Paul ekewet ete: “N̄kpa ke ntak ibet, ndien emi anam ndu uwem nnọ Abasi.”—Gal. 2:19.

Se Paul ekewetde oro eyịre ye akpan n̄kpọ kiet emi enye okodomode ndinam an̄wan̄a mme esop ke obio Galatia emi mbon Rome ẹkekarade. Ndusụk mme Christian do ẹma ẹnịm nsu emi mme owo ẹkekpepde. Mbon emi ẹkekpepde nsu oro ẹkedọhọ ke owo ekededi emi oyomde Abasi anyan̄a imọ ana anam se Ibet Moses etịn̄de, akpan akpan ndina mbobi. Edi Paul ama ọdiọn̄ọ ke Abasi inịmke aba ibet idọhọ ke ana ikọt Esie ẹna mbobi. Paul ama enen̄ede anam an̄wan̄a nditọete ke mme ukpepn̄kpọ oro ẹdi nsu, onyụn̄ anam mmọ ẹnen̄ede ẹnịm ke Jesus Christ ama edikpa afak mmọ.—Gal. 2:4; 5:2.

Bible ọdọhọ ke owo ama akpa, ke enye idiọn̄ọke n̄kpọ ndomokiet, se ẹnanam ifịnake enye aba. (Eccl. 9:5) Ini Paul ọkọdọhọde: “N̄kpa ke ntak ibet,” ikọ esie ọkọwọrọ ke Ibet Moses ibọpke imọ aba. Paul ama enen̄ede enịm ke imọ ndibuọt idem ke n̄kpa emi Christ akakpade afak imọ anam imọ itọn̄ọ ‘ndidu uwem nnọ Abasi.’

“Ibet” akan̄wam Paul ọtọn̄ọ ‘ndidu uwem nnọ Abasi.’ Akan̄wam didie? Paul ama etetịn̄ ke “ẹbat owo ke edinen, itoho ke mme utom ibet, edi oto ke ndibuọt idem ke Christ Jesus ikpọn̄-ikpọn̄.” (Gal. 2:16) Enyene akpan ufọn emi Ibet akanamde. Enye ke Paul ọkọdọhọ mbon Galatia ete: “Ẹkeda enye ẹdidian man anam ubiatibet ayarade, tutu mfri emi ẹken̄wọn̄ọde un̄wọn̄ọ ẹnọ edisịm.” (Gal. 3:19) Ibet oro ama anam ẹkụt ke inyeneke nte owo emi mîfọnke ima ekemede ndinịm Ibet oro, isụk iduehe n̄kpọ ndomokiet, ke mmọ ẹma ẹnyụn̄ ẹyom mfọnmma uwa emi edide ẹma ẹwa inikiet ke ibuot mmọ, owo iwaha aba. Ntre Ibet oro ama an̄wam mme owo ẹkụt ke Jesus edi “mfri” oro. Ke ini owo ọbuọtde idem ke Jesus Christ ke Abasi edibat enye ke edinen owo. (Gal. 3:24) Abasi ama abat Paul ke edinen sia Ibet ama an̄wam enye yak edidiọn̄ọ Jesus Christ onyụn̄ ọbuọt idem ye enye. Nte Paul akasan̄ade ‘akpa ke ntak ibet’ onyụn̄ ọtọn̄ọde ‘ndidu uwem nnọ Abasi’ ekedi oro. Ọwọrọ Paul ikenyeneke n̄kpọ ndinam aba ye Ibet Moses, enye eketiene se Abasi etịn̄de.

Mbiet n̄kpọ oro ke Paul eketịn̄ ke leta emi enye ekewetde ọnọ nditọete ke Rome. Enye ọkọdọhọ ete: “Nditọete mi, ẹkeda idem Christ ẹnam mbufo n̄ko ẹkpan̄a ẹwọn̄ọ ke idak Ibet . . . Ke emi ẹnam nnyịn ibọhọ Ibet, koro nnyịn ikakpade ke se ikọsọn̄ọde imụm nnyịn ikama.” (Rome 7:4, 6) Itien̄wed emi ye Galatia 2:19 ẹwụt ke Paul iketịn̄ke iban̄a ndikpa nte owo emi abiatde Ibet Moses. Enye eketịn̄ aban̄a owo ndiwọrọ ke ufụn Ibet oro. Ibet Moses ikọbọpke Paul ye mme Christian eken aba sia mmọ ẹma ẹbuọt idem ke n̄kpa emi Jesus akakpade afak mmọ.