Idụhe owo ndomokiet emi ekemede ndinen̄ede mfiọk nte Paul eketiede. Isinyụn̄ idọdrọ enye; nnyịn idaha ndise esie ito se ikụtde ke mme n̄kpọeset ndomokiet emi ẹdọkde ẹsion̄o ke isọn̄.

Edi imokụt ndusụk se mme owo ẹwetde ẹban̄a nte Paul eketiede. Kiet ke otu mmọ edi n̄wed oro ẹkotde Acts of Paul and Thecla. Zion’s Watch Tower March 1, 1902, ama ewet se ẹtịn̄de ke n̄wed oro ẹban̄a nte Paul eketiede. N̄wed oro ọdọhọ ke Paul ikọniọn̄ke, ke enye ama ọkwọhọ ibọ, enyene anyan ọkpọ ibuo, atuak n̄kat, ọdọn̄ọ idem, ntan̄enyịn esie n̄kan̄ mbiba ama onyụn̄ ọkọri ediyịre kiet. Zion’s Watch Tower oro ọkọdọhọ ke otu kpukpru se ẹwetde ẹban̄a nte Paul eketiede, ke etie nte enye emi enen akan, ke ediwak owo ẹkenyụn̄ ẹnịm ke Paul eketie ntre. Ẹkewet n̄wed emi ke n̄kpọ nte isua 150 ke Christ ama akamana.

The Oxford Dictionary of the Christian Church (eke 1997) ọdọhọ ke enen̄ede etie nte se The Acts of Paul and Thecla etịn̄de aban̄a nte Paul eketiede enen. Ata ediwak isua ke ẹma ẹkewet n̄wed oro, mme owo ẹkesụk ẹkpokpono n̄wed oro. Ntak idọhọde ntre? Sia ẹma ẹwet n̄wed emi ke nsio nsio ikpan̄wed 80 ke usem Greek, ẹma ẹnyụn̄ ẹkabade enye ẹdọn̄ ke nsio nsio usem. Ntre, nte idrọde Paul ke n̄wed nnyịn onyụn̄ etie nte se ndusụk n̄wed mbụkeset ẹtịn̄de ẹban̄a nte enye eketiede.

Edi kûfre ke enyene se ikam idide akpan n̄kpọ ikan nte Paul eketiede. Ke ini Paul ọkọkwọrọde ikọ, ndusụk mbon oro mîkamaha enye ẹkedọhọ ke enye ‘edi mmemmem ini enye odude ye mmimọ, ke ikọ esie inyụn̄ iwọrọke n̄kpọ.’ (2 Cor. 10:10) Kûfre n̄ko ke utịben̄kpọ emi Jesus akanamde akanam Paul edidi mbet esie. N̄kọ omonyụn̄ eti ke Jesus ekemek Paul ete ‘ada enyịn̄ imọ aka iso mme idụt.’ Paul ama onyụn̄ esịn idem anam oro. (Utom 9:​3-5, 15; 22:​6-8) Imonyụn̄ ikpep ediwak n̄kpọ ke mme n̄wed Bible emi Jehovah ọkọnọde Paul spirit esie ada ewet.

Paul ikọwọkke inua iban̄a se enye ekesinamde mbemiso enye ekedide mbet Christ, ikonyụn̄ itịn̄ke nte imọ itiede. (Utom 26:​4, 5; Phil. 3:​4-6) Enye ọkọdọhọ ete: “Ami n̄kpri n̄kan ke otu mme apostle, nnyụn̄ ndotke se ẹkotde apostle.” (1 Cor. 15:⁠9) Enye ama afiak ewet ete: “Ami, emi nsụhọrede n̄kan owo emi ekpride akan ke otu ndisana owo, ke ẹkewụt mfọnido oro owo mîdotke, man n̄kpatan̄a eti mbụk emi aban̄ade inyene Christ oro ayan̄ade owo ifiọk, nnọ mme idụt.” (Eph. 3:⁠8) Eti mbụk oro Paul ọkọkwọrọde mi akam edi akpan n̄kpọ akan nte enye eketiede.