N̄KOKPON ke Graz, ke Austria. Ini n̄kedide isua itiaba, ẹma ẹmen mi ẹkesịn ke ufọkn̄wed praimari. Ẹma ẹsikpep nditọwọn̄ ke ufọkn̄wed oro nte mmọ ẹkpedide nun. Edi orụk use oro n̄kokụtde mme oku ye mme nun ẹnamde ama odoro owo ndidien. Eka mi ikayakke n̄ka n̄wed do nsịm isua kiet.

Ekem, mma ndika ufọkn̄wed emi ẹsidụn̄de-dụn̄. Okoneyo usen kiet, ete mi ama edimen mi aka obio Schladming sia ẹma ẹduọn̄ọ bọmb ke Graz ntịme ntịme. M̀mê imebebe ebọp idụk Schladming m̀mê nnyịn ibehe, ẹma ẹtop bọmb ẹwụri ebọp oro. Isan̄ en̄wen, ẹma ẹsịne ke ubomofụm emi ekekperede isọn̄ ẹtop mi ye eka eka mi ke okụre nnyịn. Ke ekọn̄ oro ama okokụre, eketie nte ukara ye ufọkabasi ẹkpu nnyịn.

Ke 1950, Ntiense Jehovah kiet ama ọtọn̄ọ ndisikpep eka mi Bible. Mma nsikpan̄ utọn̄ n̄kop se enye ekpepde eka mi, nsinyụn̄ ntiene eka mi ndụk mbono esop ndusụk ini. Eka mi ama edikụt ke Mme Ntiense Jehovah ẹkpep akpanikọ. Ntre enye ama ana baptism ke 1952.

Ini oro, eketie mi nte esop oro odude ke obio nnyịn edi n̄ka n̄kani iban. Edi usen kiet, ima ika esop oro ediwak uyen ẹkedude, esop enye oro iketiehe nte n̄ka n̄kani iban. Ke ini ikọnyọn̄de idi Graz, mma ntọn̄ọ ndidụk kpukpru mbono esop. Ikebịghike, mma n̄kụt n̄ko ke se n̄kekpepde edi akpanikọ. Mma ndifiọk ke Jehovah edi Abasi emi esin̄wamde ikọt esie kpukpru ini. Enye esin̄wam nnyịn idem ke ini etiede nte mfịna nnyịn okpon akan nnyịn, ke inyụn̄ idụhe eke ekemede ndin̄wam nnyịn.​—Ps. 3:​5, 6.

Ama ọdọn̄ mi ndinam mbon en̄wen ẹfiọk se n̄kpepde. Ntre mma ntọn̄ọ ndikwọrọ ikọ nnọ nditọeka mi. Nditọeka mi iban inan̄ oro  ẹkesọn̄ọde mi ẹma ẹkpọn̄ ufọk ẹkekpep n̄wed. Mma n̄ka nsio nsio obio oro mmọ ẹkekpepde n̄wed n̄kọdọhọ mmọ ẹkpep Bible. Nte ini akakade, kpukpru nditọeka mi ẹma ẹkpep Bible ẹnyụn̄ ẹdidi Mme Ntiense Jehovah.

Ke ọyọhọ urua iba oro n̄kọkwọrọde ikọ ke ufọk ke ufọk, mma n̄kụt eyenan̄wan kiet nnyụn̄ ntọn̄ọ ndikpep enye Bible. Enye ama ebe isua 30. Mma n̄kpep enye n̄kpọ tutu enye ana baptism. Ekem ebe esie ye nditọiren mmọ iba ẹma ẹna baptism n̄ko. Nte n̄kekpepde enye n̄kpọ, ntre ke n̄ketetịm mbuọt idem ye Abasi. Ntak emi ndọhọde ntre? Akanam Ntiense Jehovah ndomokiet ikekpepke mi Bible. Ntre mma nsinen̄ede mben̄e idem mbemiso n̄kade n̄kekpep eyenan̄wan oro n̄kpọ. N̄kanam ntre man n̄kpep idem mi nnyụn̄ n̄keme ndikpep enye! Oro ama anam Ikọ Abasi enen̄ede an̄wan̄a mi. Mma nna baptism ke April 1954.

Ke 1955, mma ndụk mbono ofụri ererimbot ke Germany, France, ye England. Mma n̄kụt Brọda Albert Schroeder ke London, ke England. Enye ekedi andikpep ke Ufọkn̄wed Gilead. Enye ama edidi owo Otu Emi Ẹsede Ẹban̄a Utom Nnyịn. Ke ini ikakade ikese British Museum, Brọda Schroeder ama owụt nnyịn ndusụk ikpan̄wed Bible. Ẹma ẹwet enyịn̄ Abasi ke abisi usem Hebrew ke mme ikpan̄wed oro. Enye ama onyụn̄ etịn̄ nte mme ikpan̄wed oro ẹnyenede ufọn. Oro ama anam mi ntetịm mma Jehovah ye akpanikọ oro n̄kpepde. Mma nnen̄ede mbiere ndinam ata ediwak owo ẹdifiọk se Bible ekpepde.

N̄kọtọn̄ọ usiakusụn̄ ofụri ini ke January 1, 1956. Ke ọfiọn̄ inan̄ ebede, ẹma ẹmek mi akpan asiakusụn̄. Ẹkenọ mi n̄ka obio Mistelbach, ke Austria. Ntiense Jehovah ndomokiet ikodụhe do. Enyene se ikpakadade mfịna idi. Ami ye nsan̄a mi ikama n̄kpọ nsio nsio. Enye ekedi isua 25, edi akayak ekpri ami ndisịm isua 19. N̄koto akwa obio ndi, enye oto obio-in̄wan̄. N̄kesibakke ndemede, edi enye ama esibak edemede. N̄kesibakke ndụk idap, edi enye ama esibak odụk idap. Item Bible ama an̄wam nnyịn ikûyak mme n̄kpọ oro anam nnyịn itọhọ. Ama enem nnyịn ndisan̄a ntre n̄kwọrọ ikọ.

Nsio nsio n̄kpọ ama etịbe oro akpakanamde ukwọrọikọ odorode nnyịn. Ẹma ẹkam ẹkọbọ nnyịn, edi Jehovah ‘ikọkpọn̄ke nnyịn.’ (2 Cor. 4:​7-9) Isan̄ kiet, ke ini ikosụk ikwọrọde ikọ ke obio-in̄wan̄ kiet, mme owo ẹma ẹkpọhọde ebua mmọ ẹyak. Ikpọ ebua ẹma ẹkpọi ẹfehe ẹbịne nnyịn, ye ikpọ edet. Ima imụm kiet eken ubọk, mma nnyụn̄ mbọn̄ akam nte: “Jehovah mbọk, mmọ ẹma ẹdom nnyịn, yak isọp ikpa!” Ke ini ekedide se nnyịn mi se mmọ mi, mmọ ẹma ẹtuak ẹda ẹnyen̄e isịm, ekem ẹwọn̄ọde iso ẹdaha. Ima ifiọk ke Jehovah ekekpeme nnyịn oro. Ima ika iso ikwọrọ ikọ ke ofụri obio oro. Ama enem nnyịn nte mbon obio oro ẹkekpan̄de utọn̄. Nso ikanam mmọ ẹkpan̄ utọn̄? Ekeme ndidi idem ama akpa mmọ nte ebua mmọ mîkodomke nnyịn, mîdịghe, edi mmọ ẹkema nte edide mmọ ẹnam nnyịn utọ n̄kpọ oro edi nnyịn itreke ndikwọrọ ikọ. Ndusụk mmọ ẹma ẹdidi Mme Ntiense Jehovah.

 N̄kpọ en̄wen ama anam idem enyek nnyịn. Ke ini ete enyene-ufọk oro ikodụn̄de ọkọnyọn̄de n̄kpọ edi usen kiet, enye ama ọdọhọ ke enyịn mmịn ke imọn̄ iwot nnyịn, ke nnyịn isan̄a isịn ntịme ke obio. N̄wan esie ama odomo ndisụk enye esịt, edi ọkọduọn̄ọ inụn̄ ke nsia ebiọn̄. Ubet nnyịn okodu ke enyọn̄. Do ke ikesịne ikop ofụri editịm oro. Ima isọsọp itan̄ n̄kpọitie ifiọk usụn̄ inyụn̄ itọn̄ọ nditan̄ n̄kpọ nnyịn ndọn̄ ke ekpat. Ke ini ikebererede usụn̄, ima ikụt enye akamade ofụt ada ke itie oro ẹsisan̄ade ẹdọk ẹdi ubet nnyịn. Ima itan̄ ekpat nnyịn isan̄a usụn̄ en̄wen ifehe iwọrọ. Nnyịn ikafiakke ika do aba. Ikasan̄a usụn̄ in̄wan̄ iwọrọ ke obio oro.

Ima ikọbọ ubet kiet ke ufọkisen idụn̄. Ima idụn̄ do ikpere isua kiet. Itie oro ama ọfọn ye ukwọrọikọ tutu. Nso ikanam ọfọn? Ufọkisen oro okodu ke ufọt obio, ndusụk nditọ ukpepn̄kpọ nnyịn ẹma ẹsiyom ndidi do ndikpep n̄kpọ. Ikebịghike, ima isinịm ukpepn̄kpọ n̄wed esop ye Ukpepn̄kpọ Enyọn̄-Ukpeme ke ubet nnyịn. N̄kpọ nte owo 15 ẹkesidụk.

Ima idụn̄ ke Mistelbach ikan isua kiet. Ekem ẹma ẹnọ mi n̄ka Feldbach; enye odu ke usụk usụk edem usiahautịn Graz. N̄kodu do ye asiakusụn̄ en̄wen. Edi esop ndomokiet ikodụhe do. Ikodụn̄ ke ekpri ubet kiet ke ufọkenyọn̄ emi ẹdade eto ẹbọp; ubet nnyịn okodu ke ọyọhọ enyọn̄ iba. Ofụm ama esito mme ufan̄ eto oro efri nnyịn, ntre ima iwak n̄kani n̄wedmbụk n̄kpọntịbe isịri mme ufan̄ oro. Ikesikoi mmọn̄ ke obube mmọn̄ ida inam n̄kpọ. Kpa ye oro mîkememke inọ nnyịn, Abasi ama ọdiọn̄ nnyịn. Ẹma ẹsiak otu kiet do ke ufan̄ ọfiọn̄ ifan̄. Nte ini akakade, n̄kpọ nte owo 30 ke ubon kiet oro ikekpepde n̄kpọ ẹma ẹdidụk esop!

Kpukpru emi anam ntetịm mma Jehovah sia enye isitreke ndin̄wam mbon oro ẹsịnde idem ẹnam n̄kpọ esie. Ekpededi mme owo ikemeke ndin̄wam nnyịn, Jehovah do ye nnyịn.​—Ps. 121:​1-3.

Ke 1958, ẹma ẹduak ndinịm akamba mbono ofụri ererimbot ke Yankee Stadium, ke New York City, ye ke Polo Grounds. Mma ndọhọ n̄kọk itieutom ke Austria ke mmọn̄ ntiene n̄ka. Mmọ ẹma ẹbụp mi m̀mê n̄kpama nditiene n̄ka Ufọkn̄wed Gilead, ọyọhọ klas 32. N̄kakam ntetie mbet! Mma nsọsọp mbọrọ ke nyaka.

 N̄ketie n̄kpere Brọda Martin Poetzinger ke Ufọkn̄wed Gilead. Enye ama ọbọ ufen etieti ke nsio nsio ufọk-n̄kpọkọbi mbon Nazi. Enye ama edidi owo Otu Emi Ẹsede Ẹban̄a Utom Nnyịn. Ke ini ẹsụk ẹkpepde n̄kpọ, enye ama esisịn mi inua ke utọn̄ ete, “Erika, ẹsitịn̄ didie enye emi ke German?”

Ke ima ikekpep n̄kpọ ibe ọfiọn̄ iba, Brọda Nathan Knorr ama asiak obio oro ẹdinọde nnyịn ika. Ẹkenọ mi n̄ka Paraguay. Edi akana ete mi esịn ubọk ke n̄wed ke imenyịme n̄ka sia n̄kokponke n̄kem. Ke ete mi ama ekenyịme, mma n̄kesịm Paraguay ke March 1959. Ẹkedọhọ n̄kodụn̄ ke ufọkidụn̄ isụn̄utom ke Asunción. N̄kodụn̄ ye Sista en̄wen.

Ikebịghike, mma n̄kụt Brọda Walter Bright. Enye ekedi isụn̄utom, okonyụn̄ odu ke ọyọhọ klas 30 ke Ufọkn̄wed Gilead. Nte ini akakade, ima idọ ndọ inyụn̄ idiana kiet iyọ mfịna uwem. Ima isikot Isaiah 41:10 ini ekededi oro inyenede mfịna oro anamde ibuot oyon nnyịn. Itien̄wed oro ọdọhọ ete: “Kûkop ndịk, koro ami ndude ye afo. Kûsuan enyịn, koro ami ndide Abasi fo. Ami nyọsọn̄ọ fi idem.” Itien̄wed emi ama esisọn̄ọ nnyịn idem onyụn̄ anam ikụt ke Jehovah ididehedei ikpu nnyịn edieke ikade iso inam n̄kpọ esie inyụn̄ ibemde iso iyom Obio Ubọn̄ esie.

Ekem ẹma ẹnọ nnyịn ika obio kiet emi ekperede adan̄a Brazil. Akwa owo ufọkabasi ama ọdọn̄ n̄kparawa ẹtomo ikpọ itiat ẹtọn̄ọ ufọkidụn̄ isụn̄utom oro ikodụn̄de, idịghe nte idem ufọk ọkọsọsọn̄ idem. Ebe mi ama ọtọn̄ọ ndikpep Bible ye akamba owo bodisi kiet do. Akamba owo bodisi oro ama anam mme bodisi ẹda ẹkpere ufọk nnyịn ke urua kiet. Mbon ntịme oro ikafịnake nnyịn aba. Esisịt ini ke oro ebede, ẹma ẹdọhọ iwọrọ ikodụn̄ ke ufọk oro ọkọfọnde akan enye oro ikodụn̄de. Ufọk oro okodu ke n̄kan̄ Brazil. Oro ama anam ikeme ndinịm mbono esop ke Paraguay ye ke Brazil. Ẹma ẹsiak n̄kpri esop iba mbemiso ikọkpọn̄de do.

Mme dọkta oro ẹsisọbọde mi idem ẹkedọhọ ke ndimanke eyen. Edi ke 1962, idem ama akpa mi ini n̄kọfiọkde ke mmoyomo. Ima ikodụn̄ ikpere ubon mme ebe mi ke Hollywood, ke Florida. Nnyịn ikekemeke ndisiak usụn̄ ke ediwak isua ke ntak oro ikesede iban̄a ubon nnyịn. Kpa ye oro, nnyịn ikadaha n̄kpọ Abasi ibre mbre.​—Matt. 6:33.

Ke ini ikọwọrọde ikodụn̄ ke Florida ke November 1962, idem ama akpa nnyịn ndikụt ke mbon Florida ikamaha mbubịt ye mfia nditọete ẹdụk mbono esop ọtọkiet m̀mê ẹkwọrọ ikọ ke ukem itie. Edi sia Jehovah mîsisarike owo ndomokiet, ikebịghike mbubịt ye mfia nditọete ẹma ẹfiak ẹdiana kiet ẹnam n̄kpọ esie. Ima ikụt ubọk Jehovah ke n̄kpọ oro. Ediwak esop ẹdu do idahaemi.

Kansa mfre ama owot ebe mi ke 2015. Ama enem mi ndidu ye enye ke ofụri isua 55 oro ikọdọde ndọ. Enye ama ama Jehovah onyụn̄ an̄wam ediwak nditọete. Ntie mbet ini oro Jehovah edinamde enye eset.​—Utom 24:15.

Esịt enem mi ndidu ke utom uyọhọ ini mbe isua 40. Jehovah enen̄ede ọdiọn̄ mi. Ke uwụtn̄kpọ, owo 136 ke otu mbon oro ikekpepde Bible ẹma ẹna baptism; ima isidu ini emi owo mmọ kiet kiet anade. N̄kpọ ama esisọn̄ ye nnyịn ndusụk ini. Edi nnyịn ikayakke oro anam nnyịn itre ndinam n̄kpọ Jehovah. Utu ke oro, ima isinen̄ede ikpere enye, inyụn̄ inịm ke enye eyenen̄ede n̄kpọ obon ke ini esie. Enye esinyụn̄ anam ntre!​—2 Tim. 4:​16, 17.

N̄kpa ebe mi esibiak mi etieti, edi utom usiakusụn̄ esidọn̄ mi esịt. Ndikpep mme owo Bible an̄wam mi tutu. Mmesikam n̄kpep mme owo ke Abasi ayanam mme akpan̄kpa ẹset. Inua ikemeke ndibụk nte Jehovah an̄wamde mi. Akananam enye ikpụhu mi. Enye ọsọn̄ọ mi idem, an̄wam mi, onyụn̄ ada “ubọk nnasia edinen ido” esie omụm mi akama nte enye ọkọn̄wọn̄ọde.​—Isa. 41:10.