Nditọ Levi emi mîkedịghe mme oku ẹma ẹnyene ediwak utom emi mmọ ẹkesinamde, esịnede utom emi ebietde utom bodisi. Etubom temple ekedi adausụn̄ ke utom emi. Philo eyen Jew emi ekedide ewet mbụkeset ekewet ntem aban̄a utom mme bodisi temple: ‘Ndusụk nditọ Levi emi ẹsikpeme mme inuaotop emi mme owo ẹbede ẹdụk temple, ndusụk ẹda ke iso edisana ebiet. Mmọ ẹsikụt ẹte ke owo ndomokiet emi mînyeneke unen ndidụk do itọhọ ikpat do, ekpededi ke ndudue. Ẹbahade mmọ ẹdọn̄ ke ikpehe ke ikpehe. Ndusụk ẹsisan̄a ẹkanade n̄kan̄ emi temple odude uwemeyo, ndusụk ẹsan̄a ẹkanade okoneyo.’

Mbon Sanhedrin ẹma ẹsidọn̄ mme bodisi temple emi utom. Mme bodisi oro ẹkedi n̄kukụre n̄ka mme Jew emi mbon Rome ẹkenyịmede ẹsikama n̄kpọ en̄wan.

Ataifiọk kiet emi ekerede Joachim Jeremias ọkọdọhọ ete ke ‘ini ẹkedide ndimụm Jesus, ke enye ama obụp mbon emi ẹkedide ndimụm enye m̀mê nso inam mmọ mîkomụmke imọ ini imọ ikesikpepde n̄kpọ ke Temple ke usen ke usen. (Matt. 26:55) Jesus ikpokobụpke mmọ mbụme emi ekpedi mmọ ikedịghe mme bodisi temple.’ Ataifiọk oro enịm ke kpa mme bodisi temple ke ẹkedọn̄ ẹkemụm Jesus mbemiso isan̄ enye emi. (John 7:32, 45, 46) Mme bodisi temple oro ye etubom mmọ ke ẹkedọn̄ ẹkemen mbet Jesus ẹdi iso Sanhedrin, onyụn̄ etie nte mmọ ẹketiene ẹdụri apostle Paul ẹsio ke temple.—Utom 4:1-3; 5:17-27; 21:27-30.