N̄kamana ke St. Paul ke Minnesota ke U.S.A. ke 1954. Ikesika Ufọkabasi Catholic, nnyịn ikedịghe ubuene ikonyụn̄ idịghe imọ. Idi owo ition, ami ndi ọyọhọ eyen iba. N̄kaka ufọkn̄wed Catholic ini ndide eyenọwọn̄, n̄kesinyụn̄ ndu ke enyọn̄ mbot ke ufọkabasi n̄n̄wam oku. Kpa ye oro, n̄kọdiọn̄ọ Bible ata ekpri ekpri. Okposụkedi emi n̄kenịmde ke anaedi enyene Abasi emi okobotde kpukpru n̄kpọ, n̄kenịmke ke Ufọkabasi Catholic ẹkeme ndin̄wam mi n̄kpono enye.

Akpa isua emi n̄kodude ke ufọkn̄wed ukpep ibet, ebe ye n̄wan emi ẹkedide Mme Ntiense Jehovah ẹma ẹdi ufọk mi. N̄keyet ọfọn̄, ntre mmọ ẹma ẹdọhọ ke iyafiak idi, itọhọke. Ini mmọ ẹkefiakde ẹdi, mma mbụp mmọ mbụme iba: “Nso isinam n̄kpọ ọfọn ndiọi owo akan nti owo?” “Nso idinam owo enen̄ede okop inemesịt?” Mma mbọ mmọ n̄wed Akpanikö oro Adade osim Nsinsi Uwem ye Edisana N̄wed Abasi—Edikabade Eke Obufa Ererimbot emi ekenyenede awawa ikpædem. Mma nnyụn̄ nnyịme mmọ ẹkpep mi Bible. Oro ama anam ediwak n̄kpọ an̄wan̄a mi. Ama enem mi ndidiọn̄ọ ke Obio Ubọn̄ Abasi edi ukara  emi edikarade isọn̄ emi. Mma n̄kụt ke ukara owo inyeneke ufọn ndomokiet, ke enye onyụn̄ anam ubiak, ufen, ukwan̄ikpe, ye afanikọn̄ ẹyọhọ ererimbot emi.

Mma nyak idemmi nnọ Jehovah ke ntọn̄ọ ntọn̄ọ 1982 nnyụn̄ nna baptism kpa isua oro ke Mbono District “Akpanikö Obio-Uböñ” emi ẹkenịmde ke St. Paul Civic Center. Urua oro eketienede, mma mfiak n̄ka itie emi ẹkedade ẹnịm mbono oro n̄kewet udomo emi anade owo ewet mbemiso enye akabade edi ekpeibet. Ke ntọn̄ọ ntọn̄ọ October, mma ndiọn̄ọ ke mmebe udomo oro, ke mmodot ndidi ekpeibet.

Ke mbono district oro, mma n̄kụt Brọda Mike Richardson emi okodude ke Bethel Brooklyn; enye ama ọdọhọ mi ke ẹtọn̄ọ Itieutom Oro Ẹsede Ẹban̄a Ibet ke ibuot itieutom. Mma nti se eunuch emi ekedide owo Ethiopia okobụpde ke Utom 8:36 nnyụn̄ mbụp idemmi nte, ‘Nso ibiọn̄ọ mi ndikanam utom ke Itieutom Oro Ẹsede Ẹban̄a Ibet?’ Ntre mma nsịn n̄wed ndika Bethel.

Ete ye eka mi ikamaha nte ndide Ntiense Jehovah. Ete mi ama obụp mi m̀mê nso ufọn ke ami ndikanam utom nnọ Watchtower edinam inọ mi ke utom ukpeibet mi. Mma nnam an̄wan̄a enye ke edi utom mfọn, edi ke ẹyesinọ mi ekpri okụk ekpatọfọn̄ emi ẹsinọde kpukpru mbon ubon Bethel.

N̄kekemeke ndisọp n̄ka Bethel sia mma nyenyịme ndinam utom ke esopikpe kiet. Ntre n̄kọtọn̄ọ utom Bethel ke Brooklyn, New York, ke 1984. Ẹkedọhọ n̄kanam utom ke Itieutom Oro Ẹsede Ẹban̄a Ibet. Se n̄kekpepde ini nnamde utom ke esopikpe ama eben̄e mi idem ọnọ se ndisobode.

Stanley Theater odu ke Jersey City ke New Jersey. Esop Abasi ẹma ẹdep itie oro ke November 1983. Nditọete ẹma ẹsịn n̄wed ẹyom ndifiak ndiọn̄ ikan̄ ilektrik ye mmọn̄ esan̄ukwak do. Ini nditọete ẹsobode ye mbon ukara obio oro, mmọ ẹma ẹdọhọ mmọ ke iyom ndisida itie oro nnịm ikpọ mbono Mme Ntiense Jehovah. Mfịna ama ọtọn̄ọ. Ibet Jersey City ọkọdọhọ ke ana ufọk ido ukpono odu ke mme itie emi mme owo ẹdụn̄de kpọt. Stanley Theater okodu ke n̄kan̄ emi mme ufọk mbubehe ẹdude. Ntre mbon ukara oro ikenyịmeke eben̄e emi ikesịnde. Nditọete ẹma ẹfiak ẹsịn eben̄e oro, edi mmọ ikosụk inyịmeke.

Akpa urua emi n̄kesịmde Bethel, esop Abasi ẹma ẹmen n̄kpọ oro ẹka esop. Utọ ikpe  oro ama enen̄ede an̄wan̄a mi sia ami ndikosụk n̄kpọn̄ utom emi n̄kanamde isua iba ke esopikpe ke St. Paul ke Minnesota ekedi oro. Ekpeibet nnyịn kiet ama ọdọhọ esop ke ẹkesida Stanley Theater ẹnam nsio nsio n̄kpọ, utọ nte ndisio fim ye ikwọ, m̀mê nso inam ndien ibet mînyịmeke ẹda ẹnịm n̄kpọ ido ukpono. Esop ẹma ẹtịm ẹse n̄kpọ oro ẹnyụn̄ ẹbiere ke Jersey City ikokponoke unen oro inyenede ndinam n̄kpọ Abasi. Esop ẹma ẹdọhọ mmọ ẹnyịme inam se ikoyomde ndinam. Mma ntọn̄ọ ndikụt nte Jehovah adade Itieutom Oro Ẹsede Ẹban̄a Ibet anam utom esie aka iso. Ama enem mi etieti nditiene n̄n̄wam.

Nditọete ẹma ẹtọn̄ọ ata akamba utom ndifiak ndiọn̄ itie oro, ndien ke September 8, 1985, ẹma ẹnịm edinam ukụre ukpep ke Ufọkn̄wed Gilead, ọyọhọ otu 79 do ke Ufọk Mbono ke Jersey City; ikesịmke isua kiet tọn̄ọ ẹketọn̄ọ ndifiak ndiọn̄ itie oro. Ama enem mi ndisịne ke otu mme ekpeibet emi ẹn̄wamde ndinam utom Abasi aka iso; ama enem mi akan utom ekededi emi n̄kanamde nte ekpeibet mbemiso ndide Bethel. Edi n̄kọdiọn̄ọke ke nsio nsio utom emi Jehovah enịmde ebet mi idịghe ekpri.

Ọtọn̄ọde ke 1980 ka iso, Ntiense Jehovah emi ama okokpon owo ọkpọdọhọ ke imọ iyomke iyịp asan̄a ke usọbọ emi ẹnọde imọ, mbiausọbọ ye ufọkibọk ikesiwakke ndinyịme nnọ enye. Ekesinen̄ede ọsọn̄ ye iban idịbi sia mme ebiereikpe ẹkesikere ke iban oro inyeneke unen ndomokiet ndisịn ndibọ iyịp. Mmọ ẹkesikere ke owo mîsịnke n̄wan idịbi iyịp, ke enye ekeme ndikpa n̄kpọn̄ eyen oro.

Ke December 29, 1988, iyịp ama ọwọrọ Sista Denise Nicoleau ebe nde ke enye ama akaman eyen erenowo ama. Iyịp esie ama osụhọde ata idiọk idiọk, dọkta esie onyụn̄ ọdọhọ enye enyịme isịn enye iyịp. Sista Nicoleau ama esịn. Usenubọk edem usen oro, ufọkibọk ẹma ẹdọhọ ebiereikpe ọnọ mmimọ unen yak idọhọ dọkta esịn enye iyịp, man ẹnyan̄a uwem esie. Ebiereikpe ama anam se ufọkibọk ẹkeben̄ede, ibụpke Sista Nicoleau, ibụpke ebe esie m̀mê mmọ ẹkere didie, inyụn̄ idọhọke-dọhọ mmọ se imọ inyịmede ufọkibọk ẹnam.

Ke Friday, December 30, mbon ufọkibọk ẹma ẹsịn Sista Nicoleau iyịp, kpa ye emi ebe esie ye mbon ubon mmọ eken emi ẹkedude ye enye ke ufọkibọk ẹkeyịrede ẹdọhọ mmọ ẹkûsịn. Mbubreyo usen oro, mme bodisi ẹma ẹdimụm ndusụk mbon ubon mmọ ye mbiowo ifan̄ ẹdọhọ ke mmọ ẹkekan bed sista oro ẹkụk ẹdomo ndikpan owo ndisịn enye iyịp. Ke usenubọk Saturday, December 31, ẹma ẹbụk ke n̄wedmbụk n̄kpọntịbe, TV, ye radio ke New York City ye Long Island nte ẹkemụmde mmọ.

 Ke Monday usenubọk, mma n̄kot Milton Mollen emi ekedide ebiereikpe ke esop emi okponde akan enye emi mmọ ẹkekade ntịn̄ n̄kpọ oro nnọ. Mma nnen̄ede nnam enye ọdiọn̄ọ ke ebiereikpe ke akpa esop oro ikokopke ito mme sista oro mbemiso enye esịnde ubọk ke n̄wed enyịme ẹsịn sista oro iyịp. Justice Mollen ama ọdọhọ ndi ọfis imọ uwemeyo oro yak ineme kpukpru se iketịbede, ye ibet emi aban̄ade n̄kpọ oro. Brọda Philip Brumley emi ekedide esenyịn itieutom nnyịn ama etiene mi aka ọfis Justice Mollen mbubreyo oro. Ebiereikpe oro ama okot ekpeibet ufọkibọk oro etiene edi. Ima ifan̄a n̄kpọ oro uyo ọsọn̄. Nte nneme osụk akade iso, Brọda Brumley ama ewet ekpri n̄kpọ ọnọ mi ọdọhọ yak “nsụhọde uyo mi.” Ke ini mfiakde n̄kere n̄kpọ oro, mmokụt ke eti item ke enye ọkọnọ mi oro sia esịt ama ayat mi nte n̄kosụk ndomode ndiwụt ke se ekpeibet oro etịn̄de inenke.

Ke ima ikeneme n̄kpọ oro ke n̄kpọ nte hour kiet, Justice Mollen ama ọdọhọ ke ikpe oro ke ẹdibem iso ikpe edem usen oro. Nte ikosụk isan̄ade iwọrọ ke ọfis esie, enye ama ọdọhọ ke idimemke inọ ekpeibet ufọkibọk oro n̄kpọn̄. Ikọ esie ọkọwọrọ ke ọyọsọn̄ enye ndinam ẹkụt ke ufọkibọk ẹma ẹnyene unen ndisịn Sista Nicoleau iyịp ke ini enye mînyịmeke. Eketie mi nte Jehovah anam mi n̄kụt ke iyakan ke ikpe oro. Ama enem mi ndikụt ke Jehovah ada nnyịn anam uduak esie.

Ima itie itịm se iditịn̄de edem usen tutu eyo ọsọn̄. Ufọkesop oro odu ekpere Bethel Brooklyn, ntre iwakke owo ke Itieutom Oro Ẹsede Ẹban̄a Ibet emi mîketieneke idi. Ke mme ebiereikpe inan̄ emi ẹkesede ẹban̄a ikpe oro ẹma ẹkekop kpukpru n̄kpọ, mmọ ẹma ẹdọhọ ke ikpakanaha ẹnọ ufọkibọk unen ẹsịn sista oro iyịp. Akwa esopikpe oro ẹma ẹdọhọ ke Sista Nicoleau akan ke ikpe oro, ẹnyụn̄ ẹdọhọ ke owo ndisịn ubọk ke n̄wed nnyịme ẹnam n̄kpọ ke ini owo mîkopke ito owo abiat unen owo.

Ikebịghike, n̄kponn̄kan esopikpe ke New York ẹma ẹsọn̄ọ ke Sista Nicoleau enyene unen ndidọhọ ẹkûsịn imọ iyịp ke idem. Enye emi ekedi kiet ke otu ikpe inan̄ emi aban̄ade iyịp emi ikakande ke n̄kponn̄kan esopikpe ke nsio nsio stet ke United States, emi n̄ketienede nsịne. (Se ekebe oro “ Mme Ikpe Emi Ikakande ke N̄kponn̄kan Esopikpe.”) Mma  nnyụn̄ ntiene mme ekpeibet en̄wen ke Bethel nsịne ke nsio nsio ikpe emi aban̄ade m̀mê eyen edidu ye ete m̀mê edidu ye eka, usiondọ, ye ke n̄kpọ aban̄ade ufọk ye isọn̄.

N̄wan mi ekere Dawn, akpa ini emi n̄kokụtde enye, enye ama ọwọrọ ndọ okonyụn̄ ọbọk nditọ ita ikpọn̄. Enye ama anam utom afiak edi asiakusụn̄. Enyene ini emi uwem mîkememke ye enye, ama onyụn̄ enem mi nte enye ekebierede ndinam n̄kpọ Jehovah. Ke 1992, ini n̄kakade Mbono District “Mme Ọnọ Un̄wana” ke New York City, mma mbụp enye m̀mê imekeme ndidi ufan. Mma ndọ enye ke isua kiet ebede, edi n̄kosụk nnanam utom nnọ Bethel. Ndinyene n̄wan emi amade n̄kpọ Jehovah onyụn̄ etiede mbre mbre edi enọ Abasi. Dawn ọnọ mi eti utịp ke ofụri ini emi idude kiet.—N̄ke 31:12.

Ini n̄kọdọde enye, nditọ esie ẹkedi isua 11, 13, ye 16. N̄koyom ndidi eti ete nnọ mmọ, ntre mma ntịn̄ enyịn n̄kot kpukpru se n̄kụtde emi esop Abasi ẹwetde ẹban̄a ebe eka nnyụn̄ nnam se n̄kotde. Ikememke inọ nnyịn ke mme isua emi ẹketienede, edi enem mi ke mmọ ẹma ẹdida mi nte eti ufan mmọ ye edima ete mmọ. Nnyịn ikesikpanke mme ufan mmọ ndidi ndise mmọ, ama esinyụn̄ enem nnyịn ndidu ye mme uyen oro.

Ke 2013, ami ye Dawn ima iwọrọ ika Wisconsin man ikese iban̄a ete mi, ye mme ete ye eka esie. Idem ama akpa mi ndikụt ke utom Bethel mi iketreke. Ke ini ke ini, ẹma ẹsikot mi n̄ka Bethel n̄kan̄wam Itieutom Oro Ẹsede Ẹban̄a Ibet.

Ke September 2018, ekesidi ntie ntie n̄kwana itọn̄. Dọkta emi esisọbọde nnyịn idem ama ese mi idem, edi ikọdiọn̄ọke se inamde mi. Ekem dọkta en̄wen ama ọdọhọ ke ọkpọfọn n̄kokụt dọkta emi esisede aban̄a esịp. Ke January 2019, dọkta emi esisede aban̄a esịp ama ọdọhọ mi ke etie nte mmenyene ata idiọk udọn̄ọ emi edidiade mi ofụri idem nte ini akade; ẹkot udọn̄ọ oro progressive supranuclear palsy (PSP). Iwakke mme owo emi ẹdọn̄ọde utọ udọn̄ọ oro.

Ke usen ita ebede, mma nduọ mbụn̄ itọn̄ubọk nnasia ini nsụk mbrede mbre ke ice. N̄kọtọn̄ọ ndisibre mbre ke ice tọn̄ọ ini ndide ekpri, mma nnyụn̄ nnen̄ede ndiọn̄ọ mbre oro. Ami ndikọduọ mbụn̄ ubọk ama anam ndiọn̄ọ ke esịp mi enyene mfịna. Ama akpa mi idem nte udọn̄ọ oro ọkọsọpde adia mi idem. Ama ọsọn̄ mi nditịn̄ ikọ, ndisan̄a, ndinyụn̄ mmen udia.

Enen̄ede enem mi ndida ifiọk emi nnyenede nte ekpeibet n̄n̄wam esop Jehovah. Enem mi n̄ko nte n̄kemede ndiwet ediwak n̄kpọ ke mme magazine nnọ mme dọkta, mme ekpeibet, ye mme ebiereikpe. Mma nnyụn̄ nnọ utịn̄ikọ ke nsio nsio itie ke ofụri ererimbot nnam ẹkụt ke Mme Ntiense Jehovah ẹnyene unen ndidọhọ ẹkûsịn mmimọ iyịp ke idem ini ẹsiakde mmimọ idem ye ini ẹnọde mmimọ usọbọ. Kpa ye oro, ntịn̄ ukem se idude ke Luke 17:10 nte: ‘Ndi ofụn eke mînyeneke ufọn. Nnam se akpanade nnam.’