1. Nso ke Jehovah mîkabiatke ini ndinam ke Adam ye Eve ẹma ẹkenam idiọkn̄kpọ? (Genesis 3:15)

 KE ADAM ye Eve ẹma ẹkenam idiọkn̄kpọ, Jehovah ikabiatke ini nditịn̄ akpan prọfesi kiet emi akanamde nditọ Adam ẹnyene idotenyịn. Prọfesi oro odu ke Genesis 3:15.​—Kot.

2. Nso inam prọfesi oro edi ata akpan prọfesi?

² Prọfesi oro odu ke akpa n̄wed ke Bible. Enye edi ata akpan prọfesi sia okpokot kpukpru mme n̄wed eken ke Bible, oyosụk okụt n̄kpọ kiet emi asan̄ade n̄kpọ ye prọfesi oro. Ukem nte urụk emi ẹdade ẹbọp ebek ifia esimụmde kpukpru ifia oro adian, se ẹtịn̄de ke Genesis 3:15 atan̄ se idude ke mme n̄wed eken ke Bible adian kiet, mmọ ẹforo akpan etop kiet. Etop oro edi ke Abasi ọyọnọ Andinyan̄a edisobo Devil ye kpukpru ndiọi owo emi ẹdianade ye enye. * Nsobo oro edidi edidiọn̄ ọnọ kpukpru mbon emi ẹmade Jehovah!

3. Nso ke idineme ke ibuotikọ emi?

³ Ke ibuotikọ emi, imọn̄ ineme mbụme ita emi ẹban̄ade prọfesi oro odude ke Genesis 3:15: Mmanie ke ẹtịn̄ ẹban̄a ke prọfesi oro? Didie ke prọfesi oro osu? Didie ke prọfesi oro an̄wam nnyịn?

4. Anie edi “urụkikọt” oro? Inam didie idiọn̄ọ?

⁴ Genesis 3:​14, 15 etịn̄ aban̄a “urụkikọt,” “mfri” m̀mê nditọ urụkikọt oro, “n̄wan,” ye “mfri” esie. Bible an̄wam  nnyịn idiọn̄ọ se mmọ kiet kiet ẹdade ẹban̄a. * Yak ibem iso itịn̄ iban̄a “urụkikọt.” Se Jehovah eketịn̄de ke In̄wan̄ Eden ikpakan̄wan̄ake ata ata urụkikọt. Ntre, Jehovah ekebiere ikpe ọnọ owo, idịghe ata ata urụkikọt. Edi anie ekedi oro? Ediyarade 12:9 ayarade owo oro owụt nnyịn. Itie oro ọdọhọ ke “akani urụkikọt” edi Satan kpa Devil. Edi mmanie ẹdi nditọ urụkikọt oro?

5. Mmanie ẹdi nditọ urụkikọt oro?

⁵ Ndusụk ini ke Bible, ikọ oro “nditọ” esiban̄a mbon emi ẹnen̄erede ẹkpebe owo tutu ekeme ndidọhọ ke owo oro edi ete mmọ. Ntre nditọ urụkikọt oro ẹdi ndiọi angel ye mme owo emi ẹbiọn̄ọde Jehovah Abasi ye ikọt Esie ukem nte Satan. Mbon emi itịn̄de iban̄a mi ẹsịne mme angel emi ẹkekpọn̄de heaven ẹdi isọn̄ ke eyo Noah, ye mme owo ke isọn̄ emi ẹbakde ibak nte Devil ete mmọ.​—Gen. 6:​1, 2; John 8:44; 1 John 5:19; Jude 6.

6. Ntak idọhọde ke idịghe Eve ekedi “n̄wan” oro?

⁶ Idahaemi iyom ndidiọn̄ọ owo emi “n̄wan” oro edide. Idịghe Eve ke ekedi. Kop ntak kiet emi anamde idọhọ ntre. Prọfesi oro ọkọdọhọ ke mfri m̀mê eyen n̄wan oro “ayanuak” urụkikọt oro ibuot. Nte ima ikeneneme, urụkikọt oro edi Satan emi edide spirit. Ndien eyen Eve ndomokiet ikpekekemeke ndinuak Satan ibuot m̀mê ndisobo enye. Ẹdinam didie ndien ẹsobo Satan?

7. Ediyarade 12:​1, 2, 5, 10 owụt ke n̄wan emi ẹtịn̄de ẹban̄a ke Genesis 3:15 edi anie?

⁷ Akpatre n̄wed ke Bible anam idiọn̄ọ  n̄wan emi ẹtịn̄de ẹban̄a ke Genesis 3:15. (Kot Ediyarade 12:​1, 2, 5, 10.) N̄wan oro idịghe obụk ye iyịp nte nnyịn! Ọfiọn̄ odu enye ke idak ikpat, enye onyụn̄ ayara anyanya ntantaọfiọn̄ 12 ke ibuot. Eyen emi n̄wan oro amande edi Obio Ubọn̄ Abasi; akananam owo imanke utọ eyen oro. Sia Obio Ubọn̄ oro odude ke heaven, ọwọrọ n̄wan oro n̄ko odu ke heaven. N̄wan oro ada aban̄a ikpehe esop Jehovah eke heaven, emi nti angel Jehovah ẹdude.​—Gal. 4:26.

8. Anie edi akpan mfri m̀mê eyen n̄wan oro? Ini ewe ke enye ekedi mfri oro? (Genesis 22:​15-18)

⁸ Kpa Bible anam idiọn̄ọ owo emi edide akpan mfri m̀mê eyen n̄wan oro. Akana eyen oro oto ubon Abraham. (Kot Genesis 22:​15-18.) Jesus okoto ubon eti owo Abasi oro kpa nte prọfesi eketịn̄de. (Luke 3:​23, 34) Edi akana eyen oro enyene odudu emi akande odudu owo sia akana enye osobo Satan kpa Devil efep. Ntre, ini Jesus edide n̄kpọ nte isua 30, ẹma ẹda spirit Abasi ẹyet enye aran, enye akabade Eyen emi Abasi adade spirit Esie obon. Ini ẹkeyetde Jesus aran ke enye akakabade akpan mfri m̀mê eyen n̄wan oro. (Gal. 3:16) Ke Jesus ama akakpa onyụn̄ eset, Abasi ama “ada ubọn̄ ye ukpono ayara enye” onyụn̄ ọnọ enye “ofụri odudu ke heaven ye ke isọn̄.” Ẹma ẹnọ enye odudu n̄ko ‘ndibiat utom Devil.’​—Heb. 2:7; Matt. 28:18; 1 John 3:8.

9-10. (a) Mmanie ẹtiene ẹdi mfri n̄wan oro? Ini ewe ke mmọ ẹsikabade mfri oro? (b) Nso ke idineme idahaemi?

⁹ Idịghe Jesus ikpọn̄ edi mfri n̄wan oro. Mbon en̄wen ẹtiene ẹdi. Se apostle Paul eketịn̄de ye mme Christian emi ẹyetde aran, emi ẹkedide mme Jew ye mme Gentile anam idiọn̄ọ mbon emi ẹtienede ẹdi mfri n̄wan oro. Paul ọkọdọhọ ete: “Edieke mbufo ẹdide eke Christ, mbufo ke akpanikọ ẹdi mfri Abraham, mme ada udeme nnyene nte ekemde ye un̄wọn̄ọ.” (Gal. 3:​28, 29) Ini Jehovah adade edisana spirit eyet Christian aran ke Christian esitiene edi mfri n̄wan oro. Ntre, Jesus Christ ye owo 144,000 emi ẹditienede enye ikara ẹdi mfri n̄wan oro. (Edi. 14:1) Kpukpru mmọ ẹsidomo ndikere n̄kpọ nnyụn̄ nnam n̄kpọ nte Jehovah Abasi Ete mmọ.

¹⁰ Ke ima ikọdiọn̄ọ mbon emi ẹtịn̄de ẹban̄a ke Genesis 3:​15, yak ineme ekpri iban̄a nte Jehovah anamde prọfesi oro osu sụn̄sụn̄ sụn̄sụn̄, ye nte prọfesi oro an̄wamde nnyịn.

11. Didie ke ẹkenuak mfri n̄wan oro “nditịn̄ikpat”?

¹¹ Prọfesi ke Genesis 3:15 ọkọdọhọ ke urụkikọt oro ayanuak mfri m̀mê eyen n̄wan oro “nditịn̄ikpat.” Enye oro eketịbe ini Satan akanamde mme Jew ye mbon Rome ẹwot Eyen Abasi. (Luke 23:​13, 20-24) Ukem nte unan emi owo enyenede ke nditịn̄ikpat ekemede ndinam enye okûsan̄a ke ufan̄ usen ifan̄, Jesus ikekemeke ndinam n̄kpọ ndomokiet ke ufan̄ usen ita emi enye okodude ke udi.​—Matt. 16:21.

12. Didie ke ẹdinuak urụkikọt ibuot? Ini ewe ke oro editịbe?

¹² Prọfesi Genesis 3:15 ama owụt ke Jesus idisịneke ke udi ke nsinsi. Ntak edi ke prọfesi oro ama ọdọhọ ke mfri n̄wan oro ayanuak urụkikọt oro ibuot. Oro ọkọwọrọ ke unan emi ẹkenọde mfri  n̄wan oro ayakpa, oro edi, ke Jesus eyeset. Ndien Jesus ama onyụn̄ eset! Ke ọyọhọ usen ita tọn̄ọ nte Jesus akakpa, Abasi ama anam enye eset nte spirit emi mîkemeke ndikpa, enye ama onyụn̄ ọnyọn̄ heaven. Ke ekemini Abasi, Jesus oyosobo Satan efep. (Heb. 2:14) Mbon emi ẹditienede Christ ikara ẹyedian ubọk ye enye ẹsobo kpukpru nditọ urụkikọt oro, emi ẹdide mme asua Abasi ẹfep ke isọn̄.​—Edi. 17:14; 20:​4, 10. *

13. Didie ke nte prọfesi oro osude an̄wam nnyịn?

¹³ Ekpedi afo edi asan̄autom Abasi, nte prọfesi oro osude ke an̄wam fi. Jesus ekedi edidu ke isọn̄ emi nte owo. Enye ama enen̄ede ekpebe Ete esie onyụn̄ enyene nti edu emi Ete esie ekenyenede. (John 14:9) Nnyịn ndikpep mban̄a Jesus anam nnyịn ididiọn̄ọ Jehovah Abasi inyụn̄ ima Enye. Se Jesus ekekpepde ye nte enye adade esop Abasi usụn̄ mfịn an̄wam nnyịn n̄ko. Enye ekpep nnyịn ndidu uwem ke usụn̄ emi enemde Jehovah esịt. Nte ẹkenuakde Jesus nditịn̄ikpat, oro edi Jesus ndikakpa, anam ufọn ọnọ kpukpru nnyịn. Didie? Ke Jesus ama akakpa, Jehovah onyụn̄ anam enye eset, Jehovah ama enyịme mfọnmma uwa emi Eyen esie akawade. Uwa oro anam “isana ke kpukpru idiọkn̄kpọ.”​—1 John 1:7.

14. Inam didie idiọn̄ọ ke akana ini ebe mbemiso prọfesi emi ẹketịn̄de ke In̄wan̄ Eden osude?

¹⁴ Se Jehovah eketịn̄de ke prọfesi oro ke In̄wan̄ Eden ama owụt ke ini eyebe mbemiso prọfesi oro osude ofụri ofụri. N̄wan oro ndiman eyen emi ẹken̄wọn̄ọde, Devil ndikọ mme mbet nnọ idemesie, usua ndinyụn̄ ndu ke ufọt n̄wan oro ye Devil, ye ke ufọt mfri n̄wan oro ye eke Devil, ididịghe n̄kpọ usen kiet. Prọfesi oro ndin̄wan̄a nnyịn ayan̄wam nnyịn sia ayanam idiọn̄ọ ke ererimbot Satan emi ẹyesua ikọt Jehovah. Jesus ama etetịn̄ mbiet ikọ oro ye mme mbet esie. (Mark 13:13; John 17:14) Imokụt nte usua emi ẹketịn̄de ẹban̄a ke prọfesi oro etịbede akpan akpan ke isua 100 emi ebede mi. Nso inam idọhọ ntre?

15. Nso inam ererimbot ẹsua ikọt Abasi ẹkan akpa? Ntak emi nnyịn mîkpefeheke Satan?

¹⁵ Ke ẹma ẹkenam Jesus edi Edidem ke Obio Ubọn̄ Abasi ke 1914, ikebịghike ẹma ẹsio Satan ke heaven ẹduọk ke isọn̄. Enye edibet nsobo esie. (Edi. 12:​9, 12) Edi Satan iwan̄ke-wan̄ ubọk itie. Enye anam n̄kpọ ke mbrenyịn, ifụtesịt emi enye akamade asan̄a idịghe ekpri. Enye an̄wan̄a kpukpru iyatesịt esie ofụk ikọt Abasi. (Edi. 12:​13, 17) Oro anam ererimbot ẹsua ikọt Abasi ẹkan nte ẹkesisuade. Edi nnyịn inyeneke ntak ndomokiet ndifehe Satan ye ikọt esie. Ukem uko emi apostle Paul ekenyenede ke inyene. Enye ekewet ete: “Edieke Abasi adade ye nnyịn, anie edibiọn̄ọ nnyịn?” (Rome 8:31) Yak inen̄ede ibuọt idem ye Jehovah koro se inemede kan̄a anam ikụt ke ediwak n̄kpọ emi ẹketịn̄de ke prọfesi oro ke Genesis 3:15 ẹsosu.

16-18. Didie ke Genesis 3:15 ndikan̄wan̄a Curtis, Ursula, ye Jessica akan̄wam mmọ?

¹⁶ Se Jehovah ọkọn̄wọn̄ọde ke Genesis 3:15 ekeme ndin̄wam nnyịn iyọ se ededi emi ọwọrọde nnyịn. Curtis emi edide  isụn̄utom ke Guam ọdọhọ ete: “Ndusụk ini n̄kpọ ama esitịbe emi ekesiyomde ndinam mi n̄kûsọn̄ọ nda ye Jehovah. Edi ami nditie n̄kere prọfesi emi odude ke Genesis 3:15 an̄wam mi n̄ka iso mbuọt idem ye Ete mi emi odude ke heaven.” Curtis etetie ebet usen emi Jehovah edinamde kpukpru mfịna nnyịn ẹtre.

¹⁷ Sista Ursula emi odụn̄de ke Bavaria ọdọhọ ke Genesis 3:15 ndikan̄wan̄a imọ akan̄wam imọ inen̄ede inịm ke Abasi ọkọnọ spirit esie ẹda ẹwet Bible. Enye ama okụt nte kpukpru mme prọfesi eken ke Bible ẹsan̄ade n̄kpọ ye prọfesi emi, ndien oro ama enen̄ede otụk enye. Enye ọdọhọ n̄ko ete: “Ami ndidiọn̄ọ ke Jehovah ikabiatke ini ndinam n̄kpọ emi edinamde inyene idotenyịn akanam nnen̄ede mma enye.”

¹⁸ Sista Jessica emi otode Micronesia ọdọhọ ete: “Nsụk nteti nte eketiede mi ke idem akpa ini emi ndiọn̄ọde ke mmokụt akpanikọ! Prọfesi Genesis 3:15 ke osu. Oro an̄wam mi nti ke idịghe ata uwem ke nnyịn idu idahaemi. Prọfesi oro an̄wam mi nnịm ke ami ndinam n̄kpọ Jehovah edinam uwem mi enyene ibuot idahaemi, oyonyụn̄ anam nnyene uwem emi ọfọnde akan emi ke ini iso.”

19. Nso inam inịm ke akpatre n̄kpọ emi ẹketịn̄de ke prọfesi oro oyosu?

¹⁹ Imokụt ke prọfesi Genesis 3:15 ke osu. Ẹnam inen̄ede idiọn̄ọ mbon emi ẹdide mfri n̄wan oro ye eke urụkikọt oro. Unan emi ẹkenọde Jesus emi edide akpan mfri n̄wan oro ke nditịn̄ikpat ama akpa. Idahaemi enye edi okopodudu Edidem emi mîkemeke ndikpa. Ekpri ini ayak, ibat mbon emi ẹtienede Jesus ẹdi mfri n̄wan oro ọmọn̄ ekekem. Nte akpa n̄kpọ emi ẹketịn̄de ke prọfesi oro osude anam inen̄ede inịm ke akpatre n̄kpọ ke prọfesi oro, oro edi ke ẹyenuak urụkikọt oro ibuot, oyosu n̄ko. Nti ikọt Abasi ẹyen̄wek ẹduọk ẹma ẹsobo Satan! Sia ini oro mîsịmke kan̄a, kûyak idem emem fi. Abasi nnyịn isibian̄ake owo. Edidiọn̄ emi enye edidade mfri n̄wan oro idiọn̄ “kpukpru mme idụt isọn̄” ayawak ke usụn̄ emi owo mîdikemeke ndibat.​—Gen. 22:18.