpanikọ, ana isikop mmọ mbọm. (1 John 3:10, 11, 16-18) Idịghe ini n̄kpọ ọfọnde kpọt ke oyom ima kiet eken, ana ima mmọ n̄ko ke ini mfịna esịmde mmọ. Ke uwụtn̄kpọ, ndi ọmọdiọn̄ọ eyenete emi owo esie akpade ndien oyom ẹdọn̄ enye esịt m̀mê ẹn̄wam enye? Ndi omokop ke enyene nditọete emi oyobio m̀mê akamba edịm abiatde Ufọkmbono Obio Ubọn̄ mmọ m̀mê ufọk mmọ ndien oyom ẹn̄wam mmọ ẹfiak ẹbọp? Idịghe se itịn̄de kpọt esiwụt adan̄a nte imade nditọete nnyịn inyụn̄ ikopde mmọ mbọm, se idide akpan n̄kpọ ikan edi se inamde inọ mmọ.

15. Akpa John 4:7, 8 owụt ke nso ke ana inam?

¹⁵ Ima ima nditọete nnyịn, oro owụt ke imekpebe edima Ete nnyịn ke heaven. (Kot 1 John 4:7, 8.) Akpan usụn̄ kiet emi iwụtde ke imama nditọete nnyịn edi ndifen mmọ. Owo ekeme ndinam se iyatde nnyịn. Ima ifen inọ enye inyụn̄ ifre se enye akanamde nnyịn oro, oro owụt ke imama enye. (Col. 3:13) Brọda kiet emi ekerede Aldo ama ayat esịt ini brọda kiet emi enye ekesikponode  eketịn̄de ikọ emi mîfọnke aban̄a mbon edem mmọ. Aldo ọdọhọ ete: “Mma mbọn̄ akam ediwak ini ndọhọ Jehovah an̄wam mi n̄kûkere idiọkn̄kpọ mban̄a brọda oro.” Edi Aldo iketreke do. Enye ama ọdọhọ brọda oro edisan̄a ye imọ ke ukwọrọikọ. Nte mmọ ẹsụk ẹsan̄ade kiet ẹkwọrọ ikọ, Aldo ama ọdọhọ brọda oro nte ikọ esie oro akayatde imọ. Aldo ọdọhọ ete: “Ini brọda oro okopde nte ikọ esie oro akayatde mi, enye ama ekpe mi ubọk. Uyo ikọ esie ama anam n̄kụt ke enye enen̄ede atua n̄kpọfiọk ke se enye eketịn̄de oro. Ima ifiak idi ufan, mfịna enye oro ama onyụn̄ efịt ebe.”

16-17. Nso ke ikpebiere ndinam?

¹⁶ Apostle John ama enen̄ede ama nditọete esie onyụn̄ oyom mmọ ẹnen̄ede ẹbuọt idem ye Abasi. Inen̄ede ikụt emi ke leta ita oro enye ekewetde ọnọ mmọ item. Enem nnyịn etieti ndidiọn̄ọ ke irenowo ye iban emi ẹmekde yak ẹketiene Christ ẹkara ke heaven ẹnen̄ede ẹma nditọete, ẹnyụn̄ ẹkere ẹban̄a mmọ ukem nte John!—1 John 2:27.

¹⁷ Ẹyak ida item emi inemede ke ibuotikọ emi ke akpan n̄kpọ. Ẹyak ibiere ndisan̄a ke akpanikọ, ikop uyo Jehovah ke se ededi emi inamde. Kpep Ikọ esie nyụn̄ nịm se Ikọ esie etịn̄de. Nen̄ede buọt idem ke Jesus. Kûnyịme ekikere owo ye ukpepn̄kpọ mbon mfiakedem. Kûdi anam n̄kpọ Jehovah, anam oburobụt ido; kûnyụn̄ uyak mbon en̄wen ẹnyịk fi anam idiọkn̄kpọ. Du uwem nte Jehovah ọdọhọde. Ẹyak isin̄wam nditọete nnyịn emi ẹyomde un̄wam inyụn̄ ifen mbon emi ẹnamde se iyatde nnyịn man in̄wam mmọ ẹka iso ẹsọn̄ọ ẹda ye Abasi. Ima inam ntem, iyaka iso isan̄a ke akpanikọ inamke n̄kpọ m̀mê nso mfịna isịm nnyịn.