Solomon emi ekedide ete Rehoboam akakara Israel ke isua 40. (1 Ndi. 11:42) Enye akakpa ke isua 997 mbemiso Christ edimana. Ke Solomon ama akakpa, Rehoboam ama oto Jerusalem aka Shechem man ẹkenam enye edidem. (2 Chron. 10:1) Ndi emekere ke idem ama enyek Rehoboam m̀mê imọ iyenyene ọniọn̄ nte ete imọ, m̀mê iyonyụn̄ ikeme ndinam se ete imọ akanamde? N̄kpọ ama etịbe emi okowụtde m̀mê enye enyene ọniọn̄ ekem ndibiere ikpọ mfịna.

Anaedi Rehoboam ama ọfiọk ke esịt inemke nditọ Israel. Nte ini akakade, nditọ Israel ẹma ẹsio mme owo ẹdọn̄ ẹkedọhọ Rehoboam ẹte: “Ete fo ama anam ọkpọnọ nnyịn odobi; ndien ke emi nam ọkpọsọn̄ utom oro ete fo ọkọnọde nnyịn ye ndodobi ọkpọnọ oro enye ọkọkọn̄ọde nnyịn ẹfere, ndien nnyịn iyanam n̄kpọ inọ fi.”​—2 Chron. 10:​3, 4.

Ekikere ama asiaha Rehoboam iba. Edieke enye anamde se nditọ Israel ẹdọhọde, ọwọrọ enye ye ubon esie ye mbọn̄ esie idinyeneke kpukpru se mmọ ẹkpemade ndinyene, enye idinyụn̄ idọhọke mmọ ẹnọ ediwak n̄kpọ nte mmọ ẹkesinọde. Edi edieke enye mîmaha ndinam se nditọ Israel ẹdọhọde, mmọ ẹkeme ndisọn̄ ibuot. Nso ke enye akanam? Enye ama aka ebịne mbiowo oro ẹkesinọde ete esie item ete ẹteme imọ se ikpanamde. Edi enye ama ọkpọn̄ item mbiowo okobụp n̄kparawa emi ẹkedide ubọkn̄ka esie se enye akpanamde. Enye ama anam se ubọkn̄ka esie ẹketemede enye onyụn̄ efịk mme owo. Enye ọkọbọrọ nditọ Israel ete: “Ami nyanam ọkpọnọ mbufo etetịm odobi, nnyụn̄ n̄kọrọ efen ke esịt. Ete mi akakama ikpa amia mbufo, edi ami ndikama ikpa n̄kukịm mmia mbufo.”​—2 Chron. 10:​6-14.

Nso ke emi ekpep nnyịn? Imenyene ediwak ikpọ owo emi ẹma ẹkenam n̄kpọ Jehovah ke ediwak isua; mmọ ẹkeme ndin̄wam nnyịn ifiọk nnennen  se ikpanamde. Ọfọn ikop uyo mmọ man iwụt ke imenyene ọniọn̄.​—Job 12:12.

Se Rehoboam akanamde ama anam nditọ Israel ẹsọn̄ ibuot ye enye. Ntre enye ama osop mbonekọn̄ esie oyom ndikan̄wana ye mmọ. Edi Jehovah ama ọdọn̄ prọfet Shemaiah ọkọdọhọ enye ete: “Mbufo ẹkûdọk ẹken̄wana ye nditọete mbufo kpa nditọ Israel. Mbufo ẹfiak ẹnyọn̄ọ ufọk mbufo, koro edi ami nnam n̄kpọ emi etịbe.”​—1 Ndi. 12:​21-24. *

Ndi Rehoboam idisụk inamke n̄kpọ ndomokiet? Akpana an̄wan̄a fi nte utọ n̄kpọ emi akafịnade enye! Mme owo ẹdida enye didie? Enye ọkọdọhọ ke idikama “ikpa n̄kukịm” imia mme owo, edi idahaemi-e, enye ikemeke ndinam mbon oro ẹsọn̄de ibuot ye enye n̄kpọ ndomokiet. (Men 2 Chronicle 13:7 domo.) Kpa ye oro, Rehoboam ye mbonekọn̄ esie ẹma “ẹkop uyo Jehovah, ẹnyụn̄ ẹfiak ẹnyọn̄ọ ufọk mmọ.”

Nso ke emi ekpep nnyịn? Ọfọn ikop uyo Jehovah ekpededi oro ayanam mme owo ẹsak nnyịn. Jehovah ayama nnyịn onyụn̄ ọdiọn̄ nnyịn edieke ikopde uyo esie.​—Deut. 28:2.

Ndi Jehovah ama ọdiọn̄ Rehoboam? Rehoboam ama okop uyo Jehovah, ikonyụn̄ ikaha ikan̄wana ye nditọ Israel. Enye ama aka iso akara Judah ye Benjamin onyụn̄ ọbọp mbufa obio do. Enye ama anam ndusụk obio oro “ẹnen̄ede ẹsọn̄ idem.” (2 Chron. 11:​5-12) Ata akpan n̄kpọ edi ke enye ama enịm ibet Jehovah ke ndusụk ini. Ke ini esien Israel duop oro Jeroboam akakarade ẹketọn̄ọde ndikpono nsunsu abasi, ediwak nditọ Israel ẹma “ẹbere ye Rehoboam.” Mmọ ẹma ẹsika Jerusalem ẹketuak ibuot ẹnọ Jehovah. (2 Chron. 11:​16, 17) Omokụt do nte Rehoboam ndikokop uyo Jehovah akanamde ediwak owo ẹda ye enye.

Ke Rehoboam ama okokụt ke ikpat ọsọn̄ imọ ke isọn̄, enye ama anam se owo mîkpekereke. Enye ama ọkpọn̄ Jehovah okokpono nsunsu abasi! Nso ikanam enye anam utọ n̄kpọ oro? Okûdi eka esie emi okotode Ammon akanam? (1 Ndi. 14:21) M̀mê mmọ ẹkenam m̀mê idịghe mmọ ẹkenam, enye ama anam ofụri Judah ẹtiene ẹkpono nsunsu abasi. Oro akanam Jehovah ayak Shishak emi akakarade Egypt akan ediwak obio Judah kpa ye oro Rehoboam ama ọkọbọp ibibene akanade mmọ!​—1 Ndi. 14:​22-24; 2 Chron. 12:​1-4.

Ama ọdiọk enyịn ini Shishak ekedide en̄wan ye Jerusalem emi Rehoboam eketiede akara. Jehovah ama ọdọn̄ prọfet Shemaiah ọkọdọhọ Rehoboam ye mbọn̄ esie ete: “Sese, mbufo ẹmekpọn̄ mi, ndien ami n̄ko mmayak mbufo nsịn Shishak ke ubọk.” Nso ke Rehoboam akanam? Enye ama akabade esịt! Bible ọdọhọ ete: “Mbọn̄ Israel ye edidem ẹsụhọde idem ẹnyụn̄ ẹdọhọ ẹte: ‘Jehovah emenen.’” Jehovah ama anyan̄a Rehoboam ye Jerusalem ke ntak oro.​—2 Chron. 12:​5-7, 12.

Rehoboam ama aka iso akara Judah ke Jehovah ama akanyan̄a enye osio Shishak ke ubọk. Mbemiso enye akakpade, enye ama ọnọ nditọiren esie ediwak enọ. Etie nte enye akanam emi mbak mmọ idinyan̄a ukara ye Abijah. (2 Chron. 11:​21-23) Rehoboam ama ada eti ibuot anam n̄kpọ isan̄ enye emi akan ini enye ọkọtọn̄ọde-tọn̄ọ ndikara.

Kpa ye oro Rehoboam akanamde nti n̄kpọ ifan̄, Bible ọdọhọ ke enye ama “anam se idiọkde.” Ntak-a? Sia enye ikebiereke ‘ke esịt esie ndiyom Jehovah.’ Omokụt do se ikanamde Jehovah okûma enye.​—2 Chron. 12:14.

Nso ke mbụk Rehoboam ekpep nnyịn? Enye ama esikop uyo Jehovah ndusụk ini onyụn̄ anam nti n̄kpọ ifan̄ ọnọ ikọt Jehovah. Edi enye ikenen̄ekede ima Jehovah, ikesinyụn̄ isịnke ukeme ndinam se inemde Jehovah esịt. Ntak edi oro enye akanamde se idiọkde onyụn̄ okponode nsunsu abasi. Edi afo emekeme ndikere: ‘Nso ikanam Rehoboam okop uyo Jehovah? Ndi ekedi ke ntak emi enye ekenen̄erede akabade esịt, okonyụn̄  oyomde ndinam se inemde Jehovah esịt? Mîdịghe, ndi enye akabak mbon en̄wen enyịn?’ (2 Chron. 11:​3, 4; 12:6) Nte ini akakade, enye ama afiak ọtọn̄ọ ndinam se idiọkde. Enye iketiehe nte Edidem David ete ete esie! Imọdiọn̄ọ ke David ama anam ikpọ idiọkn̄kpọ, edi enye ama enen̄ede akabade esịt. Enye ama ama Jehovah ke ofụri esịt esie onyụn̄ aka iso atuak ibuot ọnọ enye ke ofụri eyouwem esie.​—1 Ndi. 14:8; Ps. 51:​1, 17; 63:1.

Enyene se mbụk Rehoboam ekpepde nnyịn. Ọfọn inọ ubon nnyịn se mmọ ẹyomde inyụn̄ isịn idem inam nti n̄kpọ. Edi edieke iyomde Jehovah ama nnyịn, ana ika iso isịn idem inam n̄kpọ esie inyụn̄ ida n̄kpọ esie ke ata akpan n̄kpọ.

Ndinen̄ede mma Jehovah edin̄wam nnyịn isịn idem inam n̄kpọ esie. Kpa nte isidọn̄de ifia ke ikan̄ man ikan̄ aka iso asak, ana isikpep Ikọ Abasi kpukpru ini, itie ikere se ikpepde, isinyụn̄ ikọbọ ke akam man ika iso ima Jehovah. (Ps. 1:2; Rome 12:12) Edieke inen̄erede ima Jehovah, eyesidọn̄ nnyịn ndinam se inemde enye esịt kpukpru ini, iyonyụn̄ inen̄ede ikabade esịt edieke inamde idiọkn̄kpọ. Emi idiyakke nnyịn itie nte Rehoboam, edi iyọsọn̄ọ ida inam n̄kpọ Jehovah.​—Jude 20, 21.