Ndi ama etịn̄ enyịn okot mme Enyọn̄-Ukpeme ndondo emi? Ọfọn, se m̀mê emekeme ndibọrọ mme mbụme oro ẹtienede mi:

Nso ke mme esenyịn circuit ye mbiowo ẹkpenam ke ini esop Abasi ẹdọhọde ẹnam n̄kpọ?

Akpana mmọ ẹsọsọp ẹnam se ẹdọhọde. Ọkpọfọn mmọ ẹbụp idemmọ ẹte: ‘Ndi mmesin̄wam nditọete ẹnam se esop Abasi ẹdọhọde? Ndi mmesisọp nnyịme nnyụn̄ nnam se ẹdọhọde ẹnam?’​—w16.11, p. 11.

Ini ewe ke ikọt Abasi ẹkedụk ufụn ẹnọ Akwa Babylon?

Emi eketịbe esisịt ini ke akpatre apostle ama akakpa. Nte ini akakade, mme owo ẹma ẹnam idemmọ Bishop ẹnyụn̄ ẹtọn̄ọ ndiyom mme owo ẹkpono mmimọ. Nsunsu Ido Ukpono Christ ama ọtọn̄ọ ndidia ubọk udia kiet ye ukara inyụn̄ iyakke mme owo ẹkpan̄ utọn̄ ẹnọ mme Christian oro ẹyetde aran. Edi ediwak isua mbemiso 1914, ikọt Abasi oro ẹyetde aran ẹma ẹtọn̄ọ ndiwọrọ ke ufụn Akwa Babylon.​—w16.11, p. 23-25.

Didie ke Bible Lefèvre d’Étaples akan̄wam mme owo?

Lefèvre ama akabade Bible esịn ke usem French ke 1523 man kpukpru owo ẹnyene. Martin Luther, William Tyndale, ye John Calvin ẹma ẹdomo ndikabade Bible nte Lefèvre akakabarede.​—wp16.6, pp. 10-12.

Nso ke “edikere n̄kpọ obụkidem” ye “edikere n̄kpọ spirit” ọwọrọ? (Rome 8:6)

Mbon emi ẹkerede n̄kpọ obụkidem ẹsikere ẹnyụn̄ ẹnam ndiọi n̄kpọ ekededi emi ọdọn̄de mmọ; mmọ ẹsitịn̄ ẹban̄a ẹnyụn̄ ẹtoro n̄kpọ obụkidem kpukpru ini. Mbon emi ẹkerede n̄kpọ spirit ẹsiyak spirit Abasi ada mmọ usụn̄ onyụn̄ an̄wam mmọ ẹkpep ndikere n̄kpọ nte Abasi esikerede. Edikere n̄kpọ obụkidem ọwọrọ n̄kpa, edi edikere n̄kpọ spirit ọwọrọ uwem ye emem.​—w16.12, p. 15-17.

Nso ke akpanam mbak udûtịmede esịt ukaha?

Nam se inen̄erede idi akpan n̄kpọ, diọn̄ọ se ekemede ndinam ye se mûkemeke, mek ini emi edisiduọkde odudu kpukpru usen, sise mme n̄kpọ-obot, sida n̄kpọ sịn ke mbubru, sisịn̄ede idem nyụn̄ de idap ọfọn.​—w16.12, p. 22-23.

Didie ke Abasi ‘okokpụhọ Enoch itie mbak enye idikụt n̄kpa’? (Heb. 11:5)

Etie nte Jehovah ikayakke Enoch okop ubiak ke ini enye oyomde ndikpa; n̄kpa esie eketie nte owo ndisụhọde nna nde idap ifụre ifụre.​—wp17.1, p. 12-13.

Ntak emi ọfọnde ika iso isụhọde idem?

Owo oro osụhọrede idem ọfiọk se imọ ikemede ndinam ye se imọ mîkemeke ndinam. Enye isisehe mbon en̄wen ke mbio, isinyụn̄ ikereke ke imọfọn ikan mmọ.​—w17.01, p. 18.

Nso iwụt ke Abasi akada otu oro ẹkesede ẹban̄a utom ikọt esie usụn̄ ke eyo mme apostle, ke enye onyụn̄ ada Otu Emi Ẹsede Ẹban̄a Utom Nnyịn usụn̄ mfịn?

Edisana spirit ama anam Ikọ Abasi an̄wan̄a mmọ, mme angel ẹma ẹn̄wam mmọ ẹse ẹban̄a utom ukwọrọikọ, mmọ ẹma ẹnyụn̄ ẹyak Ikọ Abasi ada mmọ usụn̄. Mme n̄kpọ emi ke Jehovah onyụn̄ ada an̄wam Otu Emi Ẹsede Ẹban̄a Utom Nnyịn mfịn.​—w17.02, p. 26-28.

Nso inam inen̄ede ima ufak?

N̄kpọ inan̄ emi anam: Owo emi ọkọnọde, ntak emi enye ọkọnọde, se ufak oro akakpade enye, ye se ufak oro anamde ọnọ nnyịn. Ndikere mban̄a n̄kpọ inan̄ emi ayanam inen̄ede ima ufak.​—wp17.2, p. 4-6.

Ndi asan̄autom Abasi ekeme ndikpụhọde se enye ama ekebebiere?

Akpana inam se ikebierede. Edi ndusụk ini n̄kpọ ekeme nditịbe emi ediyomde ikpụhọde se ima ikebebiere. Jehovah ama okpụhọde ekikere ke ini mbon Nineveh ẹkekabarede esịt. Imekeme n̄ko ndikpụhọde se ikebierede ke ini idide idifiọk mme n̄kpọ en̄wen emi akpanamde ikpụhọde se ikebierede.​—w17.03, p. 16-17.

Ntak emi mîfọnke itịn̄ idiọk ikọ iban̄a owo?

Nditịn̄ idiọk ikọ mban̄a owo ekeme ndinam mfịna oro etetịm okpon ekpededi ẹma ẹnam nnyịn se mîfọnke m̀mê owo ikanamke.​—w17.04, p. 21.