1. Nso ke Jehovah oyom ẹnam?

 ABASI oyom ẹkwọrọ eti mbụk Obio Ubọn̄ ke ofụri isọn̄. (Mark 13:10; 1 Tim. 2:​3, 4) Sia edide Jehovah enyene utom ukwọrọikọ, utom oro onyụn̄ edide akpan utom, oro anam enye emek edima Eyen esie ete ada usụn̄ ke utom oro. Imenịm ke sia edide Jesus ada usụn̄ ke utom oro ke ẹyenam enye ẹma nte Jehovah oyomde mbemiso utịt edide.​—Matt. 24:14.

2. Nso ke idineme ke ibuotikọ emi?

² Ke ibuotikọ emi, iyokụt nte Jesus adade “ofụn emi anamde akpanikọ onyụn̄ enyenede ọniọn̄” ekpep mme mbet esie Ikọ Abasi, onyụn̄ etịm mmọ idem ndikwọrọ ikọ ke usụn̄ emi akanam owo mîkwọrọke ke mbụk ubonowo. (Matt. 24:45) Iyokụt n̄ko nte nnyịn owo kiet kiet ikemede ndibere ye Jesus ye ofụn oro.

3. Nso utọ odudu ke ẹnọ Jesus?

³ Inam didie idiọn̄ọ ke Jesus ada usụn̄ ke utom ukwọrọikọ? Esisịt ini mbemiso enye ọnyọn̄de heaven, enye ama osobo ye ndusụk mme mbet esie ke obot kiet ke Galilee onyụn̄ ọdọhọ mmọ: “Ẹnọ mi ofụri odudu ke heaven ye ke isọn̄,” afiak ọdọhọ: “Mmọdo ẹka ẹkenam mme owo ke kpukpru idụt ẹdi mbet mi.” (Matt. 28:​18, 19) Ndida usụn̄ ke utom ukwọrọikọ esịne ke otu mme n̄kpọ emi ẹnọde Jesus odudu ndinam.

4. Nso inam inịm ke Jesus ke osụk ada usụn̄ ke utom ukwọrọikọ?

⁴ Jesus ọkọdọhọ ke ẹyekwọrọ ikọ ẹnyụn̄ ẹkpep mme owo Ikọ Abasi ke “kpukpru idụt,” ke imọ iyonyụn̄ idu ye mme mbet imọ “kpukpru usen tutu esịm akpatre ini editịm n̄kpọ emi.” (Matt. 28:20) Ikọ Jesus oro enen̄ede anam ikụt ke  enye ayada usụn̄ ke utom ukwọrọikọ tutu esịm eyo nnyịn emi.

5. Didie ke itiene inam Psalm 110:3 osu?

⁵ Jesus iketiehe ikpa ekikere m̀mê mbon emi ẹdikwọrọde ikọ ke mme akpatre usen ẹyewak. Enye ama ọdiọn̄ọ ke prọfesi Psalm 110:3 emi ọdọhọde ete: “Ikọt fo ẹyenọ idemmọ unyịme unyịme ke usen ekọn̄ fo” oyosu. Ekpedi ke etiene ọkwọrọ ikọ, ọwọrọ afo emebere ye Jesus ye ofụn emi anamde akpanikọ, ke onyụn̄ an̄wam yak prọfesi oro osu. Ke ẹnam utom oro, edi enyene mme n̄kpọ emi ẹnamde utom oro ọsọn̄.

6. Tịn̄ mfịna kiet emi mme ọkwọrọ Obio Ubọn̄ ẹnyenede.

⁶ Mfịna kiet emi mme ọkwọrọ Obio Ubọn̄ ẹnyenede edi ukọbọ. Mbon mfiakedem, ikpọ owo ufọkabasi, ye mbon pọlitiks ẹsu ediwak nsu ẹban̄a utom nnyịn. Edieke iman nnyịn, mbon emi idiọn̄ọde, ye mbon itieutom nnyịn ẹnịmde mme nsu oro, mmọ ẹkeme ndisịn nnyịn ntịme ke idem man itre ndinam n̄kpọ Jehovah inyụn̄ itre ndikwọrọ ikọ. Ke ndusụk idụt, mme asua ikọt Abasi ẹsidọhọ ke iyanam mmọ n̄kpọ, ẹsimia mmọ, mîdịghe ẹkam ẹmụm mmọ ẹkekọbi. Se mmọ ẹnamde oro ikpaha nnyịn idem sia Jesus ama ọdọhọ ete: “Mbufo ẹyedi mbon emi kpukpru mme idụt ẹsuade ke ntak enyịn̄ mi.” (Matt. 24:9) Nte ẹsuade nnyịn akam owụt ke Jehovah enem esịt ye nnyịn. (Matt. 5:​11, 12) Devil anam ẹkọbọ ikọt Abasi. Edi odudu esie ikpetke-kpet eke Jesus! Jesus ke an̄wam yak ẹkwọrọ eti mbụk ẹnọ mme owo ke kpukpru idụt.

7. Nso inam enịm ke Ediyarade 14:​6, 7 ke osu?

⁷ Mfịna en̄wen emi inyenede ke utom ukwọrọikọ edi ke ediwak owo emi ikwọrọde ikọ inọ isemke usem nnyịn. Ini Jesus ayararede se iditịbede owụt apostle John, enye ama anam John okụt ke usem idikpanke owo ndikwọrọ eti mbụk ke eyo nnyịn emi. (Kot Ediyarade 14:​6, 7.) Didie ke ikọ oro osu? Ke in̄wam adan̄a ediwak owo nte ikekeme ẹkop etop Obio Ubọn̄ Abasi. Mme owo ke kpukpru itie ke ererimbot ẹkeme ndikot mme n̄wed Ikọ Abasi ke ikpehe Intanet nnyịn emi ekerede jw.org sia usem emi idọn̄de mme n̄kpọ do ẹbe 1,000! Otu Emi Ẹsede Ẹban̄a Utom Nnyịn ẹma ẹnyịme yak ẹkabade n̄wed Du Ata Uwem ke Nsinsi! emi edide akpan n̄wed emi idade ikpep mme owo Ikọ Abasi ẹsịn ke se ibede usem 700! Ẹsio n̄ko mme vidio Ikọ Abasi ẹnọ mme inan, ẹnyụn̄ ẹnam mme n̄wed Ikọ Abasi nnyịn ẹdu ke n̄wed mme nnan. Ke ikụt nte mme prọfesi Bible ẹsude mfịn emi. Mme owo emi ‘ẹtode kpukpru usem mme idụt’ ke ẹkpep “edisana usem,” oro edi akpanikọ emi esịnede ke Bible. (Zech. 8:23; Zeph. 3:9) Jesus Christ emi edide adausụn̄ nnyịn anam ẹkeme ndinam kpukpru emi.

8. Nso ufọn ke ukwọrọikọ nnyịn anam?

⁸ Mfịn se ibede owo miliọn itiaita ke nsio nsio idụt 240 ẹdu ke esop Abasi, ndien kpukpru isua, mbon emi ẹnade baptism ẹbe tọsịn ikie! Idịghe nte mbufa mbet oro ẹwakde enen̄ede edi akpan n̄kpọ, akam edi nte mmọ ẹtiede nte “obufa owo,” oro edi, ẹnyenede mme edu emi akpanade Christian enyene. (Col. 3:​8-10) Ediwak mmọ ẹma ẹtre oburobụt ido, afai, ye asari, inyụn̄ inamke aba nte idụt mmimọ ọfọn akan. Prọfesi Isaiah 2:4 ke osu sia mmọ “ikpepke aba ekọn̄.” Nte isịnde idem inyene mme edu emi akpanade Christian enyene, iyanam enenem mme owo ndidụk esop Abasi, iyonyụn̄ iwụt ke itiene Christ Jesus emi adade nnyịn usụn̄. (John 13:35; 1 Pet.  2:12) Jesus an̄wam nnyịn inam kpukpru emi.

9. Nte ikụtde ke Matthew 24:​45-47, Jesus ọkọdọhọ ke nso iditịbe ke mme akpatre usen?

⁹ Kot Matthew 24:​45-47. Jesus ama ọdọhọ ke mme akpatre usen, ke imọ iyemek “ofụn emi anamde akpanikọ onyụn̄ enyenede ọniọn̄” yak ekpep mme mbet imọ Ikọ Abasi. Ntre imenịm ke utom emi ofụn oro anamde ke eyo nnyịn emi ididịghe ekpri. Ntre ke onyụn̄ edi. Irenowo ifan̄ emi ẹyetde aran ke Jesus Christ emi edide adausụn̄ nnyịn ada ọnọ ikọt Abasi ye mbon emi ọdọn̄de mmọ ndidiọn̄ọ Jehovah “udia ke nnennen ini.” Oro ọwọrọ ke ofụn oro ekpep mmọ Ikọ Abasi ke nnennen ini. Irenowo emi ikarake-kara nnyịn-o, mmọ isinyụn̄ inamke nte ẹdọhọ ke mbuọtidem nnyịn esịne mmọ ke ubọk. (2 Cor. 1:24) Utu ke oro, mmọ ẹdiọn̄ọ ke Jesus Christ edi ‘adausụn̄ ye etubom’ ikọt esie.​—Isa. 55:4.

10. Ewe n̄wed ke ndise oro akan̄wam fi ọtọn̄ọ ndinam n̄kpọ Jehovah?

¹⁰ Toto ke 1919, ofụn emi anamde akpanikọ osion̄o nsio nsio n̄wed emi ẹsidade ẹkpep mme owo Ikọ Abasi. Mme n̄wed oro ẹdi akpa n̄kpọ emi ẹsidade ẹkpep mbon emi ọdọn̄de mmọ ndidiọn̄ọ Jehovah mme akpanikọ emi Bible ekpepde. Ke 1921, ofụn oro ama osio n̄wed The Harp of God man ẹn̄wam mbon emi ọdọn̄de mmọ ndidiọn̄ọ Jehovah ẹdiọn̄ọ mme akpan n̄kpọ emi Bible ekpepde. Ekedi nte n̄kpọ okpụhọrede ke ererimbot, enye osion̄o mme n̄wed efen yak ẹda ẹkpep mme owo Ikọ Abasi. Ewe n̄wed akan̄wam fi ọdiọn̄ọ Ete nnyịn emi odude ke heaven onyụn̄ ama enye? Ndi ekedi “Yak Abasi Edi Akpanikö,” Akpanikö oro Adade osim Nsinsi Uwem, Afo Emekeme  Ndidu Uwem ke Nsinsi ke Paradise ke Isọn̄, Ifiọk Oro Adade Osịm Nsinsi Uwem, Nso ke Bible Enen̄ede Ekpep?, Nso ke Bible Ekpep Nnyịn?, m̀mê Du Ata Uwem ke Nsinsi! emi edide ata obufa emi inyenede idahaemi? Ẹkesion̄o mme n̄wed emi man ẹn̄wam nnyịn inam mme owo ẹdi mbet Christ. Se idude ke mme n̄wed oro ẹkenyụn̄ ẹdi nnennen se idin̄wamde mme owo ini ẹkesiode mmọ.

11. Ntak emi anade kpukpru nnyịn inen̄ede idiọn̄ọ Jehovah ye se idude ke Bible?

¹¹ Idịghe mbon emi ọdọn̄de mmọ ndidiọn̄ọ Jehovah kpọt ẹkpesịn idem ẹnam se idin̄wamde mmọ ẹnen̄ede ẹdiọn̄ọ Jehovah ye se Bible ekpepde. Se anade kpukpru nnyịn inam edi oro. Apostle Paul ekewet ete: “Ọkpọsọn̄ udia enyene mbon oro ẹkọride ẹsịm ọyọhọ idaha.” Paul ama etịn̄ n̄ko ke nnyịn ndisịn idem nnam se ikpepde ke Ikọ Abasi edin̄wam nnyịn ‘idiọn̄ọ se inende ye se ikwan̄ade.’ (Heb. 5:14) Ekeme ndinen̄ede nsọn̄ nnyịn ndidu uwem nte Jehovah oyomde idahaemi sia ata ediwak owo ẹdu oburobụt uwem. Edi Jesus okụt ete ke imekpep mme n̄kpọ emi ẹdin̄wamde nnyịn ika iso ibuọt idem ye Abasi. Nti ukpepn̄kpọ oro ẹto Bible emi Abasi ọkọnọde spirit esie ẹda ẹwet. Jesus ada ofụn emi anamde akpanikọ usụn̄ yak enye ada Bible osio utọ mme ukpepn̄kpọ oro edi onyụn̄ anam mmọ ẹsịm kpukpru owo.

12. Didie ke inọ enyịn̄ Abasi ukpono ukem nte Jesus ọkọnọde?

¹² Imọnọ enyịn̄ Abasi ukpono emi odotde ukem nte Jesus ọkọnọde. (John 17:​6, 26) Ke uwụtn̄kpọ, ke 1931 ima itọn̄ọ ndikot idem nnyịn Mme Ntiense Jehovah. Enyịn̄ oro oto Bible. Nnyịn ndikot idem nnyịn ntre owụt ke nnyịn idaha enyịn̄ oro ibre mbre, ke iyom ẹdiọn̄ọ nnyịn nte mbon emi ẹkerede enyịn̄ ẹdian Ete nnyịn emi  odude ke heaven. (Isa. 43:​10-12) Ọtọn̄ọde ke October isua oro ke ẹketọn̄ọ ndiwet enyịn̄ Abasi ke ikpaedem kpukpru nsiondi Enyọn̄-Ukpeme. N̄kpọ efen edi ke ẹdọn̄ enyịn̄ Abasi ke kpukpru itie emi anade enye odu ke Edisana N̄wed Abasi​—Edikabade Eke Obufa Ererimbot. Se nnyịn inamde oro edi ata isio ye se ufọkabasi Christendom ẹnamde. Mmọ ẹkam ẹsosion̄o enyịn̄ Jehovah ẹfep ke ediwak Bible emi mmọ ẹkabarede!

13. Nso inam enịm ke Jesus ada “ofụn emi anamde akpanikọ onyụn̄ enyenede ọniọn̄” anam n̄kpọ mfịn? (John 6:68)

¹³ Jesus ada “ofụn emi anamde akpanikọ onyụn̄ enyenede ọniọn̄” etịm mme mbet esie ọdọn̄ ke esop emi akande esop ekededi ke isọn̄ man okụt ete ke ẹkpono Jehovah nte Jehovah oyomde. Etie fi didie ke idem ndidu ke utọ esop oro? Ekeme ndidi etie fi ukem ukem nte eketiede apostle Peter emi ọkọdọhọde Jesus ete: “Nnyịn idinyọn̄ ibịne anie? Afo enyene ikọ nsinsi uwem.” (John 6:68) Ikpodu m̀mọ̀n̄ mfịn ekpedi nnyịn ikọdiọn̄ọke esop Jehovah? Esop emi ke Christ ada ekpep nnyịn kpukpru se idin̄wamde nnyịn ika iso isọn̄ọ ida ye Abasi. Enye ke Christ ada ekpep nnyịn nte ikpọkwọrọde ikọ ọfọn. Kpa enye ke Christ ada an̄wam nnyịn inyene nti edu emi Christian ekpenyenede man inem Jehovah esịt.​—Eph. 4:24.

14. Didie ke ndidu ke esop Jehovah ke ini udọn̄ọ COVID-19 an̄wam fi?

¹⁴ Jesus esiteme nnyịn nnennen se ikpanamde ke ini mfịna. Ima ikụt ufọn utọ item oro ini udọn̄ọ COVID-19 emi ekesịmde ofụri ererimbot ọkọtọn̄ọde. Ke ini ediwak owo ke ererimbot mîkọdiọn̄ọke m̀mê  mmimọ ikpananam didie, Jesus ama okụt ete ke eteme nnyịn nnennen se ikpanamde man n̄kpọ idinam nnyịn. Ẹma ẹdọhọ isifụk n̄kpọ ke ibuo ye inua (face mask) edieke idude ke itie emi mme owo ẹdude, ikûnyụn̄ ukpere owo idem ukaha. Ẹma ẹdọhọ mbiowo ẹsikot nditọete ke ubọk ke ubọk ẹdiọn̄ọ se nditọete ẹyomde man ẹda ẹse ẹban̄a idemmọ, ẹkûmen udọn̄ọ, ẹnyụn̄ ẹka iso ẹkpere Jehovah. (Isa. 32:​1, 2) Ẹma ẹsisọn̄ọ nnyịn idem ẹnyụn̄ ẹteme nnyịn mme n̄kpọ efen efen emi ikpanamde ke vidio emi ẹkotde “Se Otu Emi Ẹsede Ẹban̄a Utom Nnyịn Ẹnamde Idiọn̄ọ.”

15. Ke ini udọn̄ọ COVID-19, esop Abasi ẹkedọhọ isinịm didie mbono esop, ẹkenyụn̄ ẹdọhọ isikwọrọ ikọ didie? Tịn̄ ufọn emi okodude.

¹⁵ Ke ini udọn̄ọ COVID-19, ẹma ẹteme nnyịn nte ikpenịmde mbono esop ye nte ikpọkwọrọde ikọ. Inikiet inikiet ima itọn̄ọ ndida Intanet nnịm mbono esop nnyụn̄ ndụk n̄kpri ye ikpọ mbono. Akpan usụn̄ emi ikedikwọrọde ikọ inọ mme owo ekedi ndiwet leta m̀mê ndikot mme owo ke fon n̄kwọrọ. Jehovah ama ọdiọn̄ se ikanamde oro. Ediwak ọfis nnyịn ẹdọhọ ke ibat mme asuanetop ke idụt mmọ ama ọdọk. Se ediwak owo ẹbụkde ẹban̄a ukwọrọikọ ke ini udọn̄ọ COVID-19 enem tutu.​—Se ekebe oro “ Jehovah Ọdiọn̄ Ukwọrọikọ Nnyịn.”

16. Nso ke inịm?

¹⁶ Nte esop Abasi ẹkedọhọde ẹnam n̄kpọ ke ini udọn̄ọ oro ekeme ndidi ama etie ndusụk owo nte ke esop Abasi ẹkpekpeme idem ẹkaha. Edi nsio nsio n̄kpọ emi ẹketịbede ẹma ẹnam ikụt ke se ẹkedọhọde nnyịn inam ama ọfọn etieti. (Matt. 11:19) Nnyịn nditie n̄kere nte Jesus adade ikọt esie usụn̄ anam inịm ke inamke n̄kpọ m̀mê nso iditịbe n̄kpọn̄, ke Jehovah ye edima Eyen esie idikpọn̄ke nnyịn.​—Kot Mme Hebrew 13:​5, 6.

17. Nte Jesus adade nnyịn usụn̄ etie fi didie ke idem?

¹⁷ Jesus ndida nnyịn usụn̄ enem nnyịn etieti! Idu ke esop emi edide ebiet emi mme owo ẹtode, nte ẹnamde n̄kpọ ke edem mmọ, ye usem emi mmọ ẹsemde ikemeke ndisuan enye. Ẹda Bible ẹkpep nnyịn ediwak n̄kpọ ẹnyụn̄ ẹnen̄ede ẹkpep nnyịn nte ikpọkwọrọde ikọ. Ẹn̄wam nnyịn inyene nti edu emi Christian ekpenyenede, ke inyụn̄ ikpep ndima kiet eken. Sia Jesus edide adausụn̄ nnyịn, imekeme ndinam asian nte imama!